“ຄວາມຄິດທີ່ໃຫ້ເກັບໄວ້ໃນໃຈ: ເຊື້ອສາຍອິດສະຣາເອນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ຄວາມຄິດທີ່ໃຫ້ເກັບໄວ້ໃນໃຈ: ເຊື້ອສາຍອິດສະຣາເອນ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ຄວາມຄິດທີ່ໃຫ້ເກັບໄວ້ໃນໃຈ
ເຊື້ອສາຍອິດສະຣາເອນ
ໃນບາງບ່ອນຢູ່ໃນຖິ່ນແຫ້ງແລ້ງກັນດານ ທາງທິດຕາເວັນອອກຂອງດິນແດນການາອານ, ຢາໂຄບໄດ້ລໍຖ້າພົບກັບ ເອຊາວ ອ້າຍແຝດຂອງເພິ່ນດ້ວຍຄວາມກັງວົນ. ເທື່ອສຸດທ້າຍທີ່ຢາໂຄບໄດ້ເຫັນເອຊາວ, ປະມານ 20 ປີກ່ອນ, ເອຊາວໄດ້ເວົ້າຂູ່ວ່າຊິຂ້າເພິ່ນ. ຢາໂຄບນອນບໍ່ຫລັບທັງຄືນຢູ່ໃນຖິ່ນແຫ້ງແລ້ງກັນດານ, ສະແຫວງຫາພອນຈາກພຣະເຈົ້າ. ດ້ວຍສັດທາ, ດ້ວຍຄວາມມານະອົດທົນ, ແລະ ດ້ວຍຄວາມຕັ້ງໃຈຂອງຢາໂຄບ, ພຣະເຈົ້າຈຶ່ງໄດ້ຕອບຄຳອະທິຖານຂອງເພິ່ນ. ຄືນນັ້ນຊື່ຂອງຢາໂຄບໄດ້ຖືກປ່ຽນເປັນອິດສະຣາເອນ, ຊຶ່ງມີຄວາມໝາຍວ່າ “ເພິ່ນໄດ້ຕໍ່ສູ້ກັບພຣະເຈົ້າ” (ປະຖົມມະການ 32:28, ໝາຍເຫດຢູ່ທາງລຸ່ມໜ້າປຶ້ມ ຂ; ເບິ່ງ ປະຖົມມະການ 32:24–32 ນຳອີກ).1
ຢູ່ໃກ້ແມ່ນ້ຳຢັບໂບກ, ຢາໂຄບໄດ້ຮັບຊື່ ອິດສະຣາເອນ.
ນີ້ເປັນເທື່ອທຳອິດທີ່ຊື່ ອິດສະຣາເອນ ປະກົດຢູ່ໃນພຣະຄຣິສຕະທຳຄຳພີ, ແລະ ມັນເປັນຊື່ທີ່ຕໍ່ສູ້ຕະຫລອດທົ່ວພຣະຄຳພີ ແລະ ຕະຫລອດທົ່ວປະຫວັດສາດ. ບໍ່ດົນຊື່ນີ້ໄດ້ຖືກອ້າງເຖິງຫລາຍກວ່າພຽງແຕ່ກັບຊາຍຄົນດຽວ. ອິດສະຣາເອນມີລູກຊາຍ 12 ຄົນ, ແລະ ລູກຫລານຂອງເຂົາເຈົ້າທັງໝົດເປັນທີ່ຮູ້ຈັກກັນວ່າ “ເຊື້ອສາຍອິດສະຣາເອນ,” ເປັນ “ເຜົ່າອິດສະຣາເອນ,” ເປັນ “ລູກຫລານຂອງອິດສະຣາເອນ,” ຫລື “ຊາວອິດສະຣາເອນ.”
ຕະຫລອດທົ່ວປະຫວັດສາດ, ລູກຫລານຂອງອິດສະຣາເອນຮູ້ສຶກວ່າ ມັນເປັນສິ່ງສຳຄັນທີ່ເຂົາເຈົ້າເປັນຜູ້ສືບເຊື້ອສາຍຈາກໜຶ່ງໃນສິບສອງເຜົ່າຂອງອິດສະຣາເອນ. ເຊື້ອສາຍຂອງເຂົາເຈົ້າເປັນພາກສ່ວນທີ່ສຳຄັນຂອງເອກະລັກແຫ່ງພັນທະສັນຍາຂອງເຂົາເຈົ້າ. ອັກຄະສາວົກໂປໂລໄດ້ປະກາດວ່າ ເພິ່ນມາຈາກ “ເຜົ່າເບັນຢາມິນ” (ໂຣມ 11:1). ເມື່ອລີໄຮສົ່ງພວກລູກຊາຍຂອງເພິ່ນໄປເຢຣູຊາເລັມ ເພື່ອໄປເອົາແຜ່ນຈາລຶກທອງເຫລືອງ, ເຫດຜົນໜຶ່ງແມ່ນວ່າ ແຜ່ນຈາລຶກນັ້ນບັນຈຸ “ລຳດັບການສືບເຊື້ອສາຍຂອງບັນພະບຸລຸດຂອງເພິ່ນ” (1 ນີໄຟ 5:14; ເບິ່ງ 1 ນີໄຟ 3:3 ນຳອີກ). ລີໄຮໄດ້ພົບເຫັນວ່າ ເພິ່ນເປັນເຊື້ອສາຍຂອງໂຢເຊັບ, ແລະ ການທີ່ລູກຫລານຂອງເພິ່ນເຂົ້າໃຈເຖິງຄວາມຜູກພັນກັບເຊື້ອສາຍອິດສະຣາເອນ ພິສູດໃຫ້ເຫັນເຖິງຄວາມສຳຄັນຕໍ່ພວກເຂົາ ຫລາຍປີຕໍ່ຈາກນັ້ນ (ເບິ່ງ ແອວມາ 26:36; 3 ນີໄຟ 20:25).
ໃນສາດສະໜາຈັກທຸກວັນນີ້, ທ່ານອາດໄດ້ຍິນກ່ຽວກັບອິດສະຣາເອນ ໃນຄຳທີ່ວ່າ “ການເຕົ້າໂຮມອິດສະຣາເອນ.” ເຮົາຮ້ອງເພງກ່ຽວກັບ “ພຣະຜູ້ໄຖ່ແຫ່ງອິດສະຣາເອນ,” ເພງ “Hope of Israel,” ແລະ ເພງ “Ye Elders of Israel.”2 ໃນກໍລະນີເຫລົ່ານີ້, ເຮົາບໍ່ໄດ້ເວົ້າ ຫລື ຮ້ອງພຽງແຕ່ກ່ຽວກັບອານາຈັກບູຮານຂອງອິດສະຣາເອນ ຫລື ປະຊາຊາດໃນສະໄໝໃໝ່ທີ່ເອີ້ນວ່າອິດສະຣາເອນເທົ່ານັ້ນ. ແຕ່, ເຮົາອ້າງເຖິງຜູ້ທີ່ກຳລັງຖືກເຕົ້າໂຮມຈາກປະຊາຊາດຕ່າງໆໃນໂລກ ເຂົ້າມາໃນສາດສະໜາຈັກຂອງພຣະເຢຊູຄຣິດ. ເຮົາອ້າງເຖິງຜູ້ຄົນທີ່ຕໍ່ສູ້ກັບພຣະເຈົ້າ, ຜູ້ສະແຫວງຫາພອນຈາກພຣະອົງຢ່າງພາກພຽນ, ແລະ ຜູ້ທີ່, ຜ່ານທາງການບັບຕິສະມາ, ໄດ້ກາຍເປັນຜູ້ຄົນແຫ່ງພັນທະສັນຍາຂອງພຣະອົງ.
ປິຕຸພອນຂອງທ່ານປະກາດເຖິງຄວາມຜູກພັນຂອງທ່ານກັບເຜົ່າໜຶ່ງຂອງເຊື້ອສາຍອິດສະຣາເອນ. ສິ່ງນັ້ນມີຄວາມໝາຍຫລາຍກວ່າການເປັນພຽງແຕ່ຂໍ້ມູນປະຫວັດຄອບຄົວທີ່ໜ້າສົນໃຈເທົ່ານັ້ນ. ການເປັນພາກສ່ວນໃນເຊື້ອສາຍອິດສະຣາເອນ ໝາຍຄວາມວ່າທ່ານມີຄວາມສຳພັນທາງພັນທະສັນຍາກັບພຣະບິດາເທິງສະຫວັນ ແລະ ພຣະເຢຊູຄຣິດ. ມັນໝາຍຄວາມວ່າທ່ານ, ຄືກັນກັບອັບຣາຮາມ, ມີເຈດຕະຈາທີ່ຈະ “ເປັນພອນ” ໃຫ້ແກ່ລູກໆຂອງພຣະເຈົ້າ (ປະຖົມມະການ 12:2; ອັບຣາຮາມ 2:9–11). ໃນຖ້ອຍຄຳຂອງເປໂຕ, ມັນໝາຍຄວາມວ່າ “ຝ່າຍເຈົ້າທັງຫລາຍເປັນຊາດທີ່ພຣະເຈົ້າເລືອກໄວ້ແລ້ວ ເປັນປະໂລຫິດຫລວງ, ເປັນປະຊາຊາດບໍລິສຸດ, ເປັນພົນລະເມືອງຂອງພຣະເຈົ້າ; ເພື່ອເຈົ້າທັງຫລາຍຈະໄດ້ປະກາດພຣະບາລະມີຂອງພຣະອົງ ຜູ້ໄດ້ເອີ້ນພວກເຈົ້າໃຫ້ອອກມາຈາກຄວາມມືດ ເຂົ້າໄປສູ່ຄວາມສະຫວ່າງອັນມະຫັດສະຈັນຂອງພຣະອົງ” (1 ເປໂຕ 2:9). ມັນໝາຍຄວາມວ່າ ທ່ານ ເປັນຄົນໜຶ່ງທີ່ “ຕໍ່ສູ້ກັບພຣະເຈົ້າ” ຂະນະທີ່ທ່ານໃຫ້ກຽດແກ່ພັນທະສັນຍາຂອງທ່ານທີ່ໄດ້ເຮັດໄວ້ກັບພຣະອົງ.
ຮູບພາບຕົ້ນຕະກຸນຂອງຢາໂຄບ, ໂດຍ ຄີທ໌ ແອວ ບີເວີສ໌