“ວັນທີ 21–27 ເດືອນມີນາ. ອົບພະຍົບ 1–6: ‘ເຮົາຈົດຈຳພັນທະສັນຍາຂອງເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 21–27 ເດືອນມີນາ. ອົບພະຍົບ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
Moses and the Burning Bush [ໂມເຊ ແລະ ໄຟຢູ່ໃນກາງພຸ່ມໄມ້], ໂດຍ ແຮຣີ ແອນເດີສັນ
ວັນທີ 21–27 ເດືອນມີນາ
ອົບພະຍົບ 1–6
“ເຮົາຈົດຈຳພັນທະສັນຍາຂອງເຮົາ”
ໃຫ້ເລີ່ມຕົ້ນການສຶກສາຂອງທ່ານດ້ວຍການອະທິຖານ, ແລະ ໃຫ້ທູນຂໍຄວາມຊ່ວຍເຫລືອ ເພື່ອຈະໄດ້ພົບເຫັນຂ່າວສານຢູ່ໃນ ອົບພະຍົບ 1–6 ທີ່ກ່ຽວຂ້ອງກັບຊີວິດ ແລະ ການຮັບໃຊ້ຂອງທ່ານໃນອານາຈັກຂອງພຣະເຈົ້າ.
ບັນທຶກຄວາມປະທັບໃຈຂອງທ່ານ
ການເຊື້ອເຊີນໃຫ້ໄປອາໄສຢູ່ປະເທດເອຢິບ ໄດ້ຊ່ວຍໂຜດຊີວິດຄອບຄົວຂອງຢາໂຄບ. ແຕ່ຫລັງຈາກຫລາຍຮ້ອຍປີ, ເຊື້ອສາຍຂອງເຂົາເຈົ້າໄດ້ກາຍເປັນຂ້າທາດ ແລະ ຖືກຂູ່ເຂັນໂດຍຟາຣາໂອອົງໃໝ່ “ຜູ້ບໍ່ຮູ້ເລື່ອງຫຍັງກ່ຽວກັບໂຢເຊັບ” (ອົບພະຍົບ 1:8). ມັນຄົງເປັນເລື່ອງປົກກະຕິສຳລັບຊາວອິດສະຣາເອນທີ່ຈະສົງໄສວ່າ ເປັນຫຍັງພຣະເຈົ້າຈຶ່ງປ່ອຍໃຫ້ສິ່ງນີ້ເກີດຂຶ້ນກັບເຂົາເຈົ້າ, ຜູ້ຄົນແຫ່ງພັນທະສັນຍາຂອງພຣະອົງ. ພຣະອົງຍັງຈື່ຈຳພັນທະສັນຍາທີ່ພຣະອົງໄດ້ເຮັດໄວ້ກັບເຂົາເຈົ້າຫລືບໍ່? ເຂົາເຈົ້າຍັງເປັນຜູ້ຄົນຂອງພຣະອົງຢູ່ບໍ? ພຣະອົງເຫັນຄວາມທຸກທໍລະມານຂອງເຂົາເຈົ້າຫລືບໍ່?
ຄົງມີເວລາເມື່ອທ່ານຮູ້ສຶກຢາກຖາມຄຳຖາມທີ່ຄ້າຍຄືກັນນີ້. ທ່ານອາດສົງໄສວ່າ, ພຣະເຈົ້າຮູ້ຢູ່ບໍວ່າ ເຮົາກຳລັງປະເຊີນກັບສິ່ງໃດ? ພຣະອົງໄດ້ຍິນຄຳອ້ອນວອນຂໍຄວາມຊ່ວຍເຫລືອຂອງເຮົາຢູ່ບໍ? ເລື່ອງລາວໃນອົບພະຍົບກ່ຽວກັບການປົດປ່ອຍຊາວອິດສະຣາເອນຈາກເອຢິບ ຕອບຄຳຖາມເຊັ່ນນັ້ນຢ່າງແຈ່ມແຈ້ງ ທີ່ວ່າ: ພຣະເຈົ້າບໍ່ໄດ້ລືມໄລຜູ້ຄົນຂອງພຣະອົງ. ພຣະອົງຈົດຈຳພັນທະສັນຍາຂອງພຣະອົງກັບເຮົາ ແລະ ຈະບັນລຸມັນໃນເວລາ ແລະ ໃນວິທີທາງຂອງພຣະອົງເອງ (ເບິ່ງ ຄຳສອນ ແລະ ພັນທະສັນຍາ 88:68). “ເຮົາຈະຊ່ວຍກູ້ເອົາພວກເຈົ້າ,” ພຣະອົງປະກາດ. “ເຮົາແມ່ນພຣະຜູ້ເປັນເຈົ້າ ພຣະເຈົ້າຂອງພວກເຈົ້າ, ເຮົາຈະປົດປ່ອຍພວກເຈົ້າໃຫ້ເປັນອິດສະລະຈາກການເປັນທາດ [ຂອງພວກເຈົ້າ]” (ອົບພະຍົບ 6:6–7).
ສຳລັບພາບລວມຂອງພຣະທຳອົບພະຍົບ, ໃຫ້ເບິ່ງ “Exodus, book of” ຢູ່ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດຄືພຣະຜູ້ປົດປ່ອຍຂອງເຮົາ.
ໜຶ່ງໃນຫົວຂໍ້ຕົ້ນຕໍຢູ່ໃນພຣະທຳອົບພະຍົບ ແມ່ນວ່າພຣະເຈົ້າມີອຳນາດທີ່ຈະປົດປ່ອຍຜູ້ຄົນຂອງພຣະອົງຈາກການກົດຂີ່. ການເປັນທາດຂອງຊາວອິດສະຣາເອນ ດັ່ງທີ່ບັນຍາຍຢູ່ໃນ ອົບພະຍົບ 1 ສາມາດເບິ່ງຄືເປັນສັນຍາລັກຂອງການເປັນຊະເລີຍທີ່ເຮົາທຸກຄົນປະເຊີນ ເພາະບາບ ແລະ ຄວາມຕາຍ (ເບິ່ງ 2 ນີໄຟ 2:26–27; 9:10; ແອວມາ 36:28). ແລະ ໂມເຊ, ຜູ້ປົດປ່ອຍຂອງຊາວອິດສະຣາເອນ, ສາມາດເບິ່ງເປັນແບບ, ຫລື ການເປັນຕົວແທນ, ຂອງພຣະເຢຊູ (ເບິ່ງ ພຣະບັນຍັດສອງ 18:18–19; 1 ນີໄຟ 22:20–21). ໃຫ້ອ່ານ ອົບພະຍົບ 1–2 ໂດຍມີການປຽບທຽບເຫລົ່ານີ້ຢູ່ໃນໃຈ. ທ່ານອາດສັງເກດເຫັນ, ຍົກຕົວຢ່າງ, ວ່າທັງໂມເຊ ແລະ ພຣະເຢຊູໄດ້ຖືກຮັກສາໄວ້ຈາກຄວາມຕາຍ ນັບແຕ່ຕອນຍັງນ້ອຍ (ເບິ່ງ ອົບພະຍົບ 1:22–2:10; ມັດທາຍ 2:13–16) ແລະ ວ່າທັງສອງໄດ້ໃຊ້ເວລາຢູ່ໃນຖິ່ນແຫ້ງແລ້ງກັນດານ ກ່ອນເລີ່ມຕົ້ນການປະຕິບັດສາດສະໜາກິດ (ເບິ່ງ ອົບພະຍົບ 2:15–22; ມັດທາຍ 4:1–2). ມີຄວາມຮູ້ອື່ນໃດອີກແດ່ທີ່ທ່ານໄດ້ຮຽນຮູ້ຈາກອົບພະຍົບ ກ່ຽວກັບການເປັນຊະເລີຍທາງວິນຍານ? ກ່ຽວກັບການປົດປ່ອຍຂອງພຣະຜູ້ຊ່ວຍໃຫ້ລອດ?
ເບິ່ງ D. Todd Christofferson, “Redemption,” Liahona, May 2013, 109–12 ນຳອີກ.
Moses in the Bulrushes [ໂມເຊຢູ່ໃນກໍຫຍ້າອໍ້], © Providence Collection/licensed from goodsalt.com
ພຣະເຈົ້າປະທານອຳນາດໃຫ້ແກ່ຜູ້ທີ່ພຣະອົງເອີ້ນໃຫ້ເຮັດວຽກງານຂອງພຣະອົງ.
ທຸກວັນນີ້ເຮົາຮູ້ວ່າໂມເຊເປັນສາດສະດາ ແລະ ຜູ້ນຳທີ່ຍິ່ງໃຫຍ່. ແຕ່ໂມເຊບໍ່ໄດ້ເຫັນຕົວເອງວ່າເປັນແນວນັ້ນ ຕອນພຣະຜູ້ເປັນເຈົ້າເອີ້ນເພິ່ນເທື່ອທຳອິດ. “ຂ້ານ້ອຍເປັນມະນຸດສາມັນ,” ໂມເຊຕອບ, “ຈະໄປຫາກະສັດຟາຣາໂອໄດ້ບໍ?” (ອົບພະຍົບ 3:11). ເຖິງຢ່າງໃດກໍຕາມ, ພຣະຜູ້ເປັນເຈົ້າຮູ້ວ່າໂມເຊເປັນຄົນແບບໃດ—ແລະ ເພິ່ນສາມາດກາຍເປັນຄົນແບບໃດແທ້ໆ. ຂະນະທີ່ທ່ານອ່ານ ອົບພະຍົບ 3–4, ໃຫ້ສັງເກດເບິ່ງວິທີທີ່ພຣະຜູ້ເປັນເຈົ້າໄດ້ຮັບປະກັນໂມເຊ ແລະ ຕອບຮັບຕໍ່ຄວາມເປັນຫ່ວງຂອງເພິ່ນແນວໃດ. ທ່ານພົບເຫັນຫຍັງແດ່ຢູ່ໃນບົດເຫລົ່ານີ້ ທີ່ອາດດົນໃຈທ່ານ ເມື່ອທ່ານຮູ້ສຶກບໍ່ພຽບພ້ອມ? ພຣະຜູ້ເປັນເຈົ້າອວຍພອນຜູ້ຮັບໃຊ້ຂອງພຣະອົງດ້ວຍອຳນາດເພີ່ມເຕີມ ເພື່ອເຮັດຕາມພຣະປະສົງຂອງພຣະອົງແນວໃດ? (ເບິ່ງ ໂມເຊ 1:1–10, 24–39; 6:31–39, 47). ເມື່ອໃດທີ່ທ່ານໄດ້ເຫັນພຣະເຈົ້າ ກະທຳວຽກງານຂອງພຣະອົງຜ່ານທາງຕົວທ່ານ ຫລື ຄົນອື່ນໆ?
ສຳລັບລາຍລະອຽດເພີ່ມເຕີມກ່ຽວກັບຊີວິດ ແລະ ການປະຕິບັດສາດສະໜາກິດຂອງໂມເຊ, ໃຫ້ເບິ່ງ “ໂມເຊ” ຢູ່ໃນ Bible Dictionary ຫລື ຄູ່ມືພຣະຄຳພີ.
ຈຸດປະສົງຂອງພຣະຜູ້ເປັນເຈົ້າຈະປະສົບຄວາມສຳເລັດໃນເວລາຂອງພຣະອົງເອງ.
ເຖິງແມ່ນວ່າໂມເຊໄດ້ໄປຫາຟາຣາໂອດ້ວຍຄວາມກ້າຫານ, ຕາມທີ່ພຣະເຈົ້າໄດ້ບັນຊາເພິ່ນ, ແລະ ໄດ້ບອກເພິ່ນໃຫ້ປົດປ່ອຍຊາວອິດສະຣາເອນ, ແຕ່ຟາຣາໂອໄດ້ປະຕິເສດ. ຕາມຈິງແລ້ວ, ເພິ່ນໄດ້ເຮັດໃຫ້ຊີວິດຂອງຊາວອິດສະຣາເອນຫຍຸ້ງຍາກກວ່າເກົ່າ. ໂມເຊ ແລະ ຊາວອິດສະຣາເອນອາດສົງໄສວ່າ ເປັນຫຍັງທຸກສິ່ງຈຶ່ງບໍ່ເກີດຜົນ ເຖິງແມ່ນເມື່ອໂມເຊໄດ້ເຮັດຕາມທີ່ພຣະເຈົ້າໄດ້ຂໍໃຫ້ເພິ່ນເຮັດແລ້ວກໍຕາມ (ເບິ່ງ ອົບພະຍົບ 5:22–23).
ທ່ານເຄີຍຮູ້ສຶກວ່າຕົວເອງກຳລັງເຮັດຕາມພຣະປະສົງຂອງພຣະເຈົ້າ ແຕ່ບໍ່ເຫັນຜົນສຳເລັດດັ່ງທີ່ທ່ານຄາດໝາຍຫລືບໍ່? ໃຫ້ທົບທວນ ອົບພະຍົບ 6:1–8, ເພື່ອຊອກຫາສິ່ງທີ່ພຣະຜູ້ເປັນເຈົ້າໄດ້ກ່າວ ໃນການຊ່ວຍໂມເຊໃຫ້ອົດທົນ. ພຣະຜູ້ເປັນເຈົ້າໄດ້ຊ່ວຍທ່ານໃຫ້ທົນກັບການເຮັດຕາມພຣະປະສົງຂອງພຣະອົງແນວໃດ?
ພຣະເຢໂຮວາຄືໃຜ?
ພຣະເຢໂຮວາ ຄືໜຶ່ງໃນພຣະນາມຂອງພຣະເຢຊູຄຣິດ ແລະ ກ່າວເຖິງພຣະຜູ້ຊ່ວຍໃຫ້ລອດ ກ່ອນມາສູ່ຊ່ວງເປັນມະຕະ. ການແປຂອງໂຈເຊັບ ສະມິດ ໄດ້ໃຫ້ຄວາມແຈ່ມແຈ້ງວ່າສາດສະດາ ອັບຣາຮາມ, ສາດສະດາອີຊາກ, ແລະ ສາດສະດາຢາໂຄບ ຮູ້ຈັກພຣະຜູ້ເປັນເຈົ້າ ຕາມພຣະນາມຂອງພຣະອົງ (ເບິ່ງ ອົບພະຍົບ 6:3, ໝາຍເຫດຢູ່ທາງລຸ່ມໜ້າປຶ້ມ ຄ). ຕາມປົກກະຕິແລ້ວ, ເມື່ອວະລີທີ່ວ່າ “ພຣະຜູ້ເປັນເຈົ້າ” ປະກົດຢູ່ໃນພຣະຄຳພີເດີມ, ມັນກ່າວເຖິງພຣະເຢໂຮວາ. ໃນ ອົບພະຍົບ 3:13–15, ຄຳວ່າ “ເຮົາເປັນຜູ້ເຮົາເປັນ” ກໍກ່າວເຖິງພຣະເຢໂຮວາຄືກັນ (ເບິ່ງ ຄຳສອນ ແລະ ພັນທະສັນຍາ 38:1; 39:1 ນຳອີກ).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ອົບພະຍົບ 1–2.ຜູ້ຍິງຫລາຍຄົນໄດ້ມີບົດບາດທີ່ສຳຄັນ ໃນແຜນຂອງພຣະເຈົ້າ ເພື່ອລ້ຽງດູຜູ້ປົດປ່ອຍ ສຳລັບຊາວອິດສະຣາເອນ. ພ້ອມກັນເປັນຄອບຄົວ, ທ່ານສາມາດອ່ານກ່ຽວກັບຊີຟາຣາ ແລະ ປູອາ ນາງໝໍຕຳແຍ (ອົບພະຍົບ 1:15–20); ໂຢເກເບັດ ແມ່ຂອງໂມເຊ, ແລະ ມີຣີອາມ ເອື້ອຍຂອງເພິ່ນ (ອົບພະຍົບ 2:2–9; ຈົດບັນຊີ 26:59); ທິດາຂອງຟາຣາໂອ (ອົບພະຍົບ 2:5–6, 10); ແລະ ຊິບໂປຣາ ພັນລະຍາຂອງໂມເຊ (ອົບພະຍົບ 2:16–21). ຜູ້ຍິງເຫລົ່ານີ້ຊ່ວຍນຳພາວຽກງານຂອງພຣະເຈົ້າໄປໜ້າແນວໃດ? ປະສົບການຂອງພວກນາງເຕືອນເຮົາເຖິງພາລະກິດຂອງພຣະເຢຊູຄຣິດແນວໃດ? ພວກທ່ານກໍສາມາດຮວບຮວມຮູບພາບຂອງຍາດພີ່ນ້ອງ ແລະ ບັນພະບຸລຸດທີ່ເປັນຜູ້ຍິງ ແລະ ເລົ່າເລື່ອງລາວກ່ຽວກັບເຂົາເຈົ້າ. ເຮົາໄດ້ຮັບພອນໂດຍຜູ້ຍິງທີ່ຊອບທຳແນວໃດ? ຂ່າວສານຂອງປະທານຣະໂຊ ເອັມ ແນວສັນ “A Plea to My Sisters” (Liahona, Nov. 2015, 95–98) ສາມາດຕື່ມໃສ່ການສົນທະນາຂອງພວກທ່ານໄດ້.
-
ອົບພະຍົບ 3:1–6.ເມື່ອໂມເຊເຂົ້າໄປໃກ້ໆໄຟຢູ່ໃນກາງພຸ່ມໄມ້, ພຣະຜູ້ເປັນເຈົ້າໄດ້ບອກໃຫ້ເພິ່ນປົດເກີບ ເພື່ອເປັນເຄື່ອງໝາຍຂອງການມີຄວາມຄາລະວະ. ເຮົາຈະສະແດງຄວາມຄາລະວະໃນສະຖານທີ່ສັກສິດແນວໃດ? ຍົກຕົວຢ່າງ, ເຮົາສາມາດເຮັດສິ່ງໃດ ເພື່ອເຮັດໃຫ້ບ້ານເຮືອນຂອງເຮົາເປັນສະຖານທີ່ ບ່ອນພຣະວິນຍານຂອງພຣະຜູ້ເປັນເຈົ້າສາມາດສະຖິດຢູ່? ເຮົາຈະສະແດງຄວາມຄາລະວະຫລາຍກວ່າເກົ່າໃນສະຖານທີ່ສັກສິດແນວໃດ?
-
ອົບພະຍົບ 4:1–9.ພຣະຜູ້ເປັນເຈົ້າໄດ້ມອບອຳນາດໃຫ້ແກ່ໂມເຊ ເພື່ອເຮັດການມະຫັດສະຈັນສາມຢ່າງເປັນເຄື່ອງໝາຍ ທີ່ສະແດງໃຫ້ລູກຫລານອິດສະຣາເອນເຫັນວ່າ ພຣະອົງໄດ້ສົ່ງໂມເຊມາ. ເຄື່ອງໝາຍເຫລົ່ານີ້ສິດສອນເຮົາຫຍັງແດ່ກ່ຽວກັບພຣະເຢຊູຄຣິດ?
-
ອົບພະຍົບ 5:2.ການ “ຮູ້ຈັກ” ພຣະຜູ້ເປັນເຈົ້າໝາຍຄວາມວ່າແນວໃດຕໍ່ເຮົາ? ເຮົາຈະຮູ້ຈັກພຣະອົງໄດ້ແນວໃດ? (ສຳລັບຕົວຢ່າງ, ໃຫ້ເບິ່ງ ແອວມາ 22:15–18). ຄວາມສຳພັນຂອງເຮົາກັບພຣະອົງມີຜົນກະທົບຕໍ່ຄວາມປາດຖະໜາຂອງເຮົາ ທີ່ຈະເຊື່ອຟັງພຣະອົງແນວໃດ? (ເບິ່ງ ໂຢຮັນ 17:3; ໂມໄຊຢາ 5:13) ນຳອີກ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຄວາມເມດຕາເລີ່ມຈາກເຮົາ,” ເພງສວດ ແລະ ເພງຂອງເດັກນ້ອຍ, 69.
ການປັບປຸງການຮຽນຮູ້ຂອງເຮົາ
ມີບັນທຶກສ່ວນຕົວກ່ຽວກັບການສຶກສາ. ທ່ານອາດພົບເຫັນວ່າມັນເປັນປະໂຫຍດທີ່ຈະໃຊ້ປຶ້ມບັນທຶກສ່ວນຕົວ ຫລື ປຶ້ມນ້ອຍເພື່ອຂຽນຄວາມຄິດ, ແນວຄິດ, ຄຳຖາມ, ຫລື ຄວາມປະທັບໃຈ ທີ່ມາສູ່ທ່ານ ຂະນະທີ່ທ່ານສຶກສາ.
Moses Found in the Bulrushes by Pharaoh’s Daughter [ໂມເຊຖືກພົບເຫັນຢູ່ໃນກໍຫຍ້າອໍ້ ໂດຍທິດາຂອງຟາຣາໂອ], ໂດຍ ຈອດ ໂຊເປີ