“ວັນທີ 7–13 ເດືອນມີນາ. ປະຖົມມະການ 37–41: ‘ພຣະຜູ້ເປັນເຈົ້າສະຖິດຢູ່ກັບໂຢເຊັບ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 7–13 ເດືອນມີນາ. ປະຖົມມະການ 37–41,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ໂຢເຊັບແຫ່ງເອຢິບຢູ່ໃນຄຸກ

ຮູບພາບໂຢເຊັບແຫ່ງເອຢິບຢູ່ໃນຄຸກ, ໂດຍ ແຈັບ ຫວອດ

ວັນທີ 7–13 ເດືອນມີນາ

ປະຖົມມະການ 37–41

“ພຣະຜູ້ເປັນເຈົ້າສະຖິດຢູ່ກັບໂຢເຊັບ”

ຂະນະທີ່ທ່ານອ່ານ ປະຖົມມະການ 37–41, ໃຫ້ອະທິຖານຂໍໃຫ້ພຣະວິນຍານບໍລິສຸດຊ່ວຍເຫລືອທ່ານໃຫ້ເຫັນວິທີທີ່ຂ່າວສານຂອງພຣະຄຳພີກ່ຽວຂ້ອງກັບຊີວິດຂອງທ່ານແນວໃດ. ບັນທຶກຄວາມຮູ້ໃດໆທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ບາງເທື່ອສິ່ງບໍ່ດີເກີດຂຶ້ນກັບຄົນດີ. ຊີວິດສິດສອນບົດຮຽນນັ້ນໃຫ້ເຮົາຢ່າງແຈ່ມແຈ້ງ, ແລະ ກັບຊີວິດຂອງໂຢເຊັບ ລູກຊາຍຂອງຢາໂຄບ ກໍຄືກັນ. ລາວເປັນຜູ້ຮັບພັນທະສັນຍາທີ່ພຣະເຈົ້າໄດ້ເຮັດໄວ້ກັບບັນພະບຸລຸດຂອງລາວເປັນມູນມໍລະດົກ, ແຕ່ລາວຖືກພວກອ້າຍຂອງລາວກຽດຊັງ ແລະ ຖືກຂາຍໄປເປັນຂ້າທາດ. ລາວປະຕິເສດບໍ່ຍອມລົດຄວາມຊື່ສັດຂອງລາວລົງ ເມື່ອເມຍຂອງໂປຕີຟາເຂົ້າຫາລາວ ແລະ ດ້ວຍເຫດນັ້ນ ຈຶ່ງໄດ້ຖືກສົ່ງເຂົ້າຄຸກ. ມັນເບິ່ງຄືວ່າ ເມື່ອລາວຊື່ສັດຫລາຍຂຶ້ນເທົ່າໃດ, ລາວຍິ່ງປະເຊີນກັບຄວາມຍາກລຳບາກຫລາຍຂຶ້ນເທົ່ານັ້ນ. ແຕ່ຄວາມຍາກລຳບາກທັງໝົດນີ້ ບໍ່ໄດ້ເປັນເຄື່ອງໝາຍຂອງການບໍ່ເຫັນດ້ວຍຂອງພຣະເຈົ້າ. ຕາມຈິງແລ້ວ, ຜ່ານທາງທຸກສິ່ງເຫລົ່ານັ້ນ, “ພຣະຜູ້ເປັນເຈົ້າສະຖິດຢູ່ກັບລາວ” (ປະຖົມມະການ 39:3). ຊີວິດຂອງໂຢເຊັບໄດ້ສະແດງໃຫ້ປະຈັກເຖິງຄວາມຈິງທີ່ສຳຄັນນີ້: ພຣະເຈົ້າຈະບໍ່ປະຖິ້ມເຮົາ. “ການຕິດຕາມພຣະຜູ້ຊ່ວຍໃຫ້ລອດ ຈະບໍ່ຍົກການທົດລອງທັງໝົດໄປຈາກທ່ານ,” ປະທານດີເດີ ແອັຟ ອຸກດອບ ໄດ້ສິດສອນ. “ເຖິງຢ່າງໃດກໍຕາມ, ມັນຈະຍົກເອົາສິ່ງກີດກັນອອກໜີ ລະຫວ່າງທ່ານ ແລະ ຄວາມຊ່ວຍເຫລືອຈາກພຣະບິດາເທິງສະຫວັນ ຊຶ່ງພຣະອົງປະສົງທີ່ຈະປະທານໃຫ້ທ່ານ. ພຣະເຈົ້າຈະສະຖິດຢູ່ກັບທ່ານ” (“A Yearning for Home,” Liahona, Nov. 2017, 22).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ປະຖົມມະການ 37:1–28; 39; 41:9–45

“ພຣະຜູ້ເປັນເຈົ້າສະຖິດຢູ່ກັບໂຢເຊັບ” ໃນຄວາມຍາກລຳບາກຂອງລາວ.

ເທື່ອແລ້ວເທື່ອອີກ, ເບິ່ງຄືວ່າ ບຸນວາດສະໜາໄດ້ປະຖິ້ມໂຢເຊັບ, ແຕ່ພຣະຜູ້ເປັນເຈົ້າບໍ່ເຄີຍປະຖິ້ມລາວ. ຂະນະທີ່ທ່ານອ່ານເລື່ອງລາວຂອງໂຢເຊັບ, ໃຫ້ໄຕ່ຕອງຄຳຖາມທີ່ຄືກັນນີ້: ໂຢເຊັບເຮັດສິ່ງໃດເພື່ອຢູ່ໃກ້ພຣະຜູ້ເປັນເຈົ້າລະຫວ່າງທີ່ລາວຖືກທົດລອງ? ພຣະຜູ້ເປັນເຈົ້າ “ສະຖິດຢູ່ກັບລາວ” ແນວໃດ? (ປະຖົມມະການ 39:2–3, 21, 23).

ທ່ານອາດຢາກຖາມຄຳຖາມທີ່ຄ້າຍຄືກັນນີ້ກ່ຽວກັບຊີວິດຂອງທ່ານ. ມີຫລັກຖານຢ່າງໃດແດ່ທີ່ທ່ານເຄີຍເຫັນວ່າພຣະຜູ້ເປັນເຈົ້າບໍ່ໄດ້ປະຖິ້ມທ່ານ ໃນເວລາທີ່ທ່ານຖືກທົດລອງ? ໃຫ້ພິຈາລະນາວິທີທີ່ທ່ານສາມາດແບ່ງປັນປະສົບການກັບສະມາຊິກໃນຄອບຄົວ ແລະ ຄົນລຸ້ນຫລັງ (ເບິ່ງ 1 ນີໄຟ 5:14). ທ່ານສາມາດເຮັດຫຍັງແດ່ໃນເວລານີ້ ເພື່ອກະກຽມຕົວເອງໃຫ້ຊື່ສັດຢູ່ຄືເກົ່າ ເມື່ອທ່ານປະເຊີນກັບການທົດລອງໃນອະນາຄົດ?

ເບິ່ງ ໂຢຮັນ 14:18; ໂຣມ 8:28; ແອວມາ 36:3; ຄຳສອນ ແລະ ພັນທະສັນຍາ 121:7–8; D. Todd Christofferson, “The Joy of the Saints,” Liahona, Nov. 2019, 15–18 ນຳອີກ.

ປະຖົມມະການ 37:5–11; 40; 41:1–38

ຖ້າຫາກເຮົາຊື່ສັດ, ພຣະຜູ້ເປັນເຈົ້າຈະນຳພາ ແລະ ດົນໃຈເຮົາ.

ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ການເປີດເຜີຍໄດ້ຖືກຖ່າຍທອດໃນຫລາຍວິທີທາງ, ລວມທັງ, ຍົກຕົວຢ່າງ, ຄວາມຝັນ, ພາບນິມິດ, ການສົນທະນາກັບຜູ້ສົ່ງຂ່າວຈາກສະຫວັນ, ແລະ ການດົນໃຈ” (“The Spirit of Revelation,” Liahona, May 2011, 88). ພຣະຜູ້ເປັນເຈົ້າໄດ້ໃຊ້ຄວາມຝັນເພື່ອເປີດເຜີຍຄວາມຈິງຕໍ່ໂຢເຊັບ, ຕໍ່ຫົວໜ້າພະນັກງານເຮັດເຫລົ້າອະງຸ່ນ ແລະ ພະນັກງານເຮັດເຂົ້າຈີ່ຂອງຟາຣາໂອ, ແລະ ຕໍ່ຟາຣາໂອ. ພຣະຜູ້ເປັນເຈົ້າກໍໄດ້ເປີດເຜີຍຕໍ່ໂຢເຊັບ ເຖິງວິທີແກ້ຄວາມຝັນນຳອີກ. ທ່ານສາມາດຮຽນຮູ້ຫຍັງແດ່ຈາກ ປະຖົມມະການ 37:5–11; 40:5–8; 41:14–25, 37–38 ກ່ຽວກັບການໄດ້ຮັບ ແລະ ການເຂົ້າໃຈການເປີດເຜີຍຈາກພຣະຜູ້ເປັນເຈົ້າ? ຍົກຕົວຢ່າງ, ທ່ານຮຽນຮູ້ຫຍັງແດ່ຈາກຕົວຢ່າງຂອງໂຢເຊັບ ເມື່ອການເປີດເຜີຍເບິ່ງຄືຫຍຸ້ງຍາກທີ່ຈະເຂົ້າໃຈ? (ເບິ່ງ ປະຖົມມະການ 40:8; 41:16).

Joseph Interpreting the Butler and Baker’s Dreams [ໂຢເຊັບແປຄວາມຝັນຂອງພະນັກງານເຮັດເຫລົ້າອະງຸ່ນ ແລະ ພະນັກງານເຮັດເຂົ້າຈີ່], ໂດຍ ຟຣານຊົວ ເຈຣາດ

ໃຫ້ໄຕ່ຕອງວິທີທີ່ພຣະຜູ້ເປັນເຈົ້າເປີດເຜີຍພຣະປະສົງຂອງພຣະອົງຕໍ່ທ່ານ. ທ່ານຈະເຮັດສິ່ງໃດເພື່ອປະຕິບັດຕາມການເປີດເຜີຍທີ່ພຣະຜູ້ເປັນເຈົ້າໄດ້ມອບໃຫ້ທ່ານ? ທ່ານສະແຫວງຫາການນຳພາເພີ່ມເຕີມຈາກພຣະອົງໃນທາງໃດ?

ເບິ່ງ Russell M. Nelson, “Revelation for the Church, Revelation for Our Lives,” Liahona, May 2018, 93–96; Michelle Craig, “Spiritual Capacity,” Liahona, Nov. 2019, 19–21 ນຳອີກ.

ປະຖົມມະການ 38; 39:7–20

ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ເຮົາສາມາດແລ່ນໜີອອກໄປຈາກການລໍ້ລວງ.

ເມື່ອທ່ານກຳລັງຖືກລໍ້ລວງ, ຕົວຢ່າງຂອງໂຢເຊັບສາມາດໃຫ້ຄວາມກ້າຫານ ແລະ ຄວາມເຂັ້ມແຂງແກ່ທ່ານໄດ້. ຂະນະທີ່ທ່ານອ່ານກ່ຽວກັບປະສົບການຂອງລາວຢູ່ໃນ ປະຖົມມະການ 39, ໃຫ້ສັງເກດເບິ່ງສິ່ງທີ່ໂຢເຊັບໄດ້ເຮັດ ເພື່ອຕ້ານທານກັບການລໍ້ລວງ. ຍົກຕົວຢ່າງ:

ລາວ “ປະຕິເສດ” ການຊັກຊວນຂອງເມຍໂປຕີຟາ (ຂໍ້ທີ 8).
ລາວຮູ້ວ່າການເຮັດບາບຈະເປັນການເຮັດຜິດຕໍ່ພຣະເຈົ້າ ແລະ ຕໍ່ຄົນອື່ນໆ (ຂໍ້ທີ 8–9).
ລາວ “ບໍ່ຍອມ” ຕໍ່ການລໍ້ລວງ, ເຖິງແມ່ນວ່າມັນໄດ້ເກີດຂຶ້ນ “ທຸກມື້ທຸກວັນ” ກໍຕາມ (ຂໍ້ທີ 10).
ລາວ “ປະເສື້ອໄວ້ … ແລະ ແລ່ນອອກໄປຈາກເຮືອນ” (ຂໍ້ທີ 12).

ດ້ວຍຕົວຢ່າງຂອງໂຢເຊັບຢູ່ໃນໃຈ, ໃຫ້ຄິດທີ່ຈະວາງແຜນເພື່ອການຫລີກລ້ຽງ ແລະ ການຕ້ານທານກັບການລໍ້ລວງ. ຍົກຕົວຢ່າງ, ທ່ານສາມາດຄິດກ່ຽວກັບການລໍ້ລວງທີ່ທ່ານປະເຊີນ, ໃຫ້ຂຽນວິທີຫລີກລ້ຽງລົງໄວ້, ແລະ ວາງແຜນທີ່ຈະເພິ່ງອາໄສພຣະບິດາເທິງສະຫວັນ ເມື່ອການລໍ້ລວງເກີດຂຶ້ນ (ເບິ່ງ 2 ນີໄຟ 4:18, 27–33).

ການລໍ້ລວງ:

ວິທີຫລີກລ້ຽງ:

ແຜນຕອບຮັບ:

ເລື່ອງລາວກ່ຽວກັບຄວາມເຂັ້ມແຂງຂອງໂຢເຊັບ ເມື່ອໄດ້ປະເຊີນກັບການລໍ້ລວງນີ້ ມີອີກເລື່ອງໜຶ່ງທີ່ແຕກຕ່າງໄດ້ເກີດຂຶ້ນກ່ອນ ກ່ຽວກັບອ້າຍຂອງລາວຊື່ ຢູດາ, ມີຢູ່ໃນ ປະຖົມມະການ 38. ບົດທີ 37, 38, ແລະ 39, ທັງໝົດນີ້, ສິດສອນທ່ານຫຍັງແດ່ກ່ຽວກັບພົມມະຈັນ?

ເບິ່ງ 1 ໂກຣິນໂທ 10:13; 1 ນີໄຟ 15:23–24; 3 ນີໄຟ 18:17–18.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ປະຖົມມະການ 37.ຖ້າຫາກທ່ານໄດ້ເປັນອ້າຍຄົນໜຶ່ງຂອງໂຢເຊັບ, ທ່ານຈະເຮັດສິ່ງໃດກັບຄວາມອິດສາບັງບຽດ ເພື່ອບໍ່ໃຫ້ມັນເຮັດໃຫ້ຄວາມສຳພັນຂອງທ່ານກັບລາວເສື່ອມໂຊມລົງ? ມັນຊ່ວຍເຮົາໃຫ້ “ເວົ້າດີນຳ” ກັນແນວໃດ? (ຂໍ້ທີ 4).

ປະຖົມມະການ 39.ວິດີໂອ “The Refiner’s Fire” ແລະ “After the Storm” (ChurchofJesusChrist.org) ບອກເຖິງປະສົບການຂອງຜູ້ຄົນທີ່ພົບເຫັນຄວາມເຂັ້ມແຂງໂດຍການຫັນໄປຫາພຣະຜູ້ເປັນເຈົ້າ ລະຫວ່າງການທົດລອງຂອງເຂົາເຈົ້າ. ບາງທີພວກທ່ານສາມາດເບິ່ງວິດີໂອເລື່ອງໜຶ່ງ ແລະ ເວົ້າລົມກັນກ່ຽວກັບສິ່ງທີ່ໂຢເຊັບອາດເວົ້າ ຖ້າຫາກລາວໄດ້ເຮັດວິດີໂອກ່ຽວກັບປະສົບການຂອງລາວເອງ. ພວກທ່ານສາມາດຮ້ອງເພງ “ເຮົາຮ້ອງສັນເສີນນາມເຢຊູເຈົ້າ” ນຳກັນ (ເພງສວດ ແລະ ເພງຂອງເດັກນ້ອຍ, 27) ແລະ ຊອກຫາຄຳແນະນຳທີ່ຄອບຄົວຂອງທ່ານສາມາດແບ່ງປັນກັບໂຢເຊັບ ຂະນະທີ່ລາວປະເຊີນກັບການທົດລອງຂອງລາວ.

ປະຖົມມະການ 39:7–12.ການອ່ານຂໍ້ເຫລົ່ານີ້ສາມາດໃຫ້ໂອກາດເພື່ອສົນທະນາກ່ຽວກັບກົດພົມມະຈັນກັບຄອບຄົວຂອງທ່ານ. ຕໍ່ໄປນີ້ແມ່ນແຫລ່ງຈຳນວນໜຶ່ງ ທີ່ສາມາດຊ່ວຍທ່ານກັບການສົນທະນານີ້: ຢາໂຄບ 2:28; ແອວມາ 39:3–9; “ຄວາມບໍລິສຸດທາງເພດ” (ໃນປຶ້ມ ສຳລັບຄວາມເຂັ້ມແຂງຂອງຊາວໜຸ່ມ [2011], 35–37); “Sexual Intimacy Is Sacred and Beautiful” (ໃນ Help for Parents [2019], AddressingPornography.ChurchofJesusChrist.org).

ປະຖົມມະການ 41:15–57.ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບວິທີທີ່ພຣະຜູ້ເປັນເຈົ້າອວຍພອນຜູ້ຄົນຂອງເອຢິບຜ່ານທາງໂຢເຊັບ? ເຮົາຮຽນຮູ້ຫຍັງແດ່ກ່ຽວກັບການກະກຽມສຳລັບພາວະສຸກເສີນໃນອະນາຄົດ? ໃຫ້ສົນທະນາສິ່ງທີ່ພວກທ່ານສາມາດເຮັດໄດ້ ເພື່ອກະກຽມເປັນຄອບຄົວໃຫ້ດີກວ່າເກົ່າ. ສຳລັບແນວຄິດ, ເບິ່ງ Gospel Topics, “Emergency Preparedness,” topics.ChurchofJesusChrist.org.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຄັ້ງໜຶ່ງເຢຊູເກີດຕ່ຳຕ້ອຍ,” ເພງສວດ ແລະ ເພງຂອງເດັກນ້ອຍ, 22.

ການປັບປຸງການສຶກສາສ່ວນຕົວ

ປຽບທຽບພຣະຄຳພີໃສ່ກັບຊີວິດຂອງທ່ານ. ຂະນະທີ່ທ່ານອ່ານ, ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນໃນພຣະຄຳພີກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ຄວາມຊື່ສັດຂອງໂຢເຊັບຢູ່ໃນເອຢິບດົນໃຈທ່ານໃຫ້ຊື່ສັດຢູ່ຄືເກົ່າຕໍ່ພຣະຜູ້ເປັນເຈົ້າ ເຖິງແມ່ນຈະມີຄວາມຍາກລຳບາກກໍຕາມແນວໃດ?