“ວັນທີ 28 ເດືອນກຸມພາ–ວັນທີ 6 ເດືອນມີນາ ປະຖົມມະການ 28–33: ‘ພຣະຜູ້ເປັນເຈົ້າສະຖິດຢູ່ບ່ອນນີ້ແທ້ໆ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 28 ເດືອນກຸມພາ–ວັນທີ 6 ເດືອນມີນາ ປະຖົມມະການ 28–33,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ວັນທີ 28 ເດືອນກຸມພາ–ວັນທີ 6 ເດືອນມີນາ
ປະຖົມມະການ 28–33
“ພຣະຜູ້ເປັນເຈົ້າສະຖິດຢູ່ບ່ອນນີ້ແທ້ໆ”
ຂະນະທີ່ທ່ານອ່ານ ປະຖົມມະການ 28–33, ໃຫ້ໄຕ່ຕອງສິ່ງທີ່ທ່ານຮຽນຮູ້ຈາກຕົວຢ່າງຂອງຢາໂຄບ ແລະ ຄອບຄົວຂອງເພິ່ນ. ໃຫ້ຂຽນຄວາມປະທັບໃຈທີ່ທ່ານໄດ້ຮັບ.
ບັນທຶກຄວາມປະທັບໃຈຂອງທ່ານ
ບົດທີ 28 ແລະ 32 ຂອງປະຖົມມະການ ບອກເຖິງປະສົບການທາງວິນຍານສອງຢ່າງທີ່ສາດສະດາຢາໂຄບໄດ້ມີ. ທັງສອງຢ່າງໄດ້ເກີດຂຶ້ນຢູ່ໃນຖິ່ນແຫ້ງແລ້ງກັນດານ ແຕ່ໃນສະຖານະການທີ່ແຕກຕ່າງກັນ. ໃນປະສົບການຢ່າງທຳອິດ, ຢາໂຄບໄດ້ເດີນທາງໄປບ້ານເກີດຂອງແມ່ເພິ່ນ ເພື່ອໄປຊອກເອົາເມຍ ແລະ, ໃນລະຫວ່າງທາງ, ເພິ່ນໄດ້ນອນຄ້າງຄືນໂດຍໃຊ້ກ້ອນຫີນໝູນຕາງໝອນ. ເພິ່ນຄົງບໍ່ຄາດຄິດວ່າ ຈະພົບເຫັນພຣະຜູ້ເປັນເຈົ້າຢູ່ໃນບ່ອນເປົ່າປ່ຽວເຊັ່ນນັ້ນ, ແຕ່ພຣະເຈົ້າໄດ້ເປີດເຜີຍພຣະອົງເອງຕໍ່ຢາໂຄບ ໃນຄວາມຝັນທີ່ປ່ຽນແປງຊີວິດ, ແລະ ຢາໂຄບໄດ້ປະກາດວ່າ, “ພຣະຜູ້ເປັນເຈົ້າສະຖິດຢູ່ບ່ອນນີ້ແທ້ໆ; ແຕ່ເຮົາບໍ່ຮູ້ຈັກ” (ປະຖົມມະການ 28:16). ຫລາຍປີຈາກນັ້ນ, ຢາໂຄບໄດ້ພົບເຫັນຕົວເອງຢູ່ໃນຖິ່ນແຫ້ງແລ້ງກັນດານອີກ. ເທື່ອນີ້, ເພິ່ນກຳລັງເດີນທາງກັບໄປຍັງດິນແດນການາອານ ເພື່ອໄປພົບກັບເອຊາວ ອ້າຍຂອງເພິ່ນ, ຊຶ່ງອາດເປັນການພົບກັນທີ່ອັນຕະລາຍ ເພາະເອຊາວໄດ້ໃຈຮ້າຍໃຫ້ເພິ່ນ. ແຕ່ຢາໂຄບຮູ້ວ່າ ເມື່ອໃດທີ່ເພິ່ນຕ້ອງການພອນ, ເພິ່ນສາມາດສະແຫວງຫາພຣະຜູ້ເປັນເຈົ້າໄດ້, ແມ່ນແຕ່ຕອນຢູ່ໃນຖິ່ນແຫ້ງແລ້ງກັນດານ (ເບິ່ງ ປະຖົມມະການ 32).
ທ່ານອາດພົບເຫັນຕົວເອງຢູ່ໃນຖິ່ນແຫ້ງແລ້ງກັນດານຂອງຕົວເອງ ກຳລັງສະແຫວງຫາພອນຈາກພຣະເຈົ້າ. ບາງທີຖິ່ນແຫ້ງແລ້ງກັນດານຂອງທ່ານ ອາດເປັນຄວາມຫຍຸ້ງຍາກໃນຄວາມສຳພັນຂອງຄອບຄົວ, ດັ່ງທີ່ຢາໂຄບມີ. ບາງທີທ່ານອາດຮູ້ສຶກຢູ່ໄກຈາກພຣະເຈົ້າ ຫລື ຮູ້ສຶກວ່າທ່ານຕ້ອງການພອນ. ບາງເທື່ອພອນມີມາຢ່າງບໍ່ຄາດຄິດ; ບາງເທື່ອກໍຕ້ອງໄດ້ມີການຕໍ່ສູ້ກ່ອນ. ບໍ່ວ່າຈະເປັນສິ່ງໃດກໍຕາມທີ່ທ່ານຕ້ອງການ, ທ່ານສາມາດຄົ້ນພົບມັນໄດ້ ແມ່ນແຕ່ຢູ່ໃນຖິ່ນແຫ້ງແລ້ງກັນດານຂອງທ່ານ, “ພຣະຜູ້ເປັນເຈົ້າສະຖິດຢູ່ບ່ອນນີ້ແທ້ໆ.”
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາໄດ້ຮັບຄຳສັນຍາວ່າຈະໄດ້ຮັບພອນຂອງອັບຣາຮາມຢູ່ໃນພຣະວິຫານ.
ໃນລະຫວ່າງທາງຂອງເພິ່ນໄປຫາເມືອງຮາຣານ ເພື່ອໄປຊອກເອົາເມຍ, ຢາໂຄບໄດ້ຝັນເຫັນຂັ້ນໄດແຕ່ດິນຈົນຈຸສະຫວັນ, ໂດຍມີພຣະເຈົ້າປະທັບຢືນຢູ່ເໜືອມັນ. ໃນຄວາມຝັນນັ້ນ, ພຣະເຈົ້າໄດ້ປະກາດພັນທະສັນຍາຢ່າງດຽວກັນນັ້ນກັບຢາໂຄບ ທີ່ພຣະອົງໄດ້ເຮັດໄວ້ກັບອັບຣາຮາມ ແລະ ອີຊາກ (ເບິ່ງ ປະຖົມມະການ 28:10–17; ເບິ່ງ ປະຖົມມະການ 12:2–3; 26:1–4 ນຳອີກ). ປະທານແມຣິອອນ ຈີ ຣອມນີ ໄດ້ແບ່ງປັນຄວາມຄິດນີ້ກ່ຽວກັບຄວາມໝາຍຂອງຂັ້ນໄດ: “ຢາໂຄບໄດ້ຮັບຮູ້ວ່າພັນທະສັນຍາທີ່ເພິ່ນໄດ້ເຮັດໄວ້ກັບພຣະຜູ້ເປັນເຈົ້າຢູ່ທີ່ນັ້ນ ແມ່ນຂັ້ນບັນໄດທີ່ຕົວເພິ່ນເອງຕ້ອງປີນ ກ່ອນຈະສາມາດຮັບເອົາພອນທີ່ສັນຍາໄວ້—ພອນທີ່ໃຫ້ສິດເພິ່ນເພື່ອເຂົ້າໄປໃນສະຫວັນ ແລະ ຄົບຫາກັບພຣະຜູ້ເປັນເຈົ້າ. … ຕໍ່ເຮົາທັງໝົດ ພຣະວິຫານເປັນຄືກັນກັບເບັດເອນຕໍ່ຢາໂຄບ” (“Temples—The Gates to Heaven,” Ensign, Mar. 1971, 16).
ມີຄຳ ແລະ ວະລີອື່ນໃດແດ່ ຢູ່ໃນ ປະຖົມມະການ 28:10–22 ແນະນຳຕໍ່ທ່ານເຖິງຄວາມສຳພັນລະຫວ່າງປະສົບການຂອງຢາໂຄບ ແລະ ພອນຂອງພຣະວິຫານ? ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຄິດເຖິງພັນທະສັນຍາທີ່ທ່ານໄດ້ເຮັດ; ມີຄວາມປະທັບໃຈໃດແດ່ທີ່ມາສູ່ທ່ານ?
ຂະນະທີ່ທ່ານອ່ານ ປະຖົມມະການ 29:1–18, ໃຫ້ໄຕ່ຕອງກ່ຽວກັບການແຕ່ງງານຂອງຢາໂຄບກັບນາງຣາເຊັນ ວ່າເປັນສິ່ງສຳຄັນແນວໃດຕໍ່ພັນທະສັນຍາທີ່ພຣະເຈົ້າໄດ້ມອບໃຫ້ຢາໂຄບ ໃນເບັດເອນ (“ບ້ານຂອງພຣະເຈົ້າ”; ເບິ່ງ ປະຖົມມະການ 28:10–19). ໃຫ້ເກັບປະສົບການນີ້ໄວ້ໃນໃຈ ຂະນະທີ່ທ່ານອ່ານຕໍ່ໄປກ່ຽວກັບຊີວິດຂອງຢາໂຄບ ຢູ່ໃນ ປະຖົມມະການ 29–33. ບ້ານຂອງພຣະຜູ້ເປັນເຈົ້າໄດ້ຊ່ວຍທ່ານໃຫ້ເຂົ້າໃກ້ພຣະເຈົ້າຫລາຍກວ່າເກົ່າແນວໃດ?
ເບິ່ງ Yoon Hwan Choi, “Don’t Look Around, Look Up!” Liahona, May 2017, 90–92 ນຳອີກ.
ປະຖົມມະການ 29:31–35; 30:1–24
ພຣະຜູ້ເປັນເຈົ້າຄິດເຖິງເຮົາໃນການທົດລອງຂອງເຮົາ.
ເຖິງແມ່ນວ່ານາງຣາເຊັນ ແລະ ນາງເລອາ ມີຊີວິດຢູ່ໃນວັນເວລາ ແລະ ໃນວັດທະນະທຳທີ່ແຕກຕ່າງຈາກເຮົາ, ເຮົາທັງໝົດສາມາດເຂົ້າໃຈຄວາມຮູ້ສຶກບາງຢ່າງທີ່ເຂົາເຈົ້າມີ. ຂະນະທີ່ທ່ານອ່ານ ປະຖົມມະການ 29:31–35 ແລະ 30:1–24, ໃຫ້ຊອກຫາຄຳ ແລະ ວະລີທີ່ບັນຍາຍເຖິງຄວາມເມດຕາຂອງພຣະເຈົ້າ ຕໍ່ນາງຣາເຊັນ ແລະ ນາງເລອາ. ໃຫ້ໄຕ່ຕອງວິທີທີ່ພຣະເຈົ້າໄດ້ “ເຫັນຄວາມທຸກລຳບາກ [ຂອງທ່ານ]” ແລະ “ຄິດເຖິງ” ທ່ານແນວໃດ (ປະຖົມມະການ 29:32; 30:22).
ມັນກໍສຳຄັນອີກທີ່ຈະຈື່ຈຳວ່າ ເຖິງແມ່ນວ່າພຣະເຈົ້າໄດ້ຍິນເຮົາ, ໃນຄວາມສະຫລຽວສະຫລາດຂອງພຣະອົງ, ພຣະອົງຈະບໍ່ໃຫ້ທຸກສິ່ງຕາມທີ່ເຮົາທູນຂໍ. ໃຫ້ຄິດທີ່ຈະສຶກສາຂ່າວສານຂອງແອວເດີ ບຣຸກ ພີ ແຮວສ໌ “Answers to Prayer” (Liahona, May 2019, 11–14) ເພື່ອຮຽນຮູ້ກ່ຽວກັບວິທີຕ່າງໆ ທີ່ພຣະບິດາເທິງສະຫວັນຕອບເຮົາ.
ສຳລັບລາຍລະອຽດເພີ່ມເຕີມກ່ຽວກັບພື້ນຖານວັດທະນະທຳຂອງເລື່ອງນີ້, ໃຫ້ເບິ່ງ Old Testament Student Manual: Genesis–2 Samuel (2003), 86–88.
ຮູບພາບຢາໂຄບ ແລະ ເອຊາວ ໂອບກອດກັນ, ໂດຍ ຣໍເບີດ ທີ ບາແຣັດ
ພຣະຜູ້ຊ່ວຍໃຫ້ລອດສາມາດຊ່ວຍເຮົາໃຫ້ເອົາຊະນະການຜິດຖຽງກັນຢູ່ໃນຄອບຄົວຂອງເຮົາໄດ້.
ຂະນະທີ່ຢາໂຄບກັບຄືນໄປຍັງດິນແດນການາອານ, ເພິ່ນ “ຢ້ານ ແລະ ອຸກໃຈ” ບໍ່ຮູ້ວ່າເອຊາວຈະຕ້ອນຮັບເພິ່ນໃນແບບໃດ (ປະຖົມມະການ 32:7). ຂະນະທີ່ທ່ານອ່ານຢູ່ໃນ ປະຖົມມະການ 32–33 ກ່ຽວກັບຢາໂຄບປະເຊີນໜ້າກັບເອຊາວ ແລະ ຄວາມຮູ້ສຶກຂອງເພິ່ນໃນເວລານັ້ນ, ທ່ານອາດໄຕ່ຕອງກ່ຽວກັບຄວາມສຳພັນໃນຄອບຄົວຂອງທ່ານເອງ—ບາງທີກ່ຽວກັບສິ່ງທີ່ຕ້ອງແກ້ໄຂ. ບາງທີເລື່ອງນີ້ສາມາດດົນໃຈທ່ານໃຫ້ເອື້ອມອອກໄປຫາບາງຄົນ. ຄຳຖາມແບບດັ່ງຕໍ່ໄປນີ້ສາມາດນຳພາການອ່ານຂອງທ່ານ:
-
ຢາໂຄບກະກຽມທີ່ຈະພົບກັບເອຊາວແນວໃດ?
-
ສິ່ງໃດເດັ່ນຕໍ່ທ່ານກ່ຽວກັບຄຳອະທິຖານຂອງຢາໂຄບ ຢູ່ໃນ ປະຖົມມະການ 32:9–12?
-
ທ່ານຮຽນຮູ້ຫຍັງແດ່ກ່ຽວກັບການໃຫ້ອະໄພຈາກຕົວຢ່າງຂອງເອຊາວ?
-
ພຣະຜູ້ຊ່ວຍໃຫ້ລອດສາມາດຊ່ວຍເຮົາແກ້ໄຂຄວາມສຳພັນໃນຄອບຄົວຂອງເຮົາແນວໃດ?
ເບິ່ງ ລູກາ 15:11–32; Jeffrey R. Holland, “The Ministry of Reconciliation,” Liahona, Nov. 2018, 77–79 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ປະຖົມມະການ 28–33.ໃຫ້ໃຊ້ “ຢາໂຄບ ແລະ ຄອບຄົວຂອງລາວ” (ໃນ ນິທານພຣະສັນຍາເດີມ) ເພື່ອຊ່ວຍເດັກນ້ອຍໃຫ້ເຂົ້າໃຈເຫດການຈາກບົດເຫລົ່ານີ້. ບາງທີສະມາຊິກໃນຄອບຄົວສາມາດຢຸດໃນແຕ່ລະຮູບ ແລະ ບອກເຖິງສິ່ງທີ່ກຳລັງຖືກສິດສອນ, ດັ່ງເຊັ່ນຄວາມສຳຄັນຂອງການແຕ່ງງານ, ພັນທະສັນຍາ, ວຽກງານ, ແລະ ການໃຫ້ອະໄພ.
-
ປະຖົມມະການ 28:10–22.ທ່ານສາມາດໃຊ້ຂັ້ນໄດ (ຫລື ຮູບຂັ້ນໄດ) ເພື່ອເວົ້າລົມກັນກ່ຽວກັບວິທີທີ່ພັນທະສັນຍາຂອງເຮົາເປັນເໝືອນດັ່ງຂັ້ນໄດແນວໃດ. ເຮົາໄດ້ເຮັດພັນທະສັນຍາຢ່າງໃດແດ່, ແລະ ມັນໄດ້ຊ່ວຍເຮົາໃຫ້ເຂົ້າໃກ້ພຣະເຈົ້າຫລາຍກວ່າເກົ່າແນວໃດ? ສະມາຊິກໃນຄອບຄົວອາດມັກແຕ້ມຮູບກ່ຽວກັບຄວາມຝັນຂອງຢາໂຄບ, ທີ່ບັນຍາຍຢູ່ໃນ ປະຖົມມະການ 28:10–22.
ເພງສວດ “ພຣະບິດາ ໂປດຟັງເຮົາວອນ” (ເພງສວດ ແລະ ເພງຂອງເດັກນ້ອຍ, 23) ໄດ້ໃຫ້ການດົນໃຈໂດຍຄວາມຝັນຂອງຢາໂຄບ. ຄອບຄົວຂອງທ່ານສາມາດຮ້ອງເພງນີ້ ແລະ ສົນທະນາສິ່ງທີ່ແຕ່ລະຂໍ້ສິດສອນ.
-
ປະຖົມມະການ 32:24–32.ສະມາຊິກໃນຄອບຄົວຂອງທ່ານບາງຄົນອາດມັກຕໍ່ສູ້. ເປັນຫຍັງການ “ຕໍ່ສູ້” ຈຶ່ງເປັນວິທີທີ່ດີຢ່າງໜຶ່ງ ເພື່ອບັນຍາຍກ່ຽວກັບພອນຈາກພຣະຜູ້ເປັນເຈົ້າ? ໜັງສື ເອໂນດ 1:1–5; ແອວມາ 8:9–10 ແນະນຳສິ່ງໃດກ່ຽວກັບຄວາມໝາຍຂອງການ “ຕໍ່ສູ້ … ກັບພຣະເຈົ້າ”?
-
ປະຖົມມະການ 33:1–12.ຫລັງຈາກຫລາຍປີທີ່ຜິດໃຈກັນ, ຢາໂຄບ ແລະ ເອຊາວ ໄດ້ຄືນດີກັນ. ຖ້າຫາກຢາໂຄບ ແລະ ເອຊາວ ສາມາດເວົ້າກັບເຮົາໃນທຸກວັນນີ້, ພວກເພິ່ນຈະເວົ້າຫຍັງ ເພື່ອຊ່ວຍເຫລືອເຮົາ ເມື່ອມີການຜິດຖຽງກັນຢູ່ໃນຄອບຄົວຂອງເຮົາ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຂ້າຂໍຂອບພຣະໄທອົງບິດາ,” ເພງສວດ ແລະ ເພງຂອງເດັກນ້ອຍ, 67.
ການປັບປຸງການສຶກສາສ່ວນຕົວ
ຊອກຫາພຣະເຢຊູຄຣິດ. ພຣະຄຳພີເດີມເປັນພະຍານເຖິງພຣະເຢຊູຄຣິດ ຜ່ານທາງເລື່ອງລາວ ແລະ ເຄື່ອງໝາຍຂອງມັນ. ໃຫ້ຄິດທີ່ຈະໝາຍເຫດ ຫລື ໝາຍຂໍ້ທີ່ຊີ້ໄປຫາພຣະຜູ້ຊ່ວຍໃຫ້ລອດ ແລະ ຂໍ້ທີ່ມີຄວາມໝາຍຕໍ່ທ່ານໂດຍສະເພາະ.
Jacob’s Dream at Bethel [ຄວາມຝັນຂອງຢາໂຄບຢູ່ທີ່ເບັດເອນ], ໂດຍ ເຈ ເຄັນ ສະເປັນເຊີ