Fa’ahōho’ara’a nō te menema ’aita e ta’ata tō roto nā Maryna Kriuchenko

11–17 nō ’Ēperēra

Pāsa

« E nāna e ha’amou roa i te pohe e a muri noa atu »

’Ia tai’o ana’e ’outou ’e ’ia feruri i te tāra’ehara o te Fa’aora i teie hepetoma, ’a feruri e pāpa’i i tō ’outou mau mana’o ’e te mau ’aehuehura’a nō ni’a i tōna tusia i roto i tā ’outou buka ’ā’amu ’aore rā i roto i te vāhi i fa’ata’ahia i roto i teie arata’i.

Pāpa’i i tō outou mau mana’o

’Ua riro te orara’a o Iesu Mesia « ’ei pū nō te ’ā’amu o te ao » (« Te Mesia ora : Te ’itera’a pāpū o te mau ’Āpōsetolo », ChurchofJesusChrist.org). E aha te aura’a ? Te tahi aura’a, ’oia ho’i, tē fa’auru nei te orara’a o te Fa’aora i te haere’a mure ’ore o te mau ta’ata ato’a tei ora na, ’aore rā ’o tē ora a muri a’e. E nehenehe ato’a ’outou e parau ē, tē fa’atū’ati nei te orara’a ’e te ’ohipa a Iesu Mesia, tei hope nā roto i tōna ti’afa’ahoura’a i taua mahana sābati Pāsa mātāmua ra, i te mau ta’ata ato’a a te Atua i roto i te roara’a o te ’ā’amu : ’O rātou tei fānauhia hou te Mesia, ’ua tīa’i rātou iāna ma te fa’aro’o (hi’o Iakoba 4:4), ’e te feiā tei fānauhia i muri a’e, ’ua hi’o rātou i ni’a iāna ma te fa’aro’o. ’Ia tai’o ana’e tātou i te mau ’ā’amu ’e te mau parau tohu o te Faufa’a Tahito, ’aita tātou e ’ite i te i’oa o Iesu Mesia, tē ’ite ra rā tātou i te tāpa’o o te fa’aro’o ’e te tīa’ira’a o te feiā ti’aturi nō tahito ra i tō rātou Mesia ’e te Fa’aora. Nō reira, tātou ’o tei tītauhia ’ia ha’amana’o iāna, e nehenehe tātou e ’ite i te hō’ē tā’amura’a i ni’a i te feiā tei tīa’i iāna. Nō te mea ’ua amo mau te Mesia « i te utua o tā tātou ato’a nei hara » (Isaia 53 :6 ; pāpa’ira’a fa’a’opa i ’āpitihia atu), ’e « e hope ato’a i te fa’aorahia ’e te Mesia » (1 Korinetia 15:22 ; pāpa’ira’a fa’a’opa i ’āpitihia atu).

Mau mana’o nō te tuatāpapara’a pāpa’ira’a mo’a a te ta’ata hō’ē

Tē fa’a’ite pāpū nei te Faufa’a Tahito i te tusia tāra’ehara a te Fa’aora.

E rave rahi mau ’īrava i roto i te Faufa’a Tahito e fa’a’ite nei i te tāvinira’a ’e te tusia tāra’ehara a te Fa’aora. Tē fa’a’ite nei te tāpura i raro nei i te tahi o teie mau tuha’a pāpa’ira’a. ’Ia tai’o ana’e ’oe i teie mau ’īrava, e aha te mau mana’o e tupu mai i roto ia ’oe nō ni’a i te Fa’aora ?

Faufa’a Tahito	Faufa’a ’Āpī
Faufa’a Tahito Zekaria 9:9	Faufa’a ’Āpī Mataio 21:1–11
Faufa’a Tahito Zekaria 11:12–13	Faufa’a ’Āpī Mataio 26:14–16
Faufa’a Tahito Isaia 53 :4	Faufa’a ’Āpī Mataio 8:16–17 ; 26:36–39
Faufa’a Tahito Isaia 53 :7	Faufa’a ’Āpī Mareko 14:60-61
Faufa’a Tahito Salamo 22:16	Faufa’a ’Āpī Ioane 19:17–18 ; 20:25–27.
Faufa’a Tahito Salamo 22:18	Faufa’a ’Āpī Mataio 27:35
Faufa’a Tahito Salamo 69:21	Faufa’a ’Āpī Mataio 27:34, 48
Faufa’a Tahito Salamo 118:22	Faufa’a ’Āpī Mataio 21:42
Faufa’a Tahito Isaia 53:9,12	Faufa’a ’Āpī Mataio 27:57–60 ; Mareko 15:27–28
Faufa’a Tahito Isaia 25:8	Faufa’a ’Āpī Mareko 16:1–6 ; Luka 24:6
Faufa’a Tahito Daniela 12:2	Faufa’a ’Āpī Mataio 27:52–53

E mea nanea ’e e mea māramarama atu ā te mau parau tohu ’e te mau ha’api’ira’a nō ni’a i te Fa’aora i roto i te Buka a Moromona. ’A feruri e nāhea tō ’oe fa’aro’o i te ha’apūaihia nā roto i te mau tuha’a pāpa’ira’a mai teie : 1 Nephi 11:31–33 ; 2 Nephi 25:13 ; Mosia 3 :2–11.

E ’itehia iā’u te hau ’e te ’oa’oa nā roto i te Tāra’ehara a te Fa’aora.

I te roara’a o te tau, nā roto i tāna tusia tāra’ehara, ’ua pūpū mai Iesu Mesia i te hau ’e te ’oa’oa i te feiā ato’a e haere atu iāna ra (hi’o Mose 5:9–12). ’A tuatāpapa i teie mau pāpa’ira’a mo’a i muri nei, ’o tē fa’a’ite pāpū nei i te hau ’e te ’oa’oa tāna e pūpū nei, ’e ’a rave ai ’oe i te reira, ’a feruri e nāhea e ti’a ai ia ’oe ’ia fāri’i i te hau ’e te ’oa’oa tāna e hōro’a mai : Salamo 16:8–11 ; 30:2–5 ; Isaia 12 ; 25:8–9 ; 40:28–31 ; Ioane 14:27 ; 16:33 ; Alama 26:11–22.

Hi’o ato’a Dallin H. Oaks, « Ha’apūaihia nā roto i te Tāra’ehara a Iesu Mesia », Liahona, Novema 2015, 61–64 ; Sharon Eubank, « Mesia : Te māramarama ’o tē ’ana’ana nei i roto i te pōuri », Liahona, Mē 2019, 73–76 ; « Tē maere nei au », Te mau Hīmene, no. 111.

Mahana ha’apōiri i Goratota, nā J. Kirk Richards

Nā roto i tōna tāra’ehara, e mana tō Iesu Mesia i te tauturu iā’u ’ia upo’oti’a i ni’a i te hara, te pohe, te mau tāmatara’a ’e te mau paruparu.

I te roara’a o te mau pāpa’ira’a mo’a, ’ua fa’a’ite pāpū te mau peropheta i te mana o Iesu Mesia nō te fa’aora ia tātou i te hara ’e te pohe ’e nō te tauturu ia tātou ’ia upo’oti’a i ni’a i tō tātou mau tāmatara’a ’e te mau paruparu. Nāhea Iesu Mesia i te fa’atupura’a i te hō’ē ta’a’-ē-ra’a i roto i tō ’oe orara’a ? Nō te aha e mea faufa’a rahi ’oia nō ’oe ? ’A feruri i teie mau uira’a ’a tai’o ai ’oe i teie mau ’īrava, ’e a pāpa’i i tō ’oe mau mana’o ’e te mau ferurira’a nō ni’a i te Fa’aora :

• Isaia 61:1–3

• Ezekiela 36:26–28

• Mataio 11:28–30

• Luka 1:46–55

• Roma 8:35–39

• Alama 7:10–13

• Alama 11:42–45

• Alama 58:11

• Moroni 10:32-33

• Te Parau Ha’api’ira’a ’e Te Mau Parau Fafau 19:15–19

• Mose 5:9–12

Hi’o ato’a Walter F. Gonzalez, « E ha’aputapū te Fa’aora », Liahona, Novema 2019, 90–92.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Exodo 12:1–28.’A fa’ahanahana ai ’outou i te Pāsa, e nehenehe tō ’outou ’utuāfare e hi’o fa’ahou i te mau mea tā ’outou i ha’api’i mai nō ni’a i te Pāsa i te ’ōmuara’a o teie ’āva’e. Nō te aha e mea faufa’a te tupura’a te tusia a te Fa’aora hō’ē ā taime ’e te ’ōro’a Pāsa ?

Nō te hō’ē ha’apotora’a nō te ’ohipa i tupu i roto i te hepetoma hope’a o te orara’a o te Fa’aora, ’hi’o « Te hepetoma mo’a » i ni’a ComeuntoChrist.org/2016/easter/easter-week. Nō te mau pāpa’ira’a mo’a nō ni’a i te mau ’ohipa o te hepetoma hope’a o te Fa’aora, hi’o « Te hepetoma hope’a : Te Tāra’ehara ’e te Ti’afa’ahoura’a » i roto [Harmony of the Gospels] Aumāitera’a o te mau ’Evanelia (i roto Bible appendix [Fa’ahorora’a Bibili]a).

Isaia 53.E nehenehe te tai’ora’a i te mau parau tohu nō ni’a ia Iesu Mesia i roto i te Isaia 53 e tauturu i te mau melo o te ’utuāfare ’ia māramarama i te tusia tāra’ehara a te Fa’aora. E aha te mau ’īrava ’aore rā te mau pereota tā tō ’outou ’utuāfare e mana’o ra ē, e mea pūai ta’a ’ē mau ? E nehenehe e fa’atupu i te hō’ē purera’a ’īritira’a mana’o nō te ’utuāfare i reira ’outou e fa’a’ite ai i tō ’outou iho ’itera’a pāpū nō ni’a i te tāra’ehara a te Fa’aora.

« Te mau ’ite ta’a ’ē o te Mesia ».Tē vai ra i roto i te fa’anahora’a vaira’a buka ’evanelia ’e te ChurchofJesusChrist.org hō’ē ha’aputura’a nō te mau hōho’a video tei parauhia « Te mau ’ite ta’a ’ē o te Mesia », i reira te melo tāta’itahi o te Peresidenira’a Mātāmua ’e o te Tino ’Ahuru Ma Piti ’Āpōsetolo e fa’a’ite ai i tō rātou ’itera’a pāpū nō ni’a ia Iesu Mesia. Penei a’e e nehenehe tō ’outou ’utuāfare e māta’ita’i i te tahi o teie mau videos ’e ’ia paraparau nō ni’a i te mau mea tā ’outou i ha’api’i mai nō ni’a ia Iesu Mesia, mai roto mai i tōna mau tāvini mā’itihia. ’Ei ’utuāfare, e paraparau i te mau rāve’a e nehenehe ’outou i te fa’a’ite i tō ’outou ’itera’a pāpū nō ni’a i te Mesia. ’Ei hi’ora’a, e nehenehe ’outou e ani i te hō’ē ta’ata ’ia haere mai i te purera’a nā muri iho ia ’outou i teie sābati Pāsa.

Te mau hīmene’Ua riro te pehe ’ei rāve’a pūai nō te ha’amana’o i te Fa’aora ’e nō te tītau i te Vārua i roto i tō tātou mau ’utuāfare. E nehenehe te mau melo o te ’utuāfare e fa’a’ite ’e e hīmene ’āmui i te mau hīmene nō ni’a i te Pāsa ’aore rā nō ni’a ia Iesu Mesia, mai te « Ti’afa’ahou mai Iesu » (Te mau Hīmene, no. 117) ’’aore rā, « Jesus est-il ressuscité ? »(Chants pour les enfants 45). Nō te ’ite i te tahi atu mau hīmene ’aore rā te mau hīmene a te mau tamari’i, ’a hi’o i roto i te fa’ahorora’a tumu parau o Te mau Hīmene ’e te Chants pour les enfants.

Nō te mau mana’o hau atu nō te ha’api’ira’a i te mau tamari’i, ’hi’o te arata’i nō teie hepetoma i roto i te Mai, pe’e mai—nō te Paraimere

Hīmene i mana’ohia : « Jésus est-il ressuscité ? Chants pour les enfants, 45

Ha’amaita’ira’a i tā tātou ha’api’ira’a

’A ora i te ’evanelia a Iesu Mesia. « Nō te riro ’ei ’orometua ha’api’i mai te Mesia [i roto i tō ’outou ’utuāfare] penei a’e te ’ohipa faufa’a roa a’e tā ’outou e nehenehe e rave, ’o te… orara’a ïa i te ’evanelia ma tō ’outou ’ā’au ato’a. ’O teie te rāve’a rahi nō te fāna’o i te hoara’a o te Vārua Maita’i. ’Aita e tītauhia ia ’outou ’ia maita’i hope roa, e tāmata noa rā ma te itoito—’e e ’imi i te fa’a’orera’a hara nā roto i te Tāra’ehara a te Fa’aora i te mau taime ato’a e turori ’outou » (Ha’api’ira’a mai tā te Fa’aora, 13).

Nō teie tumu vau i haere mai ai, nā Yongsung Kim