“Mga Hunahuna nga Hinumduman: Ang Tabernakulo ug Sakripisyo,” Dali, Sunod Kanako––Alang sa mga Indibidwal ug mga Pamilya: Daang Tugon 2022 (2021)
“Mga Hunahuna nga Hinumduman: Ang Tabernakulo ug Sakripisyo,” Dali, Sunod Kanako––Alang sa mga Indibidwal ug mga Pamilya: 2022
Mga Hunahuna nga Hinumduman
Ang Tabernakulo ug Sakripisyo
Samtang magbasa kita sa Daang Tugon, usahay makakita kita og tag-as nga mga tudling mahitungod sa mga butang nga klarong importante sa Ginoo apan mabati nga dili dayon mapuslanon kanato karon. Ang Exodo 25–30; 35–40; Levitico 1–9; 16–17 mao ang mga ehemplo. Kini nga mga kapitulo detalyadong naghulagway sa tabernakulo sa Israel diha sa kamingawan ug sa mga pagsakripisyo og hayop nga gipahigayon didto.1 Ang tabernakulo usa ka madala-dala nga templo, ang pinuy-anan sa Ginoo taliwala sa Iyang katawhan.
Ang atong moderno nga mga templo adunay pagkasusama sa tabernakulo sa Israel, apan siguradong wala kini motakdo sa paghulagway niini diha sa Exodo. Ug dili kita mopatay og mga hayop sa atong mga templo—ang Pag-ula sa Manluluwas mitapos sa pagsakripisyo og hayop sobra 2,000 ka tuig na ang milabay. Apan bisan pa niini nga mga kalahian, bililhon kaayo karon ang pagbasa mahitungod sa mga pamaagi sa pagsimba sa karaang Israel, ilabi na kon ato kining tan-awon sa samang paagi sa pagtan-aw niini sa katawhan sa Dios diha sa Basahon ni Mormon—isip usa ka paagi “sa paglig-on sa ilang hugot nga pagtuo diha kang Kristo” (Alma 25:16; tan-awa usab sa Jacob 4:5; Jarom 1:11). Kon atong masabtan ang simbolismo sa tabernakulo ug pagsakripisyo og hayop, makaangkon kita og espirituhanon nga mga panabut nga makalig-on usab sa atong pagtuo ni Kristo.
Paghulagway sa mga Israelihanon nga nagdala og nati nga karnero ngadto sa tabernakulo, ni Robert T. Barrett
Ang Tabernakulo Molig-on sa Pagtuo diha ni Jesukristo
Sa dihang ang Dios misugo kang Moises sa pagtukod og tabernakulo sa kampo sa mga Israelihanon, misulti Siya sa katuyoan niini: “aron ako magapuyo sa taliwala nila” (Exodo 25:8). Sulod sa tabernakulo, ang presensya sa Dios girepresenta sa arka sa pakigsaad—usa ka kahoy nga kahon, giputos og bulawan, nga naglangkob sa sinulat nga talaan sa pakigsaad sa Dios sa Iyang katawhan (tan-awa sa Exodo 25:10–22). Ang arka gibutang sa labing balaan, kinasuloran nga lawak, gihimulag gikan sa tanang parte sa tabernakulo pinaagi sa usa ka tabil. Kini nga tabil nagsimbolo sa atong pagkahimulag gikan sa presensya sa Dios tungod sa Pagkapukan.
Gawas ni Moises, nasayud kita og usa lang ka tawo nga mahimong mosulod nianang “dapit nga labing balaan” (Exodo 26:34)—ang labawng sacerdote [high priest]. Sama sa ubang mga pari, kinahanglan una nga siya mahugasan ug madihogan (tan-awa sa Exodo 40:12–13) ug masul-oban sa sagrado nga sinina nga nagsimbolo sa iyang katungdanan (tan-awa sa Exodo 28). Kausa sa usa ka tuig, sa adlaw nga gitawag og Adlaw sa Pagtabon sa Sala, ang labawng sacerdote mohalad og mga sakripisyo alang sa mga tawo sa dili pa mosulod nga mag-inusara ngadto sa tabernakulo. Diha sa tabil, magsunog siya og incienso (tan-awa sa Levitico 16:12). Ang gipahumotan nga aso nga mosaka ngadto sa langit nagrepresentar sa mga pag-ampo sa mga tawo nga misaka ngadto sa Dios (tan-awa sa Salmo 141:2). Dayon ang labawng sacerdote, magdala sa dugo gikan sa usa ka hayop nga gisakripisyo, moagi sa tabil ug moduol sa trono sa Dios, nga gisimbolohan sa arka sa pakigsaad (tan-awa sa Levitico 16:14–15).
Nasayud sa unsay imong nahibaloan mahitungod ni Jesukristo ug sa Iyang tahas diha sa plano sa Langitnong Amahan, makita ba nimo kon sa unsang paagi ang tabernakulo nagpunting kanato ngadto sa Manluluwas? Sama nga ang tabernakulo, ug ang arka sulod niini, nagrepresentar sa presensya sa Dios taliwala sa Iyang katawhan, si Jesukristo mao ang presensya sa Dios taliwala sa Iyang katawhan (tan-awa sa Juan 1:14). Sama sa labawng sacerdote, si Jesukristo mao ang Tigpataliwala tali kanato ug sa Dios nga Amahan. Miagi Siya sa tabil aron mohimo og pangamuyo alang kanato pinaagi sa dugo sa Iyang kaugalingong sakripisyo (tan-awa sa Mga Hebreohanon 8–10).
Pipila sa mga aspeto sa tabernakulo sa Israel tingali morag pamilyar kanimo, ilabi na kon nakaadto ka na sa templo aron sa pagdawat sa imong kaugalingong mga ordinansa. Sama sa labing balaan nga dapit sa tabernakulo, ang celestial nga lawak sa templo nagrepresentar sa presensya sa Dios. Aron makasulod, kinahanglan una kitang mahugasan ug madihogan. Mosul-ob kita og sagrado nga sinina. Mag-ampo kita sa usa ka altar diin ang mga pag-ampo mosaka ngadto sa Dios. Ug sa katapusan moagi kita sa tabil padulong sa presensya sa Dios.
Tingali ang labing importante nga pagkasusama tali sa moderno nga mga templo ug sa karaang tabernakulo mao nga kining duha, kon sakto nga nasabtan, parehong mopalig-on sa atong pagtuo diha ni Jesukristo ug mopuno kanato og pasalamat alang sa Iyang maulaong sakripisyo. Gusto sa Dios nga ang tanan Niyang mga anak mosulod ngadto sa Iyang presensya; gusto Siya og “usa ka gingharian sa mga sacerdote [pari]” ug mga paring babaye (Exodo 19:6). Apan ang atong mga sala makapugong kanato sa pag-angkon niana nga panalangin, kay “walay mahugaw nga butang nga makapuyo uban sa Dios” (1 Nephi 10:21). Mao nga ang Dios nga Amahan mipadala ni Jesukristo, ang atong “labawng sacerdote sa mga maayong butang nga nanagpangabut” (Mga Hebreohanon 9:11). Miabli Siya sa tabil alang kanato ug nagtugot sa tanan nga katawhan sa Dios nga “manuol kita sa trono sa grasya, aron makadawat kitag kalooy” (Mga Hebreohanon 4:16).
Karon, ang katuyoan sa mga templo labaw pa kay sa pag-angkon og kahimayaan alang sa atong kaugalingon. Human makadawat sa atong kaugalingon nga mga ordinansa, mahimo kitang morepresentar sa atong katigulangan, puli nga modawat og mga ordinansa alang kanila. Sa usa ka pagsabot, mamahimo kitang sama sa karaang labaw nga sacerdote [high priest]—ug ang Dakong Labawng Sacerdote—miabli sa agianan padulong sa presensya sa Dios alang sa uban.
Ang Sakripisyo Naglig-on sa Pagtuo diha ni Jesukristo
Ang mga baruganan sa pag-ula og pakig-uli kusganong gitudlo sa karaang gawi sa pagsakripisyo og hayop, nga nag-una pa kaayo sa balaod ni Moises. Tungod sa gipahiuli nga ebanghelyo, nasayod kita nga si Adan ug Eva mihalad og sakripisyo, nakasabot sa simbolikanhong pagpunting niini ngadto sa sakripisyo sa Manluluwas, ug mitudlo niini ngadto sa ilang mga anak (tan-awa sa Moises 5:4–12; tan-awa usab sa Genesis 4:4).
Ang simbolismo sa pagsakripisyo og hayop tingali daw labing makaguol sa Adlaw sa Pagtabon sa Sala sa karaang Israel (“Yom Kippur” sa Hebreohanon). Ang panginahanglan alang niining tinuig nga seremonya gipahayag diha sa Levitico 16:30: “Niining adlawa pagabuhaton ang pagtabon-sa-sala alang kaninyo aron sa paghinlo kaninyo; mamahinlo kamo gikan sa tanan ninyo nga mga sala sa atubangan sa Ginoo.” Sa ingon ang presensya sa Dios magpabilin taliwala sa katawhan. Kini nga pagtabon sa sala nahimo pinaagi sa lain-laing seremonya. Sa usa niini, usa ka kanding gipatay isip usa ka halad alang sa mga sala sa mga tawo, ug ang labawng sacerdote midala sa dugo sa kanding ngadto sa labing balaan nga dapit. Wala madugay, ang labawng sacerdote mibutang sa iyang mga kamot sa usa ka buhi nga kanding ug mikumpisal sa mga sala sa mga anak sa Israel—simbolikanhong mibalhin niadto nga mga sala ngadto sa kanding. Ang kanding dayon gipalayas gikan sa kampo sa Israel.
Niini nga ritwal, ang mga kanding nagsimbolo ni Jesukristo, nga mipuli sa makasasala nga katawhan. Ang sala dili gayud tugotan diha sa presensya sa Dios. Apan imbis nga laglagon o palayason ang mga makasasala, ang Dios mihatag og laing paagi—usa ka kanding hinoon ang patyon o palayason. “Ug kadtong kanding magadala sa ibabaw niya sa ilang tanan nga kasal-anan” (Levitico 16:22).
Ang simbolismo niini nga mga ritwal nagpunting ngadto sa paagi nga gihatag sa Dios aron madala kita og balik sa Iyang presensya—si Jesukristo ug ang Iyang Pag-ula. Ang Manluluwas “[mipas-an sa] atong kasakitan, ug gipas-an niya ang atong mga kasub-anan,” bisan “ang kasal-anan nato nga tanan” (Isaias 53:4, 6). Mibarog Siya puli kanato, mihatag sa Iyang kinabuhi aron ibayad sa silot sa sala, ug dayon mibuntog sa kamatayon pinaagi sa Iyang Pagkabanhaw (tan-awa sa Mosiah 15:8–9). Ang sakripisyo ni Jesukristo mao ang “mahinungdanon ug kataposan nga sakripisyo; oo, dili usa ka sakripisyo sa tawo, ni mananap” apan hinoon “usa ka walay kinutuban ug walay kataposan nga sakripisyo” (Alma 34:10). Siya ang katumanan sa tanan nga gipunting sa karaang mga sakripisyo.
Tungod niini nga rason, human mahingpit ang Iyang sakripisyo, miingon Siya, “Kamo dili na mohalad ngari kanako nga magpaagas og dugo; oo, ang inyong mga sakripisyo … pagahunungon. … Ug kamo mohalad og usa ka sakripisyo ngari kanako nga usa ka masulub-on nga kasingkasing ug usa ka mahinulsulon nga espiritu” (3 Nephi 9:19–20).
Busa kon makakita ka og mga tudling diha sa Daang Tugon mahitungod sa mga sakripisyo ug sa tabernakulo (o sa kadugayan, sa templo)—ug daghan ka og makit-an niini—hinumdomi nga ang nag-unang katuyoan niining tanan mao ang paglig-on sa imong pagtuo diha sa Mesiyas, si Jesukristo. Tugoti ang imong kasingkasing ug ang imong hunahuna nga nakapunting ngadto Kaniya. Pamalandongi kon unsa ang Iyang gibuhat aron madala ka og balik sa presensya sa Dios—ug unsa ang imong buhaton sa pagsunod Kaniya.