“ວັນທີ 30 ເດືອນພຶດສະພາ–ວັນທີ 5 ເດືອນມິຖຸນາ. ພວກຜູ້ປົກຄອງ 2–4; 6–8; 13–16: ‘ພຣະຜູ້ເປັນເຈົ້າໄດ້ສົ່ງຊາຍຜູ້ໜຶ່ງມາຊ່ວຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 30 ເດືອນພຶດສະພາ–ວັນທີ 5 ເດືອນມິຖຸນາ. ພວກຜູ້ປົກຄອງ 2–4; 6–8; 13–16,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ນາງເດໂບຣາກັບກອງທະຫານ

ຮູບພາບນາງເດໂບຣານຳພາກອງທະຫານອິດສະຣາເອນ, © Lifeway Collection/ໄດ້ຮັບອະນຸຍາດຈາກ goodsalt.com

ວັນທີ 30 ເດືອນພຶດສະພາ–ວັນທີ 5 ເດືອນມິຖຸນາ

ພວກຜູ້ປົກຄອງ 2–4; 6–8; 13–16

“ພຣະຜູ້ເປັນເຈົ້າໄດ້ສົ່ງຊາຍຜູ້ໜຶ່ງມາຊ່ວຍ”

ພຣະຄຳພີເປັນພະຍານເຖິງພຣະເຢຊູຄຣິດ. ໃຫ້ໄຕ່ຕອງວິທີທີ່ເລື່ອງລາວທີ່ທ່ານອ່ານຢູ່ໃນພຣະທຳພວກຜູ້ປົກຄອງຊ່ວຍທ່ານໃຫ້ເຂົ້າໃກ້ພຣະອົງຫລາຍຂຶ້ນແນວໃດ.

ບັນທຶກຄວາມປະທັບໃຈຂອງທ່ານ

ເຮົາທຸກຄົນຮູ້ວ່າ ການເຮັດຄວາມຜິດນັ້ນເປັນແນວໃດ, ຮູ້ສຶກບໍ່ດີກ່ຽວກັບມັນ, ແລະ ແລ້ວກັບໃຈ ແລະ ຕັ້ງໃຈທີ່ຈະປ່ຽນແປງວິທີທາງຂອງເຮົາ. ແຕ່ໃນບາງກໍລະນີ ເຮົາລືມຄວາມຕັ້ງໃຈທີ່ຜ່ານມາ, ແລະ, ເມື່ອເຮົາປະເຊີນກັບການລໍ້ລວງ, ເຮົາອາດພົບເຫັນຕົວເອງເຮັດຄວາມຜິດຄືນອີກ. ແບບແຜນທີ່ໜ້າໂສກເສົ້ານີ້ຄືປະສົບການປົກກະຕິຂອງຊາວອິດສະຣາເອນ ທີ່ບັນຍາຍຢູ່ໃນພຣະທຳພວກຜູ້ປົກຄອງ. ໂດຍທີ່ມີຄວາມເຊື່ອ ແລະ ນະມັດສະການຕາມຊາວການາອານ—ຜູ້ທີ່ພວກເຂົາຄວນຂັບໄລ່ອອກຈາກແຜ່ນດິນ—ຊາວອິດສະຣາເອນໄດ້ລະເມີດພັນທະສັນຍາຂອງພວກເຂົາທີ່ໄດ້ເຮັດໄວ້ກັບພຣະຜູ້ເປັນເຈົ້າ ແລະ ໄດ້ຫັນໜີຈາກການນະມັດສະການພຣະອົງ. ດ້ວຍເຫດນີ້, ພວກເຂົາຈຶ່ງບໍ່ໄດ້ຮັບການປົກປັກຮັກສາ ແລະ ຕົກເປັນຊະເລີຍ. ແລະ ແຕ່ລະເທື່ອທີ່ສິ່ງນີ້ໄດ້ເກີດຂຶ້ນ, ພຣະຜູ້ເປັນເຈົ້າໄດ້ໃຫ້ໂອກາດພວກເຂົາເພື່ອກັບໃຈ ແລະ ໄດ້ສົ່ງຊາຍຜູ້ໜຶ່ງມາຊ່ວຍ, ເປັນຜູ້ນຳພາການທະຫານ ທີ່ເອີ້ນວ່າ “ຜູ້ປົກຄອງ.” ບໍ່ແມ່ນພວກຜູ້ປົກຄອງທຸກຄົນ ຢູ່ໃນພຣະທຳພວກຜູ້ປົກຄອງເປັນຄົນຊອບທຳ, ແຕ່ບາງຄົນໄດ້ໃຊ້ສັດທາອັນຍິ່ງໃຫຍ່ ໃນການປົດປ່ອຍລູກຫລານຂອງອິດສະຣາເອນ ແລະ ໄດ້ນຳພວກເຂົາກັບຄືນສູ່ຄວາມສຳພັນແຫ່ງພັນທະສັນຍາທີ່ໄດ້ເຮັດໄວ້ກັບພຣະຜູ້ເປັນເຈົ້າ. ເລື່ອງເຫລົ່ານີ້ເຕືອນເຮົາວ່າ ບໍ່ວ່າແມ່ນຫຍັງກໍຕາມທີ່ພາເຮົາໜີໄປຈາກພຣະເຢຊູຄຣິດ, ແຕ່ພຣະອົງເປັນພຣະຜູ້ໄຖ່ຂອງອິດສະຣາເອນ ແລະ ເຕັມພຣະໄທທີ່ຈະປົດປ່ອຍເຮົາ ແລະ ຍິນດີຕ້ອນຮັບເຮົາຄືນສູ່ພຣະອົງສະເໝີ.

ສຳລັບພາບລວມຂອງພຣະທຳພວກຜູ້ປົກຄອງ, ໃຫ້ເບິ່ງ “Exodus, book of” ໃນ Bible Dictionary.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ພວກຜູ້ປົກຄອງ 2:1–19; 4 :1–16

ພຣະຜູ້ເປັນເຈົ້າສະເໜີການປົດປ່ອຍ ເມື່ອເຮົາຫັນເຫ.

ພຣະທຳພວກຜູ້ປົກຄອງສາມາດໃຊ້ເປັນຄຳເຕືອນສຳລັບເຮົາ: ແມ່ນແຕ່ຫລັງຈາກທີ່ເຮົາເຄີຍມີປະສົບການກັບອຳນາດຂອງພຣະຜູ້ເປັນເຈົ້າໃນຊີວິດຂອງເຮົາມາແລ້ວກໍຕາມ, ແຕ່ກໍເປັນໄປໄດ້ທີ່ຈະຕົກໄປ. ພຣະທຳເຫລັ້ມນີ້ສາມາດເປັນກຳລັງໃຈໃຫ້ແກ່ຜູ້ທີ່ຫັນເຫ, ເພາະພຣະຜູ້ເປັນເຈົ້າສະເໜີຊ່ອງທາງໃຫ້ຫວນກັບ. ຍົກຕົວຢ່າງ, ຂະນະທີ່ທ່ານອ່ານ ພວກຜູ້ປົກຄອງ 2:1–19, ໃຫ້ຊອກຫາການກະທຳທີ່ພາຊາວອິດສະຣາເອນໃຫ້ໜີໄປຈາກພຣະຜູ້ເປັນເຈົ້າ ແລະ ວິທີທີ່ພຣະຜູ້ເປັນເຈົ້າໄດ້ປົດປ່ອຍພວກເຂົາ. ຂໍ້ພຣະຄຳພີເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ? ທ່ານສາມາດເຮັດຫຍັງແດ່ເພື່ອຈະຍັງຄົງຊື່ສັດຕໍ່ພຣະອົງຢ່າງສະເໝີຕົ້ນສະເໝີປາຍຫລາຍຍິ່ງຂຶ້ນ?

ທ່ານຈະພົບເຫັນແບບແຜນຂອງການກະບົດ, ຄວາມໂສກເສົ້າ, ແລະ ການປົດປ່ອຍ ເທື່ອແລ້ວເທື່ອອີກ ຕະຫລອດທົ່ວພຣະທຳພວກຜູ້ປົກຄອງ (ເບິ່ງ ໂດຍສະເພາະ ບົດທີ 3, 4, 6, ແລະ 13). ຂະນະທີ່ທ່ານອ່ານພຣະທຳພວກຜູ້ປົກຄອງ, ໃຫ້ໄຕ່ຕອງສິ່ງທີ່ພວກຜູ້ປົກຄອງໄດ້ເຮັດເພື່ອປົດປ່ອຍຊາວອິດສະຣາເອນ ແລະ ວິທີທີ່ພຣະຜູ້ຊ່ວຍໃຫ້ລອດຊ່ວຍທ່ານ ເມື່ອທ່ານຕ້ອງການ ການປົດປ່ອຍ.

ຕົວຢ່າງໜຶ່ງທີ່ໜ້າສັງເກດກ່ຽວກັບຄົນໜຶ່ງທີ່ໄດ້ຊ່ວຍປົດປ່ອຍຊາວອິດສະຣາເອນແມ່ນນາງເດໂບຣາ. ໃຫ້ອ່ານກ່ຽວກັບນາງ ຢູ່ໃນ ພວກຜູ້ປົກຄອງ 4:1–16, ແລະ ສັງເກດເບິ່ງອິດທິພົນທີ່ນາງມີຕໍ່ຜູ້ຄົນທີ່ຢູ່ອ້ອມຮອບນາງ. ຖ້ອຍຄຳ ຫລື ການກະທຳໃດຂອງນາງເດໂບຣາ ທີ່ສະແດງໃຫ້ທ່ານເຫັນວ່າ ນາງມີສັດທາໃນພຣະຜູ້ເປັນເຈົ້າ? ທ່ານຮູ້ສຶກວ່າ ນາງເດໂບຣາໝາຍເຖິງສິ່ງໃດ ຕາມຄຳຖາມຂອງນາງຢູ່ໃນ ຂໍ້ທີ 14: “ພຣະຜູ້ເປັນເຈົ້າບໍ່ໄດ້ຍ່າງນຳໜ້າເຈົ້າໄປບໍ?”

ເບິ່ງ ແອວມາ 7:13; ຄຳສອນ ແລະ ພັນທະສັນຍາ 84:87–88 ນຳອີກ.

ພວກຜູ້ປົກຄອງ 2:13

ພະບາອານ ແລະ ເຈົ້າແມ່ອັດສະຕາກຄືໃຜ?

ພະບາອານຄື ພຣະເຈົ້າແຫ່ງດິນຟ້າອາກາດ, ແລະ ເຈົ້າແມ່ອັດສະຕາກຄື ພຣະເຈົ້າຍິງແຫ່ງຄວາມອຸດົມສົມບູນ. ການນະມັດສະການພຣະເຈົ້າສອງອົງນີ້ ບົ່ງບອກວ່າ ແຜ່ນດິນທີ່ອຸດົມສົມບູນ ແລະ ຜູ້ຄົນທີ່ມີລູກດົກມີຄວາມສຳຄັນຫລາຍຂະໜາດໃດຕໍ່ຊາວການາອານ. ວິທີທີ່ຜູ້ຄົນນະມັດສະການພຣະເຈົ້າສອງອົງນີ້ ແລະ ພຣະເຈົ້າປອມອື່ນໆ—ບາງເທື່ອແມ່ນຮ່ວມດ້ວຍການຮ່ວມສຳພັນທາງເພດທີ່ຜິດສິນທຳ ແລະ ການຖວາຍເດັກນ້ອຍ—ຊຶ່ງເຮັດໃຫ້ພຣະຜູ້ເປັນເຈົ້າພຣະພິໂລດຫລາຍທີ່ສຸດ.

ພວກຜູ້ປົກຄອງ 6–8

ພຣະຜູ້ເປັນເຈົ້າສາມາດທຳການອັດສະຈັນເມື່ອເຮົາໄວ້ວາງໃຈໃນວິທີທາງຂອງພຣະອົງ.

ເພື່ອຈະໄດ້ຮັບສິ່ງອັດສະຈັນຂອງພຣະຜູ້ເປັນເຈົ້າໃນຊີວິດຂອງເຮົາ, ເຮົາຕ້ອງໄວ້ວາງໃຈໃນວິທີທາງຂອງພຣະອົງ, ແມ່ນແຕ່ເມື່ອວິທີທາງຂອງພຣະອົງເບິ່ງຄືຜິດປົກກະຕິ. ເລື່ອງລາວກ່ຽວກັບກີເດໂອນ, ຢູ່ໃນ ພວກຜູ້ປົກຄອງ 6–8, ເປັນຕົວຢ່າງທີ່ດີກ່ຽວກັບເລື່ອງນີ້. ພຣະຜູ້ເປັນເຈົ້າທຳການອັດສະຈັນທີ່ບໍ່ໜ້າເປັນໄປໄດ້ແນວໃດ ເມື່ອກອງທະຫານຂອງກີເດໂອນເອົາຊະນະຊາວມີດີອານ? ທ່ານຮູ້ສຶກວ່າແມ່ນຫຍັງທີ່ພຣະຜູ້ເປັນເຈົ້າພະຍາຍາມສິດສອນທ່ານ? ທ່ານເຄີຍເຫັນພຣະຜູ້ເປັນເຈົ້າທຳງານໃນທາງທີ່ບໍ່ໜ້າເປັນໄປໄດ້ແນວໃດ?

ເບິ່ງ Russell M. Nelson, “With God Nothing Shall Be Impossible,” Ensign, May 1988, 33–35 ນຳອີກ.

ພວກຜູ້ປົກຄອງ 13–16

ຄວາມເຂັ້ມແຂງມີມາຈາກຄວາມຊື່ສັດຕໍ່ພັນທະສັນຍາຂອງເຮົາທີ່ໄດ້ເຮັດໄວ້ກັບພຣະເຈົ້າ.

ແຊມຊັນໄດ້ສູນເສຍຄວາມເຂັ້ມແຂງທາງຮ່າງກາຍ ແລະ ທາງວິນຍານ ຍ້ອນການລະເມີດພັນທະສັນຍາຂອງລາວທີ່ໄດ້ເຮັດໄວ້ກັບພຣະເຈົ້າ, ລວມທັງອັນທີ່ກ່ຽວຂ້ອງກັບຊາວນາຊີຣີນຳອີກ (ສຳລັບລາຍລະອຽດກ່ຽວກັບຊາວນາຊີຣີ, ໃຫ້ເບິ່ງ ຈົດບັນຊີ 6:1–6; ພວກຜູ້ປົກຄອງ 13:7). ຂະນະທີ່ທ່ານອ່ານເລື່ອງລາວຂອງແຊມຊັນຢູ່ໃນ ພວກຜູ້ປົກຄອງ 13–16, ໃຫ້ໄຕ່ຕອງພັນທະສັນຍາແຕ່ລະຢ່າງ ທີ່ທ່ານໄດ້ເຮັດ. ທ່ານໄດ້ຮັບພອນດ້ວຍຄວາມເຂັ້ມແຂງ ຍ້ອນທ່ານໄດ້ຮັກສາພັນທະສັນຍາເຫລົ່ານັ້ນແນວໃດ? ທ່ານຮຽນຮູ້ຫຍັງແດ່ຈາກເລື່ອງລາວຂອງແຊມຊັນ ທີ່ດົນໃຈທ່ານໃຫ້ຊື່ສັດຕໍ່ພັນທະສັນຍາຂອງທ່ານທີ່ໄດ້ເຮັດໄວ້ກັບພຣະເຈົ້າ?

Samson Puts Down the Pillars [ແຊມຊັນວາງເສົາລົງ], ໂດຍ ເຈມສ໌ ທີໂຊ ແລະ ຄົນອື່ນໆ

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ພວກຜູ້ປົກຄອງ 2:10.ຫລັງຈາກໂຢຊວຍເສຍຊີວິດແລ້ວ, ຊາວອິດສະຣາເອນລຸ້ນຕໍ່ໄປໄດ້ “ລືມໄລພຣະຜູ້ເປັນເຈົ້າ.” ໃຫ້ເວົ້າລົມກັບຄອບຄົວຂອງທ່ານກ່ຽວກັບວິທີທີ່ເຂົາເຈົ້າຮູ້ຈັກພຣະຜູ້ເປັນເຈົ້າ ແລະ “ສິ່ງທີ່ພຣະອົງ [ໄດ້] ກະທຳ” ເພື່ອເຂົາເຈົ້າ. ທ່ານຈະແນ່ໃຈໄດ້ແນວໃດວ່າ ຄວາມຮູ້ນີ້ຈະຖືກຮັກສາໄວ້ໃຫ້ຄົນລຸ້ນຫລັງ?

ພວກຜູ້ປົກຄອງ 3:7–10.ຂໍ້ເຫລົ່ານີ້ສະຫລຸບແບບແຜນທີ່ເກີດຂຶ້ນເລື້ອຍໆຢູ່ໃນພຣະທຳພວກຜູ້ປົກຄອງ. ຂະນະທີ່ສະມາຊິກໃນຄອບຄົວຂອງທ່ານອ່ານຂໍ້ເຫລົ່ານີ້, ເຂົາເຈົ້າສາມາດຊີ້ບອກສິ່ງທີ່ຊາວອິດສະຣາເອນໄດ້ເຮັດ ໃນການໜີໄປຈາກພຣະຜູ້ເປັນເຈົ້າ ແລະ ສິ່ງທີ່ພຣະຜູ້ເປັນເຈົ້າໄດ້ເຮັດໃນການປົດປ່ອຍພວກເຂົາ. ແມ່ນຫຍັງທີ່ອາດເຮັດໃຫ້ເຮົາລືມໄລພຣະຜູ້ເປັນເຈົ້າ? ພຣະອົງຈະປົດປ່ອຍເຮົາແນວໃດ? ເຮົາຈະສາມາດຊື່ສັດຕໍ່ພຣະອົງຢ່າງສະເໝີຕົ້ນສະເໝີປາຍຫລາຍຍິ່ງຂຶ້ນໄດ້ແນວໃດ?

ພວກຜູ້ປົກຄອງ 6:13–16, 25–30.ກີເດໂອນໄດ້ສະແດງຄວາມກ້າຫານອັນຍິ່ງໃຫຍ່ ໃນການເຊື່ອຟັງພຣະຜູ້ເປັນເຈົ້າ, ເຖິງແມ່ນວ່າການກະທຳຂອງລາວບໍ່ໄດ້ເປັນທີ່ນິຍົມກໍຕາມ. ພຣະຜູ້ເປັນເຈົ້າໄດ້ຂໍໃຫ້ເຮົາເຮັດຫຍັງ ທີ່ຄົນອື່ນບໍ່ເຫັນດ້ວຍ? ພຣະຄຳຂອງພຣະຜູ້ເປັນເຈົ້າຕໍ່ກີເດໂອນຢູ່ໃນ ຂໍ້ທີ 13–16 ດົນໃຈເຮົາໃຫ້ເຮັດສິ່ງທີ່ຖືກຕ້ອງແນວໃດ?

ພວກຜູ້ປົກຄອງ 7.ທ່ານຈະຫລິ້ນລະຄອນກ້ອມ ຫລື ເຮັດກິດຈະກຳທີ່ສ້າງສັນໄດ້ບໍ ເພື່ອຊ່ວຍຄອບຄົວຂອງທ່ານໃຫ້ຮຽນຮູ້ຈາກປະສົບການຂອງກອງທະຫານຂອງກີເດໂອນ ທີ່ບັນຍາຍຢູ່ໃນບົດນີ້? ທ່ານຈະນຳໃຊ້ພຣະຄຳຂອງພຣະຜູ້ເປັນເຈົ້າຢູ່ໃນບົດນີ້ (ເບິ່ງ, ຍົກຕົວຢ່າງ, ຂໍ້ທີ 2 ແລະ 15) ໃນຊີວິດຂອງທ່ານແນວໃດ?

ພວກຜູ້ປົກຄອງ 13:5.ພັນທະສັນຍາຂອງແຊມຊັນທີ່ໄດ້ເຮັດໄວ້ກັບພຣະຜູ້ເປັນເຈົ້າໄດ້ໃຫ້ຄວາມເຂັ້ມແຂງແກ່ລາວ, ຄືກັນກັບພັນທະສັນຍາຂອງເຮົາ ທີ່ໃຫ້ຄວາມເຂັ້ມແຂງແກ່ເຮົາ. ຄອບຄົວຂອງທ່ານອາດມັກທີ່ຈະອອກກຳລັງກາຍບາງຢ່າງ ແລະ ສົນທະນາກັນເຖິງວິທີທີ່ການອອກກຳລັງກາຍສາມາດເຮັດໃຫ້ເຮົາເຂັ້ມແຂງຂຶ້ນແນວໃດ. ເຮົາສາມາດເຮັດສິ່ງໃດເພື່ອຊ່ວຍໃຫ້ມີຄວາມເຂັ້ມແຂງທາງວິນຍານຫລາຍຂຶ້ນໄດ້? ສຳລັບແນວຄິດບາງຢ່າງ, ສະມາຊິກໃນຄອບຄົວສາມາດອ່ານ ໂມໄຊຢາ 18:8–10; ຄຳສອນ ແລະ ພັນທະສັນຍາ 20:77, 79. ການຮັກສາພັນທະສັນຍາຂອງເຮົາ ເຮັດໃຫ້ເຮົາມີຄວາມເຂັ້ມແຂງທາງວິນຍານແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສຶກສາສ່ວນຕົວ

ກະທຳຕາມສິ່ງທີ່ທ່ານຮຽນຮູ້. ຂະນະທີ່ທ່ານສຶກສາ, ໃຫ້ຖາມຕົວເອງວ່າຈະນຳໃຊ້ສິ່ງທີ່ທ່ານຮຽນຮູ້, ແລະ ແລ້ວສັນຍາທີ່ຈະລົງມືປະຕິບັດແນວໃດ. ໃຫ້ພຣະວິນຍານນຳພາທ່ານ. (ເບິ່ງ Teaching in the Savior’s Way, 35.)