“ວັນທີ 13–19 ເດືອນມິຖຸນາ. 1 ຊາມູເອນ 8–10; 13; 15–18: ‘ພຣະຜູ້ເປັນເຈົ້າເປັນເຈົ້າຂອງສະໜາມຮົບ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 13–19 ເດືອນມິຖຸນາ. 1 ຊາມູເອນ 8–10; 13; 15–18,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
David and Goliath [ດາວິດ ແລະ ໂກລີອາດ], ໂດຍ ສະຕີບ ແນເຕີຄ໊ອດ
ວັນທີ 13–19 ເດືອນມິຖຸນາ
1 ຊາມູເອນ 8–10; 13; 15–18
“ພຣະຜູ້ເປັນເຈົ້າເປັນເຈົ້າຂອງສະໜາມຮົບ”
ຄຳແນະນຳຢູ່ໃນໂຄງຮ່າງນີ້ສາມາດຊ່ວຍທ່ານໃຫ້ຊອກເຫັນຫລັກທຳທີ່ສຳຄັນບາງຢ່າງຢູ່ໃນບົດເຫລົ່ານີ້ໄດ້. ທ່ານອາດພົບເຫັນຫລັກທຳຢ່າງອື່ນໆຂະນະທີ່ທ່ານສຶກສາ.
ບັນທຶກຄວາມປະທັບໃຈຂອງທ່ານ
ນັບຕັ້ງແຕ່ເຜົ່າອິດສະຣາເອນໄດ້ໄປຕັ້ງຖິ່ນຖານຢູ່ໃນແຜ່ນດິນແຫ່ງຄຳສັນຍາ, ຊາວຟີລິດສະຕິນກໍໄດ້ທຽວຂູ່ເຂັນຄວາມປອດໄພຂອງພວກເຂົາຢ່າງບໍ່ລົດລະ. ຫລາຍເທື່ອໃນອະດີດ, ພຣະຜູ້ເປັນເຈົ້າໄດ້ປົດປ່ອຍຊາວອິດສະຣາເອນຈາກສັດຕູຂອງພວກເຂົາ. ແຕ່ບັດນີ້ ພວກຜູ້ປົກຄອງຂອງຊາດອິດສະຣາເອນໄດ້ຮຽກຮ້ອງວ່າ, “ພວກຂ້ານ້ອຍຕ້ອງການກະສັດ … [ເພື່ອ] ນຳໜ້າພວກຂ້ານ້ອຍອອກໄປສູ່ສະໜາມຮົບ” (1 ຊາມູເອນ 8:19–20). ພຣະຜູ້ເປັນເຈົ້າໄດ້ຍິນຍອມ, ແລະ ໂຊນໄດ້ຖືກເຈີມໃຫ້ເປັນກະສັດ. ແຕ່ເມື່ອຍັກໃຫຍ່ໂກລີອາດໄດ້ມາຮ້ອງທ້າກອງທະຫານຊາວອິດສະຣາເອນ, ໂຊນ—ທັງກອງທະຫານຂອງເພິ່ນ—ໄດ້ “ມີຄວາມຢ້ານກົວຫລາຍ” (1 ຊາມູເອນ 17:11). ໃນມື້ນັ້ນ, ບໍ່ແມ່ນກະສັດໂຊນທີ່ໄດ້ຊ່ວຍເຫລືອຊາວອິດສະຣາເອນ ແຕ່ແມ່ນທ້າວນ້ອຍຄົນລ້ຽງແກະຊື່ ດາວິດ, ຜູ້ບໍ່ໄດ້ສວມເຄື່ອງປ້ອງກັນຕົວ ແຕ່ໄດ້ນຸ່ງຫົ່ມດ້ວຍສັດທາໃນພຣະຜູ້ເປັນເຈົ້າ. ການຕໍ່ສູ້ເທື່ອນີ້ພິສູດໃຫ້ຊາວອິດສະຣາເອນ, ແລະ ທຸກຄົນທີ່ຕໍ່ສູ້ທາງວິນຍານ, ເຫັນວ່າ “ພຣະຜູ້ເປັນເຈົ້າບໍ່ຈຳເປັນໃຊ້ດາບ ແລະ ຫອກ” ແລະ ວ່າ “ພຣະຜູ້ເປັນເຈົ້າເປັນເຈົ້າຂອງສະໜາມຮົບ” (1 ຊາມູເອນ 17:47).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດເປັນກະສັດຂອງເຮົາ.
ຂະນະທີ່ທ່ານອ່ານ 1 ຊາມູເອນ 8, ໃຫ້ສັງເກດເບິ່ງວິທີທີ່ພຣະຜູ້ເປັນເຈົ້າຮູ້ສຶກກ່ຽວກັບຄວາມປາດຖະໜາຂອງຊາວອິດສະຣາເອນທີ່ຈະຢາກມີກະສັດ ທີ່ນອກເໜືອໄປກວ່າພຣະອົງ. ການເລືອກພຣະຜູ້ເປັນເຈົ້າໃຫ້ເປັນ “ເຈົ້າຊີວິດ [ຂອງທ່ານ]” ໝາຍຄວາມວ່າແນວໃດ? (1 ຊາມູເອນ 8:7). ທ່ານກໍຄວນພິຈາລະນານຳອີກເຖິງວິທີທີ່ທ່ານຖືກລໍ້ລວງໃຫ້ເຮັດຕາມການນິຍົມທີ່ບໍ່ຊອບທຳຂອງໂລກ ແທນທີ່ຈະຕິດຕາມພຣະຜູ້ເປັນເຈົ້າ. ທ່ານຈະສະແດງໃຫ້ເຫັນວ່າ ທ່ານຢາກໃຫ້ພຣະເຢຊູຄຣິດເປັນກະສັດນິລັນດອນຂອງທ່ານແນວໃດ?
ເບິ່ງ ພວກຜູ້ປົກຄອງ 8:22–23; ໂມໄຊຢາ 29:1–36; Neil L. Andersen, “Overcoming the World,” Liahona, May 2017, 58–62 ນຳອີກ.
1 ຊາມູເອນ 9:15–17; 10:1–12; 16:1–13
ພຣະເຈົ້າເອີ້ນຜູ້ຄົນໂດຍການທຳນາຍ ເພື່ອຮັບໃຊ້ໃນອານາຈັກຂອງພຣະອົງ.
ພຣະເຈົ້າເລືອກໂຊນ ແລະ ດາວິດ ໃຫ້ເປັນກະສັດ ຜ່ານທາງການພະຍາກອນ ແລະ ການເປີດເຜີຍ (ເບິ່ງ 1 ຊາມູເອນ 9:15–17; 10:1–12; 16:1–13). ນີ້ກໍເປັນວິທີທີ່ພຣະອົງເອີ້ນຊາຍ ແລະ ຍິງໃຫ້ຮັບໃຊ້ໃນສາດສະໜາຈັກຂອງພຣະອົງ ໃນທຸກວັນນີ້ຄືກັນ. ທ່ານຮຽນຮູ້ຫຍັງແດ່ຈາກເລື່ອງລາວເຫລົ່ານີ້ກ່ຽວກັບຄວາມໝາຍທີ່ວ່າ “ໄດ້ຮັບການເອີ້ນຈາກພຣະເຈົ້າ, ໂດຍການພະຍາກອນ”? (ຫລັກແຫ່ງຄວາມເຊື່ອ 1:5). ພອນຢ່າງໃດແດ່ທີ່ມາຈາກການເອີ້ນ ແລະ ການແຕ່ງຕັ້ງເປັນທາງການໂດຍຜູ້ຮັບໃຊ້ທີ່ມີສິດອຳນາດຂອງພຣະຜູ້ເປັນເຈົ້າ?
ຮູບພາບຊາມູເອນກຳລັງເຈີມໂຊນ, © Lifeway Collection/ໄດ້ຮັບອະນຸຍາດຈາກ goodsalt.com
“ການເຊື່ອຟັງກໍດີກວ່າການຖວາຍ.”
ເຖິງແມ່ນວ່າໂຊນມີຮູບຮ່າງສູງໃຫຍ່, ແຕ່ເພິ່ນຖືຕົວເອງວ່າ “ບໍ່ມີຄວາມສຳຄັນ” ເມື່ອເພິ່ນໄດ້ກາຍເປັນກະສັດ (1 ຊາມູເອນ 15:17). ເຖິງຢ່າງໃດກໍຕາມ, ຂະນະທີ່ເພິ່ນໄດ້ຮັບພອນດ້ວຍຄວາມສຳເລັດຜົນ, ເພິ່ນໄດ້ເລີ່ມເຊື່ອໝັ້ນໃນຕົວເອງຫລາຍຂຶ້ນ ແລະ ເຊື່ອໝັ້ນໃນພຣະຜູ້ເປັນເຈົ້າໜ້ອຍລົງ. ມີຫລັກຖານໃດແດ່ທີ່ທ່ານເຫັນຢູ່ໃນ 1 ຊາມູເອນ 13:5–14; 15? ຖ້າຫາກທ່ານໄດ້ຢູ່ກັບໂຊນໃນເວລານັ້ນ, ທ່ານຈະເວົ້າສິ່ງໃດກັບເພິ່ນ ທີ່ຈະຊ່ວຍເພິ່ນໃຫ້ເອົາຊະນະ “ການກະບົດ” ແລະ “ຄວາມອວດດີ”? (1 ຊາມູເອນ 15:23).
ເບິ່ງ 2 ນີໄຟ 9:28–29; ຮີລາມັນ 12:4–5; ຄຳສອນ ແລະ ພັນທະສັນຍາ 121:39–40; Thomas S. Monson, “Ponder the Path of Thy Feet,” Liahona, Nov. 2014, 86–88 ນຳອີກ.
“ພຣະຜູ້ເປັນເຈົ້າເບິ່ງພາຍໃນຈິດໃຈ.”
ມີທາງໃດແດ່ທີ່ຜູ້ຄົນຕັດສິນຄົນອື່ນໂດຍ “ການເບິ່ງພາຍນອກ”? ຄຳວ່າ “ເບິ່ງພາຍໃນຈິດໃຈ,” ດັ່ງທີ່ພຣະຜູ້ເປັນເຈົ້າເບິ່ງ ໝາຍຄວາມວ່າແນວໃດ? (1 ຊາມູເອນ 16:7). ໃຫ້ພິຈາລະນາວິທີທີ່ທ່ານສາມາດນຳໃຊ້ຫລັກທຳຂໍ້ນີ້ໃນທາງທີ່ທ່ານເບິ່ງຄົນອື່ນ—ແລະ ເບິ່ງຕົວເອງແນວໃດ. ການເຮັດແນວນີ້ມີຜົນກະທົບຕໍ່ການປະຕິສຳພັນ ຫລື ຄວາມສຳພັນຂອງທ່ານກັບຄົນອື່ນແນວໃດ?
ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ເຮົາສາມາດເອົາຊະນະການທ້າທາຍທຸກຢ່າງ.
ຂະນະທີ່ທ່ານອ່ານ 1 ຊາມູເອນ 17, ໃຫ້ໄຕ່ຕອງຖ້ອຍຄຳຂອງຫລາຍຄົນຢູ່ໃນບົດນີ້ (ເບິ່ງ ລາຍຊື່ຢູ່ຂ້າງລຸ່ມ). ຖ້ອຍຄຳຂອງເຂົາເຈົ້າບົ່ງບອກເຖິງຕົວເຂົາເຈົ້າແນວໃດ? ຖ້ອຍຄຳຂອງດາວິດສະແດງໃຫ້ເຫັນເຖິງຄວາມກ້າຫານ ແລະ ສັດທາຂອງເພິ່ນໃນພຣະຜູ້ເປັນເຈົ້າແນວໃດ?
-
ໂກລີອາດ: ຂໍ້ທີ 8–10, 43–44
-
ເອລີອາບ: ຂໍ້ທີ 28
-
ໂຊນ: ຂໍ້ທີ 33
-
ດາວິດ: ຂໍ້ທີ 26, 32, 34–37, 39, 45–47
ໃຫ້ໄຕ່ຕອງການຕໍ່ສູ້ສ່ວນຕົວທີ່ທ່ານກຳລັງປະເຊີນຢູ່. ທ່ານສາມາດພົບເຫັນຫຍັງແດ່ຢູ່ໃນ 1 ຊາມູເອນ 17 ທີ່ເພີ່ມຄວາມເຂັ້ມແຂງໃຫ້ສັດທາຂອງທ່ານ ວ່າພຣະຜູ້ເປັນເຈົ້າສາມາດຊ່ວຍເຫລືອທ່ານ?
ເບິ່ງ Gordon B. Hinckley, “Overpowering the Goliaths in Our Lives,” Ensign, May 1983, 46, 51–52 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
1 ຊາມູເອນ 9:15–21; 16:7.ການອ່ານຂໍ້ເຫລົ່ານີ້ພ້ອມດ້ວຍຖ້ອຍຄຳຕໍ່ໄປນີ້ຈາກແອວເດີ ດີເດີ ແອັຟ ອຸກດອບ ສາມາດດົນໃຈການສົນທະນາກ່ຽວກັບເຫດຜົນທີ່ພຣະຜູ້ເປັນເຈົ້າໄດ້ເລືອກໂຊນ ແລະ ດາວິດ: “ຖ້າຫາກເຮົາເບິ່ງຕົນເອງຜ່ານຕາແຫ່ງຄວາມເປັນມະຕະເທົ່ານັ້ນ, ເຮົາຈະບໍ່ເຫັນຕົນເອງດີພໍ. ແຕ່ພຣະບິດາເທິງສະຫວັນຂອງເຮົາເຫັນເຮົາດັ່ງທີ່ເຮົາເປັນຢູ່ ແລະ ສາມາດກາຍເປັນ” (“It Works Wonderfully!” Liahona, Nov. 2015, 23). ບາງທີສະມາຊິກໃນຄອບຄົວຂອງທ່ານສາມາດປ່ຽນຜຽນກັນເວົ້າກ່ຽວກັບຄຸນນະພາບທີ່ດີ ທີ່ເຂົາເຈົ້າເຫັນໃນໃຈຂອງກັນແລະກັນ (ເບິ່ງ 1 ຊາມູເອນ 16:7).
-
1 ຊາມູເອນ 10:6–12.ຕອນໃດທີ່ເຮົາໄດ້ເຫັນພຣະເຈົ້າອວຍພອນບາງຄົນດ້ວຍພະລັງທາງວິນຍານ ໃຫ້ບັນລຸການມອບໝາຍ ຫລື ການເອີ້ນ ຄືກັນກັບທີ່ພຣະອົງໄດ້ອວຍພອນໂຊນ? ປະສົບການໃດແດ່ທີ່ເຮົາສາມາດແບ່ງປັນ ເມື່ອ “ພຣະເຈົ້າປ່ຽນ [ເຮົາ] ເປັນຄົນໃໝ່” ຫລື “ພຣະວິນຍານຂອງພຣະເຈົ້າກໍເຂົ້າຄວບຄຸມ [ເຮົາ]” ໃນການຮັບໃຊ້ພຣະອົງ? (ຂໍ້ທີ 9–10).
-
1 ຊາມູເອນ 17:20–54.ຄອບຄົວຂອງທ່ານອາດມັກການອ່ານເລື່ອງລາວຂອງດາວິດ ແລະ ໂກລີອາດນຳກັນ (“ດາວິດ ແລະ ໂກລີອາດ” ໃນປຶ້ມ ເລື່ອງພຣະຄຳພີເດີມ ສາມາດຊ່ວຍໄດ້) ຫລື ເບິ່ງວິດີໂອ “The Lord Will Deliver Me” (ChurchofJesusChrist.org). ສິ່ງນີ້ສາມາດນຳພາໄປຫາການສົນທະນາກ່ຽວກັບການທ້າທາຍທີ່ເຮົາປະເຊີນ ທີ່ອາດຮູ້ສຶກຄືກັນກັບ “ໂກລີອາດ” ຕໍ່ເຮົາ. ທ່ານຍັງສາມາດຂຽນການທ້າທາຍບາງຢ່າງ ຫລື ແຕ້ມຮູບໂກລີອາດໃສ່ເປົ້າ ແລະ ປ່ຽນຜຽນກັນໂຍນບາງສິ່ງ (ເຊັ່ນ ໝາກບານ ຫລື ເຈ້ຍ) ໃສ່ເປົ້າ.
ມັນອາດເປັນສິ່ງທີ່ໜ້າສົນໃຈ ທີ່ຈະອ່ານກ່ຽວກັບເຄື່ອງປ້ອງກັນ ແລະ ອາວຸດທີ່ໂກລີອາດມີ (ເບິ່ງ ຂໍ້ທີ 4–7). ດາວິດມີຫຍັງ? (ເບິ່ງ ຂໍ້ທີ 38–40, 45–47). ພຣະຜູ້ເປັນເຈົ້າໄດ້ຈັດຫາຫຍັງເພື່ອຊ່ວຍເຮົາໃຫ້ເອົາຊະນະໂກລີອາດຂອງເຮົາ?
-
1 ຊາມູເອນ 18:1–4.ດາວິດ ແລະ ໂຢນາທານເປັນເພື່ອນທີ່ດີຕໍ່ກັນແນວໃດ? ໝູ່ເພື່ອນທີ່ດີເປັນພອນແກ່ເຮົາແນວໃດ? ເຮົາສາມາດເຮັດສິ່ງໃດເພື່ອເປັນເພື່ອນທີ່ດີ—ລວມທັງຕໍ່ສະມາຊິກໃນຄອບຄົວຂອງເຮົາ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.
ການປັບປຸງການສິດສອນຂອງເຮົາ
ສະແດງປະຈັກພະຍານຂອງທ່ານເລື້ອຍໆ. “ການເປັນພະຍານແບບລຽບງ່າຍ ແລະ ຈິງໃຈຂອງທ່ານເຖິງຄວາມຈິງທາງວິນຍານ ສາມາດເປັນອິດທິພົນທີ່ມີພະລັງຕໍ່ [ຄອບຄົວຂອງທ່ານໄດ້]. ປະຈັກພະຍານຈະມີພະລັງຫລາຍທີ່ສຸດເມື່ອມັນກົງໄປກົງມາ ແລະ ຈິງໃຈ. ມັນບໍ່ຈຳເປັນຕ້ອງຄົມຄາຍ ຫລື ຍືດຍາວ” (Teaching in the Savior’s Way, 11).
ຮູບພາບດາວິດ, ໂດຍ ດຽວລີນ ມາສ໌