“ວັນທີ 20–26 ເດືອນມິຖຸນາ. 2 ຊາມູເອນ 5–7; 11–12; 1 ກະສັດ 3; 8; 11: ‘ອານາຈັກຂອງເຈົ້າຈະຄົງຢູ່ຕະຫລອດໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 20–26 ເດືອນມິຖຸນາ. 2 ຊາມູເອນ 5–7; 11–12; 1 ກະສັດ 3; 8; 11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

King David Enthroned [ກະສັດດາວິດຂຶ້ນຄອງບັນລັງ], ໂດຍ ແຈຣີ ມາຍສ໌ ຮາສະຕັນ

ວັນທີ 20–26 ເດືອນມິຖຸນາ

2 ຊາມູເອນ 5–7; 11–12; 1 ກະສັດ 3; 8; 11

“ເຮົາຈະໃຫ້ອານາຈັກຂອງເຈົ້າຄົງຢູ່ຕະຫລອດໄປ”

“ພຣະຄຳພີທຸກຕອນໄດ້ຮັບການດົນໃຈຈາກພຣະເຈົ້າ ແລະ ເປັນປະໂຫຍດ ໃນການສອນ, ການກ່າວຕັກເຕືອນວ່າກ່າວ, ການປັບປຸງແກ້ໄຂໃຫ້ຖືກຕ້ອງ, ການອົບຮົມໃນທາງຊອບທຳ” (2 ຕີໂມທຽວ 3:16).

ບັນທຶກຄວາມປະທັບໃຈຂອງທ່ານ

ການປົກຄອງຂອງກະສັດດາວິດເລີ່ມຕົ້ນດ້ວຍຄຳສັນຍາຢ່າງຫລວງຫລາຍ. ສັດທາທີ່ບໍ່ສະທ້ານຫວັ່ນໄຫວຂອງເພິ່ນໃນການເອົາຊະນະໂກລີອາດແມ່ນເປັນຕຳນານ. ໂດຍທີ່ເປັນກະສັດ, ເພິ່ນໄດ້ຕັ້ງເຢຣູຊາເລັມເປັນນະຄອນຫລວງຂອງເພິ່ນ ແລະ ໄດ້ລວມຊາວອິດສະຣາເອນເຂົ້າກັນ (ເບິ່ງ 2 ຊາມູເອນ 5). ອານາຈັກເຂັ້ມແຂງຂຶ້ນຫລາຍກວ່າທີ່ຜ່ານມາ. ແຕ່ດາວິດໄດ້ຍອມຕໍ່ການລໍ້ລວງ ແລະ ໄດ້ສູນເສຍພະລັງທາງວິນຍານໄປ.

ການປົກຄອງຂອງລູກຊາຍຂອງດາວິດ ຊື່ໂຊໂລໂມນ ກໍຄືກັນ ເລີ່ມຕົ້ນດ້ວຍຄຳສັນຍາຢ່າງຫລວງຫລາຍ. ສະຕິປັນຍາ ແລະ ການຮູ້ຈັກຄວາມແຕກຕ່າງທີ່ໄດ້ຮັບຈາກສະຫວັນຂອງເພິ່ນ ເປັນຕຳນານ. ໃນຖານະກະສັດ, ເພິ່ນໄດ້ຂະຫຍາຍຂອບເຂດຂອງປະເທດອິດສະຣາເອນ ແລະ ໄດ້ສ້າງພຣະວິຫານທີ່ສວຍສົດງົດງາມໃຫ້ແກ່ພຣະຜູ້ເປັນເຈົ້າ. ອານາຈັກເຂັ້ມແຂງຂຶ້ນຫລາຍກວ່າທີ່ຜ່ານມາ. ແຕ່ໂຊໂລໂມນປ່ອຍໃຈຕົວເອງຢ່າງໂງ່ຈ້າໃຫ້ຫັນໄປຫາພະອື່ນ.

ເຮົາຮຽນຮູ້ຫຍັງແດ່ຈາກເລື່ອງລາວທີ່ໜ້າໂສກເສົ້າເຫລົ່ານີ້? ບາງທີບົດຮຽນໜຶ່ງແມ່ນ ບໍ່ວ່າປະສົບການໃນອະດີດຂອງເຮົາຈະເປັນແນວໃດກໍຕາມ, ຄວາມເຂັ້ມແຂງທາງວິນຍານຂອງເຮົາແມ່ນຂຶ້ນກັບການເລືອກຂອງເຮົາໃນທຸກວັນນີ້. ເຮົາກໍເຫັນໃນເລື່ອງລາວເຫລົ່ານີ້ອີກວ່າ ມັນບໍ່ແມ່ນກຳລັງ ຫລື ຄວາມກ້າຫານ ຫລື ສະຕິປັນຍາຂອງເຮົາເອງ ທີ່ຊ່ວຍເຮົາໃຫ້ລອດ—ແມ່ນພຣະຜູ້ເປັນເຈົ້າທີ່ຊ່ວຍເຫລືອ. ເລື່ອງລາວເຫລົ່ານີ້ສະແດງໃຫ້ເຮົາເຫັນວ່າ ຄວາມຫວັງທີ່ແທ້ຈິງຂອງຊາວອິດສະຣາເອນ—ແລະ ຂອງເຮົາ—ບໍ່ແມ່ນຢູ່ໃນດາວິດ, ໂຊໂລໂມນ, ຫລື ຢູ່ໃນກະສັດທີ່ເປັນມະນຸດອົງໃດ, ແຕ່ໃນ “ເຊື້ອສາຍຄົນໜຶ່ງຂອງດາວິດ” ນັ້ນຄື: ພຣະເຢຊູຄຣິດ (ມັດທາຍ 1:1), ກະສັດນິລັນດອນ ຜູ້ຈະ “ຍົກອະໄພບາບປະຊາຊົນ [ຂອງພຣະອົງ]” ຖ້າຫາກເຮົາ “ຕ່າວຄືນມາຫາ [ພຣະອົງ]” (1 ກະສັດ 8:33–34).

ສຳລັບພາບລວມຂອງພຣະທຳ 2 ຊາມູເອນ ແລະ 1 ກະສັດ, ໃຫ້ເບິ່ງ “Samuel, books of” ແລະ “Kings, books of” ໃນ Bible Dictionary.

ແນວຄິດສຳລັບການສຶກສາພຣະຄຳພີເປັນສ່ວນຕົວ

2 ຊາມູເອນ 5:17–25

ພຣະຜູ້ເປັນເຈົ້າສາມາດຊີ້ນຳເຮົາ.

ເມື່ອດາວິດສາມາດລວມຊາວອິດສະຣາເອນເຂົ້າກັນແລ້ວ (ເບິ່ງ 2 ຊາມູເອນ 5:1–5), ເພິ່ນຕ້ອງໄດ້ປ້ອງກັນຜູ້ຄົນຂອງເພິ່ນຈາກຊາວຟີລິດສະຕິນ. ຂະນະທີ່ທ່ານອ່ານ 2 ຊາມູເອນ 5:17–25, ໃຫ້ພິຈາລະນາວິທີທີ່ຕົວຢ່າງຂອງດາວິດສາມາດຊ່ວຍທ່ານໃນການທ້າທາຍທີ່ທ່ານປະເຊີນແນວໃດ (ເບິ່ງ 1 ຊາມູເອນ 23:2, 10–11; 30:8; 2 ຊາມູເອນ 2:1 ນຳອີກ). ທ່ານຊອກຫາການຊີ້ນຳຈາກພຣະຜູ້ເປັນເຈົ້າໃນຊີວິດຂອງທ່ານແນວໃດ? ທ່ານໄດ້ຮັບພອນໂດຍການເຮັດຕາມການເປີດເຜີຍທີ່ທ່ານໄດ້ຮັບແນວໃດ?

ເບິ່ງ 1 ຂ່າວຄາວ 12; Richard G. Scott, “How to Obtain Revelation and Inspiration for Your Personal Life,” Liahona, May 2012, 45–47 ນຳອີກ.

2 ຊາມູເອນ 7

ຄຳວ່າ “ເຮືອນ” ຂອງພຣະຜູ້ເປັນເຈົ້າ ທີ່ສັນຍາກັບດາວິດ ໝາຍເຖິງສິ່ງໃດ?

ເມື່ອດາວິດໄດ້ສະເໜີສ້າງເຮືອນ, ໝາຍເຖິງພຣະວິຫານ, ໃຫ້ແກ່ພຣະຜູ້ເປັນເຈົ້າ (ເບິ່ງ 2 ຊາມູເອນ 7:1–3), ພຣະຜູ້ເປັນເຈົ້າໄດ້ຕອບວ່າ ຕາມຈິງແລ້ວ ລູກຊາຍ ຂອງດາວິດຈະເປັນຄົນສ້າງພຣະວິຫານໃຫ້ພຣະອົງ (ເບິ່ງ ຂໍ້ທີ 12–15; ເບິ່ງ 1 ຂ່າວຄາວ 17:1–15 ນຳອີກ). ແລ້ວພຣະຜູ້ເປັນເຈົ້າໄດ້ກ່າວອີກວ່າ ພຣະອົງຈະສ້າງ “ເຮືອນ,” ໃຫ້ດາວິດ ໝາຍເຖິງເຊື້ອສາຍ, ແລະ ບັນລັງຂອງເພິ່ນຈະຄົງຢູ່ຕະຫລອດໄປ (ເບິ່ງ 2 ຊາມູເອນ 7:11, 16, 25–29; ເພງສັນລະເສີນ 89:3–4, 35–37). ຄຳສັນຍານີ້ໄດ້ສຳເລັດຜົນໃນພຣະເຢຊູຄຣິດ, ກະສັດນິລັນດອນຂອງເຮົາ, ຜູ້ເປັນເຊື້ອສາຍຂອງດາວິດ (ເບິ່ງ ມັດທາຍ 1:1; ລູກາ 1:32–33; ໂຢຮັນ 18:33–37).

2 ຊາມູເອນ 11; 12:1–14

ເຮົາຕ້ອງມີສະຕິສະເໝີຕ້ານກັບການບາບ.

ຄວາມຊື່ສັດຂອງດາວິດຕໍ່ພຣະຜູ້ເປັນເຈົ້າໃນອະດີດ ບໍ່ໄດ້ຍົກເວັ້ນເພິ່ນຈາກການລໍ້ລວງ ເມື່ອເພິ່ນ “ຂຶ້ນໄປເທິງຫລັງຄາພຽງຂອງລາຊວັງ” ແລະ “ຫລຽວເຫັນຍິງຄົນໜຶ່ງກຳລັງອາບນ້ຳ” (2 ຊາມູເອນ 11:2). ໃຫ້ພິຈາລະນາບົດຮຽນທີ່ທ່ານຮຽນຮູ້ຈາກປະສົບການຂອງເພິ່ນ. ຄຳຖາມທີ່ຄືກັບດັ່ງຕໍ່ໄປນີ້ອາດຊ່ວຍທ່ານສຶກສາເລື່ອງນີ້ໄດ້:

ດາວິດໄດ້ເລືອກເຮັດສິ່ງໃດ ທີ່ພາເພິ່ນໄປສູ່ການເຮັດບາບຫລາຍຂຶ້ນກວ່າເກົ່າ? ມີການເລືອກທີ່ຊອບທຳຢ່າງໃດແດ່ທີ່ເພິ່ນສາມາດເລືອກເຮັດແທນໄດ້?
ຜູ້ປໍລະປັກພະຍາຍາມເຮັດສິ່ງໃດແດ່ ເພື່ອນຳພາທ່ານໃຫ້ເຮັດການບາບໃນຊີວິດຂອງທ່ານ? ມີການເລືອກໃດແດ່ທີ່ທ່ານສາມາດເຮັດໃນເວລານີ້ ເພື່ອຫວນຕ່າວກັບຄືນມາຫາບ່ອນທີ່ປອດໄພ?

ເບິ່ງ 2 ນີໄຟ 28:20–24; “To Look Upon” (ວິດີໂອ), ChurchofJesusChrist.org ນຳອີກ.

2:3

1 ກະສັດ 3:1–15

ຂອງປະທານແຫ່ງການຮູ້ຈັກຄວາມແຕກຕ່າງຊ່ວຍເຮົາໃຫ້ຮູ້ວ່າອັນໃດດີ ແລະ ອັນໃດຊົ່ວ.

ຖ້າຫາກພຣະຜູ້ເປັນເຈົ້າໄດ້ກ່າວກັບທ່ານວ່າ, “ເຈົ້າຢາກໄດ້ຫຍັງຈາກເຮົາ” (1 ກະສັດ 3:5), ທ່ານຈະທູນຂໍສິ່ງໃດ? ແມ່ນຫຍັງທີ່ປະທັບໃຈທ່ານກ່ຽວກັບຄຳອ້ອນວອນຂອງໂຊໂລໂມນ? ໃຫ້ໄຕ່ຕອງວ່າ ເປັນຫຍັງ “ສະຕິປັນຍາ” ທີ່ຈະ “ຮູ້ຈັກຄວາມແຕກຕ່າງລະຫວ່າງຄວາມດີ ແລະ ຄວາມຊົ່ວ” (ຂໍ້ທີ 9) ຈຶ່ງມີຄ່າຫລາຍແທ້ໆ. ທ່ານສາມາດເຮັດສິ່ງໃດເພື່ອສະແຫວງຫາຂອງປະທານນີ້?

ເບິ່ງ 2 ຂ່າວຄາວ 1; ໂມໂຣໄນ 7:12–19; David A. Bednar, “Quick to Observe,” Ensign, Dec. 2006, 30–36 ນຳອີກ.

1 ກະສັດ 8:12–61

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ເປັນເວລາຫລາຍຮ້ອຍປີ, ຫໍເຕັນສັກສິດເຄື່ອນທີ່ ທີ່ໂມເຊໄດ້ສ້າງໄດ້ເປັນຕົວແທນໃຫ້ແກ່ການປະທັບຢູ່ຂອງພຣະເຈົ້າ. ເຖິງແມ່ນວ່າດາວິດຢາກສ້າງສະຖານທີ່ຖາວອນໃຫ້ແກ່ພຣະເຈົ້າ, ແຕ່ພຣະເຈົ້າໄດ້ເລືອກໃຫ້ໂຊໂລໂມນ ລູກຊາຍຂອງດາວິດເປັນຄົນສ້າງພຣະວິຫານໃຫ້ພຣະຜູ້ເປັນເຈົ້າ. ຂະນະທີ່ທ່ານອ່ານກ່ຽວກັບຄຳອະທິຖານຂອງໂຊໂລໂມນ ແລະ ຖ້ອຍຄຳທີ່ເພິ່ນໄດ້ກ່າວກັບຜູ້ຄົນຂອງເພິ່ນ ເມື່ອພຣະວິຫານຖືກສ້າງສຳເລັດ, ໃຫ້ສັງເກດເບິ່ງວິທີທີ່ເພິ່ນຮູ້ສຶກກ່ຽວກັບພຣະຜູ້ເປັນເຈົ້າ ແລະ ພຣະວິຫານຂອງພຣະອົງ. ທ່ານສາມາດຂຽນພອນທີ່ໂຊໂລໂມນໄດ້ທູນຂໍຢູ່ໃນຄຳອະທິຖານຂອງເພິ່ນລົງໄວ້. ທ່ານສັງເກດເຫັນຫຍັງແດ່ກ່ຽວກັບພອນເຫລົ່ານີ້? ທ່ານໄດ້ຮັບພອນແນວໃດ ຈາກພຣະວິຫານຂອງພຣະຜູ້ເປັນເຈົ້າ ໃນທຸກວັນນີ້?

ເບິ່ງ 2 ຂ່າວຄາວ 6 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

2 ຊາມູເອນ 5:19, 23.ເມື່ອໃດທີ່ເຮົາໄດ້ “ຂໍໃຫ້ພຣະຜູ້ເປັນເຈົ້າ” ນຳພາ ແລະ ຊີ້ນຳເຮົາ? ພຣະອົງຕອບເຮົາແນວໃດ?

2 ຊາມູເອນ 7:16.ເມື່ອພຣະຜູ້ເປັນເຈົ້າໄດ້ບອກດາວິດວ່າ, “ເຮົາຈະໃຫ້ອານາຈັກຂອງເຈົ້າຄົງຢູ່ຕະຫລອດໄປ,” ພຣະອົງໄດ້ກ່າວເຖິງກະສັດໃນອະນາຄົດ ໃນເຊື້ອສາຍຂອງດາວິດ ຜູ້ທີ່ຈະປົກຄອງຕະຫລອດໄປ: ພຣະເຢຊູຄຣິດ. ບາງທີຄອບຄົວຂອງທ່ານອາດຢາກເຮັດມົງກຸດ ຂະນະທີ່ສົນທະນາກັນເຖິງເຫດຜົນທີ່ພວກທ່ານຮູ້ບຸນຄຸນທີ່ພຣະເຢຊູຄຣິດເປັນກະສັດນິລັນດອນຂອງພວກທ່ານແນວໃດ.

2 ຊາມູເອນ 11.ການອ່ານກ່ຽວກັບບາບທີ່ໂສກເສົ້າຂອງດາວິດ ອາດເປັນໂອກາດທີ່ດີ ທີ່ຈະສົນທະນາກັນເຖິງໄພອັນຕະລາຍຂອງຮູບພາບລາມົກ, ຄວາມຄິດທີ່ບໍ່ສະອາດ, ແລະ ການຜິດສິນລະທຳ. ແຫລ່ງຂໍ້ມູນດັ່ງຕໍ່ໄປນີ້ສາມາດເປັນປະໂຫຍດໃນການສົນທະນາຂອງທ່ານ: October 2019 ວາລະສານ Liahona, the Church’s Addressing Pornography resources (ChurchofJesusChrist.org/addressing-pornography), ແລະ ວິດີໂອ “What Should I Do When I See Pornography?” ແລະ “Watch Your Step” (ChurchofJesusChrist.org). ສະມາຊິກໃນຄອບຄົວສາມາດວາງແຜນການເຖິງສິ່ງທີ່ເຂົາເຈົ້າຈະເຮັດເມື່ອເຂົາເຈົ້າປະເຊີນກັບຮູບພາບລາມົກ.

5:45

2:35

1 ກະສັດ 11:9–11.ມີ “ບັນດາພະ” ໃດແດ່ (ຂໍ້ທີ 10) ທີ່ສາມາດຫັນຫົວໃຈຂອງເຮົາໃຫ້ໜີຈາກພຣະຜູ້ເປັນເຈົ້າ? ເຮົາຈະຮັກສາຫົວໃຈໃຫ້ເຈາະຈົງຢູ່ທີ່ພຣະບິດາເທິງສະຫວັນ ແລະ ພຣະເຢຊູຄຣິດໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ເອົາໃຈໃສ່ຕໍ່ຫລັກທຳທີ່ຈະເປັນພອນໃຫ້ແກ່ຄອບຄົວຂອງທ່ານ. ຂະນະທີ່ທ່ານສຶກສາພຣະຄຳຂອງພຣະເຈົ້າດ້ວຍການອະທິຖານ, ໃຫ້ຖາມຕົວເອງວ່າ, “ເຮົາພົບເຫັນຫຍັງແດ່ຢູ່ບ່ອນນີ້ ທີ່ຈະມີຄວາມໝາຍຕໍ່ຄອບຄົວຂອງເຮົາໂດຍສະເພາະ?” (ເບິ່ງ Teaching in the Savior’s Way, 17).