“ວັນທີ 27 ເດືອນມິຖຸນາ–ວັນທີ 3 ເດືອນກໍລະກົດ. 1 ກະສັດ 17–19: ‘ຖ້າພຣະຜູ້ເປັນເຈົ້າແມ່ນພຣະເຈົ້າ, ຈົ່ງນະມັດສະການພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 27 ເດືອນມິຖຸນາ–ວັນທີ 3 ເດືອນກໍລະກົດ. 1 ກະສັດ 17–19,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ເອລີຢາຢືນຢູ່ໃກ້ແທ່ນບູຊາທີ່ລຸກເປັນໄຟ

Elijah Contends against the Priests of Baal [ເອລີຢາຂັດແຍ້ງຕ້ານພວກປະໂລຫິດຂອງພະບາອານ], ໂດຍ ແຈຣີ ຮາສະຕັນ

ວັນທີ 27 ເດືອນມິຖຸນາ–ວັນທີ 3 ເດືອນກໍລະກົດ

1 ກະສັດ 17–19

“ຖ້າພຣະຜູ້ເປັນເຈົ້າແມ່ນພຣະເຈົ້າ, ຈົ່ງນະມັດສະການພຣະອົງ”

ເມື່ອທ່ານອ່ານພຣະຄຳພີ, ທ່ານໄດ້ໃຊ້ສັດທາ, ຊຶ່ງກະກຽມຫົວໃຈ ແລະ ຈິດໃຈຂອງທ່ານໃຫ້ໄດ້ຍິນ “ສຽງອັນເບົາໆ” ຂອງພຣະວິນຍານ (1 ກະສັດ 19:12).

ບັນທຶກຄວາມປະທັບໃຈຂອງທ່ານ

ເຊື້ອສາຍອິດສະຣາເອນຢູ່ໃນຄວາມສັບສົນ. ຄວາມເປັນອັນໜຶ່ງດຽວກັນ ແລະ ຄວາມຈະເລີນຮຸ່ງເຮືອງຢູ່ໃຕ້ການປົກຄອງຂອງດາວິດ ແລະ ໂຊໂລໂມນໄດ້ເປັນອະດີດໄປແລ້ວ, ແລະ ຄວາມສຳພັນແຫ່ງພັນທະສັນຍາຂອງປະເທດກັບພຣະຜູ້ເປັນເຈົ້າ, ສຳລັບຫລາຍຄົນ, ກໍໄດ້ເປັນຄວາມຊົງຈຳທີ່ເລືອນລາງໄປແລ້ວ. ອານາຈັກອິດສະຣາເອນໄດ້ແຕກແຍກ, ດ້ວຍສິບເຜົ່າທີ່ໂຮມກັນຢູ່ພາກເໜືອເປັນອານາຈັກອິດສະຣາເອນ ແລະ ສອງເຜົ່າໂຮມກັນຢູ່ພາກໃຕ້ເປັນອານາຈັກຢູດາຍ. ອານາຈັກທັງສອງບໍ່ມີຄວາມໝັ້ນຄົງທາງວິນຍານ, ນຳພາໂດຍກະສັດທີ່ຝ່າຝືນພັນທະສັນຍາຂອງຕົນກັບພຣະຜູ້ເປັນເຈົ້າ ແລະ ຊັກຊວນຄົນອື່ນໆໃຫ້ເຮັດຄືກັນ (ເບິ່ງ 1 ກະສັດ 11–16). ແຕ່ການປະຖິ້ມຄວາມເຊື່ອແມ່ນຮ້າຍແຮງ ໂດຍສະເພາະໃນອານາຈັກພາກເໜືອ, ບ່ອນທີ່ກະສັດອາຮາບຊຸກຍູ້ຊາວອິດສະຣາເອນໃຫ້ນະມັດສະການພະປອມຊື່ບາອານ.

ແມ່ນຢູ່ໃນສະຖານທີ່ແຫ່ງນີ້ແຫລະທີ່ສາດສະດາເອລີຢາໄດ້ຖືກເອີ້ນໃຫ້ສັ່ງສອນ. ເລື່ອງລາວຂອງການປະຕິບັດສາດສະໜາກິດຂອງເພິ່ນເຮັດໃຫ້ເຫັນຢ່າງແຈ້ງຊັດວ່າ ສັດທາສ່ວນຕົວໃນພຣະຜູ້ເປັນເຈົ້າ ສາມາດຈະເລີນກ້າວໜ້າໄດ້ ໃນທ່າມກາງຄົນຊອບທຳ ແມ່ນແຕ່ໃນສະພາບແວດລ້ອມທີ່ຊົ່ວຮ້າຍກໍຕາມ. ບາງເທື່ອພຣະຜູ້ເປັນເຈົ້າຕອບຮັບສັດທາເຊັ່ນນັ້ນດ້ວຍການອັດສະຈັນທີ່ໜ້າງຶດງໍ້ໃຫ້ຜູ້ຄົນເຫັນ, ດັ່ງເຊັ່ນ ໄຟລົງມາຈາກສະຫວັນ. ແຕ່ພຣະອົງກໍຍັງທຳການອັດສະຈັນຢ່າງງຽບໆ ແລະ ເປັນສ່ວນຕົວນຳອີກ, ດັ່ງເຊັ່ນ ການສະໜອງຄວາມຕ້ອງການຂອງແມ່ໝ້າຍ ແລະ ລູກຊາຍຂອງນາງ. ແລະ ສ່ວນຫລາຍການອັດສະຈັນຂອງພຣະອົງແມ່ນພິເສດ ທີ່ພຽງແຕ່ທ່ານເທົ່ານັ້ນທີ່ຮູ້ຈັກ—ຍົກຕົວຢ່າງ, ຕອນພຣະຜູ້ເປັນເຈົ້າເປີດເຜີຍພຣະອົງເອງ ແລະ ພຣະປະສົງຂອງພຣະອົງຜ່ານທາງ “ສຽງອັນເບົາໆ” (1 ກະສັດ 19:12).

ສຳລັບລາຍລະອຽດເພີ່ມເຕີມກ່ຽວກັບເອລີຢາ, ໃຫ້ເບິ່ງ “Elijah” ໃນ Bible Dictionary.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ກະສັດ 17:1–16

ການເຊື້ອເຊີນໃຫ້ເສຍສະລະ ເປັນໂອກາດທີ່ຈະໃຊ້ສັດທາຂອງເຮົາ.

ທຳອິດ ອາດເບິ່ງຄືວ່າເປັນສິ່ງຍາກທີ່ຈະເຂົ້າໃຈເຫດຜົນທີ່ເອລີຢາຂໍໃຫ້ແມ່ໝ້າຍຢູ່ໃນເມືອງຊາເຣຟັດ ຫາເຂົ້າຫານ້ຳໃຫ້ເພິ່ນກິນກ່ອນ ແລ້ວແມ່ໝ້າຍ ແລະ ລູກຊາຍທີ່ຫິວໂຫຍຈຶ່ງກິນທີຫລັງ. ແຕ່ຄຳຂໍຮ້ອງຂອງເອລີຢາສາມາດເຫັນໄດ້ວ່າ ເປັນພອນໃຫ້ແກ່ຄອບຄົວນ້ອຍໆນີ້. ເຂົາເຈົ້າຕ້ອງການພອນຂອງພຣະຜູ້ເປັນເຈົ້າ, ແລະ ສ່ວນຫລາຍການເສຍສະລະຈະນຳພອນມາໃຫ້—ລວມທັງພອນຂອງການມີສັດທາທີ່ເຂັ້ມແຂງ.

ຂະນະທີ່ທ່ານອ່ານເລື່ອງນີ້, ໃຫ້ສົມມຸດຕົວເອງວ່າເປັນແມ່ໝ້າຍທີ່ດີເດັ່ນຜູ້ນີ້. ແມ່ນຫຍັງທີ່ປະທັບໃຈທ່ານກ່ຽວກັບນາງ? ໃຫ້ພິຈາລະນາໂອກາດທີ່ທ່ານມີ ເພື່ອໃຊ້ສັດທາຂອງທ່ານ—ລວມທັງໂອກາດທີ່ຈະເສຍສະລະ. ທ່ານຈະເປັນເໝືອນດັ່ງແມ່ໝ້າຍຄົນນີ້ໄດ້ແນວໃດ?

ເບິ່ງ ມັດທາຍ 6:25–33; ລູກາ 4:24–26; Lynn G. Robbins, “Tithing—a Commandment Even for the Destitute,” Liahona, May 2005, 34–36 ນຳອີກ.

1 ກະສັດ 18

“ຖ້າພຣະຜູ້ເປັນເຈົ້າແມ່ນພຣະເຈົ້າ, ຈົ່ງນະມັດສະການພຣະອົງ.”

ຊາວອິດສະຣາເອນອາດຮູ້ສຶກມີເຫດຜົນທີ່ດີ ທີ່ຈະນະມັດສະການພະບາອານ ເຖິງແມ່ນພຣະຜູ້ເປັນເຈົ້າໄດ້ບັນຊາວ່າ, “ຢ່ານະມັດສະການພະອື່ນນອກຈາກເຮົາ” (ອົບພະຍົບ 20:3). ຜູ້ຄົນຮູ້ຈັກພະບາອານວ່າເປັນພຣະເຈົ້າແຫ່ງດິນຟ້າອາກາດ, ແລະ ຫລັງຈາກມີຄວາມແຫ້ງແລ້ງເປັນເວລາສາມປີ, ພວກເຂົາຢາກເຫັນຝົນຕົກຟ້າລົມຫລາຍທີ່ສຸດ. ແລະ ການນະມັດສະການພະບາອານກໍຖືກສັງຄົມຍອມຮັບ ແລະ ຖືກຮັບຮອງໂດຍກະສັດ ແລະ ລາຊີນີ. ຂະນະທີ່ທ່ານອ່ານ 1 ກະສັດ 18, ໃຫ້ພິຈາລະນາທຸກສະຖານະການໃນຊີວິດຂອງທ່ານ ທີ່ສາມາດປຽບທຽບກັບສະຖານະການຂອງຊາວອິດສະຣາເອນ. ທ່ານເຄີຍພົບເຫັນຕົວເອງວ່າບໍ່ແນ່ໃຈກ່ຽວກັບການຕິດຕາມພຣະຜູ້ເປັນເຈົ້າ ຍ້ອນທາງເລືອກເບິ່ງຄືວ່າສົມເຫດສົມຜົນ ແລະ ໜ້າສົນໃຈຢູ່ບໍ? (ເບິ່ງ 1 ກະສັດ 18:21). ໃນເຫດການທີ່ພົບເຫັນຢູ່ໃນບົດນີ້, ທ່ານຄິດວ່າ ພຣະຜູ້ເປັນເຈົ້າພະຍາຍາມສິດສອນຫຍັງໃຫ້ຜູ້ຄົນກ່ຽວກັບພຣະອົງເອງ ແລະ ກ່ຽວກັບພະບາອານ? ມີປະສົບການໃດແດ່ທີ່ສິດສອນທ່ານເຖິງຄວາມຈິງທີ່ຄ້າຍຄືກັນນີ້?

ອາດເປັນສິ່ງທີ່ໜ້າສົນໃຈ ທີ່ຈະສັງເກດເບິ່ງສິ່ງທີ່ເອລີຢາໄດ້ກ່າວ ແລະ ໄດ້ເຮັດຢູ່ໃນບົດນີ້ ທີ່ສະແດງໃຫ້ເຫັນສັດທາຂອງເພິ່ນໃນພຣະຜູ້ເປັນເຈົ້າ. ທ່ານຮຽນຮູ້ຫຍັງແດ່ ຈາກເອລີຢາກ່ຽວກັບສັດທາ?

ເບິ່ງ ໂຢຊວຍ 24:15; 2 ນີໄຟ 2:26–28; D. Todd Christofferson, “Choice and Commitment” (worldwide devotional for young adults, Jan. 12, 2020), ChurchofJesusChrist.org ນຳອີກ.

ການພັນລະນາສັນຍາລັກຈາກ 1 ກະສັດ 19:11–12. The Prophet [ສາດສະດາ], © Robert Booth Charles/Bridgeman Images

1 ກະສັດ 19:1–18

ພຣະຜູ້ເປັນເຈົ້າມັກກ່າວໃນທາງທີ່ເບົາໆ ແລະ ລຽບງ່າຍ.

ເມື່ອລາຊີນີເຢເຊເບນໄດ້ຍິນກ່ຽວກັບສິ່ງທີ່ໄດ້ເກີດຂຶ້ນກັບພວກປະໂລຫິດຂອງນາງຢູ່ເທິງພູເຂົາກາເມນ, ນາງບໍ່ໄດ້ກັບໃຈ—ນາງໄດ້ໃຈຮ້າຍຢ່າງແຮງ. ໂດຍທີ່ເປັນຫ່ວງກັບຊີວິດຕົນ, ເອລີຢາໄດ້ໜີເຂົ້າໄປໃນຖິ່ນແຫ້ງແລ້ງກັນດານ ແລະ ລີ້ຊ່ອນຕົວຢູ່ໃນຖ້ຳ. ຢູ່ທີ່ນັ້ນ, ໂດຍທີ່ໂດດດ່ຽວ ແລະ ທໍ້ແທ້ໃຈ, ເພິ່ນໄດ້ມີປະສົບການກັບພຣະຜູ້ເປັນເຈົ້າ ທີ່ແຕກຕ່າງຈາກສິ່ງທີ່ໄດ້ເກີດຂຶ້ນຢູ່ເທິງພູເຂົາກາເມນ. ປະສົບການຂອງເອລີຢາ ຢູ່ໃນ 1 ກະສັດ 19:1–18 ສິດສອນທ່ານຫຍັງແດ່ກ່ຽວກັບວິທີທີ່ພຣະຜູ້ເປັນເຈົ້າສື່ສານກັບທ່ານ ໃນເວລາທີ່ທ່ານຕ້ອງການຄວາມຊ່ວຍເຫລືອ? ໃຫ້ໄຕ່ຕອງເວລາໃດໜຶ່ງໃນຊີວິດຂອງທ່ານ ຕອນທີ່ທ່ານໄດ້ມີປະສົບການກັບສຸລະສຽງຂອງພຣະອົງ. ທ່ານຕ້ອງເຮັດສິ່ງໃດ ເພື່ອຈະໄດ້ຮັບຄຳແນະນຳຈາກພຣະອົງໃຫ້ເລື້ອຍກວ່າເກົ່າ?

ໃຫ້ໄຕ່ຕອງຖ້ອຍຄຳ ແລະ ວະລີ ທີ່ໃຊ້ຢູ່ໃນຂໍ້ດັ່ງຕໍ່ໄປນີ້ ທີ່ບັນຍາຍວິທີທີ່ພຣະຜູ້ເປັນເຈົ້າສື່ສານກັບທ່ານ: ຮີລາມັນ 5:30; 3 ນີໄຟ 11:3–7; ຄຳສອນ ແລະ ພັນທະສັນຍາ 6:22–23; 8:2–3; 9:8–9; 11:12–14; 36:2.

ເບິ່ງ ເພງສັນລະເສີນ 46:10; 1 ນີໄຟ 17:45; Russell M. Nelson, “Hear Him,” Liahona, May 2020, 88–92 ນຳອີກ.

1 ກະສັດ 19:19–21

ການຮັບໃຊ້ພຣະຜູ້ເປັນເຈົ້າມີຄວາມສຳຄັນຫລາຍກວ່າຄວາມກັງວົນທາງໂລກ.

ຄວາມຈິງທີ່ເອລີຊາມີງົວ 12 ຄູ່ ບົ່ງບອກວ່າເພິ່ນອາດເປັນຜູ້ໜຶ່ງທີ່ຮັ່ງມີ. ແມ່ນຫຍັງທີ່ປະທັບໃຈທ່ານກ່ຽວກັບການກະທຳຂອງເພິ່ນ ຊຶ່ງບັນທຶກຢູ່ໃນ 1 ກະສັດ 19:19–21? ທ່ານຈະເຮັດຕາມຕົວຢ່າງຂອງເອລີຊາໄດ້ແນວໃດ?

ເບິ່ງ ມັດທາຍ 4:18–22 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

1 ກະສັດ 17:1–16.ວິດີໂອ “Elijah and the Widow of Zarephath” (ChurchofJesusChrist.org) ແລະ ຮູບພາບຢູ່ໃນໂຄງຮ່າງນີ້ສາມາດຊ່ວຍຄອບຄົວຂອງທ່ານໄດ້ ເພື່ອວາດພາບໃນໃຈເຫັນເລື່ອງລາວ ຢູ່ໃນ 1 ກະສັດ 17:1–16. ຫລັງຈາກການອ່ານຂໍ້ເຫລົ່ານີ້ ແລະ ໄດ້ເບິ່ງແຫລ່ງເຫລົ່ານີ້ແລ້ວ, ສະມາຊິກໃນຄອບຄົວແຕ່ລະຄົນສາມາດຂຽນຄຸນສົມບັດທີ່ດົນໃຈຂອງແມ່ໝ້າຍລົງໄວ້. ພຣະຜູ້ເປັນເຈົ້າໄດ້ຂໍໃຫ້ເຮົາເຮັດສິ່ງໃດເພື່ອສະແດງອອກເຖິງສັດທາຂອງເຮົາ?

1 ກະສັດ 18.“ເອລີຢາ ແລະ ພວກປະໂລຫິດຂອງພະບາອານ” (ໃນປຶ້ມ ເລື່ອງພຣະຄຳພີເດີມ) ສາມາດຊ່ວຍຄອບຄົວຂອງທ່ານໃຫ້ຮຽນຮູ້ເລື່ອງລາວຢູ່ໃນ 1 ກະສັດ 18 ໄດ້. ມີສິ່ງໃດບໍ່ທີ່ກີດກັນເຮົາຈາກການເຮັດຄຳໝັ້ນສັນຍາທີ່ຈິງໃຈຕໍ່ພຣະຜູ້ເປັນເຈົ້າ? ເຮົາຈະສະແດງຄວາມເຕັມໃຈເພື່ອເລືອກເອົາພຣະອົງແນວໃດ? (ເບິ່ງ ຂໍ້ທີ 21).

1 ກະສັດ 19:11–12.ແມ່ນຫຍັງທີ່ຈະຊ່ວຍຄອບຄົວຂອງທ່ານໃຫ້ເຂົ້າໃຈເຖິງຄວາມສຳຄັນຂອງການຟັງ “ສຽງອັນເບົາໆ”? ພວກທ່ານສາມາດອ່ານ 1 ກະສັດ 19:11–12 ນຳກັນ ດ້ວຍສຽງອັນເບົາໆ ຫລື ຮ້ອງເພງຄ່ອຍໆກ່ຽວກັບພຣະວິນຍານ, ດັ່ງເຊັ່ນ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30). ທ່ານສາມາດສ້າງສຽງລົບກວນ ເພື່ອສະແດງເຖິງວິທີທີ່ຊາຕານພະຍາຍາມກີດກັນເຮົາຈາກການໄດ້ຍິນສຽງອັນເບົາໆ. ສະມາຊິກໃນຄອບຄົວສາມາດບອກເຖິງສິ່ງທີ່ເຂົາເຈົ້າເຮັດ ເພື່ອຈະມີຄວາມຮູ້ສຶກໄວຕໍ່ການກະຕຸ້ນຂອງພຣະວິນຍານ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30.

ການປັບປຸງການສຶກສາສ່ວນຕົວ

ບັນທຶກຄວາມປະທັບໃຈຂອງທ່ານ. ເມື່ອທ່ານຮູ້ສຶກວ່າພຣະວິນຍານກຳລັງກ່າວກັບທ່ານ, ໃຫ້ຄິດທີ່ຈະຂຽນຄວາມຮູ້ສຶກຂອງທ່ານລົງໄວ້ ວ່າພຣະອົງກຳລັງບອກຫຍັງກັບທ່ານ. ການຄິດທີ່ຈະຂຽນຄວາມປະທັບໃຈເຫລົ່ານີ້ລົງໄວ້ ສາມາດຊ່ວຍທ່ານໃຫ້ໄຕ່ຕອງ ແລະ ທະນຸຖະໜອມມັນໄວ້.