“ວັນທີ 4–10 ເດືອນກໍລະກົດ. 2 ກະສັດ 2–7: ‘ຢູ່ໃນອິດສະຣາເອນມີສາດສະດາຄົນໜຶ່ງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 4–10 ເດືອນກໍລະກົດ. 2 ກະສັດ 2–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ຮູບພາບເອລີຊາສະແດງລົດມ້າທີ່ເປັນໄຟຕໍ່ຄົນຮັບໃຊ້, © Review & Herald Publishing/ໄດ້ຮັບອະນຸຍາດຈາກ goodsalt.com
ວັນທີ 4–10 ເດືອນກໍລະກົດ
2 ກະສັດ 2–7
“ຢູ່ໃນອິດສະຣາເອນມີສາດສະດາຄົນໜຶ່ງ”
ຂະນະທີ່ທ່ານອ່ານພຣະຄຳພີ, ພຣະວິນຍານບໍລິສຸດອາດກະຕຸ້ນທ່ານໃຫ້ເອົາໃຈໃສ່ຕໍ່ວະລີ ຫລື ຂໍ້ພຣະຄຳພີໃດໜຶ່ງ. ໃຫ້ພິຈາລະນາທີ່ຈະບັນທຶກລົງໄວ້ວ່າ ເປັນຫຍັງຂໍ້ພຣະຄຳພີເຫລົ່ານັ້ນຈຶ່ງມີຄວາມໝາຍຫລາຍແທ້ໆຕໍ່ທ່ານ.
ບັນທຶກຄວາມປະທັບໃຈຂອງທ່ານ
ພາລະກິດຕົ້ນຕໍຂອງສາດສະດາແມ່ນທີ່ຈະສິດສອນ ແລະ ເປັນພະຍານເຖິງພຣະຜູ້ຊ່ວຍໃຫ້ລອດ ພຣະເຢຊູຄຣິດ. ເຖິງຢ່າງໃດກໍຕາມ, ບັນທຶກຂອງເຮົາເຖິງສາດສະດາເອລີຊາ, ບໍ່ໄດ້ມີຫຍັງຫລາຍກ່ຽວກັບການສິດສອນ ຫລື ການເປັນພະຍານຂອງເພິ່ນ. ສິ່ງທີ່ມີຢູ່ໃນບັນທຶກແມ່ນການອັດສະຈັນທີ່ ເອລີຊາໄດ້ກະທຳ, ລວມທັງການນຳເດັກນ້ອຍທີ່ຕາຍແລ້ວໃຫ້ຄືນມີຊີວິດອີກ (ເບິ່ງ 2 ກະສັດ 4:18–37), ການລ້ຽງເຂົ້າຝູງຊົນຢ່າງຫລວງຫລາຍດ້ວຍອາຫານເລັກນ້ອຍ (ເບິ່ງ 2 ກະສັດ 4:42–44), ແລະ ການປິ່ນປົວຄົນຂີ້ທູດ (ເບິ່ງ 2 ກະສັດ 5:1–14). ສະນັ້ນເຖິງແມ່ນວ່າເຮົາບໍ່ມີຖ້ອຍຄຳຂອງເອລີຊາເປັນພະຍານເຖິງພຣະຄຣິດ, ແຕ່ເຮົາມີ, ຕະຫລອດທົ່ວການປະຕິບັດສາດສະໜາກິດຂອງເອລີຊາ, ການສະແດງໃຫ້ປະຈັກທີ່ມີພະລັງເຖິງອຳນາດແຫ່ງການໂຜດຊີວິດ, ການບຳລຸງລ້ຽງ, ແລະ ການປິ່ນປົວຂອງພຣະຜູ້ເປັນເຈົ້າ. ການສະແດງໃຫ້ປະຈັກເຊັ່ນນັ້ນແມ່ນມີຢູ່ຢ່າງຫລວງຫລາຍໃນຊີວິດຂອງເຮົາ ຊຶ່ງບາງເທື່ອເຮົາກໍບໍ່ຮັບຮູ້. ເພື່ອຈະເຫັນສິ່ງເຫລົ່ານີ້, ເຮົາຕ້ອງສະແຫວງຫາການອັດຈະສັນທີ່ເອລີຊາໄດ້ສະແຫວງຫາ ເມື່ອເພິ່ນອະທິຖານເພື່ອຄົນຮັບໃຊ້ໜຸ່ມຂອງເພິ່ນທີ່ວ່າ, “ຂ້າແດ່ພຣະຜູ້ເປັນເຈົ້າ, ຂໍພຣະອົງເປີດຕາຄົນຮັບໃຊ້ຂອງຂ້ານ້ອຍຄົນນີ້ໃຫ້ເຫັນ” (2 ກະສັດ 6:17).
ສຳລັບລາຍລະອຽດເພີ່ມເຕີມກ່ຽວກັບ 2 ກະສັດ, ໃຫ້ເບິ່ງ “Kings, books of” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຈົ້າສາມາດທຳການອັດສະຈັນໃນຊີວິດຂອງເຮົາ.
ການອັດສະຈັນມັກຈະຊ່ວຍເຮົາໃຫ້ເອົາຊະນະຄວາມຫຍຸ້ງຍາກຢູ່ໃນຊ່ວງມະຕະ—ໃນວັນເວລາຂອງເອລີຊາ, ມີເມືອງດີ ແຕ່ນ້ຳບໍ່ດີທີ່ຕ້ອງດັດແປງ ແລະ ຂວານເຫລັກຫລ່ອນຕົກລົງໄປໃນນ້ຳທີ່ກອບກູ້ຄືນມາ (ເບິ່ງ 2 ກະສັດ 2:19–22; 6:4–7). ແຕ່ການອັດສະຈັນໄດ້ຫັນຫົວໃຈຂອງເຮົາມາຫາພຣະຜູ້ເປັນເຈົ້າ ແລະ ເປັນບົດຮຽນທາງວິນຍານໃຫ້ເຮົານຳອີກ. ຂະນະທີ່ທ່ານອ່ານ 2 ກະສັດ 2–6, ໃຫ້ຄິດທີ່ຈະຂຽນການອັດສະຈັນທີ່ທ່ານພົບເຫັນລົງໄວ້, ແລະ ໄຕ່ຕອງບົດຮຽນທາງວິນຍານທີ່ທ່ານໄດ້ຮຽນຮູ້ຈາກແຕ່ລະຢ່າງ. ການອັດສະຈັນເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ ແລະ ສິ່ງທີ່ພຣະອົງສາມາດກະທຳໃນຊີວິດຂອງທ່ານ?
ເບິ່ງ 2 ນີໄຟ 26:12–13; 27:23; ມໍມອນ 9:7–21; ໂມໂຣໄນ 7:35–37; Donald L. Hallstrom, “Has the Day of Miracles Ceased?” Liahona, Nov. 2017, 88–90 ນຳອີກ.
ພຣະຄຳຂອງພຣະຜູ້ເປັນເຈົ້າຜ່ານທາງສາດສະດາຂອງພຣະອົງ ຈະສຳເລັດຄົບຖ້ວນ.
ດັ່ງທີ່ບັນທຶກຢູ່ໃນ 2 ກະສັດ 4:8–17; 7:1–16, ພຣະຜູ້ເປັນເຈົ້າໄດ້ດົນໃຈເອລີຊາໃຫ້ທຳນາຍເຖິງສິ່ງທີ່ຈະເກີດຂຶ້ນ—ສິ່ງທີ່ເບິ່ງວ່າ, ຈາກມຸມມອງຂອງຄົນອື່ນ, ເບິ່ງຄືຈະບໍ່ເກີດຂຶ້ນ. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຄິດກ່ຽວກັບວິທີທີ່ທ່ານຕອບຮັບຕໍ່ພຣະຄຳຂອງພຣະຜູ້ເປັນເຈົ້າຜ່ານທາງສາດສະດາຂອງພຣະອົງໃນທຸກວັນນີ້. ຄຳສອນ, ການທຳນາຍ, ຫລື ຄຳສັນຍາໃດແດ່ທີ່ທ່ານໄດ້ຍິນຈາກສາດສະດາທີ່ມີຊີວິດຢູ່? ທ່ານກຳລັງເຮັດຫຍັງແດ່ເພື່ອກະທຳຕາມສັດທາກັບຄຳສັນຍາເຫລົ່ານີ້?
ເບິ່ງ 3 ນີໄຟ 29:6; ຄຳສອນ ແລະ ພັນທະສັນຍາ 1:37–38 ນຳອີກ.
ຖ້າຫາກເຮົາຖ່ອມຕົວ ແລະ ເຊື່ອຟັງ, ພຣະເຢຊູຄຣິດສາມາດປິ່ນປົວເຮົາ.
ບາງເທື່ອມັນງ່າຍກວ່າທີ່ຈະພົບເຫັນຄວາມໝາຍສ່ວນຕົວຢູ່ໃນພຣະຄຳພີ ເມື່ອທ່ານປຽບທຽບສິ່ງທີ່ເປັນທາງໂລກຢູ່ໃນເລື່ອງລາວ ໃສ່ກັບສິ່ງທີ່ເປັນທາງວິນຍານ. ຍົກຕົວຢ່າງ, ຂະນະທີ່ອ່ານ 2 ກະສັດ 5, ທ່ານອາດປຽບທຽບການເປັນພະຍາດຂີ້ທູດຂອງນາອາມານໃສ່ກັບການທ້າທາຍທາງວິນຍານທີ່ທ່ານກຳລັງປະເຊີນຢູ່. ຄືກັນກັບນາອາມານ, ບາງທີທ່ານອາດຄາດຫວັງວ່າພຣະຜູ້ເປັນເຈົ້າຈະ “ເຮັດສິ່ງທີ່ຍາກ” (ຂໍ້ທີ 13) ເພື່ອຊ່ວຍເຫລືອທ່ານ. ປະສົບການຂອງນາອາມານສິດສອນທ່ານຫຍັງແດ່? ໃນຊີວິດຂອງທ່ານ, ແມ່ນຫຍັງທີ່ເທົ່າກັບການເຮັດຕາມຄຳແນະນຳແບບງ່າຍໆ ເຊັ່ນ “ການອາບນ້ຳຊຳລະຕົວ”?
ໃຫ້ສັງເກດເບິ່ງປະສົບການຂອງນາອາມານ ວ່າມີຜົນກະທົບແນວໃດຕໍ່ສັດທາຂອງລາວ ໃນພຣະເຈົ້າແຫ່ງອິດສະຣາເອນ (ເບິ່ງ ຂໍ້ທີ 15). ປະສົບການໃດແດ່ທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະເຈົ້າ?
ເບິ່ງ ລູກາ 4:27; 1 ເປໂຕ 5:5–7; ແອວມາ 37:3–7; ອີເທີ 12:27; L. Whitney Clayton, “Whatsoever He Saith unto You, Do It,” Liahona, May 2017, 97–99; “Naaman and Elisha” (ວິດີໂອ), ChurchofJesusChrist.org ນຳອີກ.
“ຝ່າຍຂອງພວກເຮົາມີຫລາຍກວ່າຝ່າຍຂອງພວກເຂົາ.”
ທ່ານເຄີຍຮູ້ສຶກມີຈຳນວນໜ້ອຍ ແລະ ມີຄວາມຢ້ານກົວ, ຄິດສົງໄສ, ຄືກັນກັບຄົນຮັບໃຊ້ຂອງເອລີຊາບໍ, “ພວກເຮົາຄວນຈະເຮັດຢ່າງໃດ?” (ເບິ່ງ 2 ກະສັດ 6:8–23). ແມ່ນຫຍັງທີ່ດົນໃຈທ່ານກ່ຽວກັບຄຳຕອບຂອງເອລີຊາ? ເລື່ອງນີ້ປ່ຽນວິທີທີ່ທ່ານຄິດ ແລະ ຮູ້ສຶກກ່ຽວກັບການທົດລອງຂອງທ່ານ, ໜ້າທີ່ຮັບຜິດຊອບຂອງທ່ານ, ແລະ ຄວາມພະຍາຍາມຂອງທ່ານທີ່ຈະດຳລົງຊີວິດຕາມພຣະກິດຕິຄຸນແນວໃດ?
ຂະນະທີ່ທ່ານໄຕ່ຕອງ, ໃຫ້ພິຈາລະນາຖ້ອຍຄຳຂອງປະທານເຮັນຣີ ບີ ໄອຣິງ ທີ່ວ່າ: “ເຊັ່ນດຽວກັນກັບຄົນຮັບໃຊ້ຄົນນັ້ນຂອງເອລີຊາ, ມີຄົນຢ່າງຫລວງຫລາຍຢູ່ກັບທ່ານ ຫລາຍກວ່າຜູ້ທີ່ທ່ານເຫັນວ່າຕໍ່ຕ້ານທ່ານ. ບາງຄົນທີ່ຢູ່ກັບທ່ານຈະເບິ່ງບໍ່ເຫັນດ້ວຍຕາມະນຸດຂອງທ່ານ. ພຣະຜູ້ເປັນເຈົ້າຈະໃຫ້ກຳລັງໃຈທ່ານ ແລະ ບາງເທື່ອຈະເອີ້ນບາງຄົນໃຫ້ຢືນຢູ່ກັບທ່ານ” (“O Ye That Embark,” Liahona, Nov. 2008, 58).
ເບິ່ງ ເພງສັນລະເສີນ 121; ຄຳສອນ ແລະ ພັນທະສັນຍາ 84:88 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
2 ກະສັດ 2:1–14.ໃຫ້ຄິດກ່ຽວກັບຜູ້ຄົນທີ່ໄດ້ເຫັນເອລີຊາ “ໄດ້ຈັບເອົາ” ເສື້ອຄຸມຂອງເອລີຢາ (ຫລື ເສື້ອຊັ້ນນອກ—ເປັນສັນຍາລັກເຖິງການເອີ້ນຂອງເພິ່ນໃຫ້ເປັນສາດສະດາ). ສິ່ງນີ້ອາດມີຜົນກະທົບຕໍ່ວິທີທີ່ພວກເຂົາຕອບຮັບຕໍ່ການປະຕິບັດສາດສະໜາກິດຂອງເອລີຊາແນວໃດ? (ເບິ່ງ 1 ກະສັດ 19:19 ນຳອີກ.) ບາງທີສະມາຊິກໃນຄອບຄົວສາມາດປ່ຽນຜຽນກັນນຸ່ງ “ເສື້ອຄຸມ” ແລະ ເປັນພະຍານເຖິງວິທີທີ່ເຂົາເຈົ້າໄດ້ເຫັນພຣະຜູ້ເປັນເຈົ້າຊຸກຍູ້ ແລະ ເພີ່ມຄວາມເຂັ້ມແຂງໃຫ້ແກ່ຜູ້ທີ່ຖືກເອີ້ນໃຫ້ຮັບໃຊ້ຢູ່ໃນສາດສະໜາຈັກຂອງພຣະອົງແນວໃດ.
-
2 ກະສັດ 4.ທ່ານສາມາດເຊື້ອເຊີນສະມາຊິກໃນຄອບຄົວໃຫ້ອ່ານກ່ຽວກັບການອັດສະຈັນຢ່າງໜຶ່ງຢູ່ໃນ 2 ກະສັດ 4 (ເບິ່ງ ຂໍ້ທີ 1–7, 14–17, 32–35, 38–41, 42–44) ແລະ ໃຫ້ຂຽນຮ່ອງຮອຍລົງໄວ້ເພື່ອຊ່ວຍສະມາຊິກໃນຄອບຄົວຄົນອື່ນໆໃຫ້ເດົາວ່າ ມັນແມ່ນການອັດສະຈັນຢ່າງໃດ ທີ່ເຂົາເຈົ້າກຳລັງບັນຍາຍຢູ່. ເຮົາຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າ ແລະ ການອັດສະຈັນຂອງພຣະອົງຈາກບົດເຫລົ່ານີ້? ການອັດສະຈັນຢ່າງໃດແດ່—ໃຫຍ່ ຫລື ນ້ອຍ—ທີ່ພວກເຮົາເຄີຍເຫັນໃນຊີວິດຂອງພວກເຮົາ?
-
2 ກະສັດ 5:1–15.ຂະນະທີ່ທ່ານອ່ານຂໍ້ເຫລົ່ານີ້ ແລະ ໄຕ່ຕອງສິ່ງທີ່ລຽບງ່າຍທີ່ນາອາມານໄດ້ຖືກຮຽກຮ້ອງໃຫ້ເຮັດ, ໃຫ້ພິຈາລະນາເຖິງບາງສິ່ງທີ່ສາດສະດາຂອງເຮົາໄດ້ຮຽກຮ້ອງໃຫ້ເຮົາເຮັດ. ຄອບຄົວຂອງເຮົາຈະເຮັດຕາມຄຳແນະນຳນີ້ໄດ້ດີກວ່າເກົ່າແນວໃດ?
ຄອບຄົວຂອງທ່ານສາມາດເບິ່ງວິດີໂອ “Naaman and Elisha” (ChurchofJesusChrist.org) ຫລື ອ່ານ “ເອລີຊາປິ່ນປົວນາອາມານ” (ໃນປຶ້ມ ເລື່ອງພຣະຄຳພີເດີມ).
-
2 ກະສັດ 5:20–27.ເກຮາຊິ ອາດໄດ້ຮັບຜົນປະໂຫຍດຈາກການອ່ານ “ຄວາມສຸດຈະຫລິດ ແລະ ຄວາມຊື່ສັດ” ໃນປຶ້ມ ສຳລັບຄວາມເຂັ້ມແຂງຂອງຊາວໜຸ່ມ ແນວໃດ? (ໜ້າທີ 19). ຄວາມບໍ່ສຸດຈະຫລິດເປັນຜົນຮ້າຍຕໍ່ເຮົາແນວໃດ? ເຮົາໄດ້ຮັບພອນແນວໃດຈາກການເປັນຄົນສຸດຈະຫລິດ?
-
2 ກະສັດ 6:13–17.ສະມາຊິກໃນຄອບຄົວອາດມັກແຕ້ມຮູບກ່ຽວກັບປະສົບການຂອງເອລີຊາ ແລະ ຄົນຮັບໃຊ້ຂອງເພິ່ນ ທີ່ບັນຍາຍຢູ່ໃນຂໍ້ເຫລົ່ານີ້. ຂໍ້ເຫລົ່ານີ້ຊ່ວຍເຮົາແນວໃດ ເມື່ອເຮົາຮູ້ສຶກໂດດດ່ຽວ ຫລື ມີຄວາມກົດດັນຫລາຍ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຂ້າຂໍຂອບພຣະໄທອົງບິດາ,” ເພງສວດ ແລະ ເພງຂອງເດັກນ້ອຍ, 67.
ການປັບປຸງການສິດສອນຂອງເຮົາ
ຊຸກຍູ້ໃຫ້ຖາມຄຳຖາມ. ຄຳຖາມຈາກລູກໆບົ່ງບອກວ່າພວກເຂົາພ້ອມແລ້ວທີ່ຈະຮຽນຮູ້. ຖ້າຫາກທ່ານບໍ່ຮູ້ຄຳຕອບຕໍ່ຄຳຖາມຂອງພວກເຂົາ, ໃຫ້ຊອກຫາຄຳຕອບກັບພວກເຂົາ. (ເບິ່ງ Teaching in the Savior’s Way, 25–26.)
ຮູບພາບນາອາມານກຳລັງຫາຍດີຈາກພະຍາດຂີ້ທູດ, ໂດຍ ພອລ໌ ແມນ