“ວັນທີ 25–31 ເດືອນກໍລະກົດ. ເອສະເທີ: ‘ເຈົ້າໄດ້ເປັນລາຊີນີ … ເພື່ອໃນຍາມຄັບຂັນເຊັ່ນນີ້ແຫລະ’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 25–31 ເດືອນກໍລະກົດ. ເອສະເທີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

Esther [ນາງເອສະເທີ], ໂດຍ ເຈມສ໌ ຈອນສັນ

ວັນທີ 25–31 ເດືອນກໍລະກົດ

ເອສະເທີ

“ເຈົ້າໄດ້ເປັນລາຊີນີ … ເພື່ອໃນຍາມຄັບຂັນເຊັ່ນນີ້ແຫລະ”

ຂະນະທີ່ທ່ານອ່ານເອສະເທີ, ໃຫ້ສະແຫວງຫາການດົນໃຈຈາກພຣະວິນຍານທີ່ເໝາະສົມສຳລັບທ່ານ, ແລະ ບັນທຶກຄວາມປະທັບໃຈທີ່ທ່ານໄດ້ຮັບ.

ບັນທຶກຄວາມປະທັບໃຈຂອງທ່ານ

ເຫດການຫລາຍຢ່າງຢູ່ໃນພຣະທຳເອສະເທີ ອາດເບິ່ງຄື່ວ່າໂຊກເຂົ້າຂ້າງ ຫລື ການບັງເອີນ. ບໍ່ມີທາງອື່ນອີກທີ່ຈະອະທິບາຍວິທີທີ່ເດັກກຳພ້າຄົນຢິວ ໄດ້ກາຍເປັນລາຊີນີຂອງເປີເຊຍ ໃນເວລາທີ່ເໝາະສົມເພື່ອຊ່ວຍກູ້ຊີວິດຂອງຜູ້ຄົນຂອງນາງຈາກການຖືກຂ້າ? ມັນເປັນການບັງເອີນແນວໃດທີ່ ມໍເດໄກ ພີ່ນ້ອງຂອງນາງເອສະເທີໄດ້ຍິນວ່າມີຄົນວາງແຜນທີ່ຈະສັງຫານກະສັດ? ສິ່ງເຫລົ່ານີ້ເປັນການບັງເອີນ, ຫລື ມັນເປັນແຜນການຈາກສະຫວັນ? ແອວເດີ ຣອນໂນ ເອ ແຣັສ໌ແບນ ໄດ້ສັງເກດວ່າ: “ສິ່ງທີ່ເບິ່ງຄືວ່າເປັນເຫດການບັງເອີນ, ຕາມຈິງແລ້ວ, ໄດ້ຖືກຄວບຄຸມໂດຍພຣະບິດາທີ່ຊົງຮັກ ຢູ່ໃນສະຫວັນ. … ອິດທິພົນຂອງພຣະຜູ້ເປັນເຈົ້າອາດເຫັນໄດ້ຢູ່ໃນສິ່ງເລັກນ້ອຍໃນຊີວິດຂອງເຮົາ” (“By Divine Design,” Liahona, Nov. 2017, 56). ເຮົາອາດບໍ່ເຫັນອິດທິພົນຂອງພຣະຜູ້ເປັນເຈົ້າໃນ “ສິ່ງເລັກນ້ອຍ” ເຫລົ່ານີ້. ແຕ່ເຮົາຮຽນຮູ້ຈາກປະສົບການຂອງນາງເອສະເທີ ວ່າພຣະອົງສາມາດນຳພາເຮົາໃນເສັ້ນທາງ ແລະ ກະກຽມເຮົາ “ໃນຍາມຄັບຂັນເຊັ່ນນີ້” (ເອສະເທີ 4:14) ຕອນເຮົາສາມາດເປັນເຄື່ອງມືໃນພຣະຫັດຂອງພຣະອົງ ເພື່ອບັນລຸຈຸດປະສົງຂອງພຣະອົງ.

ສຳລັບພາບລວມຂອງພຣະທຳເອສະເທີ, ໃຫ້ເບິ່ງ “Esther, book of” ໃນ Bible Dictionary.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ເອສະເທີ

ພຣະຜູ້ເປັນເຈົ້າສາມາດເຮັດໃຫ້ເຮົາເປັນເຄື່ອງມື ເພື່ອເປັນພອນໃຫ້ຄົນອື່ນໄດ້.

ຊິດສະເຕີ ແອນ ຊີ ພິງກຣີ ໄດ້ສິດສອນວ່າ: “ການກາຍເປັນເຄື່ອງມືໃນພຣະຫັດຂອງພຣະເຈົ້າ ເປັນສິດທິພິເສດທີ່ຍິ່ງໃຫຍ່ ແລະ ເປັນໜ້າທີ່ຮັບຜິດຊອບທີ່ສັກສິດ. ບໍ່ວ່າເຮົາຈະອາໄສຢູ່ໃສກໍຕາມ, ບໍ່ວ່າສະຖານະການຂອງເຮົາຈະເປັນແບບໃດກໍຕາມ, ບໍ່ວ່າສະຖານະພາບການແຕ່ງງານ ຫລື ອາຍຸຂອງເຮົາຈະເປັນຢ່າງໃດກໍຕາມ, ພຣະຜູ້ເປັນເຈົ້າຕ້ອງການເຮົາ ແຕ່ລະຄົນ ໃຫ້ບັນລຸພາກສ່ວນສະເພາະ [ຂອງເຮົາ] ໃນການສ້າງສາອານາຈັກຂອງພຣະອົງ ໃນຍຸກສຸດທ້າຍນີ້” (“Knowing the Lord’s Will for You,” Liahona, Nov. 2005, 112).

ຂະນະທີ່ທ່ານອ່ານເລື່ອງລາວຂອງນາງເອສະເທີ, ໃຫ້ໄຕ່ຕອງວິທີທີ່ຂໍ້ຄວາມນີ້ກ່ຽວຂ້ອງກັບນາງແນວໃດ. ໃຫ້ຊອກຫາວິທີທີ່ພຣະຜູ້ເປັນເຈົ້າໄດ້ເຮັດໃຫ້ເປັນໄປໄດ້ສຳລັບນາງທີ່ຈະຊ່ວຍກູ້ຄົນຢິວ (ເບິ່ງ, ຍົກຕົວຢ່າງ, ເອສະເທີ 2:21–23; 3:10–14; 4:14–16). ແລ້ວໃຫ້ໄຕ່ຕອງວິທີທີ່ພຣະອົງນຳພາຊີວິດຂອງທ່ານ ໃນວິທີທາງທີ່ໃຫ້ທ່ານໄດ້ເປັນພອນໃຫ້ແກ່ຄົນອື່ນແນວໃດ. ມີສະຖານະການ ຫລື ຄວາມສຳພັນໃດແດ່ທີ່ທ່ານຮູ້ສຶກວ່າ ພຣະອົງໄດ້ນຳພາທ່ານ “ເພື່ອໃນຍາມຄັບຂັນເຊັ່ນນີ້ແຫລະ”? (ເອສະເທີ 4:14). ຖ້າຫາກທ່ານມີປິຕຸພອນ, ໃຫ້ຄິດທີ່ຈະອ່ານມັນ ເພື່ອຮຽນຮູ້ຕື່ມອີກກ່ຽວກັບວຽກງານທີ່ພຣະຜູ້ເປັນເຈົ້າມີໃຫ້ທ່ານເຮັດ.

ເອສະເທີ 3; 5:9–14; 7

ຄວາມທະນົງໃຈ ແລະ ຄວາມໂກດຮ້າຍສາມາດພາໄປສູ່ການຕົກຕ່ຳໄດ້.

ໃນພຣະທຳເອສະເທີ, ເຮົາຮຽນຮູ້ຈາກຄວາມຊື່ສັດຂອງນາງເອສະເທີ ແລະ ມໍເດໄກ ແລະ ຈາກຄວາມທະນົງໃຈ ແລະ ຄວາມໂກດຮ້າຍຂອງຮາມານນຳອີກ. ຂະນະທີ່ທ່ານອ່ານ ເອສະເທີ 3; 5:9–14, ໃຫ້ພິຈາລະນາຄວາມຮູ້ສຶກ, ຄຳເວົ້າ, ແລະ ການກະທຳຂອງຮາມານ. ມັນບອກຫຍັງແດ່ກ່ຽວກັບຕົວລາວ ແລະ ແຮງຈູງໃຈຂອງລາວ? ຜົນສະທ້ອນແນວໃດແດ່ທີ່ລາວໄດ້ປະເຊີນ? (ເບິ່ງ ເອສະເທີ 7). ການອ່ານກ່ຽວກັບຮາມານ ອາດກະຕຸ້ນທ່ານໃຫ້ສຳຫລວດຕົວເອງວ່າແມ່ນຫຍັງທີ່ເປັນແຮງຈູງໃຈຄວາມຮູ້ສຶກ ແລະ ການກະທຳຂອງທ່ານ. ທ່ານຖືກດົນໃຈໃຫ້ທຳການປ່ຽນແປງຢ່າງໃດບໍ? ທ່ານຈະຫັນມາຫາພຣະບິດາເທິງສະຫວັນເພື່ອຂໍຄວາມຊ່ວຍເຫລືອແນວໃດ?

ເບິ່ງ ສຸພາສິດ 16:32; ແອວມາ 5:28 ນຳອີກ.

ເອສະເທີ 3–4; 5:2–3; 8:11–12

ການຖືສິນອົດເຂົ້າເປັນການສະແດງອອກເຖິງການເພິ່ງອາໄສຂອງເຮົາຕໍ່ພຣະຜູ້ເປັນເຈົ້າ.

ໃຫ້ສັງເກດເບິ່ງສະພາບການທີ່ເຮັດໃຫ້ນາງເອສະເທີ ແລະ ຄົນຢິວທັງໝົດໃຫ້ຖືສິນອົດເຂົ້າ (ເບິ່ງ ເອສະເທີ 3:13; 4:1–3, 10–17). ການຖືສິນອົດເຂົ້າເປັນພອນໃຫ້ແກ່ພວກເຂົາແນວໃດ? (ເບິ່ງ ເອສະເທີ 5:2–3; 8:11–12). ເປັນຫຍັງພຣະຜູ້ເປັນເຈົ້າຈຶ່ງຂໍໃຫ້ເຮົາຖືສິນອົດເຂົ້າ? (ເບິ່ງ Gospel Topics, “Fasting and Fast Offerings,” topics.ChurchofJesusChrist.org). ໃຫ້ພິຈາລະນາສິ່ງທີ່ທ່ານສາມາດເຮັດເພື່ອເຮັດໃຫ້ການຖືສິນອົດເຂົ້າເປັນພອນທີ່ຍິ່ງໃຫຍ່ກວ່າເກົ່າໃນຊີວິດຂອງທ່ານແນວໃດ.

ເບິ່ງ ເອຊາຢາ 58:6–12; ມັດທາຍ 4:1–4; 17:14–21; “Fasting: Young Single Adult Ward, Amanda” (ວິດີໂອ), ChurchofJesusChrist.org ນຳອີກ.

2:41

ເອສະເທີ 3:1–11; 4:10–17; 5:1–4

ການເຮັດສິ່ງທີ່ຖືກຕ້ອງມັກຈະຮຽກຮ້ອງຄວາມກ້າຫານຫລາຍກວ່າເກົ່າ.

ເມື່ອມໍເດໄກ ແລະ ນາງເອສະເທີໄດ້ຍຶດໝັ້ນກັບຄວາມເຊື່ອຂອງເຂົາເຈົ້າ, ເຂົາເຈົ້າໄດ້ເອົາຊີວິດເຂົ້າສ່ຽງ. ການເລືອກຂອງເຮົາອາດມີຜົນສະທ້ອນທີ່ບໍ່ຮ້າຍແຮງ, ແຕ່ການເຮັດສິ່ງທີ່ຖືກຕ້ອງອາດຈະຮຽກຮ້ອງຄວາມກ້າຫານຢູ່ສະເໝີ. ທ່ານຮຽນຮູ້ຫຍັງແດ່ຈາກ ເອສະເທີ 3:1–4; 4:10–17 ກ່ຽວກັບການມີຄວາມກ້າຫານທີ່ຈະເຮັດສິ່ງທີ່ຖືກຕ້ອງ? ໃຫ້ສັງເກດເບິ່ງຜົນສະທ້ອນທີ່ແຕກຕ່າງໃນປະສົບການຂອງມໍເດໄກ ແລະ ນາງເອສະເທີ ຫລັງຈາກທີ່ໄດ້ສະແດງຄວາມກ້າຫານ (ເບິ່ງ ເອສະເທີ 3:5–11; 5:1–4). ຜູ້ຄົນຕ້ອງຮູ້ຫຍັງແດ່ກ່ຽວກັບພຣະເຈົ້າ ເພື່ອຈະເລືອກເຮັດຄືກັນກັບນາງເອສະເທີ ແລະ ມໍເດໄກ ໄດ້ເຮັດ—ເພື່ອເຮັດສິ່ງທີ່ຖືກຕ້ອງ ບໍ່ວ່າຜົນສະທ້ອນຈະເປັນແນວໃດກໍຕາມ?

ເທື່ອຕໍ່ໄປເມື່ອທ່ານພິຈາລະນາຜົນສະທ້ອນຂອງການເຮັດສິ່ງທີ່ຖືກຕ້ອງ, ໃຫ້ທ່ານໃຊ້ຖ້ອຍຄຳທີ່ກ້າຫານຂອງນາງເອສະເທີຢູ່ໃນ ເອສະເທີ 4:16 ກັບສະຖານະການຂອງທ່ານເອງ. ຍົກຕົວຢ່າງ, ທ່ານອາດເວົ້າກັບຕົວເອງວ່າ, “ເມື່ອເຮົາເລືອກເຮັດສິ່ງທີ່ຖືກຕ້ອງ, ຖ້າເຮົາ [ສູນເສຍໝູ່ເພື່ອນ], ເຮົາ [ກໍຍອມ].”

ເບິ່ງ Thomas S. Monson, “May You Have Courage,” Liahona, May 2009, 123–27 ນຳອີກ.

ນາງເອສະເທີ ແລະ ກະສັດ — Esther before the King [ນາງເອສະເທີຢູ່ຕໍ່ໜ້າກະສັດ], ໂດຍ ມິເນີວາ ເຄ ໄທເກີດ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ເອສະເທີ 1–10.ຫລັງຈາກການທົບທວນເລື່ອງລາວຂອງນາງເອສະເທີ (ເບິ່ງ “ລາຊີນີເອສະເທີ” ໃນປຶ້ມ ເລື່ອງພຣະຄຳພີເດີມ ຫລື ວິດີໂອ “For Such a Time as This,” ChurchofJesusChrist.org), ຄອບຄົວຂອງທ່ານອາດມັກເຮັດຫຸ່ນຕຸກກະຕາຂອງບາງຄົນຢູ່ໃນເລື່ອງລາວນີ້ (ເບິ່ງ ໜ້າກິດຈະກຳຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ). ເຂົາເຈົ້າສາມາດໃຊ້ມັນເພື່ອເລົ່າເລື່ອງລາວ. ພວກທ່ານກໍຍັງສາມາດຮ້ອງເພງກ່ຽວກັບຄວາມກ້າຫານ ແລະ ຄວາມຈິງໃຈ, ດັ່ງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ຫລື “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72). ຂໍ້ຄວາມໃດຢູ່ໃນເພງນີ້ທີ່ເຕືອນທ່ານກ່ຽວກັບນາງເອສະເທີ?

2:3

ເອສະເທີ 2:5–7.ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງມໍເດໄກກ່ຽວກັບການຊ່ວຍເຫລືອສະມາຊິກໃນຄອບຄົວໃນເວລາຂອງການທົດລອງ? ມີໃຜແດ່ໃນຄອບຄົວຂອງເຮົາທີ່ຕ້ອງການຄວາມຊ່ວຍເຫລືອຈາກເຮົາ? ໃຫ້ວາງແຜນເພື່ອຊ່ວຍເຫລືອເຂົາເຈົ້າ.

ເອສະເທີ 4:15–17.ຄວາມກ້າຫານຂອງນາງເອສະເທີສາມາດດົນໃຈຄອບຄົວຂອງທ່ານໃຫ້ສົນທະນາວິທີທີ່ຈະພັດທະນາຄວາມກ້າຫານເພື່ອຍຶດໝັ້ນຢູ່ໃນຄວາມຈິງ ໃນສະຖານະການທີ່ເຂົາເຈົ້າປະເຊີນ. ນາງເອສະເທີໝາຍຄວາມວ່າແນວໃດ ເມື່ອນາງເວົ້າວ່າ “ຖ້າຂ້ອຍຕາຍ, ຂ້ອຍກໍຍອມ”? ຄຳເວົ້າຂອງນາງກ່ຽວຂ້ອງກັບເຮົາແນວໃດ ເມື່ອເຮົາຕ້ອງມີຄວາມກ້າຫານ? ວິດີໂອ “Courage” (ChurchofJesusChrist.org) ມີຕົວຢ່າງບາງຈຳນວນ.

3:19

ເອສະເທີ 9:26–32.ຊາວຢິວໄດ້ຈັດງານປູຣິມຂຶ້ນ ເພື່ອລະນຶກເຖິງເລື່ອງລາວຂອງນາງເອສະເທີ. ໃນເວລາທີ່ຮັບປະທານອາຫານ ໃນອາທິດນີ້, ໃຫ້ຄິດທີ່ຈະແບ່ງປັນເລື່ອງລາວຕອນທີ່ສະມາຊິກໃນຄອບຄົວຂອງທ່ານ, ລວມທັງບັນພະບຸລຸດ, ໄດ້ເປັນພອນໃຫ້ຄົນອື່ນ ໂດຍການຍຶດໝັ້ນໃນຄວາມຖືກຕ້ອງຄືກັນກັບທີ່ນາງເອສະເທີໄດ້ເຮັດ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ເອົາແບບຢ່າງຊີວິດຂອງພຣະຜູ້ຊ່ວຍໃຫ້ລອດ. “ອຳນາດຂອງພຣະຜູ້ຊ່ວຍໃຫ້ລອດ ທີ່ຈະສິດສອນ ແລະ ເຊີດຊູຄົນອື່ນ ແມ່ນມາຈາກວິທີທີ່ພຣະອົງດຳລົງຊີວິດ ແລະ ບຸກຄົນທີ່ພຣະອົງເປັນ. ເມື່ອທ່ານພາກພຽນພະຍາຍາມທີ່ຈະ ດຳລົງຊີວິດ ເໝືອນຢ່າງພຣະເຢຊູຄຣິດຫລາຍເທົ່າໃດ, ທ່ານຍິ່ງຈະສາມາດ ສິດສອນ ເໝືອນຢ່າງພຣະອົງຫລາຍຂຶ້ນເທົ່ານັ້ນ” (Teaching in the Savior’s Way, 13).

ນາງເອສະເທີ — Queen Esther [ລາຊີນີ ເອສະເທີ], ໂດຍ ມິເນີວາ ເຄ ໄທເກີດ, © ວິວລຽມ ແລະ ແບດີ ສະໂຕກສ໌