“ວັນທີ 11–17 ເດືອນກໍລະກົດ. 2 ກະສັດ 17–25: ‘ເພິ່ນໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 11–17 ເດືອນກໍລະກົດ. 2 ກະສັດ 17–25,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
The Flight of the Prisoners [ນັກໂທດທີ່ກຳລັງແຕກໜີ], ໂດຍ ເຈມສ໌ ທີໂຊ ແລະ ຄົນອື່ນໆ
ວັນທີ 11–17 ເດືອນກໍລະກົດ
2 ກະສັດ 17–25
“ເພິ່ນໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງຊາດອິດສະຣາເອນ”
ເມື່ອໂຢສີຢາໄດ້ຍິນຂໍ້ຄວາມຈາກປຶ້ມທີ່ບັນຈຸກົດບັນຍັດ, ເພິ່ນກໍໄດ້ຕອບຮັບດ້ວຍສັດທາ. ທ່ານຈະຕອບຮັບດ້ວຍສັດທາຕໍ່ສິ່ງທີ່ທ່ານອ່ານຢູ່ໃນ 2 ກະສັດ 17–25 ແນວໃດ?
ບັນທຶກຄວາມປະທັບໃຈຂອງທ່ານ
ເຖິງແມ່ນວ່າການປະຕິບັດສາດສະໜາກິດຂອງສາດສະດາເອລີຊາເປັນທີ່ໜ້າປະທັບໃຈກໍຕາມ, ແຕ່ທາງວິນຍານຂອງອານາຈັກພາກເໜືອຂອງອິດສະຣາເອນນັບມື້ນັບເສື່ອມໂຊມລົງ. ກະສັດທີ່ຊົ່ວຮ້າຍໄດ້ສົ່ງເສີມການຂາບໄຫວ້ຮູບເຄົາລົບ, ແລະ ສົງຄາມ ແລະ ການປະຖິ້ມຄວາມເຊື່ອມີເພີ່ມຫລາຍຂຶ້ນ. ໃນທີ່ສຸດຈັກກະພັດອັດຊີເຣຍໄດ້ຂຶ້ນຄອບຄອງ ແລະ ໄດ້ເຮັດໃຫ້ສິບເຜົ່າຂອງອິດສະຣາເອນແຕກກະຈັດກະຈາຍໄປ.
ໃນເວລາດຽວກັນ, ອານາຈັກພາກໃຕ້ຂອງຢູດາຍກໍບໍ່ດີໄປກວ່ານັ້ນ, ການຂາບໄຫວ້ຮູບເຄົາລົບກໍຂະຫຍາຍໄປທົ່ວທຸກບ່ອນ ໃນທີ່ນັ້ນ. ແຕ່ໃນທ່າມກາງການເສື່ອມໂຊມທາງວິນຍານນີ້, ເລື່ອງລາວຢູ່ໃນພຣະຄຳພີໄດ້ກ່າວເຖິງກະສັດທີ່ຊອບທຳສອງອົງ ຜູ້ຊຶ່ງ, ໃນຊົ່ວໄລຍະໜຶ່ງ, ໄດ້ຫັນຜູ້ຄົນຂອງພວກເພິ່ນກັບມາຫາພຣະຜູ້ເປັນເຈົ້າ. ກະສັດອົງໜຶ່ງແມ່ນ ເຮເຊກີຢາ. ລະຫວ່າງການປົກຄອງຂອງເພິ່ນ, ຊາວອັດຊີເຣຍ, ທີ່ຫາກໍໄດ້ໄຊຊະນະພາກເໜືອ, ໄດ້ຄອບຄອງຫລາຍບ່ອນຢູ່ພາກໃຕ້. ແຕ່ເຮເຊກີຢາ ແລະ ຜູ້ຄົນຂອງເພິ່ນໄດ້ສະແດງສັດທາໃນພຣະຜູ້ເປັນເຈົ້າ, ຜູ້ໄດ້ປົດປ່ອຍເຢຣູຊາເລັມໃນວິທີທີ່ໜ້າອັດສະຈັນໃຈ. ຕໍ່ມາ, ຫລັງຈາກຊົ່ວໄລຍະໜຶ່ງຂອງການປະຖິ້ມຄວາມເຊື່ອ, ໂຢສີຢາໄດ້ເລີ່ມຕົ້ນຂຶ້ນຄອງ. ໂດຍໄດ້ຮັບການດົນໃຈຈາກໜັງສືທີ່ບັນຈຸກົດບັນຍັດ, ໂຢສີຢາໄດ້ປະຕິຮູບ ທີ່ນຳສາດສະໜາມາສູ່ຊີວິດຂອງຜູ້ຄົນຂອງເພິ່ນຢ່າງຫລວງຫລາຍ.
ເຮົາຮຽນຮູ້ຫຍັງແດ່ຈາກຈຸດຮຸ່ງເຫລື້ອມສອງຈຸດນີ້ ໃນໄລຍະຫລາຍປີທີ່ມືດມົນເຫລົ່ານັ້ນໃນປະຫວັດສາດຂອງຢູດາຍ? ໃນບັນດາສິ່ງອື່ນໆ, ທ່ານອາດໄຕ່ຕອງພະລັງແຫ່ງສັດທາ ແລະ ພຣະຄຳຂອງພຣະເຈົ້າໃນຊີວິດຂອງທ່ານ. ຄືກັນກັບອິດສະຣາເອນ ແລະ ຢູດາຍ, ເຮົາທຸກຄົນກໍເຄີຍເລືອກເຮັດສິ່ງທີ່ດີ ແລະ ສິ່ງທີ່ບໍ່ດີ. ແລະ ເມື່ອເຮົາຮູ້ສຶກວ່າຕ້ອງມີການປະຕິຮູບໃນຊີວິດຂອງເຮົາ, ບາງທີຕົວຢ່າງຂອງເຮເຊກີຢາ ແລະ ໂຢສີຢາ ສາມາດດົນໃຈເຮົາໃຫ້ “ໄວ້ວາງໃຈໃນພຣະຜູ້ເປັນເຈົ້າ ພຣະເຈົ້າຂອງເຮົາ” (2 ກະສັດ 18:22).
ເບິ່ງ 2 ຂ່າວຄາວ 29–35; ພາກ “ຄວາມຄິດທີ່ໃຫ້ເກັບໄວ້ໃນໃຈ” “ພຣະເຢຊູຈະກ່າວກັບຊາວອິດສະຣາເອນທັງໝົດວ່າ, ‘ຈົ່ງກັບບ້ານ ນຳອີກ.’”
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາສາມາດຈິງໃຈຕໍ່ພຣະຜູ້ເປັນເຈົ້າລະຫວ່າງເວລາທີ່ມີການທ້າທາຍ.
ເຮົາສ່ວນຫລາຍເຄີຍມີປະສົບການຕອນທີ່ສັດທາຂອງເຮົາໄດ້ຮັບການທ້າທາຍ. ສຳລັບເຮເຊກີຢາ ແລະ ຜູ້ຄົນຂອງເພິ່ນ, ແມ່ນເວລາທີ່ກອງທັບອັດຊີເຣຍໄດ້ບຸກໂຈມຕີຢູດາຍ, ໄດ້ທຳລາຍຫລາຍຫົວເມືອງ, ແລະ ໄດ້ມຸ້ງໜ້າໄປຫາເຢຣູຊາເລັມ. ຂະນະທີ່ທ່ານອ່ານ 2 ກະສັດ 18–19, ໃຫ້ວາດພາບໃນໃຈວ່າທ່ານໄດ້ອາໄສຢູ່ໃນນະຄອນເຢຣູຊາເລັມລະຫວ່າງເວລານັ້ນ. ທ່ານຈະຮູ້ສຶກແນວໃດ, ຍົກຕົວຢ່າງ, ເມື່ອໄດ້ຍິນຊາວອັດຊີເຣຍຮ້ອງເຍາະເຍີ້ຍ ດັ່ງທີ່ບັນທຶກຢູ່ໃນ 2 ກະສັດ 18:28–37 ແລະ 19:10–13? ທ່ານຮຽນຮູ້ຫຍັງແດ່ຈາກສິ່ງທີ່ເຮເຊກີຢາໄດ້ເຮັດ ໃນການຕອບຮັບ? (ເບິ່ງ 2 ກະສັດ 19:1–7, 14–19). ພຣະຜູ້ເປັນເຈົ້າໄດ້ຄ້ຳຈູນເຮເຊກີຢາແນວໃດ? (ເບິ່ງ 2 ກະສັດ 19:35–37). ໃຫ້ໄຕ່ຕອງວິທີທີ່ພຣະອົງໄດ້ຄ້ຳຈູນທ່ານໃນເວລາທີ່ມີການທ້າທາຍແນວໃດ.
ທ່ານກໍອາດຢາກໄຕ່ຕອງຄຳບັນຍາຍຂອງເຮເຊກີຢາອີກຢູ່ໃນ 2 ກະສັດ 18:5–7. ຂໍ້ເຫລົ່ານັ້ນແນະນຳສິ່ງໃດກ່ຽວກັບເຫດຜົນທີ່ເຮເຊກີຢາຍັງຄົງຊື່ສັດເໝືອນເດີມ ເມື່ອມີການທ້າທາຍ? ທ່ານຈະເຮັດຕາມຕົວຢ່າງຂອງເພິ່ນໄດ້ແນວໃດ?
ເບິ່ງ 3 ນີໄຟ 3–4; D. Todd Christofferson, “Firm and Steadfast in the Faith of Christ,” Liahona, Nov. 2018, 30–33 ນຳອີກ.
ທຸກສິ່ງຢູ່ໃນພຣະຫັດຂອງພຣະຜູ້ເປັນເຈົ້າ.
ເຊັນນາເກຣິບ ກະສັດຂອງອັດຊີເຣຍ, ມີເຫດຜົນດີທີ່ໜ້າເຊື່ອວ່າ ກອງທັບຂອງເພິ່ນຈະຍຶດເອົານະຄອນເຢຣູຊາເລັມໄດ້. ອັດຊີເຣຍໄດ້ຍຶດຄອງຫລາຍປະເທດ, ລວມທັງອິດສະຣາເອນ—ເຢຣູຊາເລັມຈະແຕກຕ່າງຈາກນັ້ນແນວໃດ? (ເບິ່ງ 2 ກະສັດ 17; 18:33–34; 19:11–13). ແຕ່ພຣະຜູ້ເປັນເຈົ້າມີຂ່າວສານສຳລັບເຊັນນາເກຣິບ, ຜ່ານທາງສາດສະດາເອຊາຢາ, ແລະ ມັນຖືກບັນທຶກໄວ້ຢູ່ໃນ 2 ກະສັດ 19:20–34. ທ່ານຈະສະຫລຸບຂ່າວສານນີ້ແນວໃດ? ຄວາມຈິງຢ່າງໃດແດ່ທີ່ທ່ານພົບເຫັນຢູ່ໃນຂໍ້ເຫລົ່ານີ້ ທີ່ຊ່ວຍທ່ານໃຫ້ມີສັດທາໃນພຣະຜູ້ເປັນເຈົ້າ ແລະ ໃນແຜນຂອງພຣະອົງ?
ເບິ່ງ ຮີລາມັນ 12:4–23; ຄຳສອນ ແລະ ພັນທະສັນຍາ 101:16 ນຳອີກ.
ພຣະຄຳພີສາມາດຫັນຫົວໃຈຂອງເຮົາມາຫາພຣະຜູ້ເປັນເຈົ້າໄດ້.
ທ່ານເຄີຍຮູ້ສຶກວ່າ ທ່ານຂາດເຂີນບາງຢ່າງທາງວິນຍານບໍ? ບາງທີທ່ານຮູ້ສຶກວ່າ ຄວາມສຳພັນຂອງທ່ານກັບພຣະເຈົ້າຄວນເຂັ້ມແຂງຫລາຍກວ່ານີ້. ແມ່ນຫຍັງທີ່ຊ່ວຍທ່ານໃຫ້ຫັນກັບມາຫາພຣະອົງ? ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານກ່ຽວກັບວິທີທີ່ອານາຈັກຢູດາຍໄດ້ຫັນໜີຈາກພຣະຜູ້ເປັນເຈົ້າພາຍໃຕ້ການຄອບຄອງຂອງກະສັດມານາເຊ (ເບິ່ງ 2 ກະສັດ 21) ແລະ ວິທີທີ່ກະສັດໂຢສີຢາໄດ້ຊ່ວຍພວກເຂົາຫັນກັບມາຫາພຣະອົງ (ເບິ່ງ 2 ກະສັດ 22–23). ແມ່ນຫຍັງທີ່ດົນໃຈໂຢສີຢາ ແລະ ຜູ້ຄົນຂອງເພິ່ນ? ເລື່ອງນີ້ອາດດົນໃຈທ່ານໃຫ້ຫັນກັບມາ “ເຊື່ອຟັງພຣະຜູ້ເປັນເຈົ້າ … ດ້ວຍສຸດໃຈ [ຂອງທ່ານ] ແລະ ດ້ວຍສຸດຈິດ [ຂອງທ່ານ]” (2 ກະສັດ 23:3).
ຂະນະທີ່ທ່ານອ່ານບົດເຫລົ່ານີ້, ໃຫ້ພິຈາລະນາທີ່ຈະສຶກສາ ບົດທີ 6 ໃນ Teachings of Presidents of the Church: Spencer W. Kimball ([2006], 59–68) ນຳອີກ, ໃນນີ້ປະທານຄິມໂບໄດ້ແນະນຳວ່າ ເລື່ອງລາວກ່ຽວກັບກະສັດໂຢສີຢາ “ເປັນເລື່ອງໜຶ່ງທີ່ເດັ່ນທີ່ສຸດ ຢູ່ໃນພຣະຄຳພີທັງໝົດ” (ໜ້າທີ 62). ເປັນຫຍັງປະທານຄິມໂບຈຶ່ງຮູ້ສຶກແນວນີ້? ທ່ານພົບເຫັນຫຍັງຢູ່ໃນຖ້ອຍຄຳຂອງປະທານຄິມໂບ, ໂດຍສະເພາະຄວາມຄິດຄວາມເຫັນຂອງເພິ່ນກ່ຽວກັບກະສັດໂຢສີຢາ, ທີ່ຊ່ວຍທ່ານນຳໃຊ້ 2 ກະສັດ 22–23 ໃນຊີວິດຂອງທ່ານ?
ເບິ່ງ ແອວມາ 31:5; Takashi Wada, “Feasting upon the Words of Christ,” Liahona, May 2019, 38–40; “Josiah and the Book of the Law” (ວິດີໂອ), ChurchofJesusChrist.org ນຳອີກ.
ພຣະຄຳພີສາມາດຊ່ວຍຫັນຫົວໃຈເຮົາໃຫ້ມາຫາພຣະຜູ້ເປັນເຈົ້າ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
2 ກະສັດ 19:14–19.ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງເຮເຊກີຢາ ທີ່ສາມາດຊ່ວຍເຮົາເມື່ອເຮົາມີບັນຫາຫຍຸ້ງຍາກ ແລະ ມີຄຳຖາມ? ພຣະຜູ້ເປັນເຈົ້າໄດ້ຕອບຄຳອະທິຖານຂອງເຮົາທີ່ຂໍຄວາມຊ່ວຍເຫລືອແນວໃດ? ບາງທີສະມາຊິກໃນຄອບຄົວແຕ່ລະຄົນສາມາດເຮັດບາງສິ່ງ ເພື່ອວາງສະແດງຢູ່ໃນເຮືອນ ທີ່ເຕືອນເຂົາເຈົ້າໃຫ້ຫັນມາຫາພຣະຜູ້ເປັນເຈົ້າ.
-
2 ກະສັດ 22:3–7.ພະນັກງານທີ່ອະທິບາຍຢູ່ໃນ 2 ກະສັດ 22:3–7 ໄດ້ຮັບເງິນເພື່ອເອົາໄປໃຊ້ສ້າງພຣະວິຫານຄືນໃໝ່ “ເພາະພວກເຂົາເປັນຄົນສັດຊື່” (ຂໍ້ທີ 7). ຫລັງຈາກການອ່ານຂໍ້ເຫລົ່ານີ້ແລ້ວ, ທ່ານສາມາດຂໍໃຫ້ສະມາຊິກໃນຄອບຄົວບອກກ່ຽວກັບສິ່ງທີ່ເຂົາເຈົ້າໄດ້ຮັບມອບໝາຍ. ເຮົາຈະເປັນຄົນທີ່ໄວ້ເນື້ອເຊື່ອໃຈໄດ້ຄືກັນກັບພະນັກງານຢູ່ໃນຂໍ້ເຫລົ່ານີ້ໄດ້ແນວໃດ?
-
2 ກະສັດ 22:8–11, 19; 23:1–3.ແມ່ນຫຍັງທີ່ປະທັບໃຈເຮົາກ່ຽວກັບວິທີທີ່ໂຢສີຢາ ແລະ ຜູ້ຄົນຂອງເພິ່ນຕອບຮັບພຣະຄຳຂອງພຣະເຈົ້າ? ເຮົາຈະຕອບຮັບພຣະຄຳຂອງພຣະເຈົ້າຢູ່ໃນພຣະຄຳພີແນວໃດ? ສະມາຊິກຂອງຄອບຄົວທ່ານສາມາດແບ່ງປັນຂໍ້ພຣະຄຳພີ ຫລື ເລື່ອງລາວທີ່ຊ່ວຍເຂົາເຈົ້າໃຫ້ມີຄວາມປາດຖະໜາທີ່ຈະຕິດຕາມພຣະບິດາເທິງສະຫວັນ ແລະ ພຣະເຢຊູຄຣິດ.
-
2 ກະສັດ 23:25.ແມ່ນຫຍັງທີ່ເດັ່ນຕໍ່ເຮົາກ່ຽວກັບຄຳບັນຍາຍຂອງໂຢສີຢາ ຢູ່ໃນຂໍ້ນີ້? ຄອບຄົວຂອງທ່ານສາມາດແຕ້ມຮູບໃສ່ໃນເຈ້ຍທີ່ເປັນຮູບຫົວໃຈ ກ່ຽວກັບສິ່ງທີ່ເຂົາເຈົ້າສາມາດເຮັດໃນອາທິດນີ້ ເພື່ອຫັນມາຫາພຣະຜູ້ເປັນເຈົ້າ ດ້ວຍສຸດໃຈຂອງເຂົາເຈົ້າ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຈາລຶກທອງຄຳ,” ເພງສວດ ແລະ ເພງຂອງເດັກນ້ອຍ, 71.
ການປັບປຸງການສຶກສາສ່ວນຕົວ
ຊອກຫາຖ້ອຍຄຳ ແລະ ວະລີທີ່ດົນໃຈ. ຂະນະທີ່ທ່ານອ່ານ, ພຣະວິນຍານອາດເຮັດໃຫ້ທ່ານສົນໃຈກັບຖ້ອຍຄຳ ຫລື ວະລີໃດໜຶ່ງໂດຍສະເພາະ. ມັນອາດດົນໃຈ ແລະ ຊຸກຍູ້ທ່ານ; ມັນອາດແມ່ນແຕ່ເບິ່ງຄືວ່າຖືກຂຽນໄວ້ເພື່ອທ່ານເທົ່ານັ້ນ.
ຮູບພາບຜູ້ຂຽນນຳມ້ວນພຣະຄຳພີມາຖວາຍກະສັດ ໂຢສີຢາ, ໂດຍ ຣໍເບີດ ທີ ແບແຣັດ