ວິທີທີ່ຈະໄດ້ຮັບການເປີດເຜີຍ ແລະ ການດົນໃຈສຳລັບຊີວິດສ່ວນຕົວຂອງທ່ານ
ໂດຍ ແອວເດີ ຣິເຈີດ ຈີ ສະກາດ
ແຫ່ງສະພາອັກຄະສາວົກສິບສອງ
ເປັນຫຍັງພຣະຜູ້ເປັນເຈົ້າຈຶ່ງຢາກ ໃຫ້ເຮົາອະທິຖານຫາພຣະອົງ ແລະ ທູນຂໍ? ເພາະວ່ານັ້ນເປັນວິທີທາງທີ່ການເປີດເຜີຍຈະຖືກໄດ້ຮັບ.
ທຸກຄົນທີ່ໄດ້ກ່າວຢູ່ເທິງແທ່ນປາໄສນີ້ກໍຮູ້ສຶກເຖິງພະລັງ ແລະ ການສະໜັບສະໜູນຂອງສະມາຊິກຕະຫລອດທົ່ວໂລກ. ຂ້າພະເຈົ້າມີຄວາມກະຕັນຍູທີ່ໄດ້ຮັບການສະໜັບສະໜູນຢ່າງດຽວກັນນັ້ນຈາກຄູ່ຄອງ ແລະ ຜູ້ທີ່ໄດ້ລ່ວງລັບໄປແລ້ວ. ຂອບໃຈຫລາຍໆຈີນນີ.
ພຣະວິນຍານບໍລິສຸດສື່ສານຂໍ້ມູນສຳຄັນທີ່ເຮົາຕ້ອງການເພື່ອນຳພາເຮົາໃນການເດີນທາງຂອງເຮົາຢູ່ເທິງ ໂລກມະຕະ. ເມື່ອຂໍ້ມູນນັ້ນຊັດເຈນ ແລະ ແຈ່ມແຈ້ງ ແລະ ສຳຄັນ, ມັນຕ້ອງໄດ້ຮັບຊື່ວ່າເປັນການເປີດ ເຜີຍ. ເມື່ອມັນເປັນການກະຕຸ້ນຕາມລຳດັບທີ່ເຮົາໄດ້ຮັບເລື້ອຍໆ ເພື່ອນຳພາເຮົາແຕ່ລະບາດກ້າວທີ່ນຳ ໄປສູ່ເປົ້າໝາຍທີ່ມີຄຸນຄ່າ, ສຳລັບຂ່າວສານຂອງຂ້າພະເຈົ້ານີ້, ມັນເປັນຄວາມດົນໃຈ.
ຕົວຢ່າງໜຶ່ງຂອງການເປີດເຜີຍອາດເປັນການນຳພາທີ່ປະທານສະເປັນເຊີ ດັບບັນຢູ ຄິມໂບ ໄດ້ຮັບ ຫລັງຈາກການອ້ອນວອນຫາພຣະຜູ້ເປັນເຈົ້າເປັນເວລາອັນຍາວນານ ແລະ ຕໍ່ເນື່ອງຂອງເພິ່ນກ່ຽວກັບ ການປະທານຖານະປະໂລຫິດໃຫ້ແກ່ຜູ້ຊາຍທີ່ຊອບທຳທຸກຄົນໃນສາດສະໜາຈັກໃນວັນເວລາທີ່ມັນ ໄດ້ມີໃຫ້ພຽງແຕ່ສຳລັບບາງຄົນເທົ່ານັ້ນ.
ອີກຕົວຢ່າງໜຶ່ງຂອງການເປີດເຜີຍຄືການຊີ້ນຳທີ່ຖືກມອບໃຫ້ສາດສະດາໂຈເຊັບ ແອັຟ ສະມິດ ວ່າ: “ຂ້າພະເຈົ້າເຊື່ອວ່າພວກເຮົາເຄື່ອນໄຫວ ແລະ ໄດ້ເປັນຕົວເຮົາເອງໃນທີ່ປະທັບຂອງເຫລົ່າທູດແຫ່ງ ສະຫວັນ ແລະ ຜູ້ຄົນແຫ່ງສະຫວັນ. ພວກເຮົາບໍ່ໄດ້ຢູ່ແຍກຈາກເຂົາເຈົ້າ. ... ພວກເຮົາກ່ຽວພັນ ກັບຍາດພີ່ນ້ອງ, ກັບບັນພະບຸລຸດຂອງເຮົາ, ... ຜູ້ທີ່ໄດ້ໄປສູ່ໂລກແຫ່ງວິນຍານກ່ອນເຮົາ. ເຮົາບໍ່ສາມາດລືມເຂົາເຈົ້າໄດ້; ເຮົາຈະບໍ່ເຊົາຮັກເຂົາເຈົ້າ; ເຮົາເກັບເຂົາເຈົ້າໄວ້ຢູ່ໃນຫົວໃຈຂອງເຮົາ, ໃນຄວາມຊົງຈຳ, ແລະ ສະນັ້ນເຮົາຈຶ່ງພົວພັນ ແລະ ຮ່ວມກັນຢູ່ກັບເຂົາເຈົ້າໂດຍຄວາມສຳພັນ ທີ່ເຮົາຕັດຂາດບໍ່ໄດ້. ... ຖ້ານີ້ເປັນແບບດຽວກັບພວກເຮົາໃນສະພາບການທີ່ຈຳກັດຂອງເຮົາ, ອ້ອມຮອບຢູ່ກັບຄວາມອ່ອນແອທາງໂລກຂອງເຮົາ, ... ມັນຈະແນ່ນອນພຽງໃດ .... ທີ່ຈະເຊື່ອວ່າ ຜູ້ທີ່ໄດ້ຊື່ສັດ, ທີ່ໄດ້ເສຍຊີວິດໄປແລ້ວ .... ສາມາດເຫັນໄດ້ດີກວ່າທີ່ເຮົາສາມາດເຫັນເຂົາເຈົ້າ; ວ່າເຂົາເຈົ້າຮູ້ຈັກເຮົາດີກວ່າເຮົາຮູ້ຈັກເຂົາເຈົ້າ. ... ເຮົາມີຊີວິດຢູ່ໃນທີ່ປະທັບຂອງເຂົາເຈົ້າ, ເຂົາເຈົ້າ ເຫັນເຮົາ, ເຂົາເຈົ້າເປັນຫ່ວງນຳຄວາມຜາສຸກຂອງເຮົາ, ເຂົາເຈົ້າຮັກເຮົາໃນເວລານີ້ຫລາຍກວ່າແຕ່ກ່ອນ. ໃນເວລານີ້ເຂົາເຈົ້າເຫັນອັນຕະລາຍທີ່ລໍ້ລວງເຮົາ; ... ຄວາມຮັກທີ່ເຂົາເຈົ້າມີໃຫ້ເຮົາ ແລະ ຄວາມ ປາຖະໜາຂອງເຂົາເຈົ້າສຳລັບຄວາມປອດໄພຂອງເຮົາຕ້ອງຍິ່ງໃຫຍ່ກວ່າທີ່ເຮົາຮູ້ສຶກສຳລັບຕົວເຮົາເອງ.”1
ເຮົາສາມາດເຮັດໃຫ້ຄວາມສຳພັນຂອງເຮົາກັບຜູ້ຄົນທີ່ເຮົາຮູ້ຈັກ ແລະ ຮັກແພງທີ່ໄດ້ເສຍຊີວິດໄປ ແລ້ວເຂັ້ມແຂງໄດ້. ສິ່ງນີ້ຈະເກີດຂຶ້ນໄດ້ໂດຍຄວາມພະຍາຍາມທີ່ເດັດດ່ຽວຂອງເຮົາທີ່ຈະເຮັດສິ່ງທີ່ ຖືກຕ້ອງຕໍ່ໄປ. ເຮົາສາມາດເຮັດໃຫ້ຄວາມສຳພັນຂອງເຮົາກັບບຸກຄົນທີ່ເຮົາທີ່ເຮົາຮັກທີ່ໄດ້ເສຍໄປ ແລ້ວເຂັ້ມແຂງຂຶ້ນ ໂດຍການຍອມຮັບວ່າການຈາກໄປນັ້ນ ເປັນສິ່ງຊົ່ວຄາວ ແລະ ວ່າພັນທະສັນຍາ ທີ່ເຮົາໄດ້ເຮັດໃນພຣະວິຫານນັ້ນເປັນຊົ່ວນິລັນດອນ. ເມື່ອຖືກຮັກສາຢ່າງສະໝ່ຳສະເໝີ, ມັນຈະເຮັດ ໃຫ້ການບັນລຸຄຳສັນຍານິລັນດອນທີ່ມີຢູ່ໃນພັນທະສັນຍານັ້ນແນ່ນອນ.
ຕອນຂ້າພະເຈົ້າໄດ້ຮັບການກະຕຸ້ນເຕືອນຢ່າງແຮງກ້າຈາກພຣະວິນຍານວ່າໃຫ້ຂໍຍິງສາວຜູ້ສວຍງາມ ຄົນໜຶ່ງຊື່ ຈິນນີນ ວອດກິນ ໃຫ້ໄປຜະນຶກກັບຂ້າພະເຈົ້າທີ່ພຣະວິຫານ.
ບົດຮຽນທິ່ຍິ່ງໃຫຍ່ບົດໜຶ່ງທີ່ເຮົາແຕ່ລະຄົນຕ້ອງຮຽນຮູ້ຄືທີ່ຈະທູນຂໍ. ເປັນຫຍັງພຣະຜູ້ເປັນເຈົ້າຈຶ່ງຢາກ ໃຫ້ເຮົາອະທິຖານຫາພຣະອົງ ແລະ ທູນຂໍ? ເພາະວ່ານັ້ນເປັນວິທີທາງທີ່ການເປີດເຜີຍຈະຖືກໄດ້ຮັບ.
ເມື່ອຂ້າພະເຈົ້າໄດ້ປະເຊີນໜ້າກັບເລື່ອງທີ່ຍາກລຳບາກ, ນີ້ເປັນວິທີທາງທີ່ຂ້າພະເຈົ້າພະຍາຍາມ ຈະເຂົ້າໃຈວ່າຈະເຮັດຫຍັງແດ່. ຂ້າພະເຈົ້າຈະຖືສິນອົດເຂົ້າ. ຂ້າພະເຈົ້າຈະອະທິຖານເພື່ອຈະໄດ້ພົບ ແລະ ເຂົ້າໃຈຂໍ້ພຣະຄຳພີທີ່ຈະຊ່ອຍເຫລືອ. ຂັ້ນຕອນນີ້ເປັນວົງຈອນ. ຂ້າພະເຈົ້າເລີ່ມອ່ານຂໍ້ພຣະຄຳພີ; ຂ້າພະເຈົ້າໄຕ່ຕອງຄວາມໝາຍຂອງຂໍ້ນັ້ນ ແລະ ອະທິຖານຂໍຄວາມດົນໃຈ. ແລ້ວຂ້າພະເຈົ້າຈະໄຕ່ຕອງ ແລະ ອະທິຖານເພື່ອຈະຮູ້ຖ້າຫາກຂ້າພະເຈົ້າໄດ້ບັນທຶກທຸກສິ່ງທີ່ພຣະຜູ້ເປັນເຈົ້າປະສົງໃຫ້ຂ້າພະເຈົ້າເຮັດ. ສ່ວນຫລາຍແລ້ວຄວາມປະທັບໃຈຫລາຍຢ່າງຈະເຂົ້າມາພ້ອມຄວາມເຂົ້າໃຈຄຳສອນທີ່ເພີ່ມທະວີຂຶ້ນ. ຂ້າພະເຈົ້າໄດ້ພົບເຫັນແບບແຜນນັ້ນທີ່ເປັນວິທີທາງທີ່ດີທີ່ຈະຮຽນຮູ້ຈາກພຣະຄຳພີ.
ຍັງມີຫລັກທຳບາງຢ່າງທີ່ນຳໃຊ້ໄດ້ທີ່ຈະເພີ່ມພູນການເປີດເຜີຍ. ທຳອິດ, ຄວາມຮູ້ສຶກທີ່ຈະກໍ່ໃຫ້ເກີດ ຄວາມໂມໂຫ ຫລື ຄວາມເຈັບປວດ ຫລື ການປ້ອງກັນຕົວຈະຂັບໄລ່ພຣະວິນຍານບໍລິສຸດອອກໄປ. ອາລົມ ເຫລົ່ານີ້ຕ້ອງຖືກກຳຈັດອອກໄປ, ຫລື ໂອກາດທີ່ຈະໄດ້ຮັບການເປີດເຜີຍນັ້ນຈະມີໜ້ອຍ.
ອີກຫລັກທຳອີກຢ່າງໜຶ່ງຄື ໃຫ້ລະມັດລະວັງກັບຄວາມຕະຫລົກ. ສຽງຫົວທີ່ບໍ່ເໝາະສົມຈະເຮັດໃຫ້ ພຣະວິນຍານບໍ່ພໍພຣະໄທ. ຄວາມຕະຫລົກທີ່ດີຈະຊ່ອຍໃນການເປີດເຜີຍ; ຄວາມຕະຫລົກຄືການປົດປ່ອຍຄວາມກົດດັນຂອງຊີວິດອອກໄປ.
ສັດຕູຂອງການເປີດເຜີຍອີກຢ່າງໜຶ່ງຈະມາຈາກການເວົ້າເກີນຄວາມຈິງ ຫລື ສຽງດັງພິລຶກໃນສິ່ງທີ່ໄດ້ກ່າວ. ການເວົ້າຈາງຽບໆ ແລະ ລະມັດລະວັງຈະສົ່ງເສີມອຳນາດທີ່ຈະໄດ້ຮັບການເປີດເຜີຍ.
ອີກດ້ານໜຶ່ງທີ່ມີອິດທິພົນຕໍ່ການສື່ສານທາງວິນຍານຄືສຸຂະພາບ. ການອອກກຳລັງກາຍ, ການຫລັບນອນ ທີ່ສົມຄວນ, ແລະ ການເລືອກອາຫານການກິນທີ່ດີຈະເພີ່ມຂະຫຍາຍຄວາມສາມາດຂອງເຮົາທີ່ຈະໄດ້ຮັບ ແລະ ເຂົ້າໃຈການເປີດເຜີຍ. ເຮົາຈະມີຊີວິດຢູ່ເປັນເວລາທີ່ຖືກກຳນົດໄວ້ໃນລະຍະຊີວິດຂອງເຮົາ; ເຖິງຢ່າງໃດກໍຕາມ, ເຮົາສາມາດເຮັດໃຫ້ທັງຄຸນນະພາບແຫ່ງການຮັບໃຊ້ນັ້ນ ແລະ ຄວາມຜາສຸກຂອງ ເຮົາດີຂຶ້ນໂດຍການເລືອກທີ່ເໝາະສົມຢ່າງລະມັດລະວັງ.
ມັນສຳຄັນທີ່ກິດຈະກຳປະຈຳວັນຂອງເຮົາບໍ່ໄດ້ກີດກັນເຮົາຈາກການຟັງພຣະວິນຍານ.
ການເປີດເຜີຍຖືກມອບໃຫ້ໃນຄວາມຝັນຄືກັນ ເມື່ອມີການປ່ຽນສະພາບຈາກການນອນຫລັບຫາການ ຕື່ນຕົວທີ່ເກືອບສັງເກດເຫັນບໍ່ໄດ້. ຖ້າທ່ານພະຍາຍາມຈະບັນທຶກມັນໄວ້ໃນທັນທີ, ທ່ານຈະສາມາດ ບັນທຶກລາຍລະອຽດໄດ້ດີ, ບໍ່ດັ່ງນັ້ນ ມັນຈະຄ່ອຍໆຫາຍໄປຢ່າງວ່ອງໄວ. ການສື່ສານທີ່ດົນໃຈໃນກາງຄືນ ທົ່ວໄປແລ້ວຈະຕິດຕາມມາດ້ວຍຄວາມຮູ້ສຶກອັນສັກສິດສຳລັບປະສົບການທັງໝົດ. ພຣະຜູ້ເປັນເຈົ້າ ຈະໃຊ້ບຸກຄົນທີ່ເຮົາມີຄວາມນັກຖືຫລາຍທີ່ຈະສອນຄວາມຈິງໃຫ້ເຮົາໃນຄວາມຝັນ ເພາະວ່າເຮົາໄວ້ ວາງໃຈເຂົາເຈົ້າ ແລະ ຈະຮັບຟັງຄຳແນະນຳຂອງເຂົາເຈົ້າ. ພຣະຜູ້ເປັນເຈົ້າເປັນຜູ້ໃຫ້ການສັ່ງສອນນັ້ນ ຜ່ານພຣະວິນຍານບໍລິສຸດ. ເຖິງຢ່າງໃດກໍດີ, ໃນຄວາມຝັນນັ້ນພຣະອົງອາດເຮັດໃຫ້ມັນງ່າຍທີ່ຈະເຂົ້າໃຈ ແລະ ຈະສຳພັດຫົວໃຈໂດຍການສັ່ງສອນຈາກຄົນໃດຄົນໜຶ່ງທີ່ເຮົາຮັກ ແລະ ນັບຖື.
ເມື່ອມັນເປັນເພື່ອຈຸດປະສົງຂອງພຣະຜູ້ເປັນເຈົ້າ, ພຣະອົງສາມາດນຳສິ່ງໃດກໍໄດ້ມາສູ່ຄວາມຈົດຈຳ ຂອງເຮົາທີ່ໄດ້ເກີດຂຶ້ນກັບເຮົາ. ຄວາມເທັດຈິງນີ້ຄວນບໍ່ເຮັດໃຫ້ຄວາມຕັ້ງໃຈຂອງເຮົາອ່ອນແອທີ່ຈະບັນທຶກ ຄວາມປະທັບໃຈຈາກພຣະວິນຍານ. ຂັ້ນຕອນຂອງການຫວນຄິດໂດຍການດົນໃຈຈະຖືກເພີ່ມພູນໂດຍ ການບັນທຶກມັນໄວ້ຢ່າງລະມັດລະວັງ. ການບັນທຶກການດົນໃຈຢ່າງລະມັດລະວັງນັ້ນຈະສະແດງໃຫ້ ພຣະເຈົ້າເຫັນວ່າການສື່ສານຂອງພຣະອົງນັ້ນສັກສິດສຳລັບເຮົາ. ການບັນທຶກການຊີ້ນຳດັ່່ງກ່າວ ຈາກພຣະວິນຍານຄວນໄດ້ຮັບການປົກປ້ອງຈາກການສູນເສຍ ຫລື ຈາກການລ່ວງລ້ຳຂອງຄົນອື່ນ.
ພຣະຄຳພີໃຫ້ການຢືນຢັນທີ່ຄ່ອງແຄ້ວວ່າຄວາມຈິງ, ທີ່ໄດ້ປະຕິບັດຕາມຢ່າງສະໝ່ຳສະເໝີ, ຈະເປີດ ປະຕູໄປສູ່ການດົນໃຈແນວໃດ ທີ່ຈະຮູ້ສິ່ງທີ່ຈະຕ້ອງເຮັດ ແລະ ເມື່ອຈຳເປັນອຳນາດແຫ່ງສະຫວັນຈະເພີ່ມ ຄວາມສາມາດຂອງເຮົາ. ພຣະຄຳພີສະແດງໃຫ້ເຫັນວ່າຄວາມສາມາດຂອງຄົນອື່ນທີ່ຈະເອົາຊະນະ ການທ້າທາຍທີ່ຍາກລຳບາກ, ໜ້າສົງໄສ ແລະ ເບິ່ງຄືວ່າຈະເອົາຊະນະບໍ່ໄດ້ຖືກເຮັດໃຫ້ເຂັ້ມແຂງຂຶ້ນ ໃນເວລາທີ່ຕ້ອງການ. ຂະນະທີ່ທ່ານຄິດໄຕ່່ຕອງຕົວຢ່າງເຫລົ່ານີ້, ການຢືນຢັນທີ່ງຽບສະຫງົບຈະເຂົ້າ ມາຜ່ານພຣະວິນຍານວ່າປະສົບການຂອງເຂົາເຈົ້າຈິງ. ທ່ານຈະມາຮູ້ວ່າຄວາມຊ່ອຍເຫລືອທີ່ຄ້າຍກັນນີ້ ກໍມີໄວ້ໃຫ້ທ່ານຕາມເງື່ອນໄຂທີ່ພຣະຜູ້ເປັນເຈົ້າກຳນົດໄວ້.
ຂ້າພະເຈົ້າໄດ້ເຫັນບຸກຄົນທີ່ປະເຊີນກັບການທ້າທາຍ ຜູ້ທີ່ໄດ້ຮູ້ສິ່ງທີ່ເຂົາເຈົ້າຕ້ອງເຮັດເມື່ອມັນເກີນ ປະສົບການຂອງເຂົາເຈົ້າເພາະວ່າເຂົາເຈົ້າໄດ້ໄວ້ວາງໃຈໃນພຣະຜູ້ເປັນເຈົ້າວ່າພຣະອົງຈະນຳພາ ເຂົາເຈົ້າໄປສູ່ຂໍ້ແກ້ໄຂທີ່ເຂົາເຈົ້າຕ້ອງການຢ່າງຮີບດ່ວນ.
ພຣະເຈົ້າໄດ້ກ່າວວ່າ ເຮົາຈະໄດ້ຮັບການສອນຈາກເບື້ອງບົນ. ເຮົາຄວນຊຳລະຕົວໃຫ້ບໍລິສຸດ ແລະ ເຮົາຈະໄດ້ຮັບພອນດ້ວຍອຳນາດ, ເພື່ອເຮົາຈະຮັບແມ່ນແຕ່ດັ່ງທີ່ພຣະອົງໄດ້ກ່າວໄວ້.2 ຄຳທີ່ວ່າ ຊຳລະຕົວໃຫ້ບໍລິສຸດ ອາດປະກົດວ່າໜ້າງົງງັນ. ປະທານແຮໂຣນ ບີ ລີ ໄດ້ອະທິບາຍເທື່ອໜຶ່ງວ່າ, “ທ່ານສາມາດເອົາສຳນວນທີ່ວ່າ, ‘ຮັກສາພຣະບັນຍັດຂອງເຮົາ’ ມາແທນຄຳເຫລົ່ານັ້ນໄດ້.”3
ນີ້ກໍໝາຍຄວາມວ່າຄົນໆນັ້ນຕ້ອງສະອາດທັງທາງຈິດໃຈ ແລະ ຮ່າງກາຍເພື່ອວ່າພຣະຜູ້ເປັນເຈົ້າຈະ ສາມາດດົນໃຈເຂົາ. ມັນໝາຍຄວາມວ່າເຈດຕະນາຂອງເຂົາຕ້ອງບໍລິສຸດ. ຄົນທີ່ຮັກສາພຣະບັນຍັດຂອງ ພຣະອົງພຣະອົງຈະໄວ້ວາງໃຈເຂົາ; ບຸກຄົນໆນັ້ນຈະໄດ້ຮັບການດົນໃຈຈາກພຣະອົງເພື່ອຈະຮູ້ສິ່ງ ທີ່ຈະຕ້ອງເຮັດ ແລະ ຕາມທີ່ຈຳເປັນຈະໄດ້ຮັບອຳນາດຈາກສະຫວັນ ຫລື ຄວາມສາມາດທີ່ຈະເຮັດສິ່ງນັ້ນ.
ເພື່ອເລື່ອງທາງວິນຍານຈະເຕີບໂຕໃຫ້ເຂັ້ມແຂງຂຶ້ນ ແລະ ມີໄວ້ໃຫ້ຫລາຍເມື່ອຕ້ອງການ, ມັນຕ້ອງຖືກ ປູກຝັງຢູ່ໃນສະພາບແວດລ້ອມທີ່ຊອບທຳ. ຄວາມຍິ່ງຍະໂສ, ຄວາມຈອງຫອງ, ແລະ ຄວາມອວດດີ ເປັນເໝືອນໜ້າດິນພື້ນຫີນທີ່ຈະບໍ່ເກີດຜົນທາງວິນຍານ.
ຄວາມຖ່ອມຕົວເປັນພື້ນດິນທີ່ອຸດົມສົມບູນບ່ອນທີ່ຄວາມເປັນຝ່າຍວິນຍານຈະເຕີບໂຕ ແລະ ອອກໝາກ ຜົນແຫ່ງການດົນໃຈທີ່ຈະຮູ້ສິ່ງທີ່ຕ້ອງເຮັດ. ມັນພາເຮົາເຂົ້າສູ່ອຳນາດຈາກສະຫວັນທີ່ຈະສຳເລັດສິ່ງ ທີ່ຕ້ອງເຮັດ. ຄວາມຖ່ອມຕົວມີລັກສະນະທີ່ລ້ຳຄ່າສອງຢ່າງ: ຄວາມສາມາດທີ່ຈະຍອມຮັບຕໍ່ຄຳສອນ ຂອງພຣະວິນຍານ ແລະ ຄວາມບໍລິສຸດຂອງການເຈດຕະນາ. ບຸກຄົນໆໜຶ່ງທີ່ຖືກກະຕຸ້ນໂດຍຄວາມ ປາຖະໜາຫາຄວາມສັນລະເສີນ ຫລື ຄວາມຍ້ອງຍໍຈະບໍ່ມີສິດໄດ້ຮັບການສັ່ງສອນຈາກພຣະວິນຍານ. ການດົນໃຈເຮັດໃຫ້ເຮົາມີສິດທີ່ຈະຮູ້ສິ່ງທີ່ຕ້ອງເຮັດ ແລະ ເມື່ອຈຳເປັນຈະນຳໄປສູ່ອຳນາດຈາກ ສະຫວັນທີ່ຈຳເປັນເພື່ອສຳເລັດສິ່ງນັ້ນ. ບຸກຄົນທີ່ີອວດດີ, ປ່ອຍໃຫ້ອາລົມຂອງເຂົາມີອິດທິພົນ ຕໍ່ການຕັດສິນໃຈຂອງເຂົາ, ຫລື ປ່ອຍໃຫ້ອິດທິພົນ ຫລື ແຮງກົດດັນຈາກອີກຄົນໜຶ່ງເພື່ອຄວບຄຸມ ການກະທຳຂອງເຂົາຈະບໍ່ໄດ້ຮັບການດົນໃຈ ຫລື ຖືກນຳພາຢ່າງມີພະລັງໂດຍພຣະວິນຍານ.
ເມື່ອເຮົາປະຕິບັດໃນຖານະເຄື່ອງມືແທນຄົນອື່ນ, ເຮົາຈະໄດ້ຮັບການດົນໃຈງ່າຍກວ່າເມື່ອເຮົາຄິດນຳ ແຕ່ເລື່ອງຂອງຕົວເອງເທົ່ານັ້ນ. ໃນຂັ້ນຕອນຂອງການຊ່ອຍເຫລືອຄົນອື່ນ, ພຣະຜູ້ເປັນເຈົ້າເພີ່ມ ການຊີ້ນຳນັ້ນ ເພື່ອຜົນປະໂຫຍດຂອງເຮົາເອງ.
ພຣະບິດາເທິງສະຫວັນບໍ່ໄດ້ສົ່ງເຮົາມາເທິງໂລກເພື່ອໃຫ້ລົ້ມເຫລວ ແຕ່ໃຫ້ສຳເລັດຜົນຢ່າງຮຸ່ງໂລດ. ມັນອາດເບິ່ງຄືວ່າເປັນເລື່ອງກົງກັນຂ້າມ, ແຕ່ນັ້ນຈຶ່ງເປັນສາເຫດທີ່ການຮັບຮູ້ຄຳຕອບຕໍ່ການອະທິຖານ ບາງເທື່ອຈະເປັນເລື່ອງຍາກ. ບາງເທື່ອເຮົາອາດພະຍາຍາມປະເຊີນກັບຊີວິດແບບບໍ່ສະຫລາດ ໂດຍເພິ່ງປະສົບການ ແລະ ຄວາມສາມາດຂອງຕົວເອງ. ຈະເປັນສິ່ງສະຫລາດກວ່າຖ້າຫາກເຮົາສະແຫວງຫາຜ່ານການອະທິຖານ ແລະ ການດົນໃຈຈາກສະຫວັນເພື່ອຈະຮູ້ວ່າຈະເຮັດຫຍັງແດ່. ການເຊື່ອຟັງຂອງເຂົາເຈົ້າຮັບຮອງວ່າ ເມື່ອຈຳເປັນ, ເຂົາເຈົ້າຈະສາມາດມີສິດຮັບອຳນາດຈາກສະຫວັນທີ່ຈະສຳເລັດວັດຖຸປະສົງທີ່ຖືກດົນໃຈ.
ເໝືອນດັ່ງເຮົາທັງຫລາຍ, ອໍລິເວີ ຄາວເດີຣີ ບໍ່ໄດ້ຮັບຮູ້ຫລັກຖານຂອງຄຳຕອບຕໍ່ຄຳຖາມທີ່ພຣະຜູ້ ເປັນເຈົ້າໄດ້ປະທານໃຫ້ແລ້ວ. ເພື່ອຈະເປີດຕາຂອງເພິ່ນ, ແລະ ຕາຂອງເຮົາດ້ວຍ, ການເປີດເຜີຍນີ້ ຖືກມອບໃຫ້ຜ່ານໂຈເຊັບ ສະມິດ ວ່າ:
ພຣະຜູ້ເປັນເຈົ້າໄດ້ບອກອໍລິເວີວ່າເພິ່ນໄດ້ເປັນສຸກເພາະສິ່ງທີ່ເພິ່ນໄດ້ເຮັດໄປ; ເພາະເພິ່ນໄດ້ທູນຖາມ ແລະ ຈົ່ງເບິ່ງ, ຫລາຍໆຄັ້ງພຽງໃດທີ່ເພິ່ນໄດ້ຖາມເພິ່ນກໍໄດ້ຮັບຄຳແນະນຳຈາກພຣະວິນຍານຂອງພຣະອົງ. ຫາກບໍ່ເປັນດັ່ງນັ້ນ, ເພິ່ນຄົງບໍ່ມາຍັງທີ່ທີ່ເພິ່ນໄດ້ຢູ່ໃນເວລານັ້ນ.
ພຣະຜູ້ເປັນເຈົ້າໄດ້ກ່າວກັບອໍລິເວີວ່າ ເພິ່ນຮູ້ວ່າເພິ່ນສອບຖາມພຣະອົງ ແລະ ພຣະອົງໄດ້ເຮັດໃຫ້ຄວາມຄິດຂອງເພິ່ນສະຫວ່າງ ແລະ ບັດນີ້ພຣະອົງບອກເພິ່ນເລື່ອງເຫລົ່ານີ້ ເພື່ອເພິ່ນຈະຮູ້ວ່າເພິ່ນໄດ້ຮັບຄວາມສະຫວ່າງໂດຍພຣະວິນຍານແຫ່ງຄວາມຈິງ.4
ຖ້າທ່ານຮູ້ສຶກວ່າພຣະເຈົ້າຍັງບໍ່ໄດ້ຕອບຄຳອະທິຖານຂອງທ່ານ, ຈົ່ງໄຕ່ຕອງຂໍ້ພຣະຄຳພີເຫລົ່ານີ້—ແລ້ວໃຫ້ຊອກຫາຫລັກຖານນັ້ນໃນຊີວິດຂອງທ່ານຢ່າງລະມັດລະວັງ ເຖິງຄຳຕອບທີ່ພຣະອົງອາດຕອບທ່ານໄປແລ້ວ.
ຈຸດຊີ້ບອກສອງຈຸດວ່າຄວາມຮູ້ສຶກ ຫລື ການກະຕຸ້ນນັ້ນມາຈາກພຣະເຈົ້າກໍຄື ມັນຈະກໍ່ໃຫ້ເກີດຄວາມ ສະຫງົບສຸກໃນຫົວໃຈຂອງທ່ານ ແລະ ຄວາມຮູ້ສຶກງຽບໆທີ່ອົບອຸ່ນ. ເມື່ອທ່ານເຮັດຕາມຫລັກທຳດັ່ງທີ່ຂ້າພະເຈົ້າກ່າວມານັ້ນ, ທ່ານຈະຕຽມພ້ອມທີ່ຈະຮູ້ວ່າອັນໃດເປັນການເປີດເຜີຍໃນເວລາທີ່ຫຍຸ້ງຍາກໃນຊີວິດຂອງທ່ານ.
ເມື່ອທ່ານຕິດຕາມກະແສຂອງການນຳພາຈາກສະຫວັນດີເທົ່າໃດ, ຄວາມສຸກຂອງທ່ານຢູ່ທີ່ນີ້ ແລະ ໃນນິລັນດອນແຮ່ງຈະຍິ່ງໃຫຍ່ຫລາຍເທົ່ານັ້ນ, ແລະ ພ້ອມນັ້ນຄວາມກ້າວໜ້າ ແລະ ຄວາມສາມາດ ຂອງທ່ານທີ່ຈະຮັບໃຊ້ແຮ່ງຈະອຸດົມສົມບູນຫລາຍຂຶ້ນ. ຂ້າພະເຈົ້າບໍ່ເຂົ້າໃຈທັງໝົດວ່ານີ້ຈະເກີດຂຶ້ນ ໄດ້ແນວໃດ, ແຕ່ກະແສນັ້ນໃນຊີວິດຂອງທ່ານຈະບໍ່ເອົາອຳເພີໃຈຂອງທ່ານໄປ. ຂອງປະທານແຫ່ງອຳເພີໃຈ ທາງສິນທຳນັ້ນສຳຄັນຫລາຍສຳລັບພຣະບິດາຜູ້ສະຖິດຢູ່ໃນສະຫວັນຂອງເຮົາ ພຣະອົງຈຶ່ງເຕັມໃຈສູນເສຍ ຈຳນວນໜຶ່ງສ່ວນສາມຂອງລູກໆທາງວິນຍານຂອງພຣະອົງ ເພື່ອຈະໄດ້ຮັກສາອຳເພີໃຈເອົາໄວ້. ທ່ານສາມາດຕັດສິນການເລືອກທີ່ທ່ານເລືອກ; ການຕັດສິນໃຈທີ່ຈະເຮັດສິ່ງທີ່ຖືກຕ້ອງຈະນຳຄວາມ ສະຫງົບສຸກທາງຄວາມຄິດ ແລະ ຫົວໃຈມາໃຫ້.
ຖ້າການເລືອກຂອງທ່ານຜິດພາດ, ຍັງມີທາງກັບຄືນຜ່ານການກັບໃຈ. ເມື່ອເງື່ອນໄຂຂອງມັນຖືກສະໜອງ ຢ່າງຄົບຖ້ວນ, ການຊົດໃຊ້ຂອງພຣະເຢຊູຄຣິດ, ພຣະຜູ້ຊ່ອຍໃຫ້ລອດຂອງເຮົາ, ຈະໃຫ້ການປົດປ່ອຍ ຈາກຂໍ້ຮຽກຮ້ອງຂອງຄວາມຍຸດຕິທຳສຳລັບຄວາມຜິດພາດທີ່ໄດ້ເຮັດລົງໄປ. ມັນເປັນເລື່ອງງ່າຍທີ່ ອັດສະຈັນໃຈ ແລະ ງົດງາມເໜືອການປຽບທຽບໃດໆ. ຂະນະທີ່ທ່ານດຳລົງຊີວິດຢ່າງຊອບທຳຕໍ່ໄປ, ທ່ານຈະໄດ້ຮັບການກະຕຸ້ນສະເໝີໄປເພື່ອຈະຮູ້ສິ່ງທີ່ຕ້ອງເຮັດ. ບາງເທື່ອການພົບເຫັນສິ່ງຈະຕ້ອງເຮັດ ຈະໃຊ້ຄວາມພະຍາຍາມ ແລະ ຄວາມໄວ້ວາງໃຈຫລາຍໃນສ່ວນຂອງທ່ານ. ແຕ່ທ່ານຈະໄດ້ຮັບການ ກະຕຸ້ນເຕືອນເພື່ອຈະຮູ້ວ່າຈະເຮັດຫຍັງເມື່ອທ່ານສະໜອງເງື່ອນໄຂສຳລັບການນຳພາຈາກສະຫວັນ ດັ່ງກ່າວໃນຊີວິດຂອງທ່ານ, ດັ່ງເຊັ່ນ, ການເຊື່ອຟັງພຣະບັນຍັດຂອງພຣະຜູ້ເປັນເຈົ້າ, ຄວາມໄວ້ວາງໃຈ ໃນແຜ່ນແຫ່ງຄວາມສຸກຈາກສະຫວັນຂອງພຣະອົງ, ແລະ ການຫລີກລ້ຽງສິ່ງໃດໆທີ່ກົງກັນ ຂ້າມກັບແຜນນັ້ນ.
ການສື່ສານກັບພຣະບິດາຜູ້ສະຖິດຢູ່ໃນສະຫວັນຂອງເຮົາບໍ່ແມ່ນເລື່ອງຫລິ້ນໆ. ມັນເປັນສິດທິພິເສດທີ່ສັກສິດ. ມັນຂຶ້ນຢູ່ກັບຫລັກທຳນິລັນດອນທີ່ບໍ່ປ່ຽນແປງ. ເຮົາໄດ້ຮັບມັນຈາກພຣະບິດາຜູ້ສະຖິດຢູ່ໃນສະຫວັນໃນການຕອບສະໜອງຕໍ່ສັດທາ, ການເຊື່ອຟັງ, ແລະ ການນຳໃຊ້ອຳເພີໃຈຂອງເຮົາຢ່າງເໝາະສົມ.
ຂໍ່ໃຫ້ພຣະຜູ້ເປັນເຈົ້າຈົ່ງດົນໃຈທ່ານໃຫ້ເຂົ້າໃຈ ແລະ ນຳໃຊ້ຫລັກທຳຕ່າງໆທີ່ຈະນຳໄປສູ່ການເປີດເຜີຍ ແລະ ການດົນໃຈສ່ວນຕົວໃນພຣະນາມຂອງພຣະເຢຊູຄຣິດ, ອາແມນ.