“ວັນທີ 6–12 ເດືອນມິຖຸນາ. ນາງຣຸດ; 1 ຊາມູເອນ 1–3: ‘ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 6–12 ເດືອນມິຖຸນາ. ນາງຣຸດ; 1 ຊາມູເອນ 1–3,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

Whither Thou Goest [ແມ່ໄປທີ່ໃດລູກກໍຈະໄປທີ່ນັ້ນ], ໂດຍ ແຊນດີ ຟະເຣັກໂກທັນ ກາກອນ

ວັນທີ 6–12 ເດືອນມິຖຸນາ

ນາງຣຸດ; 1 ຊາມູເອນ 1–3

“ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ”

ຂະນະທີ່ທ່ານສຶກສາຊີວິດຂອງນາງຣຸດ, ນາງນາໂອມີ, ນາງຮັນນາ, ແລະ ຄົນອື່ນໆໃນອາທິດນີ້, ໃຫ້ຟັງພຣະວິນຍານຢ່າງໃກ້ຊິດ ແລະ ບັນທຶກຄວາມປະທັບໃຈໃດໆທີ່ທ່ານໄດ້ຮັບ. ທ່ານຖືກດົນໃຈໃຫ້ເຮັດຫຍັງ?

ບັນທຶກຄວາມປະທັບໃຈຂອງທ່ານ

ບາງເທື່ອເຮົາວາດພາບວ່າ ຊີວິດຂອງເຮົາຄວນຢູ່ໃນເສັ້ນທາງທີ່ແຈ່ມໃສ ນັບແຕ່ຕອນເລີ່ມຕົ້ນຈົນຈົບ. ເຖິງແນວໃດ, ໄລຍະສັ້ນທີ່ສຸດລະຫວ່າງສອງຈຸດແມ່ນເສັ້ນຕົງ. ແຕ່ຊີວິດກໍເຕັມໄປດ້ວຍຄວາມລ່າຊ້າ ແລະ ທາງອ້ອມ ທີ່ນຳພາເຮົາໄປໃນທາງທີ່ບໍ່ຄາດຄິດ. ເຮົາອາດພົບເຫັນວ່າ ຊີວິດຂອງເຮົາແມ່ນແຕກຕ່າງຫລາຍຈາກສິ່ງທີ່ເຮົາຄິດວ່າເຮົາຄວນເປັນ.

ນາງຣຸດ ແລະ ນາງຮັນນາ ກໍເຂົ້າໃຈເລື່ອງນີ້ດີ. ນາງຣຸດບໍ່ໄດ້ເປັນຄົນອິດສະຣາເອນ, ແຕ່ນາງໄດ້ແຕ່ງງານກັບຄົນອິດສະຣາເອນ, ແລະ ເມື່ອສາມີຂອງນາງໄດ້ຕາຍໄປ, ນາງຕ້ອງໄດ້ເລືອກ. ນາງຄວນກັບຄືນໄປຫາຄອບຄົວຂອງນາງ ແລະ ຄືນສູ່ຊີວິດທີ່ຄຸ້ນເຄີຍບໍ, ຫລື ນາງຕ້ອງຮັບເອົາຄວາມເຊື່ອຖືຂອງຊາວອິດສະຣາເອນ ແລະ ບ້ານໃໝ່ກັບແມ່ຍ່າຂອງນາງ? (ເບິ່ງ ນາງຣຸດ 1:4–18). ແຜນການຂອງນາງຮັນນາໃນຊີວິດແມ່ນການຢາກມີລູກ, ແລະ ການທີ່ນາງບໍ່ສາມາດມີລູກ ໄດ້ເຮັດໃຫ້ນາງເຕັມໄປ “ດ້ວຍຄວາມຂົມຂື່ນ” (ເບິ່ງ 1 ຊາມູເອນ 1:1–10). ຂະນະທີ່ທ່ານອ່ານກ່ຽວກັບນາງຣຸດ ແລະ ນາງຮັນນາ, ໃຫ້ພິຈາລະນາສັດທາຂອງເຂົາເຈົ້າ ທີ່ຕ້ອງມອບຊີວິດໄວ້ຢູ່ໃນພຣະຫັດຂອງພຣະຜູ້ເປັນເຈົ້າ ແລະ ເດີນໄປໃນເສັ້ນທາງທີ່ບໍ່ຄາດຄິດ. ແລ້ວທ່ານອາດຄິດກ່ຽວກັບການເດີນທາງຂອງທ່ານເອງ. ມັນຈະເບິ່ງແຕກຕ່າງຈາກການເດີນທາງຂອງນາງຣຸດ ແລະ ນາງຮັນນາ—ແລະ ຄົນອື່ນໆອີກ. ແຕ່ຕະຫລອດທົ່ວການທົດລອງ ແລະ ສິ່ງທີ່ເກີດຂຶ້ນແບບບໍ່ຄາດຄິດ ລະຫວ່າງຕອນນີ້ ເຖິງຈຸດໝາຍປາຍທາງນິລັນດອນຂອງທ່ານ, ທ່ານສາມາດຮຽນທີ່ຈະເວົ້າແບບດຽວກັບນາງຮັນນາວ່າ, “ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ” (1 ຊາມູເອນ 2:1).

ສຳລັບພາບລວມຂອງພຣະທຳ ນາງຣຸດ ແລະ 1 ຊາມູເອນ, ໃຫ້ເບິ່ງ “Ruth” ແລະ “Samuel, books of” ໃນ Bible Dictionary.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ນາງຣຸດ

ພຣະຄຣິດສາມາດປ່ຽບຄວາມໂສກເສົ້າເປັນໄຊຊະນະໄດ້.

ເມື່ອສາມີຂອງນາງຣຸດໄດ້ຕາຍໄປ, ຜົນສະທ້ອນຂອງຄວາມໂສກເສົ້ານັ້ນ ແມ່ນຮ້າຍແຮງຫລາຍກວ່າແມ່ໝ້າຍໃນທຸກວັນນີ້ຕ້ອງປະເຊີນ. ໃນວັດທະນະທຳຂອງຊາວອິດສະຣາເອນ ໃນເວລານັ້ນ, ຜູ້ຍິງທີ່ປາດສະຈາກສາມີ ຫລື ລູກຊາຍ ບໍ່ມີສິດທີ່ຈະມີທີ່ດິນ ແລະ ບໍ່ມີຫົນທາງທີ່ຈະຫາລ້ຽງຊີບ. ຂະນະທີ່ທ່ານອ່ານເລື່ອງລາວຂອງນາງຣຸດ, ໃຫ້ສັງເກດເບິ່ງວິທີທີ່ພຣະຜູ້ເປັນເຈົ້າປ່ຽນຄວາມໂສກເສົ້າໃຫ້ກາຍເປັນພອນອັນຍິ່ງໃຫຍ່ແນວໃດ. ທ່ານສັງເກດເຫັນຫຍັງແດ່ກ່ຽວກັບນາງຣຸດ ທີ່ອາດຊ່ວຍເຫລືອນາງໄດ້? ໂບອາດມີບົດບາດແນວໃດໃນການຊ່ວຍກູ້ນາງຣຸດຈາກສະຖານະການທີ່ອັບຈົນຂອງນາງ? (ເບິ່ງ ນາງຣຸດ 4:4–7). ບຸກຄະລິກລັກສະນະທີ່ເປັນເໝືອນພຣະຄຣິດຢ່າງໃດແດ່ ທີ່ທ່ານເຫັນຢູ່ໃນຕົວຂອງນາງຣຸດ ແລະ ໂບອາດ?

ນາງຣຸດ; 1 ຊາມູເອນ 1

ເຮົາສາມາດໄວ້ວາງໃຈວ່າພຣະເຈົ້າຈະນຳພາ ແລະ ຊ່ວຍເຫລືອເຮົາ ບໍ່ວ່າສະຖານະການຂອງເຮົາຈະເປັນແນວໃດກໍຕາມ.

ທ່ານສາມາດເຫັນຕົວເອງຢູ່ໃນເລື່ອງລາວຂອງນາງຣຸດ, ນາງນາໂອມີ, ແລະ ນາງຮັນນາບໍ? ບາງທີທ່ານເຄີຍທຸກທໍລະມານກັບການສູນເສຍ, ຄືກັນກັບນາງຣຸດ ແລະ ນາງນາໂອມີໄດ້ສູນເສຍ (ເບິ່ງ ນາງຣຸດ 1:1–5). ຫລື ບາງທີ, ຄືກັນກັບນາງຮັນນາ, ທ່ານຄອຍຖ້າພອນທີ່ທ່ານຍັງບໍ່ໄດ້ຮັບເທື່ອ (ເບິ່ງ 1 ຊາມູເອນ 1:1–10). ໃຫ້ໄຕ່ຕອງຂ່າວສານທີ່ທ່ານສາມາດຮຽນຮູ້ຈາກຕົວຢ່າງຂອງຜູ້ຍິງທີ່ຊື່ສັດເຫລົ່ານີ້. ນາງຣຸດ ແລະ ນາງຮັນນາສະແດງສັດທາໃນພຣະເຈົ້າແນວໃດ? ພອນຢ່າງໃດແດ່ທີ່ເຂົາເຈົ້າໄດ້ຮັບ? ທ່ານຈະເຮັດຕາມຕົວຢ່າງຂອງເຂົາເຈົ້າໄດ້ແນວໃດ? ໃຫ້ພິຈາລະນາວ່າ ທ່ານໄດ້ “ມາເພິ່ງພາອາໄສ” ພຣະຜູ້ເປັນເຈົ້າແນວໃດ (ນາງຣຸດ 2:12) ເຖິງແມ່ນເວລາທີ່ຊີວິດມີຄວາມຫຍຸ້ງຍາກກໍຕາມ.

ເບິ່ງ Reyna I. Aburto, “Thru Cloud and Sunshine, Lord, Abide with Me!” Liahona, Nov. 2019, 57–60 ນຳອີກ.

ນາງຮັນນາ ແລະ ຊາມູເອນ — For This Child I Prayed [ຂ້ານ້ອຍໄດ້ອະທິຖານຂໍລູກນຳພຣະອົງ], ໂດຍ ແອວສະແປດ ຢັງ

1 ຊາມູເອນ 2:1–10

ຫົວໃຈຂອງເຮົາສາມາດປິຕິຍິນດີໃນພຣະຜູ້ເປັນເຈົ້າ.

ຫລັງຈາກນາງຮັນນາໄດ້ພາທ້າວນ້ອຍຊາມູເອນໄປຍັງພຣະວິຫານ, ນາງໄດ້ກ່າວຄຳສວຍງາມເພື່ອສັນລະເສີນພຣະຜູ້ເປັນເຈົ້າ, ບັນທຶກຢູ່ໃນ 1 ຊາມູເອນ 2:1–10. ຖ້ອຍຄຳເຫລົ່ານີ້ປະທັບໃຈຫລາຍກວ່ານັ້ນ ເມື່ອທ່ານພິຈາລະນາເມື່ອບໍ່ດົນມານັ້ນ, “ນາງໄດ້ຮ້ອງໄຫ້, … ດ້ວຍຄວາມຂົມຂື່ນ” (1 ຊາມູເອນ 1:10). ຂະນະທີ່ທ່ານສຶກສາຂໍ້ເຫລົ່ານີ້, ຂ່າວສານຢ່າງໃດແດ່ທີ່ທ່ານພົບເຫັນວ່າ ເພີ່ມພູນຄວາມຮູ້ສຶກຂອງທ່ານເລື່ອງການສັນລະເສີນ ແລະ ຄວາມກະຕັນຍູຕໍ່ພຣະຜູ້ເປັນເຈົ້າ? ບາງທີເພງຂອງນາງຮັນນາຈະດົນໃຈທ່ານໃນວິທີທາງທີ່ສ້າງສັນ ເພື່ອສະແດງຄວາມກະຕັນຍູຕໍ່ພຣະຜູ້ເປັນເຈົ້າ—ເພງ, ການແຕ້ມຮູບ, ການໃຫ້ຄວາມຊ່ວຍເຫລືອ, ຫລື ອັນໃດກໍຕາມທີ່ສື່ສານຄວາມຮູ້ສຶກຂອງທ່ານຕໍ່ພຣະອົງ.

ແນ່ນອນ, ບໍ່ພຽງແຕ່ຄຳອະທິຖານອັນແຮງກ້າເທົ່ານັ້ນທີ່ໄດ້ຮັບຄຳຕອບໃນທາງທີ່ນາງຮັນນາໄດ້ຮັບ. ທ່ານພົບເຫັນຫຍັງແດ່ຢູ່ໃນຂ່າວສານຂອງປະທານດີເດີ ແອັຟ ອຸກດອບ “Grateful in Any Circumstances” ທີ່ສາມາດຊ່ວຍທ່ານເວລາທີ່ຄຳອະທິຖານຂອງທ່ານບໍ່ໄດ້ຮັບຄຳຕອບໃນທາງທີ່ທ່ານຄາດຫວັງ? (Liahona, May 2014, 70–77).

1 ຊາມູເອນ 3

ເຮົາສາມາດໄດ້ຍິນ ແລະ ເຊື່ອຟັງສຸລະສຽງຂອງພຣະຜູ້ເປັນເຈົ້າ.

ຄືກັນກັບເຮົາທຸກຄົນ, ຊາມູເອນຕ້ອງໄດ້ຮຽນຮູ້ວິທີທີ່ຈະຮັບຮູ້ສຸລະສຽງຂອງພຣະຜູ້ເປັນເຈົ້າ. ຂະນະທີ່ທ່ານສຶກສາ 1 ຊາມູເອນ 3, ທ່ານຮຽນຮູ້ຫຍັງແດ່ຈາກທ້າວນ້ອຍຄົນນີ້ກ່ຽວກັບການຟັງ ແລະ ການເຊື່ອຟັງສຸລະສຽງຂອງພຣະຜູ້ເປັນເຈົ້າ? ທ່ານເຄີຍມີປະສົບການໃດແດ່ກັບການໄດ້ຍິນສຸລະສຽງຂອງພຣະອົງ? ທ່ານມີໂອກາດໃດແດ່, ຄືກັນກັບເອລີ, ເພື່ອຊ່ວຍຄົນອື່ນໆໃຫ້ຮັບຮູ້ ເມື່ອພຣະຜູ້ເປັນເຈົ້າກຳລັງກ່າວກັບເຂົາເຈົ້າ? (ເບິ່ງ 1 ຊາມູເອນ 3:7).

ເບິ່ງ ໂຢຮັນ 14:14–21; David P. Homer, “Hearing His Voice,” Liahona, May 2019, 41–43 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ນາງຣຸດ 1:16–18; 2:5–8, 11–12.ຄອບຄົວຂອງທ່ານສາມາດເບິ່ງຕົວຢ່າງຂອງຄວາມເມດຕາ ແລະ ຄວາມຈົງຮັກພັກດີຢູ່ໃນຂໍ້ເຫລົ່ານີ້. ເຮົາຈະສະແດງຄວາມເມດຕາຕໍ່ຄອບຄົວຂອງເຮົາ ແລະ ຄົນອື່ນໆ ແລະ ຈົງຮັກພັກດີຕໍ່ພຣະເຢຊູຄຣິດແນວໃດ? ບົດ “ນາງຣຸດ ແລະ ນາງນາໂອມີ” (ໃນປຶ້ມ ເລື່ອງພຣະຄຳພີເດີມ) ສາມາດຊ່ວຍຄອບຄົວຂອງທ່ານໃຫ້ຮຽນຈາກຕົວຢ່າງຂອງນາງຣຸດໄດ້.

1 ຊາມູເອນ 1:15.ບາງທີທ່ານຄວນຖອກເທບາງຢ່າງຈາກກະປ໋ອງ ເພື່ອຊ່ວຍສະມາຊິກໃນຄອບຄົວ ວາດພາບເຫັນສິ່ງທີ່ນາງຮັນນາໝາຍເຖິງ ເມື່ອນາງເວົ້າວ່າ, “ຂ້ານ້ອຍ … ລະບາຍຄວາມທຸກໜັກໃນຈິດວິນຍານຂອງຂ້ານ້ອຍຕໍ່ພຣະພັກຂອງພຣະຜູ້ເປັນເຈົ້າ.” ເປັນຫຍັງສິ່ງນີ້ຈຶ່ງເປັນວິທີທີ່ດີຢ່າງໜຶ່ງເພື່ອບັນຍາຍເຖິງສິ່ງທີ່ຄຳອະທິຖານຂອງເຮົາຄວນເປັນ? ເຮົາຈະປ່ຽນແປງການອະທິຖານເປັນສ່ວນຕົວ ແລະ ເປັນຄອບຄົວຂອງເຮົາໃຫ້ດີຂຶ້ນແນວໃດ?

1 ຊາມູເອນ 2:1–10.ກາບກອນຂອງນາງຮັນນາທີ່ສັນລະເສີນພຣະຜູ້ເປັນເຈົ້າອາດພາທ່ານໃຫ້ຄິດເຖິງເພງທີ່ທ່ານໃຊ້ເພື່ອສັນລະເສີນພຣະຜູ້ເປັນເຈົ້າ. ພວກທ່ານສາມາດຮ້ອງເພງນຳກັນ. ສະມາຊິກໃນຄອບຄົວຂອງທ່ານອາດຄິດຫາທາງອື່ນນຳອີກ ເພື່ອສະແດງຄວາມຮູ້ສຶກຂອງເຂົາເຈົ້າຕໍ່ພຣະເຢຊູຄຣິດ. ຍົກຕົວຢ່າງ, ເຂົາເຈົ້າສາມາດແຕ້ມຮູບທີ່ສະແດງໃຫ້ເຫັນວ່າເປັນຫຍັງເຂົາເຈົ້າຈຶ່ງຮັກພຣະຜູ້ຊ່ວຍໃຫ້ລອດ.

1 ຊາມູເອນ 3:1–11.ມັນອາດເປັນສິ່ງສະໜຸກສະໜານທີ່ຈະສະແດງຕາມເລື່ອງ ຕອນທີ່ພຣະຜູ້ເປັນເຈົ້າເອີ້ນຊາມູເອນ, ຫລື ຄອບຄົວຂອງທ່ານອາດເບິ່ງວິດີໂອ “Samuel and Eli” (ChurchofJesusChrist.org). ສະມາຊິກໃນຄອບຄົວສາມາດເວົ້າລົມກັນກ່ຽວກັບເວລາທີ່ເຂົາເຈົ້າຮູ້ສຶກວ່າພຣະຜູ້ເປັນເຈົ້າກ່າວກັບເຂົາເຈົ້າ ແລະ ວິທີທີ່ເຂົາເຈົ້າໄດ້ເຮັດຕາມພຣະຄຳຂອງພຣະອົງ.

2:3

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຮູ້ພຣະຜູ້ໄຖ່ຊົງພຣະຊົນ,” ເພງສວດ ແລະ ເພງຂອງເດັກນ້ອຍ, 42.

ການປັບປຸງການສຶກສາສ່ວນຕົວ

ປ່ອຍໃຫ້ພຣະວິນຍານຊົງນຳການສຶກສາຂອງທ່ານ. ໃຫ້ອະທິຖານຫວັງວ່າພຣະວິນຍານບໍລິສຸດຈະນຳພາທ່ານໄປຫາສິ່ງທີ່ທ່ານຕ້ອງການທີ່ຈະຮຽນຮູ້. ຈົ່ງມີຄວາມຮູ້ສຶກໄວຕໍ່ການກະຊິບຂອງພຣະອົງ, ເຖິງແມ່ນວ່າສິ່ງນີ້ພາທ່ານໄປອ່ານຫົວຂໍ້ທີ່ທ່ານບໍ່ຄາດຄິດ ຫລື ສຶກສາໃນວິທີທາງທີ່ແຕກຕ່າງກໍຕາມ.

ທ້າວນ້ອຍຊາມູເອນຢູ່ໃນຜ້າເຕັ້ນ — ຮູບພາບຊາມູເອນໄດ້ຍິນພຣະຜູ້ເປັນເຈົ້າ, ໂດຍ ແຊມ ລໍເລີ