“ວັນທີ 23–29 ເດືອນພຶດສະພາ. ໂຢຊວຍ 1–8; 23–24: ‘ໃຫ້ມີໃຈເດັດດ່ຽວ ແລະ ກ້າຫານ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 23–29 ເດືອນພຶດສະພາ. ໂຢຊວຍ 1–8; 23–24,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບໂມເຊແຕ່ງຕັ້ງໂຢຊວຍ, ໂດຍ ແດໂຣ ທອມມັສ

ວັນທີ 23–29 ເດືອນພຶດສະພາ

ໂຢຊວຍ 1–8; 23–24

“ໃຫ້ມີໃຈເດັດດ່ຽວ ແລະ ກ້າຫານ”

ຂະນະທີ່ທ່ານສຶກສາພຣະທຳໂຢຊວຍ, ໃຫ້ພິຈາລະນາວິທີທີ່ສິ່ງທີ່ທ່ານຮຽນຮູ້ກ່ຽວກັບຊາວອິດສະຣາເອນສາມາດເພີ່ມສັດທາຂອງທ່ານໃນພຣະເຢຊູຄຣິດແນວໃດ.

ບັນທຶກຄວາມປະທັບໃຈຂອງທ່ານ

ຫລາຍລຸ້ນຄົນໄດ້ຜ່ານໄປ, ແຕ່ຄຳສັນຍາຂອງພຣະຜູ້ເປັນເຈົ້າເລີ່ມຈະສຳເລັດຄົບຖ້ວນ: ລູກຫລານຂອງອິດສະຣາເອນເກືອບຈະໄດ້ຮັບແຜ່ນດິນແຫ່ງຄຳສັນຍາມາເປັນມູນມໍລະດົກ. ແຕ່ສິ່ງທີ່ຂວາງກັ້ນພວກເຂົາແມ່ນແມ່ນ້ຳຈໍແດນ, ກຳແພງເມືອງເຢຣີໂກ, ຜູ້ຄົນທີ່ຊົ່ວຮ້າຍທີ່ມີພະລັງ ຜູ້ປະຕິເສດພຣະຜູ້ເປັນເຈົ້າ (ເບິ່ງ 1 ນີໄຟ 17:35). ຍິ່ງໄປກວ່ານັ້ນ, ໂມເຊຜູ້ນຳທີ່ຮັກແພງຂອງພວກເຂົາກໍຫາຍໄປແລ້ວ. ສະຖານະການອາດເຮັດໃຫ້ຊາວອິດສະຣາເອນບາງຄົນອ່ອນແຮງ ແລະ ຢ້ານກົວ, ແຕ່ພຣະຜູ້ເປັນເຈົ້າໄດ້ກ່າວວ່າ, “ໃຫ້ມີໃຈເດັດດ່ຽວ ແລະ ກ້າຫານ.” ເປັນຫຍັງພວກເຂົາຈຶ່ງຮູ້ສຶກແບບນີ້? ບໍ່ແມ່ນຍ້ອນກຳລັງຂອງພວກເຂົາເອງ—ຫລື ກຳລັງຂອງໂມເຊ ຫລື ໂຢຊວຍ—ແຕ່ຍ້ອນ “ພຣະຜູ້ເປັນເຈົ້າ ພຣະເຈົ້າຂອງເຈົ້າ ຢູ່ກັບເຈົ້າໃນທຸກໆບ່ອນທີ່ເຈົ້າໄປ” (ໂຢຊວຍ 1:9). ເມື່ອເຮົາມີແມ່ນ້ຳຂອງຕົວເອງທີ່ຈະຂ້າມ ແລະ ມີກຳແພງທີ່ຈະທຳລາຍ, ສິ່ງທີ່ດີເລີດອາດເກີດຂຶ້ນໃນຊີວິດຂອງເຮົາ, ຍ້ອນ “ພຣະຜູ້ເປັນເຈົ້າ [ຜູ້] ຈະເຮັດການອັດສະຈັນໃນທ່າມກາງ [ພວກເຮົາ]” (ໂຢຊວຍ 3:5).

ສຳລັບພາບລວມຂອງພຣະທຳໂຢຊວຍ, ໃຫ້ເບິ່ງ “Joshua, book of” ໃນ Bible Dictionary.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢຊວຍ 1:1–9

ພຣະເຈົ້າຈະຢູ່ກັບເຮົາຖ້າຫາກເຮົາຊື່ສັດຕໍ່ພຣະອົງ.

ໃຫ້ວາດພາບເບິ່ງວ່າ ໂຢຊວຍຮູ້ສຶກແນວໃດ ເມື່ອຖືກເອີ້ນໃຫ້ຮັບໜ້າທີ່ແທນໂມເຊ. ໃຫ້ສັງເກດເບິ່ງສິ່ງທີ່ພຣະຜູ້ເປັນເຈົ້າໄດ້ກ່າວ ຢູ່ໃນ ໂຢຊວຍ 1:1–9 ເພື່ອຊຸກຍູ້ເພິ່ນ. ໃຫ້ຄິດກ່ຽວກັບການທ້າທາຍທີ່ຫຍຸ້ງຍາກທີ່ທ່ານປະເຊີນ; ແມ່ນຫຍັງຢູ່ໃນຂໍ້ເຫລົ່ານີ້ທີ່ຊ່ວຍທ່ານໃຫ້ມີຄວາມກ້າຫານ?

ອາດເປັນທີ່ໜ້າສົນໃຈທີ່ຈະສັງເກດເບິ່ງຊື່ ໂຢຊວຍ (Yehoshua [ເຢໂຮຊວຍ] ຫລື Yeshua [ເຢຊວຍ] ໃນພາສາເຮັບເຣີ) ແປວ່າ “ພຣະເຢໂຮວາຊ່ວຍໃຫ້ລອດ.” ແລະ ພຣະນາມ Jesus [ເຢຊູ] ແມ່ນມາຈາກ Yeshua [ເຢຊວຍ]. ສະນັ້ນ ຂະນະທີ່ທ່ານອ່ານກ່ຽວກັບ ໂຢຊວຍ, ໃຫ້ພິຈາລະນາວິທີທີ່ພາລະກິດຂອງເພິ່ນທີ່ຈະນຳພາລູກຫລານຂອງອິດສະຣາເອນເຂົ້າໄປໃນແຜ່ນດິນແຫ່ງຄຳສັນຍາເຕືອນທ່ານເຖິງພາລະກິດຂອງພຣະຜູ້ຊ່ວຍໃຫ້ລອດແນວໃດ.

ເບິ່ງ Ann M. Dibb, “Be of a Good Courage,” Liahona, May 2010, 114–16 ນຳອີກ.

ໂຢຊວຍ 2

ທັງສັດທາ ແລະ ວຽກງານແມ່ນຈຳເປັນສຳລັບຄວາມລອດ.

ຊາວຄຣິດໃນສະໄໝບູຮານໄດ້ເຫັນນາງຣາຮາບວ່າເປັນຕົວຢ່າງຂອງພະລັງທັງສັດທາ ແລະ ວຽກງານ (ເບິ່ງ ເຮັບເຣີ 11:31; ຢາໂກໂບ 2:25). ຂະນະທີ່ທ່ານອ່ານ ໂຢຊວຍ 2, ໃຫ້ພິຈາລະນາບົດບາດແຫ່ງສັດທາ ແລະ ວຽກງານຂອງນາງຣາຮາບ ໃນການຊ່ວຍຕົວເອງ, ຊ່ວຍຄອບຄົວຂອງນາງ, ແລະ ຊ່ວຍພວກນັກສືບສອດແນມໃຫ້ລອດແນວໃດ. ສິ່ງນີ້ສິດສອນທ່ານຫຍັງແດ່ກ່ຽວກັບວິທີທີ່ສັດທາຂອງທ່ານໃນພຣະຄຣິດ ແລະ ວຽກງານຂອງທ່ານສາມາດເປັນອິດທິພົນຕໍ່ຕົວທ່ານເອງ ແລະ ຄົນອື່ນແນວໃດ?

ທ່ານອາດສົນໃຈຢາກຮູ້ວ່າ ນາງຣາຮາບໄດ້ເປັນບັນພະບຸລຸດຂອງກະສັດດາວິດ ແລະ ພຣະເຢຊູຄຣິດ (ເບິ່ງ ມັດທາຍ 1:5). ບົດຮຽນທີ່ເປັນໄປໄດ້ຢ່າງໃດແດ່ທີ່ເຮົາສາມາດຮຽນຮູ້ຈາກສິ່ງນີ້?

ໂຢຊວຍ 3–4

ເຮົາສາມາດມີປະສົບການກັບ “ການອັດສະຈັນ” ຂອງພຣະເຈົ້າ ຖ້າຫາກເຮົາມີສັດທາໃນພຣະເຢຊູຄຣິດ.

ພຣະຜູ້ເປັນເຈົ້າປະສົງໃຫ້ “ທຸກໆຄົນທີ່ເທິງແຜ່ນດິນໂລກຈະຮູ້ວ່າ ພຣະຫັດຂອງພຣະຜູ້ເປັນເຈົ້າຊົງລິດອຳນາດຍິ່ງໃຫຍ່ເທົ່າໃດ” (ໂຢຊວຍ 4:24). ຂະນະທີ່ທ່ານອ່ານ ໂຢຊວຍ 3–4, ໃຫ້ໄຕ່ຕອງວິທີທີ່ທ່ານຮູ້ວ່າ ພຣະຫັດຂອງພຣະຜູ້ເປັນເຈົ້າຊົງລິດອຳນາດຍິ່ງໃຫຍ່ແນວໃດ. ພຣະຜູ້ເປັນເຈົ້າໄດ້ກະທຳ “ການອັດສະຈັນ” ໃນຊີວິດຂອງທ່ານແນວໃດ? (ໂຢຊວຍ 3:5). ທ່ານສາມາດມີປະສົບການ—ຫລື ຮັບຮູ້—ການອັດສະຈັນເຫລົ່ານັ້ນຫລາຍຂຶ້ນເລື້ອຍໆແນວໃດ? (ຍົກຕົວຢ່າງ, ເບິ່ງ ໂຢຊວຍ 3:17).

ທ່ານຄິດວ່າເປັນຫຍັງຊາວອິດສະຣາເອນຈຶ່ງຈຳເປັນຕ້ອງຊຳລະຕົວເອງໃຫ້ສະອາດກ່ອນທີ່ພວກເຂົາຈະຂ້າມແມ່ນ້ຳຈໍແດນ? ທ່ານພົບເຫັນສິ່ງໃດທີ່ສຳຄັນໃນຄວາມຈິງທີ່ວ່າ ແມ່ນ້ຳຈະແຍກອອກພຽງແຕ່ຫລັງຈາກ “ພວກປະໂລຫິດຈຸ່ມຕີນລົງ … ໃນແມ່ນ້ຳ” ເທົ່ານັ້ນ? (ໂຢຊວຍ 3:13, 15).

ສຳລັບເຫດການສຳຄັນຢ່າງອື່ນໆ ທີ່ໄດ້ເກີດຂຶ້ນຢູ່ແມ່ນ້ຳຈໍແດນ, ໃຫ້ເບິ່ງ 2 ກະສັດ 2:6–15; 5:1–14; ແລະ ມາຣະໂກ 1:9–11. ຂະນະທີ່ທ່ານໄຕ່ຕອງຂໍ້ພຣະຄຳພີເຫລົ່ານີ້, ທ່ານເຫັນສິ່ງໃດທີ່ກ່ຽວຂ້ອງກັນລະຫວ່າງເຫດການເຫລົ່ານີ້?

ເບິ່ງ Gérald Caussé, “Is It Still Wonderful to You?” Liahona, May 2015, 98–100; “Exercise Faith in Christ” (ວິດີໂອ), ChurchofJesusChrist.org ນຳອີກ.

ໂຢຊວຍ 6–8

ການເຊື່ອຟັງນຳອຳນາດຂອງພຣະເຈົ້າມາສູ່ຊີວິດຂອງເຮົາ.

ບົດເຫລົ່ານີ້ກ່ຽວຂ້ອງກັບການຕໍ່ສູ້ເອົາດິນແດນເຢຣີໂກ ແລະ ອາອີ. ຂະນະທີ່ທ່ານອ່ານມັນ, ໃຫ້ພິຈາລະນາວິທີທີ່ທ່ານຕໍ່ສູ້ກັບການລໍ້ລວງໃນຊີວິດຂອງທ່ານເອງແນວໃດ (ຍົກຕົວຢ່າງ, ເບິ່ງ ໂຢຊວຍ 7:10–13). ທ່ານຮຽນຮູ້ຫຍັງແດ່ກ່ຽວກັບວິທີທີ່ພຣະເຈົ້າສາມາດຊ່ວຍເຫລືອທ່ານ ແລະ ສິ່ງທີ່ທ່ານຕ້ອງເຮັດເພື່ອເຂົ້າເຖິງອຳນາດຂອງພຣະອົງ? ຍົກຕົວຢ່າງ, ແມ່ນຫຍັງທີ່ປະທັບໃຈທ່ານກ່ຽວກັບຄຳແນະນຳຂອງພຣະຜູ້ເປັນເຈົ້າ ເລື່ອງການໄປຕີເອົາເຢຣີໂກ? (ເບິ່ງ ໂຢຊວຍ 6:1–5). ບາງທີເລື່ອງລາວໃນ ໂຢຊວຍ 7 ຈະດົນໃຈທ່ານໃຫ້ພິຈາລະນາ ຖ້າຫາກວ່າມີ “ສິ່ງຂອງທີ່ຕ້ອງຖືກທຳລາຍ” ອັນໃດບໍ່ ໃນຊີວິດຂອງທ່ານ ທີ່ທ່ານຕ້ອງກຳຈັດໃຫ້ໝົດສິ້ນໄປ (ໂຢຊວຍ 7:13).

ໂຢຊວຍ 23–24

“ຈົ່ງສັດຊື່ຕໍ່ພຣະຜູ້ເປັນເຈົ້າ ພຣະເຈົ້າຂອງທ່ານ.”

ຫລັງຈາກໄດ້ແບ່ງປັນແຜ່ນດິນແຫ່ງຄຳສັນຍາໃຫ້ສິບສອງເຜົ່າແລ້ວ (ເບິ່ງ ໂຢຊວຍ 13–21), ໂຢຊວຍໄດ້ສິດສອນພວກເຂົາເປັນເທື່ອສຸດທ້າຍ. ຂະນະທີ່ທ່ານອ່ານການສິດສອນເຫລົ່ານີ້ ຢູ່ໃນ ໂຢຊວຍ 23–24, ທ່ານຄວນຂຽນຄຳເຕືອນ, ຄຳແນະນຳ, ແລະ ພອນທີ່ສັນຍາ ທີ່ທ່ານພົບເຫັນລົງໄວ້. ເມື່ອພິຈາລະນາທຸກສິ່ງທີ່ຊາວອິດສະຣາເອນໄດ້ຜ່ານຜ່າ, ທ່ານຄິດວ່າ ເປັນຫຍັງໂຢຊວຍຈຶ່ງເລືອກເອົາສິ່ງເຫລົ່ານີ້ມາບອກພວກເຂົາ ໃນບັ້ນທ້າຍຊີວິດຂອງເພິ່ນ? ທ່ານພົບເຫັນຫຍັງແດ່ທີ່ດົນໃຈທ່ານໃຫ້ “ສັດຊື່ຕໍ່ພຣະຜູ້ເປັນເຈົ້າ”? (ໂຢຊວຍ 23:8).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢຊວຍ 1:8.ຂໍ້ນີ້ແນະນຳຫຍັງແດ່ກ່ຽວກັບວິທີທີ່ເຮົາຄວນເຂົ້າຫາການສຶກສາພຣະຄຳພີຂອງເຮົາ, ທັງເປັນສ່ວນຕົວ ແລະ ເປັນຄອບຄົວ? ພຣະຄຳພີເຮັດໃຫ້ເຮົາ “ຈະເລີນຮຸ່ງເຮືອງ” ແລະ ຊ່ວຍເຮົາໃຫ້ “ປະສົບຄວາມສຳເລັດ” ແນວໃດ?

ໂຢຊວຍ 4:3, 6–9.ຫລັງຈາກການອ່ານສິ່ງທີ່ພຣະຜູ້ເປັນເຈົ້າຢາກໃຫ້ຊາວອິດສະຣາເອນເຮັດດ້ວຍຫີນຈາກແມ່ນ້ຳຈໍແດນ, ຄອບຄົວຂອງທ່ານສາມາດເວົ້າລົມກັນກ່ຽວກັບສິ່ງທີ່ຍິ່ງໃຫຍ່ບາງຢ່າງ ທີ່ພຣະຜູ້ເປັນເຈົ້າໄດ້ກະທຳເພື່ອພວກທ່ານແນວໃດ. ແລ້ວພວກທ່ານສາມາດມອບກ້ອນຫີນກ້ອນໜຶ່ງໃຫ້ສະມາຊິກໃນຄອບຄົວແຕ່ລະຄົນ ແລະ ເຊື້ອເຊີນເຂົາເຈົ້າໃຫ້ຂຽນ ຫລື ແຕ້ມສິ່ງທີ່ພຣະຜູ້ເປັນເຈົ້າໄດ້ກະທຳເພື່ອເຂົາເຈົ້າ.

ໂຢຊວຍ 6:2–5.ຄອບຄົວຂອງທ່ານອາດມີຄວາມສະໜຸກສະໜານກັບການສະແດງວິທີທີ່ພຣະຜູ້ເປັນເຈົ້າແນະນຳຊາວອິດສະຣາເອນ ໃຫ້ສາມາດຕີເອົາເມືອງເຢຣີໂກໄດ້. ພຣະຜູ້ເປັນເຈົ້າປະສົງໃຫ້ເຮົາຮຽນຮູ້ສິ່ງໃດຈາກເລື່ອງນີ້?

ໂຢຊວຍ 24:15.ຫລັງຈາກການອ່ານຂໍ້ນີ້, ສະມາຊິກໃນຄອບຄົວສາມາດແບ່ງປັນປະສົບການ ຊຶ່ງໃນນັ້ນເຂົາເຈົ້າໄດ້ເລືອກທີ່ຈະຮັບໃຊ້ພຣະຜູ້ເປັນເຈົ້າ ເຖິງແມ່ນວ່າຈະເປັນເລື່ອງຍາກກໍຕາມ. ເປັນຫຍັງມັນຈຶ່ງສຳຄັນທີ່ຈະເລືອກຮັບໃຊ້ພຣະອົງໃນ “ມື້ນີ້” ແທນທີ່ຈະລໍຖ້າໃຫ້ສະຖານະການໃດໜຶ່ງເກີດຂຶ້ນເສຍກ່ອນ? ເຮົາຈະສາມາດສະໜັບສະໜູນສະມາຊິກໃນ “ຄອບຄົວ” ຂອງເຮົາໄດ້ແນວໃດ ຂະນະທີ່ເຮົາພະຍາຍາມ “ຮັບໃຊ້ພຣະຜູ້ເປັນເຈົ້າ”?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສິດສອນຂອງເຮົາ

ສະແດງປະຈັກພະຍານຂອງທ່ານເລື້ອຍໆ. ການເປັນພະຍານຢ່າງຈິງໃຈຂອງທ່ານ ສາມາດເປັນອິດທິພົນທີ່ມີພະລັງຕໍ່ຄອບຄົວຂອງທ່ານໄດ້. ມັນບໍ່ຈຳເປັນຕ້ອງຄົມຄາຍ ຫລື ຍືດຍາວ. ປະຈັກພະຍານຈະມີພະລັງຫລາຍທີ່ສຸດ ເມື່ອມັນກົງໄປກົງມາ ແລະ ຈິງໃຈ. (ເບິ່ງ Teaching in the Savior’s Way, 11.)

ພຣະຜູ້ເປັນເຈົ້າເຮັດໃຫ້ກຳແພງເມືອງເຢຣີໂກພັງທະລາຍ. © Providence Collection/ໄດ້ຮັບອະນຸຍາດຈາກ goodsalt.com