“ວັນທີ 2–8 ເດືອນພຶດສະພາ. ອົບພະຍົບ 35–40; ລະບຽບພວກເລວີ 1; 16; 19: ‘ອຸທິດຖວາຍແດ່ພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)

“ວັນທີ 2–8 ເດືອນພຶດສະພາ. ອົບພະຍົບ 35–40; ລະບຽບພວກເລວີ 1; 16; 19,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022

ຮູບພາບ

ພຣະວິຫານເຊົາປາໂລ ບຣາຊິນ

ວັນທີ 2–8 ເດືອນພຶດສະພາ

ອົບພະຍົບ 35–40; ລະບຽບພວກເລວີ 1; 16; 19

“ອຸທິດຖວາຍແດ່ພຣະຜູ້ເປັນເຈົ້າ”

ຂະນະທີ່ທ່ານສຶກສາພຣະຄຳພີ, ໃຫ້ເອົາໃຈໃສ່ຕໍ່ຄວາມປະທັບໃຈທາງວິນຍານທີ່ທ່ານໄດ້ຮັບກ່ຽວກັບວິທີທີ່ທ່ານສາມາດກາຍເປັນເໝືອນດັ່ງພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນ.

ບັນທຶກຄວາມປະທັບໃຈຂອງທ່ານ

ການໜີຈາກປະເທດເອຢິບ—ເຖິງແມ່ນສຳຄັນ ແລະ ເປັນການມະຫັດສະຈັນ—ແຕ່ກໍບໍ່ໄດ້ບັນລຸຈຸດປະສົງຂອງພຣະເຈົ້າສຳລັບລູກຫລານຂອງອິດສະຣາເອນ. ແມ່ນແຕ່ຄວາມຈະເລີນຮຸ່ງເຮືອງໃນອະນາຄົດຢູ່ໃນແຜ່ນດິນແຫ່ງຄຳສັນຍາ ກໍບໍ່ໄດ້ເປັນຈຸດປະສົງສູງສຸດຂອງພຣະເຈົ້າສຳລັບພວກເຂົາ. ສິ່ງເຫລົ່ານີ້ເປັນພຽງແຕ່ຂັ້ນຕອນທີ່ພາໄປສູ່ສິ່ງທີ່ພຣະເຈົ້າຕ້ອງການແທ້ໆສຳລັບຜູ້ຄົນຂອງພຣະອົງ: “ຈົ່ງບໍລິສຸດ: ເພາະເຮົາແມ່ນພຣະຜູ້ເປັນເຈົ້າ ພຣະເຈົ້າຂອງພວກເຈົ້າເປັນຜູ້ບໍລິສຸດ” (ລະບຽບພວກເລວີ 19:2). ພຣະເຈົ້າສະແຫວງຫາທີ່ຈະເຮັດໃຫ້ຜູ້ຄົນຂອງພຣະອົງເປັນຄົນບໍລິສຸດແນວໃດ ເມື່ອພວກເຂົາບໍ່ຮູ້ຫຍັງເລີຍ ນອກຈາກການເປັນຊະເລີຍ ເປັນເວລາຫລາຍລຸ້ນຄົນ? ພຣະອົງໄດ້ບັນຊາພວກເຂົາໃຫ້ສ້າງສະຖານທີ່ສັກສິດແດ່ພຣະຜູ້ເປັນເຈົ້າ—ຄືຫໍເຕັນສັກສິດຢູ່ໃນຖິ່ນແຫ້ງແລ້ງກັນດານ. ພຣະອົງໄດ້ມອບພັນທະສັນຍາ ແລະ ກົດໃຫ້ພວກເຂົາ ເພື່ອນຳພາພວກເຂົາໃນການກະທຳ ແລະ, ໃນທີ່ສຸດ, ເພື່ອປ່ຽນແປງໃຈຂອງພວກເຂົາ. ແລະ ເມື່ອພວກເຂົາຂາດຕົກບົກພ່ອງໃນຄວາມພະຍາຍາມຂອງພວກເຂົາທີ່ຈະຮັກສາກົດເຫລົ່ານັ້ນ, ພຣະອົງໄດ້ບັນຊາພວກເຂົາໃຫ້ຖວາຍສັດເພື່ອເປັນສັນຍາລັກເຖິງການຊົດໃຊ້ແທນບາບພວກເຂົາ. ທັງໝົດນີ້ໝາຍເຖິງການຫັນຈິດໃຈ, ຫົວໃຈ, ແລະ ຊີວິດຂອງພວກເຂົາມາຫາພຣະຜູ້ຊ່ວຍໃຫ້ລອດ ແລະ ການໄຖ່ທີ່ພຣະອົງສະເໜີມອບໃຫ້. ພຣະອົງເປັນເສັ້ນທາງທີ່ແທ້ຈິງໄປສູ່ຄວາມບໍລິສຸດ, ສຳລັບຊາວອິດສະຣາເອນ ແລະ ສຳລັບເຮົາ. ເຮົາທຸກຄົນເຄີຍໃຊ້ບາງເວລາຢູ່ໃນການເປັນຊະເລີຍຂອງຄວາມບາບ, ແລະ ເຮົາທຸກຄົນໄດ້ຖືກເຊື້ອເຊີນໃຫ້ກັບໃຈ—ເພື່ອໃຫ້ໜີຈາກບາບ ແລະ ຕິດຕາມພຣະເຢຊູຄຣິດ, ຜູ້ທີ່ໄດ້ສັນຍາວ່າ, “ເຮົາສາມາດເຮັດໃຫ້ພວກເຈົ້າບໍລິສຸດ” (ຄຳສອນ ແລະ ພັນທະສັນຍາ 60:7).

ສຳລັບພາບລວມຂອງພຣະທຳລະບຽບພວກເລວີ, ໃຫ້ເບິ່ງ “Leviticus” ໃນ Bible Dictionary.

ຮູບພາບ

Learn More image

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ອົບພະຍົບ 35–40; ລະບຽບພວກເລວີ 19

ພຣະຜູ້ເປັນເຈົ້າປະສົງໃຫ້ເຮົາກາຍເປັນຜູ້ບໍລິສຸດດັ່ງທີ່ພຣະອົງເປັນ.

ອົບພະຍົບ 25–31 ບັນທຶກຄຳແນະນຳຂອງພຣະຜູ້ເປັນເຈົ້າຕໍ່ຊາວອິດສະຣາເອນ ກ່ຽວກັບວິທີທີ່ຈະສ້າງຫໍເຕັນສັກສິດ, ບ່ອນທີ່ພິທີການສັກສິດຈະຊ່ວຍພວກເຂົາກາຍເປັນຜູ້ບໍລິສຸດ. ອົບພະຍົບ 35–40 ບັນຍາຍຄວາມພະຍາຍາມຂອງຊາວອິດສະຣາເອນທີ່ຈະເຊື່ອຟັງຄຳແນະນຳເຫລົ່ານີ້. ຂະນະທີ່ທ່ານອ່ານ ບົດທີ 35–40, ໃຫ້ຊອກຫາສິ່ງທີ່ພຣະຜູ້ເປັນເຈົ້າໄດ້ຂໍໃຫ້ຜູ້ຄົນຂອງພຣະອົງເອົາໄປໄວ້ໃນຫໍເຕັນສັກສິດ, ແລະ ໄຕ່ຕອງກ່ຽວກັບສິ່ງຂອງເຫລົ່ານີ້ ສາມາດເປັນຕົວແທນໃຫ້ແກ່ສິ່ງໃດ ແລະ ເຖິງສິ່ງທີ່ສິ່ງເຫລົ່ານີ້ແນະນຳທ່ານໃຫ້ມີຄວາມບໍລິສຸດຫລາຍຂຶ້ນແນວໃດ. ໂດຍສະເພາະແລ້ວ ໃຫ້ພິຈາລະນາວິທີທີ່ສິ່ງຂອງເຫລົ່ານີ້ຫັນແນວຄິດຂອງທ່ານມາຫາພຣະຜູ້ຊ່ວຍໃຫ້ລອດແນວໃດ. ຕາຕະລາງທີ່ຄ້າຍຄືກັນນີ້ອາດຊ່ວຍທ່ານໄດ້:

ທ່ານພົບເຫັນສິ່ງຂອງອັນໃດແດ່?	ມັນເປັນຕົວແທນໃຫ້ສິ່ງໃດ?
ທ່ານພົບເຫັນສິ່ງຂອງອັນໃດແດ່? ຫີບພຣະບັນຍັດ (ອົບພະຍົບ 37:1–9; 40:20–21)	ມັນເປັນຕົວແທນໃຫ້ສິ່ງໃດ? ການປະທັບຢູ່ຂອງພຣະເຈົ້າ; ພັນທະສັນຍາ ແລະ ພຣະບັນຍັດຂອງພຣະອົງ
ທ່ານພົບເຫັນສິ່ງຂອງອັນໃດແດ່? ແທ່ນຄຳເຄື່ອງຫອມ (ອົບພະຍົບ 40:26–27; ເບິ່ງ ອົບພະຍົບ 30:1, 6–8 ນຳອີກ)	ມັນເປັນຕົວແທນໃຫ້ສິ່ງໃດ? ຄຳອະທິຖານທີ່ຂຶ້ນເຖິງພຣະຜູ້ເປັນເຈົ້າ
ທ່ານພົບເຫັນສິ່ງຂອງອັນໃດແດ່? ຫລັກຮອງທຽນໄຂ ຫລື ຕະກຽງ (ອົບພະຍົບ 37:17–24)
ທ່ານພົບເຫັນສິ່ງຂອງອັນໃດແດ່? ແທ່ນເຜົາເຄື່ອງຖວາຍ (ອົບພະຍົບ 38:1–7; ເບິ່ງ ອົບພະຍົບ 27:1; 29:10–14 ນຳອີກ)
ທ່ານພົບເຫັນສິ່ງຂອງອັນໃດແດ່? ຂັນ (ພານ) ທອງສຳລິດ (ອົບພະຍົບ 30:17–21)

ຖ້າຫາກວ່າທ່ານເຄີຍມີສ່ວນຮ່ວມໃນພິທີການຂອງພຣະວິຫານ, ທ່ານໄດ້ຮຽນຮູ້ຫຍັງແດ່ກ່ຽວກັບຫໍເຕັນສັກສິດຈາກ ອົບພະຍົບ 35–40 ທີ່ເຕືອນທ່ານກ່ຽວກັບປະສົບການຂອງທ່ານໃນພຣະວິຫານ? (ເບິ່ງ “ຄວາມຄິດທີ່ໃຫ້ເກັບໄວ້ໃນໃຈ: ຫໍເຕັນສັກສິດ ແລະ ການເສຍສະລະ” ນຳອີກ). ໃຫ້ໄຕ່ຕອງວິທີທີ່ພັນທະສັນຍາໃນພຣະວິຫານຊ່ວຍທ່ານໃຫ້ກາຍເປັນຜູ້ບໍລິສຸດດັ່ງທີ່ພຣະບິດາເທິງສະຫວັນ ແລະ ພຣະເຢຊູຄຣິດເປັນ.

ແນ່ນອນ, ການຢູ່ໃນສະຖານທີ່ສັກສິດ ບໍ່ສາມາດຊ່ວຍເຮົາໃຫ້ເປັນຜູ້ບໍລິສຸດໄດ້. ລະບຽບພວກເລວີ 19 ບັນຍາຍກົດ ແລະ ພຣະບັນຍັດທີ່ພຣະຜູ້ເປັນເຈົ້າໄດ້ມອບໃຫ້ຊາວອິດສະຣາເອນເພື່ອເພີ່ມຄວາມບໍລິສຸດຫລາຍຂຶ້ນ. ທ່ານພົບເຫັນຫຍັງແດ່ໃນພຣະບັນຍັດເຫລົ່ານີ້ ທີ່ສາມາດຊ່ວຍທ່ານໃຫ້ກາຍເປັນຜູ້ບໍລິສຸດຫລາຍຂຶ້ນ? ທ່ານຮູ້ສຶກປະທັບໃຈໃຫ້ເຮັດຫຍັງແດ່ ເພື່ອດຳລົງຊີວິດໃນຫລັກທຳເຫລົ່ານີ້ຫລາຍກວ່າເກົ່າ?

ເບິ່ງ Carol F. McConkie, “The Beauty of Holiness,” Liahona, May 2017, 9–12; “The Tabernacle” (ວິດີໂອ), ChurchofJesusChrist.org; Bible Dictionary, “Holiness”; temples.ChurchofJesusChrist.org ນຳອີກ.

ອົບພະຍົບ 35:4–36:7

ພຣະຜູ້ເປັນເຈົ້າຂໍໃຫ້ເຮົາຖວາຍຄວາມເຕັມໃຈຂອງເຮົາ.

ໃນປີທີ່ຫລັງຈາກໄດ້ໜີຈາກປະເທດເອຢິບ, ຄວາມສຳພັນຂອງລູກຫລານຂອງອິດສະຣາເອນກັບພຣະເຢໂຮວາ ສາມາດຖືກບັນຍາຍວ່າເປັນສິ່ງທີ່ບໍ່ສະໝ່ຳສະເໝີ. ແຕ່, ຂະນະທີ່ທ່ານອ່ານ ອົບພະຍົບ 35:4–36:7, ໃຫ້ສັງເກດວິທີທີ່ຊາວອິດສະຣາເອນຕອບຮັບພຣະບັນຍັດທີ່ຈະສ້າງຫໍເຕັນສັກສິດ. ທ່ານຮຽນຮູ້ຫຍັງແດ່ຈາກຊາວອິດສະຣາເອນທີ່ສາມາດຊ່ວຍທ່ານໃຫ້ຮັບໃຊ້ພຣະຜູ້ເປັນເຈົ້າໃຫ້ດີຂຶ້ນກວ່າເກົ່າ?

ປະທານບອນນີ ແອວ ອໍສະກາສັນ ໄດ້ສິດສອນວ່າ: “ສະມາຊິກແຕ່ລະຄົນ ຄວນຮູ້ຈັກວ່າ ສາດສະໜາຈັກຕ້ອງການເຂົາເຈົ້າຫລາຍຂະໜາດໃດ. ແຕ່ລະຄົນກໍມີບາງສິ່ງທີ່ສຳຄັນ ທີ່ຈະເອົາມາຊ່ວຍໄດ້ ແລະ ມີພອນສະຫວັນ ແລະ ຄວາມສາມາດພິເສດ ທີ່ຈະຊ່ວຍໃຫ້ວຽກງານທີ່ສຳຄັນນີ້ກ້າວໄປຂ້າງໜ້າ” (“Young Women in the Work,” Liahona, May 2018, 37). ຂະນະທີ່ທ່ານອ່ານ ອົບພະຍົບ 36:1–4, ໃຫ້ໄຕ່ຕອງວ່າ ພຣະຜູ້ເປັນເຈົ້າໄດ້ “ມອບ” ສິ່ງໃດໃຫ້ທ່ານ. ໃຫ້ພິຈາລະນາທີ່ຈະທູນຖາມພຣະບິດາເທິງສະຫວັນເຖິງສິ່ງທີ່ພຣະອົງໄດ້ປະທານໃຫ້ທ່ານ ເພື່ອວ່າທ່ານຈະສາມາດມີສ່ວນຮ່ວມໃນວຽກງານຂອງພຣະອົງ.

ລູກຫລານຂອງອິດສະຣາເອນໄດ້ຖວາຍສິ່ງຂອງເພື່ອສ້າງຫໍເຕັນສັກສິດ ດ້ວຍຄວາມ “ເຕັມໃຈ” (ອົບພະຍົບ 35:5). ຮູບພາບປະກອບ ໂດຍ ຄໍເບີດ ໂກຕີເອີ, © Lifeway Collection/ໄດ້ຮັບອະນຸຍາດຈາກ goodsalt.com

ລະບຽບພວກເລວີ 1:1–9; 16

ຜ່ານທາງການຊົດໃຊ້ຂອງພຣະເຢຊູຄຣິດ, ເຮົາສາມາດໄດ້ຮັບການໃຫ້ອະໄພ.

ພາກສ່ວນໃຫຍ່ຂອງພຣະທຳລະບຽບພວກເລວີ ອາດແປກປະຫລາດຕໍ່ເຮົາ—ການຖວາຍສັດ, ພິທີກຳທີ່ກ່ຽວກັບເລືອດ ແລະ ນ້ຳ, ແລະ ກົດຂອງການໃຊ້ຊີວິດ. ແຕ່ພິທີກຳ ແລະ ກົດເຫລົ່ານີ້ອາດມີເຈດຕະນາເພື່ອສິດສອນຫລັກທຳທີ່ຄຸ້ນເຄີຍ—ການກັບໃຈ, ຄວາມບໍລິສຸດ, ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດ. ເພື່ອຊອກຫາຫລັກທຳເຫລົ່ານີ້ ຂະນະທີ່ທ່ານອ່ານ ລະບຽບພວກເລວີ 1:1–9; 16, ໃຫ້ພິຈາລະນາຄຳຖາມຄືກັບດັ່ງຕໍ່ໄປນີ້: ເຮົາສາມາດຮຽນຮູ້ຫຍັງແດ່ຈາກການເສຍສະລະເຫລົ່ານີ້ ກ່ຽວກັບພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ? ເຮົາເປັນຄືກັນກັບຜູ້ຄົນເຫລົ່ານັ້ນທີ່ເສຍສະລະສິ່ງຂອງເຫລົ່ານີ້ແນວໃດ? ທ່ານອາດພິຈາລະນາທີ່ຈະທົບທວນ “ຄວາມຄິດທີ່ໃຫ້ເກັບໄວ້ໃນໃຈ: ຫໍເຕັນສັກສິດ ແລະ ການເສຍສະລະ” ຢູ່ໃນແຫລ່ງນີ້ ແລະ “ການເສຍສະລະ” ໃນ ຄູ່ມືພຣະຄຳພີ (scriptures.ChurchofJesusChrist.org).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ອົບພະຍົບ 36:1–7.ໃນ ອົບພະຍົບ 36:1–7, ເຮົາຮຽນຮູ້ຫຍັງແດ່ຈາກວິທີທີ່ຊາວອິດສະຣາເອນໄດ້ຕອບຮັບຕໍ່ພຣະບັນຍັດທີ່ຈະສ້າງຫໍເຕັນສັກສິດ? ເປັນຄອບຄົວ, ພວກທ່ານສາມາດຄິດເຖິງວິທີທີ່ພຣະຜູ້ເປັນເຈົ້າໄດ້ເຊື້ອເຊີນເຮົາໃຫ້ມີສ່ວນຮ່ວມໃນວຽກງານຂອງພຣະອົງ. ເຮົາຈະເຮັດຕາມຕົວຢ່າງຂອງຊາວອິດສະຣາເອນແນວໃດ?

ອົບພະຍົບ 40.ຂະນະທີ່ທ່ານອ່ານ ອົບພະຍົບ 40 ນຳກັນ, ທ່ານສາມາດເຊື້ອເຊີນສະມາຊິກໃນຄອບຄົວໃຫ້ຍົກມືຂຶ້ນທຸກເທື່ອທີ່ເຂົາເຈົ້າໄດ້ຍິນວະລີທີ່ວ່າ “ຕາມທີ່ພຣະຜູ້ເປັນເຈົ້າໄດ້ບອກ.” ເຮົາຮຽນຮູ້ຫຍັງແດ່ຈາກບົດນີ້ກ່ຽວກັບການເຊື່ອຟັງພຣະຜູ້ເປັນເຈົ້າ?

ອົບພະຍົບ 40:1–34.ຂະນະທີ່ພວກທ່ານອ່ານກ່ຽວກັບການສ້າງຫໍເຕັນສັກສິດ ໃນ ອົບພະຍົບ 40, ພວກທ່ານສາມາດຊ່ວຍກັນຊີ້ບອກພາກສ່ວນທີ່ແຕກຕ່າງກັນຂອງຫໍເຕັນສັກສິດ, ໂດຍການໃຊ້ຮູບທີ່ຢູ່ໃນໂຄງຮ່າງນີ້. ເພື່ອເຊື່ອມຕໍ່ການສົນທະນານີ້ເຂົ້າກັບການນະມັດສະການພຣະວິຫານໃນວັນເວລາຂອງເຮົາ, ພວກທ່ານສາມາດທົບທວນ “Why Latter-day Saints Build Temples” (temples.ChurchofJesusChrist.org) ຫລື ເບິ່ງວິດີໂອ “Temples” (ChurchofJesusChrist.org ນຳກັນ).

ລະບຽບພວກເລວີ 19.ສະມາຊິກໃນຄອບຄົວແຕ່ລະຄົນສາມາດຊອກຫາຂໍ້ໜຶ່ງຢູ່ໃນບົດນີ້ ທີ່ເຂົາເຈົ້າຮູ້ສຶກວ່າຈະຊ່ວຍເຂົາເຈົ້າໃຫ້ “ບໍລິສຸດ” (ລະບຽບພວກເລວີ 19:2) ແລະ ແບ່ງປັນມັນກັບຄອບຄົວ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ໂອ້ພຣະບິດາຜູ້ນິລັນ,” ເພງສວດ ແລະ ເພງຂອງເດັກນ້ອຍ, 18.

ການປັບປຸງການສຶກສາສ່ວນຕົວ

ຊອກຫາພຣະເຢຊູຄຣິດ. ພຣະຄຳພີທັງໝົດ, ແມ່ນແຕ່ພຣະຄຳພີເດີມ, ເປັນພະຍານເຖິງພຣະເຢຊູຄຣິດ. ຂະນະທີ່ທ່ານອ່ານພຣະຄຳພີເດີມ, ໃຫ້ພິຈາລະນາ ສັນຍາລັກ, ຜູ້ຄົນ, ແລະ ເຫດການທີ່ສາມາດສິດສອນທ່ານກ່ຽວກັບພຣະຜູ້ຊ່ວຍໃຫ້ລອດ.