ເຄື່ອງປະດັບແຫ່ງຄວາມບໍລິສຸດ

ໂດຍ ແຄວໂຣ ແອັຟ ມັກຄອງກີ

ທີ່ປຶກສາທີໜຶ່ງໃນຝ່າຍປະທານອົງການຍິງໜຸ່ມສາມັນ

ພຣະບິດາເທິງສະຫວັນຂອງເຮົາ ໄດ້ຈັດຫາສິ່ງທີ່ຈຳເປັນໄວ້ສຳລັບເຮົາ ເພື່ອວ່າເຮົາຈະສາມາດກາຍເປັນຄົນບໍລິສຸດ ດັ່ງພຣະອົງ.

ໃນຂະນະທີ່ຂ້າພະເຈົ້າຕຽມສຳລັບກອງປະຊຸມນີ້, ໃຈຂອງຂ້າພະເຈົ້າໄດ້ຫັນໄປຫາເອື້ອຍນ້ອງທີ່ຊື່ສັດຫລາຍຄົນ ຜູ້ທີ່ຂ້າພະເຈົ້າໄດ້ພົບເຫັນ, ທັງໃກ້ ແລະ ໄກ. ສຳລັບຂ້າພະເຈົ້າແລ້ວ, ເຂົາເຈົ້າໄດ້ຖືກບັນຍາຍໃນທາງດີທີ່ສຸດ ໃນເພງສັນລະເສີນ ແຫ່ງຄວາມຂອບຄຸນ ໂດຍກະສັດດາວິດ ທີ່ວ່າ: “ຈົ່ງຍົກຍໍພຣະນາມອັນຄວນຂອງພຣະອົງ ແດ່ພຣະຜູ້ເປັນເຈົ້າ: ຈົ່ງນຳເຄື່ອງບູຊາ ແລະ ມາເຂົ້າເຝົ້າພຣະອົງ: ຈົ່ງນະມັດສະການພຣະຜູ້ເປັນເຈົ້າ ດ້ວຍເຄື່ອງປະດັບແຫ່ງຄວາມບໍລິສຸດ.”¹

ຂ້າພະເຈົ້າເຫັນເຄື່ອງປະດັບແຫ່ງຄວາມບໍລິສຸດ ໃນບັນດາເອື້ອຍນ້ອງ ຜູ້ຈົດຈໍ່ຢູ່ທີ່ທຸກສິ່ງທີ່ດີ, ຜູ້ຢາກກາຍເປັນເໝືອນດັ່ງພຣະຜູ້ຊ່ວຍໃຫ້ລອດ. ເຂົາເຈົ້າໄດ້ຖວາຍດ້ວຍສຸດຈິດວິນຍານ, ສຸດໃຈ, ພະລັງ, ຄວາມນຶກຄິດ, ແລະ ກຳລັງຂອງເຂົາເຈົ້າ ຕໍ່ພຣະຜູ້ເປັນເຈົ້າ ໃນທາງທີ່ເຂົາເຈົ້າດຳລົງຊີວິດໃນແຕ່ລະວັນ.² ຄວາມບໍລິສຸດມາຈາກຄວາມພະຍາຍາມ ແລະ ການດີ້ນລົນ ທີ່ຈະຮັກສາພຣະບັນຍັດ ແລະ ໃຫ້ກຽດແກ່ພັນທະສັນຍາ ທີ່ເຮົາໄດ້ເຮັດໄວ້ກັບພຣະເຈົ້າ. ຄວາມບໍລິສຸດຄືການເລືອກທີ່ຈະຮັກສາພຣະວິນຍານບໍລິສຸດໄວ້ເປັນຜູ້ນຳພາ.³ ຄວາມບໍລິສຸດຄືການບໍ່ໂນ່ມອຽງຕາມທຳມະຊາດ ແລະ ຄືການກາຍເປັນໄພ່ພົນຂອງພຣະເຈົ້າ ໂດຍການຊົດໃຊ້ຂອງອົງພຣະຄຣິດ.”⁴ “ທຸກເວລາໃນ [ຊີວິດຂອງເຮົາ] ຈະຕ້ອງເປັນການຖວາຍແດ່ອົງພຣະຜູ້ເປັນເຈົ້າ.”⁵

ພຣະເຈົ້າແຫ່ງສະຫວັນ ບັນຊາເຊື້ອສາຍອິດສະຣາເອນວ່າ, “ເຮົາແມ່ນພຣະຜູ້ເປັນເຈົ້າ ພຣະເຈົ້າຂອງພວກເຈົ້າ: ພວກເຈົ້າຕ້ອງບໍລິສຸດ ເພາະເຮົາບໍລິສຸດ: ຢ່າເຮັດໃຫ້ພວກເຈົ້າເປັນມົນທິນ.”⁶

ແອວດີ ດີ ທອດ ຄຣິດສະໂຕເຟີສັນ ໄດ້ສອນວ່າ, ພຣະບິດາເທິງສະຫວັນຂອງເຮົາ ເປັນພຣະເຈົ້າທີ່ມີຄວາມຄາດຫວັງສູງ. … ພຣະອົງສະເໜີ ເຮັດໃຫ້ເຮົາບໍລິສຸດ ເພື່ອວ່າເຮົາຈະໄດ້ຢູ່ໃນລັດສະໝີພາບຊັ້ນສູງ (ເບິ່ງ D&C 88:22) ແລະ ຢູ່ໃນທີ່ປະທັບຂອງພຣະອົງ (ເບິ່ງ Moses 6:57).⁷ ປຶ້ມ Lectures on Faith ອະທິບາຍວ່າ, ບໍ່ມີມະນຸດຄົນໃດ ສາມາດຊື່ນຊົມກັບລັດສະໝີພາບຂອງຕົນ ປາດສະຈາກການໄດ້ຮັບຄວາມດີພ້ອມທຸກຢ່າງ ແລະ ຄວາມບໍລິສຸດເສຍກ່ອນ. ພຣະບິດາເທິງສະຫວັນຂອງເຮົາຮູ້ຈັກເຮົາ.⁸ ພຣະອົງຮັກເຮົາ ແລະ ພຣະອົງໄດ້ຈັດຫາສິ່ງທີ່ຈຳເປັນໄວ້ສຳລັບເຮົາ ເພື່ອວ່າເຮົາຈະສາມາດກາຍເປັນຄົນບໍລິສຸດ ດັ່ງພຣະອົງ.

ເຮົາເປັນທິດາຂອງພຣະບິດາເທິງສະຫວັນ, ແລະ ເຮົາແຕ່ລະຄົນມີມໍລະດົກແຫ່ງສະຫວັນທີ່ບໍລິສຸດ. ພຣະບິດາຜູ້ສະຖິດຢູ່ໃນສະຫວັນຂອງເຮົາ ໄດ້ປະກາດວ່າ, ພຣະອົງຄືພຣະເຈົ້າ ພຣະຜູ້ບໍລິສຸດຄືນາມຂອງພຣະອົງ.⁹ ໃນໂລກກ່ອນຊ່ວງມະຕະ, ເຮົາຮັກພຣະບິດາ ແລະ ນະມັດສະການພຣະອົງ. ເຮົາຢາກເປັນເໝືອນດັ່ງພຣະອົງ. ເປັນເພາະຄວາມຮັກຂອງຜູ້ເປັນພຣະບິດາ, ພຣະອົງຈຶ່ງໄດ້ປະທານພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ໃຫ້ມາເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ພຣະອົງເປັນພຣະບຸດຂອງພຣະຜູ້ບໍລິສຸດ.¹⁰ ພຣະຜູ້ບໍລິສຸດຄືພຣະນາມຂອງພຣະອົງ,¹¹ ພຣະຜູ້ບໍລິສຸດຂອງອິດສະຣາເອນ.¹²

ຄວາມຫວັງຂອງເຮົາສຳລັບຄວາມບໍລິສຸດ ຄືການຈົດຈໍ່ຢູ່ທີ່ພຣະຄຣິດ, ໃນຄວາມເມດຕາ ແລະ ໃນພຣະຄຸນຂອງພຣະອົງ. ດ້ວຍສັດທາໃນພຣະເຢຊູຄຣິດ ແລະ ໃນການຊົດໃຊ້ຂອງພຣະອົງ, ເຮົາອາດຖືກເຮັດໃຫ້ສະອາດ ປາດສະຈາກດ່າງພອຍ, ເມື່ອເຮົາບໍ່ຍອມຮັບຄວາມບໍ່ເປັນເໝືອນພຣະເຈົ້າທັງໝົດ¹³ ແລະ ກັບໃຈຢ່າງຈິງໃຈ. ເຮົາໄດ້ຮັບບັບຕິສະມາດ້ວຍນ້ຳເພື່ອການປົດບາບ. ຈິດວິນຍານຂອງເຮົາໄດ້ຖືກຊຳລະໃຫ້ບໍລິສຸດ ເມື່ອເຮົາເປີດໃຈຮັບເອົາພຣະວິນຍານບໍລິສຸດ. ທຸກອາທິດ, ເຮົາຮັບສ່ວນຂອງພິທີສິນລະລຶກ. ໃນວິນຍານແຫ່ງການກັບໃຈ ໂດຍມີຄວາມປາດຖະໜາສຳລັບຄວາມຊອບທຳ, ເຮົາເຮັດພັນທະສັນຍາວ່າ ເຮົາເຕັມໃຈຮັບພຣະນາມຂອງພຣະຄຣິດ, ລະນຶກເຖິງພຣະອົງ, ແລະ ຮັກສາພຣະບັນຍັດຂອງພຣະອົງ ເພື່ອເຮົາຈະມີພຣະວິນຍານຂອງພຣະອົງຢູ່ດ້ວຍຕະຫລອດເວລາ. ເມື່ອເວລາຜ່ານໄປ ເມື່ອເຮົາພະຍາຍາມສະເໝີ ທີ່ຈະກາຍເປັນໜຶ່ງດັ່ງພຣະບິດາ, ພຣະບຸດ, ແລະ ພຣະວິນຍານບໍລິສຸດ, ເຮົາຈະກາຍເປັນຜູ້ຮັບທຳມະຊາດແຫ່ງສະຫວັນຂອງພວກພຣະອົງ.¹⁴

ຄວາມບໍລິສຸດຄືການຮັກສາພັນທະສັນຍາຂອງເຮົາ

ເຮົາຮັບຮູ້ເຖິງຄວາມສຳຄັນຂອງການທົດສອບ, ການລໍ້ລວງ, ຄວາມທຸກຍາກລຳບາກ ວ່າສາມາດດຶງເຮົາອອກຈາກທຸກສິ່ງ ທີ່ເປັນຄຸນນະທຳ ແລະ ຄວນສັນລະເສີນ ຢູ່ຕໍ່ພຣະພັກຂອງພຣະເຈົ້າ. ແຕ່ປະສົບການໃນຊ່ວງມະຕະ ຈະໃຫ້ໂອກາດເຮົາເລືອກເອົາຄວາມບໍລິສຸດ. ສ່ວນຫລາຍແລ້ວ ມັນແມ່ນການເສຍສະລະ ທີ່ເຮົາໄດ້ເຮັດ ເພື່ອຮັກສາພັນທະສັນຍາຂອງເຮົາ ທີ່ຊຳລະເຮົາ ແລະ ເຮັດໃຫ້ເຮົາບໍລິສຸດ.

ຂ້າພະເຈົ້າໄດ້ເຫັນຄວາມບໍລິສຸດຢູ່ໃນໃບໜ້າຂອງນາງ ອີວານຈີລີນ, ອາຍຸ 13 ປີ ຢູ່ປະເທດການາ. ວິທີໜຶ່ງທີ່ນາງຮັກສາພັນທະສັນຍາຂອງນາງ ແມ່ນໂດຍການຂະຫຍາຍການເອີ້ນຂອງນາງ ໃນຖານະເປັນ ປະທານຫ້ອງດາລຸນີ. ນາງໄດ້ອະທິບາຍຢ່າງຖ່ອມຕົວວ່າ ນາງໄດ້ໄປຢາມເຮືອນໝູ່ເພື່ອນ, ເປັນຍິງໜຸ່ມທີ່ບໍ່ເຂັ້ມແຂງ, ເພື່ອເວົ້າລົມກັບພໍ່ແມ່ຂອງພວກນາງ ເພື່ອຂໍໃຫ້ເຂົາເຈົ້າອະນຸຍາດໃຫ້ພວກນາງໄປໂບດ. ເຂົາເຈົ້າໄດ້ບອກນາງວ່າ ມັນເປັນເລື່ອງຍາກ ເພາະວັນອາທິດລູກໆຕ້ອງເຮັດວຽກບ້ານ. ສະນັ້ນ ນາງອີວານຈີລີນ ຈຶ່ງໄດ້ໄປຊ່ວຍເຮັດວຽກບ້ານ, ແລະ ດ້ວຍຄວາມຊ່ວຍເຫລືອຂອງນາງ ໝູ່ເພື່ອນຂອງນາງຈຶ່ງໄດ້ຮັບອະນຸຍາດໃຫ້ໄປໂບດ.

ຖ້າຫາກເຮົາຈະຮັກສາພັນທະສັນຍາທີ່ກ່ຽວພັນກັນນີ້, ແລ້ວພິທີການຂອງຖານະປະໂລຫິດສັກສິດຈະປ່ຽນແປງເຮົາ, ຊຳລະເຮົາ, ແລະ ຕຽມເຮົາເພື່ອເຂົ້າໄປໃນທີ່ປະທັບຂອງພຣະຜູ້ເປັນເຈົ້າ.¹⁵ ສະນັ້ນ, ເຮົາແບກຫາບພາລະຂອງກັນແລະກັນ; ເຮົາເພີ່ມຄວາມເຂັ້ມແຂງໃຫ້ກັນແລະກັນ. ເຮົາໄດ້ຮັບການປົດບາບເມື່ອເຮົາຊ່ວຍບັນເທົາຄົນຍາກຈົນ, ຄົນຫິວໂຫຍ, ຄົນເປືອຍເປົ່າ, ແລະ ຄົນເຈັບປ່ວຍ ທາງວິນຍານ ແລະ ທາງໂລກ.¹⁶ ເຮົາຮັກສາຕົວເອງຈາກການດ່າງພອຍຂອງໂລກ ເມື່ອເຮົາຮັກສາວັນຊະບາໂຕ ແລະ ຮັບສ່ວນສິນລະລຶກຢ່າງມີຄ່າຄວນ ໃນວັນສັກສິດຂອງພຣະເຈົ້າ.¹⁷

ເຮົາເປັນພອນໃຫ້ແກ່ຄອບຄົວ ແລະ ເຮັດໃຫ້ບ້ານເຮືອນຂອງເຮົາເປັນບ່ອນສັກສິດ. ເຮົາຕ້ອງຄວບຄຸມກິເລດຕັນຫາທັງໝົດຂອງເຮົາ ເພື່ອເຮົາຈະເຕັມໄປດ້ວຍຄວາມບໍລິສຸດ ແລະ ຄວາມຮັກອັນຍືນຍົງ.¹⁸ ເຮົາເອື້ອມອອກໄປຫາຄົນອື່ນໃນຄວາມກະລຸນາ, ດ້ວຍຄວາມເຫັນອົກເຫັນໃຈ, ແລະ ຢືນເປັນພະຍານຂອງພຣະເຈົ້າ. ເຮົາກາຍເປັນຜູ້ຄົນຊີໂອນ, ມີໃຈດຽວ ແລະ ຄວາມນຶກຄິດດຽວ, ເປັນຄົນບໍລິສຸດຜູ້ຢູ່ນຳກັນ ໃນຄວາມເປັນອັນໜຶ່ງດຽວກັນ ແລະ ດຳລົງຢູ່ໃນຄວາມຊອບທຳ.¹⁹ “ເພາະຊີໂອນຕ້ອງເພີ່ມພູນໃນຄວາມສວຍງາມ ແລະ ໃນຄວາມສັກສິດ.”²⁰

ເອື້ອຍນ້ອງທັງຫລາຍ, ຈົ່ງໄປພຣະວິຫານ. ຖ້າຫາກເຮົາຢາກເປັນຄົນບໍລິສຸດ ຕຽມທີ່ຈະຕ້ອນຮັບພຣະຜູ້ຊ່ວຍໃຫ້ລອດ ໃນການສະເດັດມາຂອງພຣະອົງ, ແລ້ວເຮົາຕ້ອງລຸກຂຶ້ນ ແລະ ສວມອາພອນທີ່ສວຍງາມ.²¹ ໃນຄວາມເຂັ້ມແຂງ ແລະ ເປັນກຽດ, ເຮົາປະຖິ້ມວິທີທາງຂອງໂລກ ແລະ ຮັກສາພັນທະສັນຍາຂອງເຮົາ ເພື່ອວ່າເຮົາຈະ “ຖືກຫຸ້ມຫໍ່ໄວ້ດ້ວຍຄວາມບໍລິສຸດ, ແທ້ຈິງແລ້ວ, ແມ່ນດ້ວຍເສື້ອຄຸມແຫ່ງຄວາມຊອບທຳ.”²²

ຄວາມບໍລິສຸດ ຄືການຮັບເອົາພຣະວິນຍານບໍລິສຸດເປັນຜູ້ນຳພາຂອງເຮົາ

ຄວາມບໍລິສຸດ ຄືຂອງປະທານແຫ່ງພຣະວິນຍານ. ເຮົາຮັບເອົາຂອງປະທານ ເມື່ອເຮົາເລືອກເຮັດສິ່ງທີ່ຈະເພີ່ມຄວາມບໍລິສຸດໃຫ້ແກ່ອຳນາດຂອງພຣະວິນຍານບໍລິສຸດ ໃນຊີວິດຂອງເຮົາ.

ເມື່ອນາງມາທາ ໄດ້ຮັບເອົາພຣະເຢຊູຄຣິດ ເຂົ້າໄປໃນບ້ານຂອງນາງ, ນາງຮູ້ສຶກວ່າ ຢາກຮັບໃຊ້ພຣະຜູ້ເປັນເຈົ້າ ຈົນສຸດຄວາມສາມາດຂອງນາງ. ມາຣີ ນ້ອງສາວຂອງນາງ ໄດ້ເລືອກທີ່ຈະນັ່ງ “ຢູ່ໃກ້ພຣະບາດຂອງພຣະເຢຊູ” ແລະ ຟັງພຣະອົງເວົ້າ. ເມື່ອນາງມາທາ ຮູ້ສຶກໜັກໃຈທີ່ບໍ່ມີໃຜຊ່ວຍນາງຮັບໃຊ້, ນາງຈຶ່ງໄດ້ຈົ່ມ ວ່າ, “ພຣະອົງເຈົ້າເອີຍ, ທ່ານບໍ່ສົນໃຈບໍທີ່ນ້ອງສາວຂອງຂ້ານ້ອຍ ປະໃຫ້ຂ້ານ້ອຍເຮັດວຽກທັງໝົດນີ້ແຕ່ຜູ້ດຽວ?”

ຂ້າພະເຈົ້າມັກການກ່າວຕຳນິທີ່ອ່ອນໂຍນທີ່ສຸດ ຊຶ່ງຂ້າພະເຈົ້າເຄີຍໄດ້ຍິນມາ. ດ້ວຍຄວາມຮັກອັນບໍລິບູນ ແລະ ດ້ວຍຄວາມເຫັນອົກເຫັນໃຈອັນເປັນນິດ, ພຣະຜູ້ຊ່ວຍໃຫ້ລອດໄດ້ກ່າວວ່າ:

“ມາທາ, ມາທາເອີຍ, ເຈົ້າກັງວົນ ແລະ ມົວວຸ້ນວາຍຢູ່ກັບຫລາຍສິ່ງແທ້ໜໍ:

“ສິ່ງທີ່ຈຳເປັນນັ້ນ ກໍມີແຕ່ສິ່ງດຽວ: ມາຣີໄດ້ເລືອກເອົາສິ່ງທີ່ດີນັ້ນແລ້ວ ແລະ ຜູ້ໃດຈະຍາດເອົາສິ່ງນີ້ໄປຈາກນາງບໍ່ໄດ້.”²³

ເອື້ອຍນ້ອງທັງຫລາຍ, ຖ້າຫາກເຮົາເປັນຄົນບໍລິສຸດ, ເຮົາຕ້ອງຮຽນຮູ້ທີ່ຈະນັ່ງຢູ່ໃກ້ພຣະບາດຂອງພຣະຜູ້ບໍລິສຸດຂອງອິດສະຣາເອນ ແລະ ໃຫ້ເວລາຕໍ່ຄວາມບໍລິສຸດ. ເຮົາໄດ້ວາງມືຖື, ລາຍການທີ່ຕ້ອງເຮັດ, ແລະ ຄວາມເປັນຫ່ວງໃນໂລກ ລົງໄວ້ແລ້ວບໍ? ການອະທິຖານ, ການສຶກສາ, ແລະ ການເຊື່ອຟັງພຣະຄຳຂອງພຣະເຈົ້າ ເຊື້ອເຊີນຄວາມຮັກທີ່ຊຳລະໃຫ້ສະອາດ ແລະ ປິ່ນປົວຂອງພຣະເຈົ້າ ເຂົ້າມາໃນຈິດວິນຍານຂອງເຮົາ. ຂໍໃຫ້ເຮົາຈົ່ງຫາເວລາເພື່ອຄວາມບໍລິສຸດ ເພື່ອວ່າເຮົາຈະເຕັມໄປດ້ວຍພຣະວິນຍານທີ່ສັກສິດ, ແລະ ການຊຳລະໃຫ້ສະອາດຂອງພຣະອົງ. ໂດຍມີພຣະວິນຍານບໍລິສຸດເປັນຜູ້ນຳພາຂອງເຮົາ, ເຮົາຈະຕຽມພ້ອມ ເພື່ອຕ້ອນຮັບພຣະຜູ້ຊ່ວຍໃຫ້ລອດ ໃນເຄື່ອງປະດັບແຫ່ງຄວາມບໍລິສຸດ.²⁴

ຄວາມບໍລິສຸດ ຄືການກາຍເປັນໄພ່ພົນຂອງພຣະເຈົ້າ ຜ່ານການຊົດໃຊ້ຂອງພຣະເຢຊູຄຣິດ

ອີງຕາມຖ້ອຍຄຳທີ່ດົນໃຈຂອງກະສັດເບັນຢາມິນ, ຜູ້ຄົນທີ່ກາຍເປັນໄພ່ພົນຂອງພຣະເຈົ້າ ຜ່ານທາງການຊົດໃຊ້ຂອງພຣະເຢຊູຄຣິດ ເປັນບຸກຄົນທີ່ບອກລອນສອນງ່າຍ, ອ່ອນໂຍນ, ຖ່ອມຕົວ, ອົດທົນ, ແລະ ເຕັມໄປດ້ວຍຄວາມຮັກ, ດັ່ງທີ່ພຣະຜູ້ຊ່ວຍໃຫ້ລອດເປັນ.²⁵ ເພິ່ນໄດ້ທຳນາຍວ່າ ພຣະເຢຊູຄຣິດ, “ພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່, ຜູ້ຄອບຄອງ, ຜູ້ເປັນມາແລ້ວ ແລະ ເປັນຢູ່ຈາກຊົ່ວນິລັນດອນເຖິງຊົ່ວນິລັນດອນ ຈະສະເດັດຈາກສະຫວັນລົງມາຢູ່ໃນບັນດາລູກຫລານມະນຸດ, ແລະ ຈະຢູ່ໃນຮ່າງກາຍທີ່ເຮັດດ້ວຍດິນໜຽວ.” ພຣະອົງໄດ້ມາເພື່ອໃຫ້ພອນແກ່ຄົນເຈັບປ່ວຍ, ເປັນລ່ອຍ, ຫູໜວກ, ແລະ ຕາບອດ, ແລະ ໄດ້ນຳຄົນທີ່ຕາຍແລ້ວ ຄືນມາມີຊີວິດ. ແຕ່ພຣະອົງໄດ້ຮັບທຸກທໍລະມານ “ຫລາຍກວ່າມະນຸດຈະທົນໄດ້, ນອກຈາກຈະເຖິງແກ່ຄວາມຕາຍ.”²⁶ ແລະ ເຖິງແມ່ນພຣະອົງເປັນພຽງຜູ້ດຽວ ຊຶ່ງຜ່ານທາງພຣະອົງ ຄວາມລອດຈຶ່ງມີມາ, ພຣະອົງໄດ້ຖືກເຍາະເຍີ້ຍ, ຖືກຂ້ຽນຕີ, ແລະ ຖືກຄຶງ. ແຕ່ພຣະບຸດຂອງພຣະເຈົ້າ ໄດ້ລຸກຂຶ້ນຈາກຫລຸມສົບ ເພື່ອວ່າເຮົາທຸກຄົນ ຈະເອົາຊະນະຄວາມຕາຍ. ພຣະອົງເປັນຜູ້ດຽວ ທີ່ຈະຢືນພິພາກສາໂລກ ໃນຄວາມຊອບທຳ. ພຣະອົງເປັນຜູ້ດຽວ ທີ່ຈະໄຖ່ເຮົາທຸກຄົນ. ພຣະອົງເປັນພຣະຜູ້ບໍລິສຸດຂອງອິດສະຣາເອນ. ພຣະເຢຊູຄຣິດເປັນເຄື່ອງປະດັບແຫ່ງຄວາມບໍລິສຸດ.

ຕອນຜູ້ຄົນຂອງກະສັດເບັນຢາມິນໄດ້ຍິນຖ້ອຍຄຳຂອງເພິ່ນ, ພວກເຂົາໄດ້ລົ້ມລົງຢູ່ກັບພື້ນດິນ ດ້ວຍຄວາມຖ່ອມຕົວ ແລະ ຄວາມຄາລະວະ ຫລາຍທີ່ສຸດ ຕໍ່ພຣະຄຸນ ແລະ ລັດສະໝີພາບຂອງພຣະເຈົ້າ. ເຂົາເຈົ້າໄດ້ຮັບຮູ້ສະພາບແຫ່ງກາມມະລົມຂອງຕົນ. ເຮົາເຫັນບໍວ່າ ເຮົາຕ້ອງເພິ່ງອາໄສພຣະຄຸນ ແລະ ພຣະເມດຕາຂອງອົງພຣະຄຣິດ ອົງເປັນພຣະຜູ້ເປັນເຈົ້າຂອງເຮົາຫລາຍຂະໜາດໃດ? ເຮົາຮັບຮູ້ບໍວ່າ ຂອງປະທານທີ່ດີທຸກຢ່າງ, ທາງໂລກ ແລະ ທາງວິນຍານ, ມາສູ່ເຮົາ ຜ່ານທາງພຣະຄຣິດ? ເຮົາຈື່ຢູ່ບໍວ່າ ອີງຕາມແຜນແຫ່ງນິລັນດອນຂອງພຣະບິດາ, ສັນຕິສຸກໃນຊີວິດນີ້ ແລະ ລັດສະໝີພາບຂອງນິລັນດອນ ຈຶ່ງເປັນຂອງເຮົາ ຜ່ານທາງພຣະຜູ້ບໍລິສຸດຂອງພຣະອົງ?

ຂໍໃຫ້ເຮົາຈົ່ງເຂົ້າຮ່ວມກັບຜູ້ຄົນຂອງກະສັດເບັນຢາມິນ ໃນຂະນະທີ່ເຂົາເຈົ້າຮ້ອງອອກມາ ດ້ວຍສຽງດຽວກັນວ່າ, “ໂອ້ ຂໍຊົງໂປດເມດຕາ ແລະ ໂປດໃຊ້ໂລຫິດທີ່ຊົດໃຊ້ຂອງພຣະຄຣິດ ເພື່ອພວກຂ້ານ້ອຍຈະໄດ້ຮັບການໃຫ້ອະໄພຈາກບາບຂອງພວກຂ້ານ້ອຍ, ແລະ ເພື່ອໃຈຂອງພວກຂ້ານ້ອຍຈະຖືກເຮັດໃຫ້ບໍລິສຸດ; ເພາະພວກຂ້ານ້ອຍເຊື່ອໃນພຣະເຢຊູຄຣິດ, ພຣະບຸດຂອງພຣະເຈົ້າ, ຜູ້ໄດ້ສ້າງສະຫວັນ ແລະ ແຜ່ນດິນໂລກ, ແລະ ທຸກຢ່າງ.”²⁷

ຂ້າພະເຈົ້າເປັນພະຍານວ່າ ເມື່ອເຮົາມາຫາພຣະຜູ້ບໍລິສຸດແຫ່ງອິດສະຣາເອນ, ແລ້ວພຣະວິນຍານຂອງພຣະອົງຈະສະເດັດມາໃນເຮົາ ເພື່ອວ່າເຮົາຈະເຕັມໄປດ້ວຍຄວາມສຸກ, ແລະ ຮັບເອົາການປົດບາບ ແລະ ຄວາມສະຫງົບໃນຈິດສຳນຶກ.

ພຣະບິດາເທິງສະຫວັນໄດ້ປະທານຄວາມສາມາດທີ່ຈະກາຍເປັນຜູ້ສັກສິດ ໃຫ້ແກ່ເຮົາແຕ່ລະຄົນ. ຂໍໃຫ້ເຮົາຈົ່ງເຮັດໃຫ້ດີທີ່ສຸດ ໃນການຮັກສາພັນທະສັນຍາຂອງເຮົາ ແລະ ຮັບເອົາພຣະວິນຍານບໍລິສຸດເປັນຜູ້ນຳພາເຮົາ. ດ້ວຍສັດທາໃນພຣະເຢຊູຄຣິດ, ເຮົາຈະກາຍເປັນໄພ່ພົນຂອງພຣະເຈົ້າ ຜ່ານທາງການຊົດໃຊ້ຂອງພຣະອົງ, ເພື່ອວ່າເຮົາຈະໄດ້ຮັບຄວາມເປັນອະມະຕະ ແລະ ຊີວິດນິລັນດອນ ແລະ ຍົກຍໍພຣະນາມອັນຄວນຂອງພຣະອົງ ແດ່ພຣະຜູ້ເປັນເຈົ້າ. ຂໍໃຫ້ຊີວິດຂອງເຮົາເປັນເຄື່ອງບູຊາທີ່ສັກສິດຕະຫລອດໄປ ເພື່ອວ່າເຮົາຈະຢືນຢູ່ຕໍ່ພຣະພັກຂອງພຣະຜູ້ເປັນເຈົ້າ ດ້ວຍເຄື່ອງປະດັບແຫ່ງຄວາມບໍລິສຸດ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.