ຄວາມກະລຸນາ, ຄວາມໃຈບຸນ, ແລະ ຄວາມຮັກ

ໂດຍ ປະທານທອມມັສ ແອັສ ມອນສັນ

ຂໍໃຫ້ເຮົາຈົ່ງສຳຫລວດຊີວິດຂອງເຮົາເອງ ແລະ ຕັ້ງໃຈທີ່ຈະເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ ໂດຍການເປັນຄົນທີ່ກະລຸນາ, ມີຄວາມຮັກ, ແລະ ມີໃຈເພື່ອແຜ່.

ອ້າຍນ້ອງທີ່ຮັກແພງ, ຂ້າພະເຈົ້າໄດ້ຮັບກຽດຢ່າງຍິ່ງ ໂດຍທີ່ມີໂອກາດໃຫ້ມາກ່າວກັບທ່ານ ໃນການເຕົ້າໂຮມທົ່ວໂລກ ຂອງຜູ້ດຳລົງຖານະປະໂລຫິດທີ່ຊື່ສັດຂອງພຣະເຈົ້າ. ຄ່ຳຄືນນີ້ ຂ້າພະເຈົ້າຢາກກ່າວໃນຫົວຂໍ້ທີ່ຂ້າພະເຈົ້າເຄີຍກ່າວມາແລ້ວ.

ສາດສະດາມໍມອນໄດ້ບັນຍາຍເຖິງຄວາມສຳຄັນຂອງບຸກຄະລິກລັກສະນະ ຂອງພຣະຜູ້ຊ່ວຍໃຫ້ລອດ ແລະ ເປັນສິ່ງທີ່ສານຸສິດຂອງພຣະອົງຄວນເອົາແບບຢ່າງ. ພຣະອົງໄດ້ກ່າວວ່າ:

“ຖ້າຫາກຜູ້ໃດອ່ອນໂຍນ ແລະ ຕ່ຳຕ້ອຍໃນໃຈ, ແລະ ສາລະພາບໂດຍອຳນາດຂອງພຣະວິນຍານບໍລິສຸດວ່າພຣະເຢຊູຄື ພຣະຄຣິດ, ຜູ້ນັ້ນຕ້ອງມີຄວາມໃຈບຸນ, ເພາະຖ້າຫາກເຂົາບໍ່ມີຄວາມໃຈບຸນ ເຂົາກໍບໍ່ເປັນອັນໃດເລີຍ; ດັ່ງນັ້ນ ເຂົາຕ້ອງມີຄວາມໃຈບຸນ.

“ແລະ ຄວາມໃຈບຸນອົດທົນໄດ້ດົນນານ, ແລະ ມີຄວາມເມດຕາ, ແລະ ບໍ່ອິດສາບັງບຽດ, ແລະ ບໍ່ອວດອົ່ງ, ແລະ ບໍ່ສະແຫວງຫາເພື່ອຕົນເອງ, ບໍ່ຄຽດງ່າຍ. …

“ດັ່ງນັ້ນ, ພີ່ນ້ອງທີ່ຮັກຂອງຂ້າພະເຈົ້າ, ຖ້າຫາກທ່ານບໍ່ມີຄວາມໃຈບຸນ, ທ່ານກໍບໍ່ເປັນອັນໃດເລີຍ, ເພາະຄວາມໃຈບຸນດຳລົງຢູ່ຕະຫລອດໄປ. ດັ່ງນັ້ນ, ຈົ່ງຍຶດໝັ້ນຢູ່ກັບຄວາມໃຈບຸນ, ຊຶ່ງເປັນສິ່ງທີ່ຍິ່ງໃຫຍ່ທີ່ສຸດໃນທຸກສິ່ງ, ເພາະວ່າທຸກສິ່ງຕ້ອງໝົດສິ້ນໄປ—

“ແຕ່ຄວາມໃຈບຸນຄືຄວາມຮັກອັນບໍລິສຸດຂອງພຣະຄຣິດ, ແລະ ມັນອົດທົນຕະຫລອດການ; ແລະ ຜູ້ໃດຖືກພົບວ່າມີມັນໃນວັນສຸດທ້າຍ, ຍ່ອມຈະເປັນການດີກັບຜູ້ນັ້ນ.”¹

ອ້າຍນ້ອງທັງຫລາຍ, ເຮົາບໍ່ໃຫ້ກຽດແກ່ຖານະປະໂລຫິດຂອງພຣະເຈົ້າ ຖ້າຫາກເຮົາບໍ່ມີຄວາມກະລຸນາຕໍ່ຄົນອື່ນ.

ເພື່ອນຮັກ ແລະ ເພື່ອນຮ່ວມງານຂອງຂ້າພະເຈົ້າຊື່ ແອວເດີ ໂຈເຊັບ ບີ ເວີດລິນ ເປັນຄົນທີ່ມີເມດຕາຫລາຍ. ເພິ່ນໄດ້ກ່າວວ່າ:

“ຄວາມກະລຸນາແມ່ນຈຳເປັນຫລາຍ ຂອງຊີວິດໃນລະດັບຊັ້ນສູງ. ຄວາມກະລຸນາຄືການປະພຶດກັບຄົນອື່ນ ຢ່າງພຣະຄຣິດ. ຄວາມກະລຸນາຄວນເຕັມຢູ່ໃນຄຳວາຈາ ແລະ ການກະທຳຂອງເຮົາ ຢູ່ທີ່ບ່ອນທຳງານ, ຢູ່ທີ່ໂຮງຮຽນ, ຢູ່ທີ່ໂບດ, ແລະ ໂດຍສະເພາະ ຢູ່ທີ່ບ້ານ.

“ພຣະເຢຊູຄຣິດ, ພຣະຜູ້ຊ່ວຍໃຫ້ລອດຂອງເຮົາ, ໄດ້ເປັນຕົວຢ່າງທີ່ດີເລີດ ເລື່ອງຄວາມກະລຸນາ ແລະ ຄວາມເຫັນອົກເຫັນໃຈ.”²

ພຣະຄຳພີສອນເຮົາວ່າ ການໃຊ້ຖານະປະໂລຫິດຢ່າງຊອບທຳ ແມ່ນຂຶ້ນກັບການດຳລົງຊີວິດ ຕາມຫລັກທຳແຫ່ງຄວາມກະລຸນາ, ຄວາມໃຈບຸນ, ແລະ ຄວາມຮັກ. ເຮົາອ່ານໃນ Doctrine and Covenants ວ່າ,

ບໍ່ມີອຳນາດ ຫລື ອິດທິພົນໃດສາມາດ ຫລື ຈະດຳລົງຮັກສາໄວ້ໄດ້ ໂດຍອາໄສຖານະປະໂລຫິດ, ນອກຈາກໂດຍການຊັກຊວນ, … ໂດຍຄວາມອ່ອນໂຍນ ແລະ ໂດຍຄວາມອ່ອນນ້ອມ, ແລະ ໂດຍຄວາມຮັກອັນບໍ່ແກ້ງເຮັດ;

ໂດຍຄວາມກະລຸນາ, ແລະ ຄວາມຮູ້ອັນບໍລິສຸດ, ຊຶ່ງຈະຂະຫຍາຍຈິດວິນຍານອອກໄປຢ່າງກວ້າງຂວາງ ໂດຍປາດສະຈາກຄວາມໜ້າຊື່ໃຈຄົດ, ແລະ ປາດສະຈາກອຸບາຍ.³

ອ້າຍນ້ອງທັງຫລາຍ, ຂໍໃຫ້ເຮົາຈົ່ງສຳຫລວດຊີວິດຂອງເຮົາເອງ ແລະ ຕັ້ງໃຈທີ່ຈະເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ ໂດຍການເປັນຄົນທີ່ກະລຸນາ, ມີຄວາມຮັກ, ແລະ ມີໃຈເພື່ອແຜ່. ແລະ ເມື່ອເຮົາເຮັດເຊັ່ນນັ້ນ, ເຮົາຈະຢູ່ໃນຕຳແໜ່ງທີ່ດີກວ່າ ເພື່ອທູນຂໍອຳນາດແຫ່ງສະຫວັນ ໃຫ້ກັບຕົວເອງ, ໃຫ້ກັບຄອບຄົວ, ແລະ ໃຫ້ກັບເພື່ອນຮ່ວມເດີນທາງກັບເຮົາ ໃນເສັ້ນທາງເດີນ ທີ່ບາງຄັ້ງກໍຫຍຸ້ງຍາກສັບສົນ ເພື່ອກັບໄປຫາບ້ານໃນສະຫວັນຂອງເຮົາ. ຂ້າພະເຈົ້າກ່າວມາໃນພຣະນາມຂອງອົງພຣະເຢຊູຄຣິດເຈົ້າ, ອາແມນ.