“ວັນທີ 9–15 ເດືອນພຶດສະພາ. ຈົດບັນຊີ 11–14; 20–24: ‘ຢ່າກະບົດຕໍ່ສູ້ພຣະຜູ້ເປັນເຈົ້າເລີຍ, ແລະ ຢ່າສູ່ຢ້ານ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີເດີມ 2022 (2021)
“ວັນທີ 9–15 ເດືອນພຶດສະພາ. ຈົດບັນຊີ 11–14; 20–24,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2022
ວັນທີ 9–15 ເດືອນພຶດສະພາ.
ຈົດບັນຊີ 11–14; 20–24
“ຢ່າກະບົດຕໍ່ສູ້ພຣະຜູ້ເປັນເຈົ້າເລີຍ, ແລະ ຢ່າສູ່ຢ້ານ”
ໂຄງຮ່າງນີ້ເນັ້ນໜັກຫລັກທຳທີ່ມີຄ່າບາງຢ່າງຢູ່ໃນພຣະທຳຈົດບັນຊີ. ຈົ່ງເປີດໃຈຕໍ່ຫລັກທຳຂໍ້ອື່ນໆນຳອີກ ອັນທີ່ພຣະວິນຍານອາດຊ່ວຍທ່ານໃຫ້ເຫັນ.
ບັນທຶກຄວາມປະທັບໃຈຂອງທ່ານ
ແມ່ນແຕ່ຍ່າງເອົາ, ຕາມປົກກະຕິແລ້ວ ກໍບໍ່ຕ້ອງໃຊ້ເວລາເຖິງ 40 ປີ ໃນການເດີນທາງຈາກຖິ່ນແຫ້ງແລ້ງກັນດານແຫ່ງຊີນາຍ ໄປຫາແຜ່ນດິນແຫ່ງຄຳສັນຍາຢູ່ໃນການາອານ. ແຕ່ລູກຫລານຂອງອິດສະຣາເອນໄດ້ໃຊ້ເວລາຫລາຍເຖິງຂະໜາດນັ້ນ, ບໍ່ແມ່ນເພາະຄວາມໄກຂອງແຜ່ນດິນ ແຕ່ແມ່ນຄວາມໄກຂອງທາງວິນຍານ: ຄວາມໄກລະຫວ່າງຜູ້ທີ່ພວກເຂົາເປັນໃຜ ແລະ ຜູ້ທີ່ພຣະຜູ້ເປັນເຈົ້າຕ້ອງການໃຫ້ພວກເຂົາກາຍເປັນ ໃນຖານະຜູ້ຄົນແຫ່ງພັນທະສັນຍາຂອງພຣະອົງ.
ພຣະທຳຈົດບັນຊີ ບັນຍາຍບາງສິ່ງທີ່ໄດ້ເກີດຂຶ້ນລະຫວ່າງ 40 ປີເຫລົ່ານັ້ນ, ລວມທັງບົດຮຽນທີ່ລູກຫລານຂອງອິດສະຣາເອນຕ້ອງໄດ້ຮຽນຮູ້ກ່ອນເຂົ້າໄປໃນແຜ່ນດິນແຫ່ງຄຳສັນຍາ. ພວກເຂົາໄດ້ຮຽນຮູ້ກ່ຽວກັບການເປັນຄົນຊື່ສັດຕໍ່ຜູ້ຮັບໃຊ້ທີ່ພຣະຜູ້ເປັນເຈົ້າໄດ້ເລືອກໄວ້ (ເບິ່ງ ຈົດບັນຊີ 12). ພວກເຂົາໄດ້ຮຽນຮູ້ກ່ຽວກັບການໄວ້ວາງໃຈໃນອຳນາດຂອງພຣະຜູ້ເປັນເຈົ້າ, ເຖິງແມ່ນວ່າອະນາຄົດເບິ່ງບໍ່ແຈ່ມໃສກໍຕາມ (ເບິ່ງ ຈົດບັນຊີ 13–14). ແລະ ພວກເຂົາໄດ້ຮຽນຮູ້ວ່າ ການເປັນຄົນທີ່ບໍ່ຊື່ສັດ ຫລື ຂາດຄວາມໄວ້ວາງໃຈ ຈະນຳອັນຕະລາຍທາງວິນຍານມາໃຫ້ວິນຍານ, ແຕ່ພວກເຂົາສາມາດກັບໃຈ ແລະ ເບິ່ງທີ່ພຣະຜູ້ຊ່ວຍໃຫ້ລອດເພື່ອການປິ່ນປົວ (ເບິ່ງ ຈົດບັນຊີ 21:4–9).
ໃນທາງໃດທາງໜຶ່ງ ເຮົາທຸກຄົນກໍເປັນຄືກັນກັບຊາວອິດສະຣາເອນ. ເຮົາທຸກຄົນຮູ້ວ່າ ການຢູ່ໃນຖິ່ນແຫ້ງແລ້ງກັນດານທາງວິນຍານເປັນແນວໃດ, ແລະ ບົດຮຽນທີ່ຄືກັນນັ້ນທີ່ພວກເຂົາໄດ້ຮຽນຮູ້ ກໍສາມາດຊ່ວຍເຮົາໃຫ້ກະກຽມທີ່ຈະເຂົ້າໄປໃນແຜ່ນດິນແຫ່ງຄຳສັນຍາຂອງເຮົາຄືກັນ: ຊີວິດນິລັນດອນຢູ່ນຳພຣະບິດາເທິງສະຫວັນຂອງເຮົາ.
ສຳລັບພາບລວມຂອງພຣະທຳຈົດບັນຊີ, ໃຫ້ເບິ່ງ “Numbers” ໃນ Bible Dictionary.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຈົດບັນຊີ 11:11–17, 24–29; 12
ການເປີດເຜີຍມີໃຫ້ທຸກຄົນ, ແຕ່ພຣະເຈົ້ານຳພາສາດສະໜາຈັກຂອງພຣະອົງຜ່ານທາງສາດສະດາຂອງພຣະອົງ.
ໃນ ຈົດບັນຊີ 11:11–17, 24–29, ໃຫ້ສັງເກດເບິ່ງບັນຫາທີ່ໂມເຊໄດ້ປະເຊີນ ແລະ ຂໍ້ແກ້ໄຂທີ່ພຣະເຈົ້າສະເໜີມອບໃຫ້. ທ່ານຄິດວ່າໂມເຊໝາຍຄວາມວ່າແນວໃດ ເມື່ອເພິ່ນເວົ້າວ່າ ເພິ່ນປາດຖະໜາ “ໃຫ້ທຸກຄົນຂອງພຣະຜູ້ເປັນເຈົ້າເປັນສາດສະດາ”? (ຂໍ້ທີ 29). ຂະນະທີ່ທ່ານໄຕ່ຕອງຂໍ້ເຫລົ່ານີ້, ໃຫ້ພິຈາລະນາຖ້ອຍຄຳເຫລົ່ານີ້ຂອງປະທານຣະໂຊ ເອັມ ແນວສັນ ທີ່ວ່າ: “ພຣະເຈົ້າ ຢາກ ກ່າວກັບທ່ານແທ້ໆບໍ? ແມ່ນແລ້ວ! … ໂອ້, ມັນມີຫລາຍສິ່ງຫລາຍຢ່າງທີ່ພຣະບິດາຜູ້ສະຖິດຢູ່ໃນສະຫວັນຢາກໃຫ້ທ່ານຮູ້ຈັກ” (“Revelation for the Church, Revelation for Our Lives,” Ensign ຫລື Liahona, May 2018, 95).
ເຖິງຢ່າງໃດກໍຕາມ, ການເວົ້າວ່າທຸກຄົນສາມາດເປັນສາດສະດາ ບໍ່ໄດ້ໝາຍຄວາມວ່າ ທຸກຄົນສາມາດນຳພາຜູ້ຄົນຂອງພຣະເຈົ້າເໝືອນດັ່ງທີ່ໂມເຊໄດ້ເຮັດ. ເຫດການທີ່ຖືກບັນທຶກໄວ້ຢູ່ໃນ ຈົດບັນຊີ 12 ໃຫ້ຄວາມແຈ່ມແຈ້ງກ່ຽວກັບເລື່ອງນີ້. ຂະນະທີ່ທ່ານອ່ານບົດນີ້, ທ່ານພົບເຫັນຂໍ້ເຕືອນຢ່າງໃດແດ່? ທ່ານຮູ້ສຶກວ່າພຣະຜູ້ເປັນເຈົ້າຢາກໃຫ້ທ່ານເຂົ້າໃຈສິ່ງໃດກ່ຽວກັບການເປີດເຜີຍສ່ວນຕົວ ແລະ ການເຮັດຕາມສາດສະດາ?
ເບິ່ງ 1 ນີໄຟ 10:17; ຄຳສອນ ແລະ ພັນທະສັນຍາ 28:1–7; Dallin H. Oaks, “Two Lines of Communication,” Liahona, Nov. 2010, 83–86 ນຳອີກ.
ດ້ວຍສັດທາໃນພຣະຜູ້ເປັນເຈົ້າ, ເຮົາສາມາດມີຄວາມຫວັງສຳລັບອະນາຄົດ.
ຂະນະທີ່ທ່ານອ່ານ ຈົດບັນຊີ 13–14, ໃຫ້ສົມມຸດຕົວເອງວ່າເປັນຊາວອິດສະຣາເອນ. ທ່ານຄິດວ່າເປັນຫຍັງພວກເຂົາຈຶ່ງຢາກ “ກັບຄືນໄປເອຢິບ”? (ຈົດບັນຊີ 14:3). ທ່ານກໍເຄີຍເປັນຄືກັນກັບຜູ້ທີ່ຄິດໃນທາງລົບບໍ ກ່ຽວກັບການເຂົ້າໄປໃນແຜ່ນດິນແຫ່ງຄຳສັນຍາ? ທ່ານຈະບັນຍາຍ “ທ່າທີ” ແຕກຕ່າງຂອງກາເລັບແນວໃດ? (ຈົດບັນຊີ 14:24). ແມ່ນຫຍັງທີ່ປະທັບໃຈທ່ານກ່ຽວກັບສັດທາຂອງກາເລັບ ແລະ ໂຢຊວຍ, ແລະ ທ່ານອາດນຳໃຊ້ຕົວຢ່າງຂອງເຂົາເຈົ້າໃນສະຖານະການທີ່ທ່ານປະເຊີນແນວໃດ?
ເບິ່ງ Teachings of Presidents of the Church: Gordon B. Hinckley (2016), 75–76 ນຳອີກ.
ຖ້າຫາກເຮົາເບິ່ງທີ່ພຣະເຢຊູຄຣິດດ້ວຍສັດທາ, ພຣະອົງສາມາດປິ່ນປົວເຮົາທາງວິນຍານ
ສາດສະດາໃນພຣະຄຳພີມໍມອນຮູ້ຈັກເລື່ອງລາວທີ່ບັນທຶກຢູ່ໃນ ຈົດບັນຊີ 21:4–9 ແລະ ເຂົ້າໃຈຄວາມສຳຄັນທາງວິນຍານຂອງມັນ. 1 ນີໄຟ 17:40–41; ແອວມາ 33:18–22; ແລະ ຮີລາມັນ 8:13–15 ໄດ້ເພີ່ມຄວາມເຂົ້າໃຈແກ່ທ່ານກ່ຽວກັບເລື່ອງນີ້ແນວໃດ? ຂະນະທີ່ທ່ານສຶກສາຂໍ້ພຣະຄຳພີເຫລົ່ານີ້, ໃຫ້ຄິດກ່ຽວກັບການປິ່ນປົວທາງວິນຍານທີ່ທ່ານຄາດຫວັງ. ຊາວອິດສະຣາເອນຕ້ອງ “[ຫລຽວເບິ່ງ] ງູທອງສຳລິດ” (ຈົດບັນຊີ 21:9) ເພື່ອຮັບການປິ່ນປົວ. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດຫລາຍຕື່ມອີກ ເພື່ອ “ຫລຽວເບິ່ງພຣະບຸດຂອງພຣະເຈົ້າດ້ວຍສັດທາ”? (ຮີລາມັນ 8:15).
ເບິ່ງ ໂຢຮັນ 3:14–15; ຄຳສອນ ແລະ ພັນທະສັນຍາ 6:36; Dale G. Renlund, “Abound with Blessings,” Liahona, May 2019, 70–73 ນຳອີກ.
ຊາວອິດສະຣາເອນໄດ້ຮັບການປິ່ນປົວໂດຍການຫລຽວເບິ່ງງູທອງສຳລິດ.
ເຮົາສາມາດເຮັດຕາມພຣະປະສົງຂອງພຣະເຈົ້າ, ແມ່ນແຕ່ຖ້າຫາກວ່າຄົນອື່ນພະຍາຍາມຊັກຊວນເຮົາບໍ່ໃຫ້ເຮັດກໍຕາມ.
ເມື່ອບາຫລາກ, ກະສັດຂອງໂມອາບ, ໄດ້ຍິນວ່າຊາວອິດສະຣາເອນກຳລັງເດີນທັບມາ, ເພິ່ນໄດ້ເອີ້ນໃຫ້ບາລາອາມມາເຂົ້າເຝົ້າ, ຜູ້ທີ່ສາມາດກ່າວອວຍພອນ ແລະ ກ່າວສາບແຊ່ງ. ບາຫລາກຢາກໃຫ້ລາວເຮັດໃຫ້ຊາວອິດສະຣາເອນອ່ອນແອລົງ ໂດຍການກ່າວສາບແຊ່ງພວກເຂົາ. ໃຫ້ສັງເກດເບິ່ງວິທີທີ່ບາຫລາກໄດ້ພະຍາຍາມຊັກຊວນບາລາອາມ (ເບິ່ງ ຈົດບັນຊີ 22:5–7, 15–17), ແລະ ໃຫ້ຄິດກ່ຽວກັບການລໍ້ລວງທີ່ທ່ານປະເຊີນ ເພື່ອໃຫ້ຕໍ່ຕ້ານພຣະປະສົງຂອງພຣະເຈົ້າ. ແມ່ນຫຍັງທີ່ປະທັບໃຈທ່ານກ່ຽວກັບຄຳຕອບຂອງບາລາອາມ ຢູ່ໃນ ຈົດບັນຊີ 22:18, 38; 23:8, 12, 26; 24:13?
ໜ້າເສຍໃຈທີ່ ໃນທີ່ສຸດເບິ່ງຄືວ່າບາລາອາມໄດ້ຍິນຍອມຕໍ່ການຊັກຊວນ ແລະ ໄດ້ທໍລະຍົດຕໍ່ຊາວອິດສະຣາເອນ (ເບິ່ງ ຈົດບັນຊີ 31:16; ຢູດາ 1:11). ໃຫ້ໄຕ່ຕອງວິທີທີ່ທ່ານສາມາດຊື່ສັດຕໍ່ພຣະຜູ້ເປັນເຈົ້າຢູ່ຄືເກົ່າ ເຖິງແມ່ນຈະໄດ້ຮັບຄວາມກົດດັນຈາກຄົນອື່ນກໍຕາມ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຈົດບັນຊີ 11:4–6.ເຮົາເຄີຍມີທ່າທີທີ່ຄ້າຍຄືກັນກັບທ່າທີຂອງຊາວອິດສະຣາເອນ ທີ່ກ່າວເຖິງຢູ່ໃນ ຈົດບັນຊີ 11:4–6 ບໍ? ຄຳແນະນຳຢູ່ໃນ ຄຳສອນ ແລະ ພັນທະສັນຍາ 59:15–21 ຊ່ວຍໄດ້ແນວໃດ?
-
ຈົດບັນຊີ 12:3.ໂມເຊໄດ້ສະແດງໃຫ້ເຫັນວ່າ ເພິ່ນ “ອ່ອນນ້ອມຖ່ອມຕົວທີ່ສຸດ” ໃນ ຈົດບັນຊີ 12 ຫລື ໃນຂໍ້ພຣະຄຳພີອື່ນໆ ທີ່ທ່ານໄດ້ອ່ານແນວໃດ? ທ່ານສາມາດທົບທວນຄຳອະທິບາຍຂອງແອວເດີ ເດວິດ ເອ ແບ໊ດນາ ກ່ຽວກັບຄວາມອ່ອນໂຍນ ຢູ່ໃນຂ່າວສານຂອງເພິ່ນ “Meek and Lowly of Heart” (Liahona, May 2018, 30–33) ຫລື ໃນ “ອ່ອນໂຍນ, ຄວາມອ່ອນໂຍນ” ໃນ ຄູ່ມືພຣະຄຳພີ (scriptures.ChurchofJesusChrist.org). ເຮົາຮຽນຮູ້ຫຍັງແດ່ກ່ຽວກັບວິທີທີ່ເຮົາສາມາດເປັນຄົນອ່ອນໂຍນຫລາຍກວ່າເກົ່າ? ເຮົາຈະໄດ້ຮັບພອນຢ່າງໃດແດ່ ເມື່ອເຮົາເຮັດສິ່ງນັ້ນ?
-
ຈົດບັນຊີ 13–14.ສະມາຊິກໃນຄອບຄົວຂອງທ່ານ ສອງຄົນ (ຫລື ຫລາຍກວ່ານັ້ນ) ສາມາດທຳທ່າ “ສອດແນມ” (ຈົດບັນຊີ 13:17) ເບິ່ງບາງບ່ອນໃນເຮືອນຂອງທ່ານ ຄືກັນກັບວ່າມັນເປັນແຜ່ນດິນແຫ່ງຄຳສັນຍາ. ແລ້ວເຂົາເຈົ້າແຕ່ລະຄົນມາລາຍງານອີງຕາມ ຈົດບັນຊີ 13:27–33 ຫລື ຈົດບັນຊີ 14:6–9. ເຮົາຮຽນຮູ້ຫຍັງແດ່ກ່ຽວກັບສັດທາຈາກການລາຍງານສອງຢ່າງທີ່ແຕກຕ່າງກັນຢູ່ໃນຂໍ້ເຫລົ່ານີ້? ເຮົາຈະສາມາດເປັນຄືກັນກັບກາເລັບ ແລະ ໂຢຊວຍແນວໃດ?
-
ຈົດບັນຊີ 21:4–9.ຫລັງຈາກການອ່ານ ຈົດບັນຊີ 21:4–9, ພ້ອມທັງ 1 ນີໄຟ 17:40–41; ແອວມາ 33:18–22; ແລະ ຮີລາມັນ 8:13–15, ແລ້ວ ຄອບຄົວຂອງທ່ານສາມາດເຮັດໂຕງູດ້ວຍເຈ້ຍ ຫລື ດິນໜຽວ ແລະ ຂຽນການປະຕິບັດແບບງ່າຍໆບາງຢ່າງໃສ່ເທິງໂຕງູ ຫລື ໃສ່ໃນເຈ້ຍ ທີ່ພວກທ່ານສາມາດເຮັດເພື່ອ “ຫລຽວເບິ່ງພຣະບຸດຂອງພຣະເຈົ້າດ້ວຍສັດທາ” (ຮີລາມັນ 8:15).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27.
ການປັບປຸງການສິດສອນຂອງເຮົາ
ຊ່ວຍຄອບຄົວຂອງທ່ານພັດທະນາການກຸ້ມຕົນເອງທາງຝ່າຍວິນຍານ. “ແທນທີ່ຈະບອກຂໍ້ມູນ, ໃຫ້ຊ່ວຍ [ສະມາຊິກໃນຄອບຄົວຂອງທ່ານ] ຄົ້ນພົບຄວາມຈິງຂອງພຣະກິດຕິຄຸນດ້ວຍຕົວເອງ ຢູ່ໃນພຣະຄຳພີ ແລະ ໃນຖ້ອຍຄຳຂອງບັນດາສາດສະດາ” (Teaching in the Savior’s Way, 28).
Moses and the Brass Serpent [ໂມເຊ ແລະ ງູທອງສຳລິດ], ໂດຍ ຈູດິດ ເອ ເມີ