Droini kei Ilaisa ni vakaraitaka tiko vei ira na nona italai na qiqi bukawaqa, © Review & Herald Publishing/licensed from goodsalt.com

4–10 ni Jiulai

2 Tui 2–7

“E tiko na Parofita e Isireli.”

Ni o wilika tiko, ena rawa ni kauta mai ki na nomu vakasama na Yalo Tabu eso na malanivosa se tikina. Vakasamataka mo vola na vuna e vakaibalebale kina vei iko na veimalanivosa oqori.

Vola na Veika o Uqeti Kina

Na itavi bibi ni dua na parofita o ya me veivakavulici ka vakadinadinataka na iVakabula o Jisu Karisito. Na noda itukutuku ni parofita o Ilaisa, e sega ni oka kina na nona veivakavulici se ivakadinadina. Na itukutuku e oka kina na cakamana e vakayacora o Ilaisa, oka kina na vakaduri cake ni dua na gone mai na mate (raica na 2 Tui 4:18–37), vakani ira na lewevuqa ena vica na kakana lalai (raica na 2 Tui 4:42–44), kei na vakabula e dua na vukavuka (raica na 2 Tui 5:1–14). Me vaka ni sega ni tu vei keda na vosa nei Ilaisa me vakadinadinataka na Karisito, e tiko vei keda, ena loma ni ilesilesi qaqa nei Ilaisa, na ivakaraitaki qaqa ni mana ni nona veisusu kei na veivakabulai na Turaga. Na veivakatakilai vakaoqori e levu vakalevu cake sara ena noda bula mai na kena eda dau kidava ena so na gauna. Me da raici ira, e gadrevi me da vakasaqara na cakamana a vakasaqara o Ilaisa ena nona masu ena vukuna na nona italai rerere, “kemuni na Turaga, au sa masuti kemuni, ni dolava na matana, me rai rawa mai kina” (2 Tui 6:17).

Me baleta na ikuri ni ivakamacala ni 2 Tui, raica na “Kings, books of” ena Bible Dictionary.

Vakasama ni Vuli iVolanikalou ni Tamata Yadua

2 Tui 2–6

E rawa ni cakacaka mana na Kalou ena noqu bula.

Na cakamana ena vukei keda meda vorata rawa na dredre ni bula oqo — ena gauna nei Ilaisa, e dua na vanua dravuisiga e gadrevi kina na wai savasava ka gadrevi me kune na imatau sa yali (raica na 2 Tui 2:19–22; 6:4–7). Ia na cakamana ena vagolea talega na yaloda vua na Turaga ka vakavulica vei keda na veilesoni vakayalo. Ni o wilika na 2 Tui 2–6, sa rawa mo cakava e dua na ituvatuva ni caka mana o kunea, ka vakasamataka vakatitobu na lesoni vakayalo o vulica mai vei ira yadua. Na cava e vakavulica vei iko na cakacaka mana oqo me baleta na Turaga kei na veika e rawa ni cakava ena nomu bula?

Raica talega na 2 Nifai 26:12–13; 27:23; Momani 9:7–21; Moronai 7:35–37; Donald L. Hallstrom, “Sa Mudu Li na Siga ni Cakacaka Mana?” Liaona, Nove. 2017, 88–90.

2 Tui 4:8–17; 7:1–16

Na vosa ni Turaga mai vei ira na Nona parofita ena vakayacori.

Me vaka e volai ena 2 Tui 4:8–17; 7:1–16, sa vakauqeti Ilaisa na Turaga me parofisaitaka na veika ena yaco mai—na veika e vaka, mai na nodra rai na tani, ena dredre ni yaco. Ni o wilika na veitikina oqo, vakasamataka na sala o sauma kina na vosa ni Turaga mai vei ira na Nona parofita nikua. Na ivakavuvuli cava, parofisai, se yalayala cava o sa bau rogoca mai vei ira na parofita bula? Na cava o sa cakava tiko mo cakacaka kina ena vakabauta ena veiyalayala oqori?

Raica talega na 3 Nifai 29:6; Vunau kei na Veiyalayalati1:37–38.

2 Tui 5

Kevaka au yalomalumalumu ka talairawarawa, e rawa ni vakabulai au o Jisu Karisito.

Ena so na gauna ena rawarawa cake meda raica na ibalebale ni ivolanikalou vei keda yadua ena nomu veidutaitaka na veika vakayago ena dua na italanoa ni veika vakayalo. Me kena ivakaraitaki, ni wiliki na 2 Tui 5, sa rawa ni o vakatautauvatataka na vukavuka nei Neamani ena dua na bolebole vakayalo o sotava tiko. Me vakataki Neamani, o na nuitaka beka ni na “cakava na Turaga e dua na ka levu” (tikina e 13) me vukei iko. Na cava e vakavulica vei iko na veika e sotava o Neamani? Ena nomu bula, na cava e tautauvata kei na kena vakamuri na ivakasala rawarawa mo “sili, ka ko na qai savasava”?

Kila na veika a sotava o Neamani ena nona vakabauta na Kalou ni Isireli (raica na tikina e 15). Na veika cava soti sa vaqaqacotaka na nomu vakabauta na Kalou?

Raica talega na Luke 4:27; 1 Pita 5:5–7; Alama 37:3–7; Ica 12:27; L. Whitney Clayton, “A Ka Kecega sa Kaya vei Kemudou, Mo Dou Kitaka,” Liaona, Me 2017, 97–99; “Naaman and Elisha” (vidio), ChurchofJesusChrist.org.

 2 Tui 6:8–23

“Ni ra sa lewevuqa era sa tiko kei kedaru, ka lewe lailai era sa tiko kei ira.”

O sa bau vakila beka ni o vakadrukai ena kemu iwiliwili ka yalorere, ka vakatataro, me vaka na nona italai gone o Ilaisana kedra tu vakadodou kei na rere, ka taroga, me vaka a cakava na cauravou gone o Ilaisa, “A cava me daru cakava?” (raica na 2 Tui 6:8–23). Na cava e vakauqeti iko baleta nai isaunitaro nei Ilaisa? E veisautaka vakacava na italanoa oqo na nomu vakasama kei na nomu nanuma me baleta na nomu vakatovolei, nomu itavi, se na nomu sasaga mo bulataka na kosipeli?

Ni ko vakasamataka vakatitobu, vakasamataka mada na vosa nei Peresitedi Henry B. Eyring: “Me vaka na italai nei Ilaisa, era sa levu cake sara sa tu vata kei iko mai vei ira o rawa ni raica ni saqati iko. Eso era tiko vata kei iko ena sega ni o raici ira rawa ena matamu vakayago. Ena laveti iko cake na Turaga ka na vakayacora ena so na gauna ena nodra kacivi eso tale mera tu vata kei iko “(”Oi Kemudou Kece sa Lesi, “ Liaona, Nove. 2008, 58).

Raica talega na Same 2:11–22; Vunau kei na Veiyalayalati 84:88

Vakasama baleta na Vuli iVolanikalou Vakamatavuvale kei na Lotu Vakamatavuvale

Raica na2 Tui 2:1–14.Vakasamataki ira na tamata era a raica na nona “taura cake” o Ilaisa na kote nei Ilaija (se na itutuvi—e dua na ivakatakilakila ni nona ilesilesi vakaparofita). Ena manata beka vakacava oqo na sala era a rogoca kina na veiqaravi nei Ilaisa? Raica talega na 1 Tui 19:19 E rawa beka ni ra vakaitavi na lewe ni matavuvale ena kena daramaki e dua na “itutuvi” ka vakadinadinataka na sala eso era raica kina na Turaga ni tokona ka vakaukauwataki ira era kacivi me ra veiqaravi ena Nona Lotu.

2 Tui 4.Sa rawa mo sureti ira na lewe ni matavuvale me ra wilika e dua vei ira na cakacaka mana ena 2 Tui 4 (raica na tikina e 1–7, 14–17, 32–35, 38–41, 42–44) ka vola e dua na ivakatakilakila me vukei ira na lewe ni matavuvale tale eso me ra vakilakila na cakamana cava e vakamacalataka tiko. Na cava eda vulica me baleta na iVakabula kei na Nona ilesilesi mai na wase oqo? Na cakamana cava—levu se lailai—eda sa raica ena noda bula?

2 Tui 5:1–15.Ni o wilika na veitikina oqo ka vakasamataka vakatitobu na veika rawarawa a kerei o Neamani me cakava, vakasamataka na veika rawarawa e kerea vei keda na noda parofita. Na sala cava beka ena muria vakavinaka cake kina na noda matavuvale na nona ivakasala?

Sa rawa talega ki na nomu matavuvale me sarava na vidio “Naaman and Elisha” (ChurchofJesusChrist.org) se wilika na “sa vakabulai Neamani o Ilaisa” (ena italanoa ni Veiyalayalati Makawa).

2 Tui 5:20–27Ena yaga beka vakacava vei Gehazi na nona wilika na “Yalodina kei na Buladokai” ena Me iSakisaki ni iTabagone? (tabana e 19). E vakacacani keda vakacava na lawaki? Eda vakalougatataki vakacava ena noda yalodina?

2 Tui 6:13–17E rawa ni ra taleitaka na lewe ni matavuvale me ra droinitaka e dua na iyaloyalo ni veika a sotava o Ilaisa kei na nona italai ka vakamacalataki ena veitikina oqo. Ena vukei keda vakacava na veitikina oqo ni da galili se vakayalolailaitaki?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Sa Voleka na Kalou,” Sere ni Lotu, naba 49.

Vakatorocaketaki Noda Veivakavulici

Vakauqeta na taro. Nodra taro na gone sa ivakaraitaki ni ra sa vakarau me ra vuli. Kevaka o sega ni kila na isau ni nodra taro, vaqara vata kei ira na kena isau. (Raica na Veivakavulici ena iVakarau ni iVakabula, 25–26.)

iYaloyalo ni nona vakabulai o Neamani mai na vukavuka, mai vei Paul Mann