The Flight of the Prisoners [Ang Pag-ikyas sa mga Binilanggo], ni James Tissot ug uban pa

Hulyo 11–17

2 Mga Hari 17–25

“Siya Misalig sa Ginoo nga Dios sa Israel”

Sa dihang nakadungog si Josias sa mga pulong gikan sa basahon sa balaod, mitubag siya uban sa pagtuo. Unsaon nimo sa pagtubag uban sa pagtuo sa unsay imong nabasa diha sa 2 Mga Hari 17–25?

Irekord ang Imong mga Impresyon

Bisan sa impresibong pangalagad ni propeta Eliseo, ang pagka-espirituhanon sa Amihanang Gingharian sa Israel padayon nga nagkakunhod. Ang daotan nga mga hari nag-awhag og pagsimba og mga dios-dios, ug ang gubat ug apostasiya midaghan. Sa katapusan ang Empiryo sa Asiria mibuntog ug mipatibulaag sa napulo ka tribo sa Israel.

Sa kasamtangan, ang Habagatang Gingharian sa Juda dili pud maayo og pagkabutang; mikatap usab ang pagsimba og mga dios-dios didto. Apan taliwala sa tanan niining espirituhanong pagkadunot, ang mga istorya sa kasulatan naghisgot og duha ka matarong nga mga hari kinsa, sulod sa usa ka panahon, mipabalik sa ilang katawhan ngadto sa Ginoo. Ang usa mao si Ezechias. Panahon sa iyang paghari, ang mga Asirianhon, bag-o lang nga midaog didto sa amihanan, mibuntog sa kadaghanan sa habagatan. Apan si Ezechias ug ang iyang katawhan mipakita og pagtuo ngadto sa Ginoo, kinsa miluwas sa Jerusalem sa usa ka milagrosong paagi. Wala madugay, human sa laing panahon sa apostasiya, si Josias misugod sa paghari. Nadasig sa usa ka bahin tungod sa pagkadiskobre og usab sa basahon sa balaod, si Josias mihimo og mga pagpangtarong nga nakapabalik sa kadasig sa relihiyosong kinabuhi sa daghan sa iyang katawhan.

Unsa ang atong makat-onan gikan niining duha ka hayag nga mga panahon sa kasagarang ngitngit nga katuigan sa kasaysayan sa Juda? Lakip sa uban pa, mahimo ka nga mamalandong sa gahom sa pagtuo ug sa pulong sa Dios diha sa imong kinabuhi. Sama ni Israel ug Juda, kitang tanan mohimo og maayo ug dili maayo nga mga pagpili. Ug kon makabantay kita nga ang mga pagpangtarong gikinahanglan sa atong mga kinabuhi, tingali ang mga ehemplo ni Ezechias ug Josias makadasig kanato sa “[pag]salig sa Ginoo nga [atong] Dios” (2 Mga Hari 18:22).

Tan-awa usab sa 2 Cronicas 29–35; sa “Mga Hunahuna nga Hinumduman” nga seksyon “Jesus Moingon, ‘Israel Pauli.’”

Mga Ideya alang sa Personal nga Pagtuon sa Kasulatan

2 Mga Hari 18–19

Mahimo akong magpabilin nga matinuoron sa Ginoo atol sa mahagiton nga mga panahon.

Kadaghanan kanato nakasinati og mga panahon nga makahagit sa atong pagtuo. Alang ni Ezechias ug sa iyang katawhan, ang usa niini nga mga panahon miabot sa dihang ang kasundalohan nga Asirianhon misulong sa Juda, migun-ob og daghang siyudad, ug miduol sa Jerusalem. Samtang magbasa ka sa 2 Mga Hari 18–19, ihanduraw nga nagpuyo ka sa Jerusalem niining panahona. Unsa kaha ang imong gibati, sama pananglit, nga madunggan ang mga pagbugal-bugal sa mga Asirianhon sumala sa narekord diha sa 2 Mga Hari 18:28–37 ug 19:10–13? Unsa ang imong nakat-onan gikan sa unsay gibuhat ni Ezechias agig tubag? (tan-awa sa 2 Mga Hari 19:1–7, 14–19). Giunsa pagsuporta sa Ginoo si Ezechias? (tan-awa sa 2 Mga Hari 19:35–37). Pamalandongi kon giunsa ka Niya sa pagsuporta atol sa mahagiton nga mga panahon.

Mahimo usab nimong pamalandongan ang paghulagway ni Ezechias diha sa 2 Mga Hari 18:5–7. Unsa ang gisugyot niini nga mga bersikulo kon nganong nakahimo si Ezechias sa pagpabiling matinud-anon sa dihang miabot ang mga hagit? Sa unsang paagi nimo masunod ang iyang ehemplo?

Tan-awa usab sa 3 Nephi 3–4; D. Todd Christofferson, “Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 30–33.

2 Mga Hari 19:20–37

Ang tanang butang anaa sa mga kamot sa Ginoo.

Si Senacherib, ang hari sa Asiria, adunay maayong rason nga motuo nga ang iyang kasundalohan makabuntog sa Jerusalem. Ang Asiria nakapildi og daghang nasod, lakip sa Israel—nganong malahi man ang Jerusalem? (tan-awa sa 2 Mga Hari 17; 18:33–34; 19:11–13). Apan ang Ginoo adunay usa ka mensahe alang kang Senacherib, gihatag pinaagi ni propeta Isaias, ug narekord kini diha sa 2 Mga Hari 19:20–34. Unsaon nimo pag-summarize niini nga mensahe? Unsa nga mga kamatuoran ang imong nakita dinhi niini nga mga bersikulo nga makatabang nimo sa pagbaton og pagtuo diha sa Ginoo ug sa Iyang plano?

Tan-awa usab sa Helaman 12:4–23; Doktrina ug mga Pakigsaad 101:16.

2 Mga Hari 21–23

Ang mga kasulatan makapadangop sa akong kasingkasing ngadto sa Ginoo.

Mibati ka ba sukad nga adunay kulang kanimo sa espirituhanong paagi? Tingali mibati ka nga ang imong relasyon sa Ginoo pwede pa nga mahimong mas lig-on. Unsa ang nakatabang kanimo nga mobalik ngadto Kaniya? Pamalandongi kini nga mga pangutana samtang magbasa ka kon sa unsang paagi napalayo sa Ginoo ang Gingharian sa Juda ubos ni Hari Manases (tan-awa sa 2 Mga Hari 21) ug sa unsang paagi si Hari Josias mitabang kanila nga mopasalig pag-usab ngadto Kaniya (tan-awa sa 2 Mga Hari 22–23). Unsa ang midasig kang Josias ug sa iyang katawhan? Kini nga istorya tingali makadasig kanimo sa pagbag-o sa imong pasalig “sa pagsunod sa Ginoo … sa bug-os [nimong] kasingkasing ug sa bug-os [nimong] kalag” (2 Mga Hari 23:3).

Samtang magbasa ka niini nga mga kapitulo, ikonsiderar usab ang pagtuon sa kapitulo 6 sa Mga Pagtulun-an sa mga Presidente sa Simbahan: Spencer W. Kimball ([2006], 74–86), diin si Presidente Kimball misugyot nga ang istorya ni Hari Josias “usa … sa pinakanindot nga mga sugilanon diha sa tanang mga kasulatan” (pahina 79). Ngano kaha nga ingon niana man ang gibati ni Presidente Kimball? Unsa ang imong nakita diha sa mga pulong ni Presidente Kimball, ilabi na sa iyang mga komentaryo mahitungod ni Hari Josias, nga makatabang kanimo sa paggamit sa 2 Mga Hari 22–23 sa imong kinabuhi?

Tan-awa usab sa Alma 31:5; Takashi Wada, “Magbusog sa mga Pulong ni Kristo,” Liahona, Mayo 2019, 38–40.

Ang mga kasulatan makatabang sa pagpadangop sa atong mga kasingkasing ngadto sa Ginoo.

Mga Ideya alang sa Pamilya nga Pagtuon sa Kasulatan ug Family Home Evening

2 Mga Hari 19:14–19.Unsa ang atong makat-unan gikan sa ehemplo ni Ezechias nga makatabang kanato kon aduna kitay lisod nga mga problema o mga pangutana? Giunsa sa Ginoo pagtubag ang atong mga pag-ampo alang sa tabang? Tingali ang matag sakop sa pamilya pwedeng mohimo og usa ka butang nga maplastar sa panimalay nga magpahinumdom kanila sa pagdangop sa Ginoo.

2 Mga Hari 22:3–7.Ang mga trabahante nga gihulagway diha sa 2 Mga Hari 22:3–7 gisaligan sa kwarta nga gigamit sa pagtukod og usab sa templo “kay sila mga matinumanon man” (bersikulo 7). Human mobasa niini nga mga bersikulo, mahimo nimong hangyoon ang mga sakop sa pamilya sa pagngalan og mga butang nga gisalig kanila. Unsaon nato pagkahimong masaligan sama sa mga trabahante niini nga mga bersikulo?

2 Mga Hari 22:8–11, 19; 23:1–3.Unsay nagustohan nato kon giunsa ni Josias ug sa iyang katawhan sa pagtubag sa pulong sa Dios? Unsaon nato sa pagtubag sa pulong sa Dios diha sa mga kasulatan? Ang mga sakop sa inyong pamilya mahimong mopaambit og mga tudling sa kasulatan o mga istorya nga nakadugang sa ilang tinguha sa pagsunod sa Langitnong Amahan ug ni Jesukristo.

2 Mga Hari 23:25.Unsa ang mipatigbabaw kanato mahitungod sa paghulagway kang Josias dinhi niini nga bersikulo? Ang inyong pamilya mahimong magdrowing diha sa mga papel nga giporma og kasingkasing sa mga butang nga mabuhat nila karong semanaha aron modangop ngadto sa Ginoo sa tibuok nilang kasingkasing.

Alang sa dugang nga mga ideya sa pagtudlo sa mga bata, tan-awa sa latid niining semanaha sa Dali, Sunod Kanako—Alang sa Primary.

Gisugyot nga awit: “Sa Ako nga Pagsiksik sa Balaang Kasulatan,” Mga Himno, nu. 175.

Pagpalambo sa Personal nga Pagtuon

Pangita sa dinasig nga mga pulong. Samtang magbasa ka, ang Espiritu mahimong modala sa pihong mga pulong o mga hugpong sa mga pulong sa imong atensyon. Mahimong modasig ug moawhag kini kanimo; mabati gani kini nga daw gisulat alang lang gayod kanimo.

Paghulagway sa usa ka tigsulat nga nagdala og linukot nga papel sa kasulatan ngadto ni Hari Josias, ni Robert T. Barrett