The Flight of the Prisoners, mai vei James Tissot kei na so tale

11–17 ni Jiulai

2 Tui 17–25

“E Vakararavi o Koya vei Jiova na Kalou ni Isireli”

Ni sa rogoca o Josaia na vosa mai na ivola ni lawa, a sauma ena vakabauta. O na sauma vakacava ena vakabauta na veika o wilika ena 2 Tui 17–25?

Vola na Veika o Vakauqeti Kina

E dina ga ni yaco tiko na nona veiqaravi vakasakiti na parofita o Ilaisa, sa lutu sobu tikoga na nodra bula vakayalo na Matanitu ena Vualiku e Isireli. O ira na tui ca era vakacakecakea na qaravi kalou matakau, ka ciqomi vakarabailevu na ivalu kei na vukitani. Sa yaco sara me vakavuai ka vakatalabusesetaki na yavusa e tini kei Isireli.

Ena gauna vata oya, a sega ni vinaka cake mai na Matanitu ena Ceva e Juta, sa takalevu talega kina na qaravi kalou matakau. Ia ena maliwa ni luluqa vakayalo oqo, e tukuni ena itukutuku vakayalo e rua na tui buladodonu, ka rau a vagolei ira lesu na nodrau tamata vua na Turaga. E dua vei rau ko Esekaia. Ena nona gauna ni veiliutaki, ena nodra sa qaqa mai na vualiku na kai Asiria, era a rawa e dua na iwase levu ena ceva. Ia era a vakaraitaka o Esekaia kei ira na nona tamata na nodra vakabauta na Turaga, ka a sereki Jerusalemi ena dua na sala mana. E muri, ni oti e dua tale na gauna ni vukitani, sa tekivu veiliutaki o Josaia. Ena nona vakauqeti vakatikina ena kena qai kunei tale na ivola ni lawa, a kauta mai o Josaia eso na veisau ka a vakabula tale na nodra bula vakalotu e vuqa na nona tamata.

Na cava eda vulica mai na rua na igauna rarama oqo ena itukutuku butobuto kei Juta? Ena maliwa ni veika tale eso, o na vakasamataka beka na mana ni vakabauta kei na vosa ni Kalou ena nomu bula. Me vakataki Isireli kei Juta, eda dau vakayacora ruarua na digidigi vinaka kei na digidigi ca. Ia ni da sa kidava ni gadrevi ena noda bula na veisau, e rairai na ivakaraitaki nei Esekaia kei Josaia e rawa ni uqeti keda me da “vakararavi vua na Turaga na noda Kalou” (2 Tui 18:22).

Raica talega na 2 Veigauna 29–35; na “Vakanananu me Maroroi ena Vakasama”Ena kaya o Jisu vei ira kece na Isireli, ‘ Dou Lako mai Vale.’”

Vakasama ni Vuli iVolanikalou ni Tamata Yadua

2 Tui 18–19

Au rawa ni dina tikoga vua na Turaga ena gauna ni dredre.

E vuqa vei keda eda sotava na gauna ka bolei kina na noda vakabauta. Vei Esekaia kei ira na nona tamata, e dua vei ira na gauna o ya a yaco ena gauna a valuti Juta kina na mataivalu ni Asiria, era a vakarusa e vuqa na veikoro lelevu, ka golevi Jerusalemi. Ni o wilika na 2 Tui 18–19, raitayaloyalotaka ni o a bula tu mai Jerusalemi ena gauna oqo. Ena vakacava beka na nomu nanuma, me ivakaraitaki, mo rogoca na nodra veivakalialiai na kai Asiria me vaka e volai ena 2 Tui 18:28–37 kei na 19:10–13? Na cava o vulica mai na veika a vakayacora o Esekaia me kena isau? (raica na 2 Tui 19:1–7, 14–19). A tokoni Esekaia vakacava na Turaga? (raica na 2 Tui 19:35–37). Vakasamataka vakatitobu na sala sa tokoni iko kina o Koya ena gauna ni dredre.

Sa rawa talega mo vakasamataka vakatitobu na ivakamacala kei Esekaia ena 2 Tui 18:5–7. Na cava era vakatura na veitikina oqo ena vuna a tudei tu kina na vakabauta nei Esekaia ni yaco mai na bolebole? O na rawa ni muria vakacava na Nona ivakaraitaki?

Raica talega na 3 Nifai 3–4; D. Todd Christofferson, “Tudei ka ega ni Yavalati Rawa ena Vakabauti Karisito,” Liaona, Nove. 2018, 30–33.

2 Tui 19:20–37

Na veika kece e tu ena liga ni Turaga.

O Senikarevi, na tui Asiria, e tu vua na ibalebale vinaka me vakabauta ni na rawai Jerusalemi na nona mataivalu. Sa vakadruka e vuqa na matanitu o Asiria, oka kina o Isireli—na cava na vuna me duatani kina o Jerusalemi? (raica na 2 Tui 17; 18:33–34; 19:11–13). Ia e dua na itukutuku ni Turaga vei Senikarevi, ka a soli mai vua na parofita o Aisea, ka volai ena 2 Tui 19:20–34. Mo na vakalekalekataka beka vakacava na itukutuku oqo? Na dina cava o raica ena veitikina oqo e vukei iko mo vakabauta na Turaga kei na Nona ituvatuva?

Raica talega na Ilamani 12:4–23; Vunau kei na Veiyalayalati 101:16.

 2 Tui 21–23

Na ivolanikalou e rawa ni vagolea na yaloqu vua na Turaga.

O sa bau vakila ni sega tiko vei iko e dua na ka vakayalo? O na vakila beka ni nomu veiwekani kei na Kalou ena rawa ni kaukauwa cake sara vakalevu. Na cava a vukei iko mo lesu tale Vua? Vakasamataka vakatitobu na taro eso oqo ni o wilika na kena a lutu tani mai vua na Turaga na Matanitu o Juta ena nona veiliutaki na Tui o Manase (raica na 2 Tui 21) kei na sala a vukei rau kina o Josaia na Tui me ra yalataki ira tale yani ki Vua (raica na 2 Tui 22–23). Na cava e veivakauqeti Josaia kei ira na nona tamata? Na itukutuku oqo e rawa ni vakauqeti iko mo vakavouya na nomu yalayala mo “muria na Turaga ena [lomamu] taucoko kei na [yalomu] taucoko” (2 Tui 23:3).

Ni o wilika na wase oqo, vakasamataka talega na wase 6 ena Nodra iVakavuvuli na Peresitedi ni Lotu: Spencer W. Kimball ([2006], 59–68), ka vakatura kina o Peresitedi Kimball ni italanoa kei Josaia na Tui “sa dua vei ira na italanoa uasivi sara ena ivolanikalou taucoko” (tabana e62). Na cava beka ena vakakina oya na nanauma nei Peresitedi Kimball? Na cava o raica ena vosa nei Peresitedi Kimball, vakabibi na nona ivakamacala me baleta na Tui o Josaia, ka vukei iko mo vakayagataka 2 Tui 22–23 ki na nomu bula?

Raica talega na Alama 31:5; Takashi Wada, “Tugana ki Lomamudou na Vosa i Karisito,” Liaona, Me 2019, 38–40; “Josaia kei na iVola ni Lawa” (vidio), ChurchofJesusChrist.org.

Na ivolanikalou e rawa ni vukea na vagolei ni yaloda vua na Turaga.

Vakasama baleta na Vuli iVolanikalou Vakamatavuvale kei na Lotu Vakamatavuvale

1 Tui 19:14–19Na cava eda rawa ni vulica mai na ivakaraitaki nei Esekaia e rawa ni vukei keda ni da sotava na dredre se lomatarotaro? Sa sauma vakacava na Turaga na noda masu me baleta na veivuke? Sa rawa ki na lewe ni matavuvale yadua me cakava e dua na ka e vale me vakananuma tiko vei ira me ra gole vua na Turaga.

2 Tui 22:3–7.Era a vakabauti na tamata era vakamacalataki ena 2 Tui 22:3–7 ena ilavo e vakayagataki me tara tale kina na valetabu “baleta ni ra a qarava ena yalodina” (tikina e 7). Ni wiliki oti na veitikina oqo, sa rawa mo kerei ira na lewe ni matavuvale mera cavuta na veika era sa nuitaki kina. Ena rawa vakacava meda vakabauti me vakataki ira na tamata cakacaka ena veitikina oqo?

2 Tui 22:8–11, 19; 23:1–3.Na cava e vakauqeti keda me baleta na sala e sauma kina o Josaia kei ira na nona tamata na vosa ni Kalou? Eda na “tugana sara” vakacava na vosa ni Kalou ena ivolanikalou? E rawa ni ra wasea na nomu matavuvale na veimala ni ivolanikalou se italanoa sa vakalevutaka cake na nodra gagadre me ra muria na Tamada Vakalomalagi kei Jisu Karisito.

2 Tui 23:25Na cava e lauti keda me baleta na ivakamacala kei Josaia ena tikina oqo? E rawa ni ratou droinitaka na nomu matavuvale ena uto pepa na veika e rawa ni ra cakava ena macawa oqo me ra goleva kina na Turaga e vu ni yalodra.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

“Sere vakaturi: “Niu qara na iVolatabu,” Hymns, naba 169

Vakavinakataki ni Vuli Yadudua

Vakaraica na veivosa kei na malanivosa veivakauqeti. Ni o wilika tiko, ena rawa ni kauta mai vakavoleka sara vei iko na Yalo eso na vosa se malanivosa. E rawa ni ra vakauqeti iko ka vakayaloqaqataki iko; e rawa sara mada ga ni vaka ni ra a volai ga me baleti iko.

Droini ni dua na vunivola a kauta mai e ivivivi ivolanikalou vua na Tui o Josaia, mai vei Robert T. Barrett