Kōmeļeļe eo an tampeļ eo an Zerubbabel, jān Sam Lawlor

Juļae 18–24

Ezra 1; 3–7; Nihimaia 2; 4–6; 8

“N̄a Ij Kōm̧m̧an Juon Jerbal Eļap”

Būreejtōn Ezra Taft Benson ekar ba, “Naan an Anij … ewōr an kajoor n̄an kōkajoorļo̧k Rikwojarjar ro im atbokwoj er kōn Jetōb bwe ren maron̄ anjo̧ ioon nana, jirōk likatōtō n̄an men ko rem̧m̧an, im kappukot lan̄lōn̄ ilo mour in” (Teachings of Presidents of the Church: Ezra Taft Benson [2014], 118).

Je En̄jake ko Rej Im̧we Eok

Armej in Ju ro kar pād ilo kamakoko ilo Babilon ium̧win 70 iiō. Rekar luuji Jerusalem im tampeļ, im elōn̄ rekar meļo̧kļo̧k aer wūjlepļo̧k n̄an kien ko an Anij. Ak Anij ekar jab meļo̧kļo̧k er. Ilo m̧ool, E ekar kwaļo̧k jān ippān rikanaan ro An, “Inaaj lowōj kom̧, im Inaaj kajejjet naan ko Aō rem̧m̧an kōn kom̧ bwe in In karo̧o̧l kom̧” (Jeremaia 29:10). M̧ool n̄an kanaan in, Irooj ekar kōm̧m̧an juon iaļ n̄an ri Ju ro bwe ren jepļaak, im E ekar bōk lōn̄ tak ro rikarejeran ro rekar kadedeikļo̧k “juon jerbal eļap” n̄an armej ro An (Nihimaia 6:3). Rikarejar rein ekoba kabna an kien etan Zerubbabel, eo ekar eddoikļo̧k ekkaļ eo an m̧weo im̧ōn Irooj; Ezra, juon pris im scribe eo ekar ukōt buruōn armej ro n̄an kien ko an Irooj; im Nihimaia, kar juon kabna an Juda eo ekar tōl jerbal in ekkaļ eo n̄an oror in bōbrae ipeļaakin Jeruasalem. Rekar jelm̧ae jum̧ae ko, aeet, ak ekar bar bōk jipan̄ jān kein jipan̄ ko jejjab kōtmeni. En̄jake ko aer remaron̄ karon̄ im im̧we en̄jake ko ad, kōnke bar kōj jej kōm̧m̧ane juon jerbal eļap. Im āinwōt ko aer, jerbal eo ad reļļap kōn m̧ōko im̧ōn Irooj, kien eo an Irooj, im kōjparok ilo jetōb me jej loe ilo E.

Kōn juon etale ekadu kōn bok ko an Ezra im Nihimaia, lale “Ezra” and “Nehemiah” ilo Bible Dictionary.

Ļōmņak ko n̄an Ekkatak Jeje Ko Rekwojarjar Ippam̧ Make

Ezra 1

Irooj ej im̧we armej ro an n̄an kakūrm̧ool jibadbad eo An.

Ālkin an Ripersia anjo̧ jān ri Babilon, kiin̄ eo an Ripersia ro, etan Cyrus, ekar im̧we jān Irooj n̄an jilkinļo̧k juon kurup in ri Ju n̄an Jerusalem n̄an bar kalōk tampeļ eo. Ilo am̧ riiti Ezra 1, je ta eo Cyrus ekar kōņaan kōm̧m̧ane n̄an rie Riju ro ilo jerbal in eaorōk. Ewi wāween am̧ lo an Irooj jerbal ippān em̧m̧aan im kōrā ro ipeļaakūm̧, ekoba ro rejjab membōr in Kabun̄ eo An? Ta eo mijen in ej katakin eok kōn Irooj im jerbal eo An?

Bar lale Aiseia 44:24–28.

Ezra 3:8–13; 6:16–22

Tampeļ ko remaron̄ letok n̄an eō lan̄lōn̄.

Ke ri Babilon rekar deļo̧n̄e Jerusalem, rekar koote tampeļ eo im tile aolepān (lale 2 Kiin̄ Ro 25:1–10; 2 Kronikel 36:17–19). Ewi am̧ ļōmņak ta eo komaron̄ kar en̄jake ilubwiljin Riju ro rekar kam̧oole menin? (lale Sam Ko 137). Lale wāween an kar ri Ju ro en̄jake, bukwi iiō tokālik, ke rekar kōtļo̧k aer bar jepļaak im bar kalōk tampeļ eo (lale Ezra 3:8–13; 6:16–22). Kejōkļo̧kjeņ kōn en̄jake ko am̧ make kōn tampeļ eo. Etke tampeļ ko rej kein jipan̄ n̄an lan̄lōn̄? Ewi wāween am̧ kwaļo̧k am̧ kam̧m̧oolol n̄an Irooj kōn tampeļ ko?

N̄an waanjon̄ak ko raan kein kōn lan̄lōn̄ ilo kalōk tampeļ ko, lale bitio ko “Practice, Celebration, Dedication: Temple Blessings in El Salvador” im “The Laie Hawaii Temple Youth Cultural Celebration” (ChurchofJesusChrist.org).

Tampeļ eo emaron̄ erom̧ juon kein jipan̄ an lan̄lōn̄ ilo mour ko ad.

Ezra 4–6; Nihimaia 2; 4; 6

Imaron̄ jipan̄ jerbal eo an Anij bwe en wōnm̧aanļo̧k jekdo̧o̧n jum̧ae ko.

Jerbal eo an Irooj ejeja jum̧aeiki, im menin ekar kalikkar m̧ool eo an kijeje ko me kar tōl jān Zerubbabel im Nihimaia. Ilo jim̧or jekjek ko, “ri kōjdate Juda” (Ezra 4:1) rekar Risamaria—bwijjin ri Israel ro ro rekar koba ippān ro Riaelōn̄ ko. Riit kōn jum̧ae ko aer n̄an kalōk tampeļ eo (lale Ezra 4–6) emaron̄ tōl eok n̄an kejōkļo̧kjeņ kōn jum̧ae ko me jerbal eo an Anij ej jelm̧ae rainin im wāween am̧ maron̄ jelm̧ae n̄e ej itok jum̧ae.

Āinļo̧k wōt, riit kōn jerbal eo an Nihimaia ke ej kōm̧m̧ane oror eo an Jerusalem (lale Nihimaia 2; 4; 6) emaron̄ kōm̧m̧an bwe kwon kejo̧kļo̧kjeņ kōn jerbal eo me Anij ekōņaan bwe kwon kōm̧m̧ane. Ta eo kwoj ekkatak jān waanjon̄ak eo an Nihimaia?

Bar lale Dieter F. Uchtdorf, “We Are Doing a Great Work and Cannot Come Down,” Liaona, Māe 2009, 59–62.

Ezra 7; Nihimaia 8

Ijeraam̧m̧an n̄e ij ekkatak jeje ko rekwojarjar.

Men̄e ālkin an tampeļ ko kar ekkaļ, armej ro an Jerusalem rekar apan̄ ilo jetōb, kōnke, kōn epepen ko, rekar kōm̧m̧an jon̄an aer kōjerbal “bok in kien ko an Moses” (Nihimaia 8:1). Ezra ri scribe eo ekar bōk mālim jān kiin̄ eo an Persia n̄an rool n̄an Jerusalem, ijo ekar “bōktok kien eo im̧aan jar eo” (Nihimaia 8:2). Ewi wāween am̧ maron̄ ļoor waanjon̄ak eo an Ezra āinwōt kar kōmeļeļeiki ilo Ezra 7:10? Ilo am̧ riiti Nihimaia 8, eo ej letok bwebwenato in Ezra an riitiļo̧k kien ko n̄an armej ro, ta ļōmņak ko kwoj ļōmņak kōn kajoor in naan ko an Anij ilo mour eo am̧?

Bar lale Teachings: Ezra Taft Benson, 115–24.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Ezra 3:8–13; 6:16–22.Ewi wāween an kar Riju kwaļo̧k aer lan̄lōn̄ kōn tampeļ āinwōt aer kar bar kalōke innem ke rekar aje? Ta eo jej kōm̧m̧ane n̄an kwaļo̧k ad lan̄lōn̄ kōn tampeļ eo? Bolen baam̧le eo am̧ emaron̄ lale pija ko an tampeļ im kōnono kōn wāween an tampeļ ko bōktok n̄an eok lan̄lōn̄ (lale temples.ChurchofJesusChrist.org).

Ezra 7:6, 9–10, 27–28.Jejjo tōre ilo eoon kein, Ezra ekar je bwe pein Irooj ekar pād ioon ilo an kar em̧akūt n̄an Jerusalem. Ta meļeļein naan in? Ewi wāween ad kar en̄jake pein Irooj iood? Bolen ro uwaan baam̧le eo remaron̄ kwaļo̧k waanjon̄ak ko jān mour ko aer.

Nihimaia 2; 4; 6.Bwebwenatoon Nihimaia emaron̄ im̧we ro uwaan baam̧le eo ke rekar jelm̧ae jum̧ae ko ilo aer kōm̧m̧ane “juon jerbal eļap” (Nihimaia 6:3). Ro uwaan baam̧le eo remaron̄ kalōk juon oror jān jabdewōt men ko ipeļaakin m̧weo im̧ōm̧ ilo am̧ riiti eoon ko (āinwōt Nihimaia 2:17–20; 4:13–18; 6:1–3). Ta eo jej katak jān Nihimaia kōn jelm̧ae jum̧ae ko? Ta eo jerbal eļap Irooj ekōņaan bwe jen kōm̧m̧ane? Ewi wāween an Irooj kōkajoorļo̧k kōj n̄an anjo̧ ioon jum̧ae ko ņae jerbal in?

Nihimaia 8:1–12.Ilo Nihimaia 8, Ezra ej riiti kien an Moses n̄an jar in armej ro rekar kijoroor n̄an ron̄jake naan ko an Anij. Riiti eoon ko 1–12 emaron̄ jipan̄ kam̧ūlaļļo̧k kam̧m̧olool eo an baam̧le eo kōn naan an Anij. Ewi wāween an armej ro kar en̄jake kōn kien ko an Anij? Ewi wāween ad maron̄ jipan̄ ro doon “kōmeļeļeik”? (eoon 8).

Kōn ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Al eo kar elmakote: “I Love to See the Temple,” Children’s Songbook, 95.

Kōkm̧anm̧anļo̧k Ad Katakin

Jeere eoon ko āinwōt juon baam̧le. Ilo iien eo baam̧le eo am̧ ej ekkatak jān jeje ko rekwojarjar, kōtļo̧k bwe ro uwaan baam̧le eo ren kwaļo̧k eoon ko jān ekkatak ko make kajjojo me eļap meļeļeier n̄an er.

Kōmeļeļe ko an Ezra ilo an riiti jeje ko rekwojarjar n̄an armej ro ilo Jerusalem, jān H. Willard Ortlip, © Providence Collection/licensed from goodsalt.com