Te Berena Ni Kamaiu, iroun Chris Young

Nobembwa 14–20

Amota; Obaria

“Kam na Ukoukora Iehova, ao Kam na Maiu”

Te Tamnei ae Raoiroi e kona ni kauka am iango ao nanom nakon rongrongon n ana taeka te Atua ake a nanonaki bon ibukim. Tera ae ko namakinna bwa e tangiria te Uea bwa kona reiakinna n te wiiki aei?

Korei Am Namakin

Te Atua e rineia ana kariki Aberaam bwa Ana aomata ni berita bwa aonga n riki “bwa kakabwaia” nakoia aomata ni kabane (taraa Karikan Bai 12:2–3). Ma ni kaitarana, n ana tai ni kakabwarabwara Amota, a mwaiti aomata ni berita ake a karawawataia ake akea aia bwai ao n tinanikuia burabeti, ni karika aia mwakuri n nebo bwa akea uaana ao akea nanona (taraa Amota 2:6–16). E koaua, te botanaomata ake a katobibiia a bon kairua n te bure ae korakora (taraa Amota1; 2:1–5), ma anne bon tiaki bukina ae a na kairua ni bure naba ana aomata te Atua (taraa Amota 3:2). Ngaia are te Atua e kanakoa te tia kawakin man ma Iuta ae arana Amota bwa e na tataekina te rairannano nakon te Baronga are Iteraera. Imwiina, te Atua e katanoata rinanon te burabeti are Obaia bwa e ngae ngke te Baronga ae Iuta e a tia n uruakaki, te Uea e na ikotiia ao e na manga kakabwaiaia Ana aomata. Aomata ni berita a tia n tannako mairoun te Uea, burabeti aika uoman a kakoauaa, ma a na bon aki kamaunaaki n aki toki. Ngkana e kaota nanona te Atua ae raba nakoia Ana toro aika burabeti (see Amota 3:7), ti kona ni butimwaia bwa te kanikina are e teimatoa n tangiria ni buokiira bwa tina maiuakina te berita are ti a tia ni karaoia ma Ngaia.

Ibukin rongorongon riki ana boki Amota ao Obaria, taraa “Amota” ao “Obaria” n te Rikitinari n te Baibara.

Iango ibukin te Kamatebwai i bon Iroum ni Koroboki aika Tabu

Amota 3:1–8; 7:10–15

Te Uea e kaoti koaua rinanoia Ana burabeti.

N Amota 3:3–6, te burabeti are Amota e kaoti katooto tabeua ni bwaai ake a na riki ao bwaai ake a rootaki imwiina: ibukina bwa te raian e kakaea kanana, te raian e bekorara; ibukina bwa te bwai ni kamwane e karaoaki ibukin te mannikiba, ao e a mwane te mannikiba. (Taraia bwa n ana Rairairi Iotebwa Timiti n te kibu6, te taeka ae “karaoia” e bitaki nakon “ataia” [n Amota 3:6, footnoteb].) N kibu 7–8, Amota e kabongana te reirei aei nakoia burabeti. Tera ae karika te burabeti bwa e na taetae ni burabeti? Tera riki ae ko reiakinna n taekaia burabeti ngkai ko wareka Amota 7:10–15? Iangoia bukin tera ngkai ko kakaitau bwa te Uea e teimatoa “ni kaota nanona ae raba nakoia ana toro aika burabeti” (Amos 3:7). Tera ae katerea te koaua aei nakoim ibukin te Atua?

Taraa naba Reirei ao Berita aika Tabu 1:38; 21:4–8; 35:13–14.

Amota 4–5

“Kam na ukoukora Iehova, ao kam na maiu.”

Ngkai ko wareka Amota 4:6–13, taraa ana motikitaeka te Uea are e kanakoa nakoia kain Iteraera. Tera ae katerei kibu aikai iaon te bwai are e kantaningaia te Uea bwa e na riki imwiin rinanoan bwaai aikai? (taraa naba Ereman 12:3). Iangoa te kataaki ae koa tibwa tia n rinanona. Ngkai kataakim e kona n ae e aki nako mairoun te Atua, iangoia bwa e na kanga n anganiko am tai n ukoukoria.

Wareka Amota 5:4, 14–15, ao iangoia bwa e kanga te Uea n tia n “akoi” (kibu15) nakoim ngkai koa tia n ukoukoria, riki inanon am tai ni kataaki.

Taraa naba DonaldL. Hallstrom, “Turn to the Lord,” Ensign ke Riaona, Meei 2010, 78–80.

Amota 8:11–12

Ana taeka te Uea e kona ni katoka te baki ao te taka n te maiu n tamnei.

Ti bane n rinanon te baki ao te taka n te maiu n tamnei, ma ti aki riai “n tiotio man taari teuana nakon taari teuana” (Amota 8:12) ni kakaea te bwai are e na rau nanora iai. Ti ata te bwai are e na katoka bakin te tamnei anne, ao ti a tia ni kakabwaiaki n ana taeka te Uea n ae mwaiti. Ngkai ko wareka Amota 8:11–12, iangoia bwa bukin tera te rongo e nakoraoi ni kabotauaki ma te maiu n akean ana taeka te Atua. Tera riki iango aika ko kunei inanon Mataio 5:6; Ioane 6:26–35; 2Nibwaai 9:50–51; 32:3; Enoti 1:4–8?

Taraa naba JeffreyR. Holland, “He Hath Filled the Hungry with Good Things,” Ensign, Nob. 1997, 64–66; Gospel Topics, “Apostasy,” topics.ChurchofJesusChrist.org.

Ti kona n riki bwa taan kamaiu iaon Maungan Tion man karaoan mwakuri n te tembora ao mwakuri n rongorongon te utu.

Obaria 1:21

Antai “tani kamaiu … iaon te maunga are Tion”?

Beretitenti GordonB. Hinckley e anga teuana kabwaranakoan te kibuntaeka are “tani kamaiu iaon te maunga are Tion,” ni karekerekea te kibuntaeka aei nakon te mwakuri n te tembora ao rongorongon te utu: “[Inanon te tembora] tia riki bwa tani kamaiu iaon te maunga are Tion. Tera ae nanonaki n aei? N ai aron are e a anga maiuna ara Tia Kabooira bwa te karea ni kamaiu n tei ibukiia aomata ni kabane, bwa ti aonga ngaira, ni mwaitira ae uarereke, ngkana ti kabaeaki ni mwakuri ibukiia tabeman inanon te tembora, n riki bwa tani kamaiu nakoia naake n te itera are teuana ake akea aia kona ti ngkana iai te bwai ae karaoaki ibukiia irouia naake a mena iaon te aba.” (“Closing Remarks,” Ensign or Liahona, Nob. 2004,105).

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Amota 3:7.Ko na bae n rinanon tabeua rongorongo man te Beretitentii n te Ekaretia ao ni maroroakina te bwai are e kaotia te Uea nakoia am utu rinanona. Bukin tera e kakaawaki bwa e na iai te burabeti are e kaira te Ekaretia? Ti kanga n ataia bwa bon te burabeti ni koaua? Tera ae ti karaoia n ira ana reirei?

Amota 5:4.Am utu a kona ni karaoa te boutita are a na katekea ni mweengam ma te kibu aei iaona. Tera ae nanonaki n ukoukora te Uea? Ti kanga n ukoukoria? Tera kakabwaia aika ti karekei ngkana ti karaoi? Ko kona ni kaoia kain te utu bwa a na tibwatibwa ao ni maroroakin kibuntaeka ake tabeua ake a reirei taekan ukoukoran te Uea, n aron Mataio 7:7–8; Ita 12:41; ao Reirei ao Berita aika Tabu 88:63.

Amota 8:11–12.Ataei a bae n tatangira katean kain kiibu ake a taekinaki ni kiibu aikai. Ngkana rabwatara a baki ke a taka, tera ae ti karaoia? Ngkana tamneira a baki ke a taka, tera ae ti karaoia? Ko kona naba ni mataku n te witeo “The Great Apostasy” (ChurchofJesusChrist.org) ao taetae iaon aron Kaokan Bwaai n te euangkerio ni katoka bakira n te maiu n tamnei.

Obaria 1:21.Tera ae kona n nanonaki n riki bwa “taan kamaiu … iaon te maunga are Tion”? (Ibukin teuana te kabwarabwara are e kona n reke, taraa te maroro iroun Beretitenti GordonB. Hinckley in “Ideas for Personal Scripture Study.”) Antai mairouia ara bakatibu aika a kainnanoa te otenanti ni kamaiu? Tera ae ti riai ni karaoia ni buokiia?

Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te kuna are e rineaki: “Ti Karabwako te Atua, ibukin am Burabeti,” Boki n Anene, namba 32.

Kanakoraoan Am Kamatebwai I Bon Iroum

Kabonganai katangitang ni kaoa te Tamnei ao n reiakin reirei iaon te reirei. Ongora ke wareka taekan te kuna are e kona ni buokiko n reiakina reirein te euangkerio. Te katooto, ko kona n ongora ke ni wareka “Ti Karabwako te Atua, ibukin am Burabeti” (Boki n Anene, nambwa.32) ni kaunga te onimaki ae korakora irouia burabeti aika a maiu. (Taraa Reirei n ana Kawai te Tia Kamaiu, 22.)

Santo Domingo Dominican Republic Tembora