12–18 ni Tiseba

Malakai

“Au A Lomani Kemudou, sa Kaya ko Jiova”

Na yaca o Malakai e kena ibalebale na “noqu italai” (Bible Dictionary, “Malakai”). Ni o vulica na itukutuku nei Malakai vei Isireli, na itukutuku cava o kunea ena nomu bula? E semati vakacava na vosa nei Malakai ki na noda gauna?

Vola na Veika o Vakauqeti kina

“Au a lomani kemudou,” a sa kaya na Turaga vei ira na Nona tamata mai vua na parofita o Malakai. Ia ko ira na Isireli era a sotava na itabatamata ni veivakararawataki kei na tiko vakavesu, era sa taroga na Turaga, “Ko a lomani keitou vakaevei?” (Malakai 1:2). Mai na veika kece e lako curuma o Isireli, era na rairai lomatarotarotaka beka se sa italanoa dina ni loloma ni Kalou vei ira na Nona tamata ni veiyalayalati na itukutuku makawa kei Isireli.

Ni ko vakasamataka na veika o sa wilika ena Veiyalayalati Makawa ena yabaki oqo, na ivakadinadina cava o kunea me baleta na loloma ni Kalou? E rawarawa sara me da raica e vuqa na ivakaraitaki ni malumalumu kei na veisaqasaqa vakatamata. Ia ena veika kece oqori, na Kalou e sega vakadua ni tarova na dodoliga yani ena loloma. Ni ratou dauvakacacani tacina o Josefa na luvei Jekope, a vakarautaka tikoga na Turaga e dua na sala me vakabulai ira kina mai na dausiga (raica na Nai Vakatekivu 45:4–8). Ni sa vosa kudrukudru ena lekutu na Isireli, sa vakani ira na Kalou ena mana (raica na Lako yani 16:1–4). Ena gauna mada ga era biuti Koya kina o Isireli, ka vuki vei ira eso tale na Kalou, ka ra sa veiseyaki tu, a sega vakadua ni biuti ira na Kalou ka yalataka ni kevaka era veivutuni, ena vakasoqoni ira ka vueti ira “e na loloma levu” (raica na Aisea 54:7).

Ni saravi e na sala oqo, na Veiyalayalati Makawa e dua na italanoa ni Nona yalovosota na Kalou, kei na loloma tudei. Ka tomani tiko nikua na italanoa oqo. “Ia ena cadra na Mata-ni-Siga ni yalo dodonu, ia na veivakabulai ena kauta lako e na tabana,” sa parofisai ko Malakai (Malakai 4:2). A lako mai o Jisu Karisito, ka kauta mai na veivakabulai vakayago kei na vakayalo kivei ira kece era lako mai Vua. Sai Koya na ivakadinadina cecere duadua ni Nona loloma na Kalou vei ira na Isireli ena gauna makawa kei keda kece sara.

Me laurai vakararaba na ivola ni Malakai, raica na “Malakai” ena Bible Dictionary.

Vakasama ni Vuli iVolanikalou ni Tamata Yadua

Malakai 1–4

“Dou lesu mai vei au, au na qai lesu yani vei kemudou.”

Ena gauna nei Malakai, era sa taracake oti na Isireli na valetabu e Jerusalemi, ia me vaka ga e dua na tamata era se gadreva tikoga me ra tara tale na nodra veimaliwai kei na Turaga. Ni o vulica na Malakai, vakasaqara na taro e a taroga na Turaga vei ira na Isireli se era a tarogi Koya kina. Vakasamataka mo tarogi iko ena so na taro tautauvata (eso na kena ivakaraitaki sa vakaturi koto e ra) me vukei iko ena nomu dikeva na kemu isema vua na Turaga ka toro voleka yani Vua.

• Au sa vakila beka vakacava na loloma ni Turaga vei au? (raica na Malakai 1:2).

• E dokai koya vakaidina beka na noqu isolisoli vua na Turaga? (raica na Malakai 1:6–11).

• Ena sala cava beka au gadreva meu “lesu” vua na Turaga? (raica na Malakai 3:7).

• Ena sala cava beka au butakoca kina na Kalou? (raica na Malakai 3:8–11).

• E dau vakaraitaka vakacava na noqu itovo ena veigauna dredre na veika au vakila vua na Turaga? (raica na Malakai 3:13–15; raica talega na 2:17).

Raica talega na D. Todd Christofferson, “O Ira Kecega Kau sa Lomana, Kau sa Vunauca ka Cudruva,” Liaona, Me 2011, 97–100

Malakai 1:6–14

E kerea na Turaga “nai madrali savasava.”

Na vosa ni Turaga ena Malachi1 vakaraitaka ni o ira na bete Isireli era cabora na manumanu sega ni savasava kei na ka tautauvimate me icabo-ni-soro ena valetabu, ka a vakatabuya na Turaga (raica na Vunau ni Soro 22:17–25). Na cava e vakatura na vakacabo ni soro oqo me baleta na nodra nanuma na bete vua na Turaga? (raica na Malakai 1:13). Na cava e kerei keda kina na Turaga meda solia Vua na noda isolisoli vinaka duadua? Vakasamataka na solibula e sa kerea vei iko na Turaga mo cakava. Na cava o rawa ni cakava mo solia vua “nai madrali savasava”? (Malakai 1:11; raica talega na 3:3).

raica talega na Moronai 7:5–14.

Malakai 3–4

Sa yaco tiko na parofisai nei Malakai ena gauna oqo.

Ena gauna a veisiko kina na iVakabula ki Amerika, a cavuta na Malakai 3–4 vei ira na Nifai (raica na 3Nifai 24–25). Ena 1823, a wasea kina na agilosi o Moronai na veitikina oqo vata kei Josefa Simici (raica na Josefa Simici—Ai Tukutuku 1:36–39; raica talega Na Vunau kei na Veiyalayalati2). Na cava na vuna o nanuma kina ni dau tokaruataki wasoma na vosa nei Malakai ena ivolanikalou? (raica talega Vunau kei na Veiyalayalati 27:9; 110:13–16; 128:17–18). Ena nomu nanuma, na itukutuku cava mai na Malakai 3–4 e bibi vakatabakidua ena noda gauna?

Ena gauna sa cavuta kina o Moronai na Malakai 4:5–6 ki vei Josefa Simici, a cakava “ena dua na duidui lailai mai na sala eda wilika” ena ivola tabu (Josefa Simici—Ai Tukutuku 1:36). Na cava e vakaikuritaka na itukutuku nei Moronai meda kila vinaka kina na parofisai oqo? Me vulici vakalevu na nona lako mai o Ilaija kei na kena sa vakayacori tiko na parofisai oqo nikua, raica na Vunau kei na Veiyalayalati 110:13–16 kei na vosa nei Elder David A. Bednar, “Ena Vagolei na Lomadra na Gone” (Liaona, Nove. 2011, 24–27) Na cava na vuna o vakavinavinaka kina ni sa lako mai o Ilaija?

Na ivakaraitaki kei Ilaija e rairai vei rau o Josefa Smici kei Oliva Kaudari ena Valetabu e Katiladi, mai vei RobertT. Barrett

Malakai 3:8–12

Na saumi ikatini e dolava na katubaleka kei lomalagi.

Ni o wilika na Malakai 3:8–12, vakasamataka na veika o sa sotava ena nomu sauma na nomu ikatini. Na cava e kena ibalebale na malanivosa “dolava, se sega, na katuba ni lomalagi” (tikina10) vei iko?

Vakasama baleta na Vuli iVolanikalou Vakamatavuvale kei na Lotu Vakamatavuvale

Malakai 1:2Ena sauma vakacava na nomu matavuvale na taro e tiko ena Malakai 1:2—“Ko [Jiova] a lomani keitou vakaevei?” Na cava eso na ivakadinadina ni Nona loloma na Turaga vei keda?

Malakai 3:8–12Ni o wilika na Malakai 3:8–12, sureti ira na lewe ni matavuvale me ra wasea nodra vakasama se nanuma me baleta na ikatini. Na veivakalougatataki vakayago ka vakayalo cava eda sa raica mai na saumi ikatini? (raica na DavidA. Bednar, “Na Katuba ni Lomalagi,” Liaona, Nove. 2013, 17–20). E rawa ni ra marautaka na lewe ni matavuvale na droini ni iyaloyalo me matataka na veivakalougatataki oqo ka vakaliliga na iyaloyalo ena dua na katubaleka.

Malakai 3:13–18Na cava na kena ibalebale vei keda meda Nona na Turaga ka dua na nona “yau talei”?

Malakai 4:5–6Ni wiliki oti na veitikina oqo, sa rawa ni raica na nomu matavuvale na isau ni veitaro oqo me baleta na parofisai nei Malakai: O cei? Na cava? Ena gauna cava? Evei? Cava na vuna? (raica talega Vunau kei na Veiyalayalati2).

Meda vagolea vakacava na yaloda vei ira na noda qase? Eda vakalougatataki vakacava ni da cakava? Sa rawa mo vakasamataka vakatitobu na veitaro oqo ni saravi tiko na vidio “The Promised Blessings of Family History” (ChurchofJesusChrist.org). Na cava eda na cakava vakamatavuvale meda ciqoma kina na veivakalougatataki oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “iTuvatuva ni Noqu Kawa,” iVolanisere ni Gonelalai,100.

Vakatorocaketaki na Vuli ni Tamata Yadudua

Taroga na taro eso ni o vuli tiko. Ni o vulica tiko na ivolanikalou, ena votu mai nomu vakasama na taro eso. Vakasamataka vakatitobu na veitaro oqo ka vakasaqara na kena isau.

Mourning’s Hosanna mai vei Rose Datoc Dall E dua na marama na yacana o Mourning e tucake tu ena vuravura ni Yalo, ka vakavolivoliti koya tu o ira na nona qase e liu. E marautaka o koya na nodra sereki mai na tiko vakavesu vakayalo.