12–18 ni Tiseba

Malakai

Au a Lomani Kemudou, sa Kaya ko Jiova”

Na Turaga sa lomani ira na gone o vakavulica. O na vukei ira vakacava na gone ni vakila na Nona loloma ni o vakavulica na ivunau e tiko ena ivola i Malakai?

Vola na Veika o Vakauqeti Kina

Sureta na Veiwasei

Wilika na malanivosa oqo mai na Malakai 1:2: “Au a lomani kemudou, sa kaya ko Jiova.” Sureta na gone yadua me wasea e dua na sala era kila kina ni sa lomani ira na Turaga. Ni sa wasea oti na gone yadua, vakavinavinakataki koya, ka wasea na nomu ivakadinadina me baleta na loloma ni Turaga kivua na gone o ya.

Vakavulica na iVunau: Gone Sobu

Malakai 3:10–12

Na Tamada Vakalomalagi ena vakalougatataki au ni’u saumi ikatini.

Kevaka mada ga era se sega ni rawa ilavo na gone sobu o vakavulica tu, era se rawa ni vulica tikoga na veivakalougatataki ni saumi ikatini.

iTaviqaravi e Rawa ni Caka

• Vukea na gone me ra wilika e 10 na yaya lalai, vaka na ilavo siliva ena tabana ni itaviqaravi ena macawa oqo. Sureti ira ni wasea e dua na yaya mai na kena vo, ka vakamacalataka ni oqo e sa vaka na ikatini eda solia vua na Turaga. Eda solia vei Koya e dua na ikatini ni ka eda rawata. Wasea na nomu ivakadinadina ena sala e dau vakalougatataki keda kina na Turaga ni da sauma na ikatini. Lagata vata e dua na sere ni ikatini, vaka na “I Want to Give the Lord My Tenth” (Children’s Songbook,150).

• Droinitaka e dua na katuba leka ena papa ni volavola, ka wilika na Malakai 3:10 vei ira na gone. Sureta me ra dusia na katuba leka ni o wilika na malanivosa “katuba ni lomalagi.” Vakamacalataka oqo e vakaibalebaletaka ni sa solia vei keda na Tamada Vakalomalagi na veivakalougatataki cecere ni da saumi ikatini. Ni ra rokataka tu na gone na tabana ni itaviqaravi ena macawa oqo, tukuna eso na vuna eda saumi ikatini kina.

• Wasea e dua na italanoa mai na mekasini iTokani se mai na nomu bula me baleta na saumi ikatini. Sureta na gone me ra vakarorogo ki na veivakalougatataki e rawa ni basika mai na saumi ikatini.

Malakai 4:5–6

Eda sa vauci vata vakamatavuvale ena valetabu.

Ena vuku ni idola ni matabete ni veivauci a solia o Ilaija kivei Josefa Simici ena valetabu e Kirtland, sa rawa ni vakaduavatataki tawayalani tu na matavuvale. Ni ko vakavulica na dina oqo, kidava tu na nodra nanuma na gone ka se sega ni vauci tu na nodra matavuvale ena valetabu.

iTaviqaravi e Rawa ni Caka

• Wilika vei ira na gone na Malakai 4:5. Qai tukuna vei ira ni a vakayacori na yalayala oqo ena gauna a rairai kina o Ilaija vei Josefa Simici ena valetabu e Kirtland (raica na “Wase40: Raivotu ena Valetabu e Kirtland,” ena iTalanoa eso ni Vunau kei na Veiyalayalati,157). Vakaraitaka e dua na yaloyalo ni ka oqo (raica na iVola Yaloyalo ni Kosipeli, naba 95), ka sureta na gone me ra dusi Ilaija kei Josefa Simici. Vakamacalataka ena vuku ni lako mai i Ilaija, sa rawa ni vauci tu vakamatavuvale ena valetabu. Wasea na nomu ivakadinadina me baleta na bibi ni vauci tu vakamatavuvale.

• Tukuna vei ira na gone na nomu lomana na nomu matavuvale; vakaraitaka e dua na yaloyalo, kevaka e rawa. Sureta e vica na gone me wasea na nodra nanuma me baleta na nodra matavuvale. Lagata vata e dua na sere ni matavuvale, vaka na “Rawa ni Tawamudu na Vuvale” (Sere ni Lotu, naba 184), ka vakadinadinataka ni sa vinakata na Tamada Vakalomalagi me ra vauci vata na matavuvale ka sa dua na vuna oqo e tiko kina na valetabu. Vukea na gone me ra kila vakamatata ni vuku ga i Jisu Karisito, sa rawa mada ga ni da vauci kivei ira na lewe ni matavuvale ka sega ni lako rawa tu ki na valetabu ena bula oqo. Sureta na gone me ra droinitaka e dua na yaloyalo ni nodra tiko vata vakamatavuvale mai lomalagi.

Vakavulica na iVunau: Gone Qase Cake

Malakai 3:8–12

Ena vakalougatataki au na Tamada Vakalomalagi ni’u sauma na ikatini.

Na saumi ikatini e sa levu cake mai na vakabauti tu ni Tamada Vakalomalagi kei Jisu Karisito mai na kena e baleta tu na veika vakailavo. Na cava era kila deivaki tu na gone o vakavulica me baleta na ikatini? O na vukei ira vakacava ni vakabauta tu na saumi ikatini?

iTaviqaravi e Rawa ni Caka

• Vola ena papa ni volavola na taro eso baleta na ikatini me vaka oqo: Na cava na ikatini? Me’u sauma vakacava na ikatini? Na cava na inaki ni ikatini? Na cava soti na veivakalougatataki ni saumi ikatini? Sureti ira na gone ni vakasaqara na Malakai 3:8–12 kei na “Dua na iKatini, iKatini” ena iDusidusi ki na iVolanikalou (scriptures.ChurchofJesusChrist.org) ka vola na isaunitaro era raica. Kerea me ra wasea vakai ira na nodra isaunitaro. Na mataqali tamata vakacava eda sa vakataka mai na saumi ikatini?

• Vakaraitaka na vidio “Jesus Teaches about the Widow’s Mite” (ChurchofJesusChrist.org), se wilika vata na Marika 12:41–44. Na cava e vakavulica vei keda na talanoa oqo ena vakanananu ni Turaga me baleta na noda isolisoli?

• Droinitaka e dua na katuba leka ena papa ni volavola, ka sureta na gone me ra vola ena loma ni katuba leka na veivakalougatataki eso e rawa ni ciqoma e dua ena saumi ikatini (ena vakasama eso, raica na Malakai 3:10–12). Sureta na gone me ra wasea e dua na nodra ivakaraitaki ena sala era sa vakalougatataki kina se na nodra matavuvale ena saumi vakayalodina ni ikatini. Se o rawa ni wasea e dua na ivakaraitaki mai na nomu bula vakai iko ena sala e sa vakalevutaka kina na nomu vakabauta na Tamada Vakalomalagi kei Jisu Karisito na saumi ikatini.

Droini ni rairai tiko i Ilaija kivei Josefa Simici kei Oliva Kaudari ena Valetabu e Kirtland, mai vei RobertT. Barrett

Malakai 4:5–6

“Au na talai Ilaija na parofita.”

Sa vakayacori na parofisai i Malakai me baleti Ilaija na parofita ni a rairai o Ilaija kivei Josefa Simici ena Valetabu e Kirtland ka solia vua na idola ni matabete e vakatara na nodra vauci vata tawayalani tu na matavuvale. O na via navuca ni sureta e dua ena tabanalevu ka vakaitavi tu ena cakacaka ni valetabu kei na tuva kawa (vaka e dua na lewe ni mataveiliutaki ni kuoramu ni italatala qase se mataveiliutaki ni iSoqosoqo ni Veivukei) me vukei iko ni vakavulica na ivunau oqo vei ira na gone. Nanuma tiko mo dau kidava na nodra nanuma na gone ka se bera ni vauci tu na nodra matavuvale.

iTaviqaravi e Rawa ni Caka

• Vola na malanivosa yadua mai na Malakai 4:5–6 ena dua tale na tiki ni pepa. Solia na tiki ni pepa vei ira na gone, ka kerea me ra biuta na veimalanivosa ena kena ituvatuva dodonu. Wilika vata na veitikina, ka veivosakitaka na taro eso vakaoqo: O cei a yalataka na Turaga me tala? Na gauna cava a kaya o Koya ni na lako mai kina na tamata oqo? Na cava e kaya na Turaga ni na kitaka na tamata oqo? Cava na vuna e gadreva kina na tamata oqo me lako mai? Evei na vanua a vakayacori kina na parofisai oqo? (raica na Vunau kei na Veiyalayalati 110:13–16).

• Vola ena papa ni volavola e dua na taro vaka Na cava na ibalebale ni kena vagolei na lomadra na gone vei ira na nodra qase? (raica na Malakai 4:6). Sureta na gone me ra vakasamataka vagumatua na taro oqo ni ra sarava na vidio “Their Hearts Are Bound to You” (ChurchofJesusChrist.org). Qai sureti ira na gone ni wasea na nodra nanuma me baleta na taro ena papa ni volavola. Veivosakitaka vata na veika o sa sotava se o ira na gone ena vulici tu ni tuva kawa.

• Vakaraitaka na yaloyalo kei Ilaija ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Sureta na gone me ra wasea na ka era kila tu me baleta na ka e vakaraitaka tiko na iyaloyalo oqo (raica talega na Vunau kei na Veiyalayalati 110:13–16). Vakadinadinataka na kaukauwa ni veivauci a vakalesuya mai o Ilaija e sa vakatara na vakaduavatataki tawamudu ni matavuvale—oka kina na matavuvale ka sega ni tiko vei ira na madigi o ya ena bula oqo. Kevaka o sa vakaitavi ena dua na veivauci, me baleti iko se dua na tamata mate, tukuna na ka o a vakila donuya na cakacaka vakalotu o ya. Kerea na gone me ra wasea na nodra nanuma me baleta na nodra matavuvale kei na ituvatuva ni Kalou me vukea na nodra tiko tawayalani vata na matavuvale.

Vakauqeta na Vuli e Vale

Sureta na gone me ra vakasamataka e dua na ka era vulica ena kalasi nikua, ka kerea e vica na gone me wasea. Vakayaloqaqataka taucoko na gone me wasea ki na nodra matavuvale e dua na ka era vulica tu me baleta na ivakavuvuli i Malakai.

Vakatorocaketaki Noda Veivakavulici

Vakaitavitaki ira na gone ena veivosakitaki ni kosipeli. O na rairai gadreva mo vakasamataka eso na sala bulabula me ra vakaitavitaki kina na gone sobu ena veivosakitaki ni kosipeli. Me ivakaraitaki, sa rawa ni ra pasitaka wavoki na gone e dua na polo ka wasea na nodra isau ni taro ni ra taura tiko na polo.