Solegi tu ena isulu vulavula na gone o Jisu ka davo koto ena veico madu

Ni sa Sucu Mai e Dua na Gone me Noda, mai vei Simon Dewey

19–25 ni Tiseba

Siganisucu

“Eda a Waraki Koya, Ena Vakabulai Keda ko Koya”

Era a vakanamata tu ena reki levu sara na parofita ni Veiyalayalati Makawa ki na sucu ni Mesaia (raica na Aisea 25:9). Ena nomu vakarau tu mo veivakavulici ena gauna ni Siganisucu, navuca na sala o rawa ni vukea kina na gone me ra kune marau tu ena sucu ni iVakabula o Jisu Karisito.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Sureti ira na gone ni wasea na ka era kila tu me baleta na sucu i Jisu Karisito. Ni ra cavuta tu e dua na tamata se yaya mai na italanoa, sureti ira ni droinitaka ena papa ni volavola. Tarogi ira na gone se cava era taleitaka tu ena italanoa oqo.

ivakatakilakila ni veivakavulici

Vakavulica na iVunau: Gone Sobu

Na Veiyalayalati Makawa sa vakavulici au me baleti Jisu.

Vukei ira na gone ni vakanamata kivua na iVakabula o Jisu Karisito me vuna tu na noda marautaka na Siganisucu. O rawa ni cakava oqo ena vakayagataki ni ivolanikalou eso mai na Veiyalayalati Makawa e vakadinadinataki Koya.

iTaviqaravi e Rawa ni Caka

• Vakaraitaka e dua na yaloyalo ni sucu i Jisu Karisito (vaka na iVola ni Yaloyalo ni Kosipeli, naba 30, se dua na yaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Wilika na Aisea 9:6, ni soli tu ki na gone yadua na gauna me dusia na gonedramidrami o Jisu ni ra rogoca na malanivosa “sa sucu mai e dua na gone.” Wasea na nomu ivakadinadina ni ra sa kila tu na parofita ena Veiyalayalati Makawa ni na sucu o Jisu.

• Sureta na gone yadua me cavuta na yacana, ka dusia tu me ikuri ni yacada, sa rawa ni da vakatokai ena so tale na ka, vaka na sisita se baraca se itokani. Sureta na gone me ra vakasamataka eso tale na ivakaraitaki. Wilika na Aisea 9:6 vei ira na gone, ni vakadreti tu na yaca eso e vagolei vei Jisu Karisito: “Ko Veivakurabuitaki, Na iVakavuvuli, Na Kalou kaukauwa, Na Tama ni gauna tawamudu, Na Tui ni Sautu.” Vukei ira na gone ni kila vakamatata na ka era tukuna vei keda na veiyaca oqo me baleti Jisu.

• Solia ki na gone yadua e dua na kalokalo pepa, ka sureta na gone me ra taura cake na nodra kalokalo ni ko wilika na malanivosa oqo mai na Tiko mai na Lekutu 24:17: “ena vura mai e dua na Kalokalo mai vei Jekope.” Sureta na gone me ra wasea na sala e sa vakataka kina e dua na kalokalo serau o Jisu ka cilava tu na vuravura taucoko. Lagata vata e dua na sere me baleta na kalokalo ka a rairai mai ni sucu o Jisu, vaka na “Stars Were Gleaming” (Children’s Songbook,37) se “The First Noel” (Hymns, no.213).

Sa noqu iVakabula o Jisu Karisito.

Na Siganisucu e sa gauna me marautaki kina sega walega na sucu i Jisu ia na Nona bula kei na ilesilesi talega vaka iVakabula kei vuravura. O na vukei ira vakacava na gone ni vakila na reki kei na vakavinavinaka ena vuku ni Veisorovaki i Jisu Karisito?

iTaviqaravi e Rawa ni Caka

• Tarogi ira na gone mera vakasamataka e dua na ka era sa vakanamata tiko kina. Vakamacalataka ni o ira sa yalodina ena Veiyalayalati Makawa a vakanamata ki na sucu i Jisu Karisito. Wilika na Aisea 25:9 vei ira na gone, ka me ra qai tokaruataka na malanivosa “Eda a waraki koya, eda na reki ka marau ni sa ia na veivakabulai o koya.” Wasea vata kei ira na vuna o reki ka marau kina ni sa sucu na Karisito. Sureta na gone me ra wasea na nodra nanuma me baleta na iVakabula.

• Lagata vata e dua na sere ni sucu i Jisu, vaka na “Mai Peceliema” (iVolanisere ni Gonelalai, 42–43) se “Agilosi! Era Sere” (Sere ni Lotu, naba.126). Vukei ira na gone ni raica na malanivosa eso ena veisere oqo e vakavulici keda me baleta na noda iVakabula kei na veivakalougatataki era tiko vei keda baleti Koya.

ivakatakilakila ni veivakavulici

Vakavulica na iVunau: Gone Qase Cake

Sa vakatavulici au na Veiyalayalati Makawa me baleti Jisu Karisito, na Mesaia sa yalataki tu.

Na Veiyalayalati Makawa e sa levu cake mai na veivola kei na volavola sokomuni taleitaki walega; sa kena inaki, vaka tu na ivolanikalou taucoko, me vakadinadinataki Jisu Karisito. Vukei ira na gone ni vulica na sala me ra raici Koya kina ena Veiyalayalati Makawa.

iTaviqaravi e Rawa ni Caka

• Sureta na gone me ra cakava e dua na lisi ni yaca kei na itutu kece i Jisu Karisito era rawa ni raica ena Mosese 7:53; Same 23:1; Jope 19:25; Aisea 7:14; 9:6; 12:2; Emosi 4:13; kei na Sakaraia 14:16. Laiva me ra veisasa kevaka era vinakata tu. Kerei ira ni wasea na nodra lisi vakai ira. Na cava eda vulica me baleta na iVakabula mai na yaca kei na itutu yadua vakaoqo?

• Vakaraitaka vei ira na gone e vica na iukuuku ni Siganisucu (se so na yaloyalo), vaka na kalokalo, cina, se dua na iloloma. Tarogi ira na gone na sala cava e rawa ni vakananumi keda kina na veika yadua oqo me baleta na iVakabula. Vakamacalataka ni sa vakayagataka wasoma na ivolanikalou na ivakatakilakila eso me vakavulici keda kina me baleti Jisu Karisito. Sureta na gone me ra raica e dua se sivia na tikina oqo me baleta e dua na ka e rawa ni vakatakarakarataki Jisu Karisito: Nai Vakatekivu 22:8; Na Lako Yani 17:6; Same 18:2; 27:1 (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale ena ikuri ni ivakaraitaki). O Jisu e vakataka vakacava na lami, wai, vatu, koro vakabai cecere, se rarama?

• Ni sa cava na vulici ni Veiyalayalati Makawa ena yabaki oqo, sureta na gone me ra wasea na nodra talanoa taleitaki se ivolanikalou mai na Veiyalayalati Makawa. Na cava era vakavulica vei keda na italanoa se ivolanikalou oqo me baleti Jisu Karisito? Cava na vuna eda vakavinavinakataka kina ni tiko na Veiyalayalati Makawa?

O Jisu Karisito sa noqu iVakabula ka Dauveivueti.

Ni da marautaka tu na sucu i Jisu Karisito, sa rawa talega ni da rekitaka na Nona bula kei na veisorovaki. O na vakayagataka tu vakacava na ivolanikalou mai na Veiyalayalati Makawa me ra vukei kina na gone ni tara cake na nodra vakabauta na nodra iVakabula ka Dauveivueti?

iTaviqaravi e Rawa ni Caka

• Wilika vata na Aisea 7:14; ka qai sureta na gone me ra wasea na ka era kila tu me baleta na sucu i Karisito. Se vakaraitaka na vidio “The Nativity” (ChurchofJesusChrist.org), ka sureta na gone yadua me digitaka e dua na tamata mai na vidio ka wasea se na vakacava tu na nanuma ni tamata o ya. Wasea na nomu ivakadinadina me baleta na iVakabula, ka sureti ira na gone me ra kitaka vakakina.

• Me vukei ira na gone ni kila vakamatata cake na itavi i Jisu Karisito vaka noda iVakabula, sureta me ra wilika na Aisea 25:8–9; 53:3–5; kei na Osea 13:14. Na cava era vakavulica vei keda na ivolanikalou oqo ena sala e dau vakabulai keda kina na Turaga? E rawa vakacava ni da “rekitaka na nona veivakabulai”? (Aisea 25:9).

• Lagata vata e dua na sere me baleta na loloma i Jisu Karisito kivei keda, vaka na “Mai Peceliema” (iVolanisere ni Gonelalai, 42–43) se “Loloma i Jisu” (Sere ni Lotu, naba 110). Sureta na gone me ra wasea na malanivosa eso e vukea na nodra vakila na loloma ni iVakabula.

ivakatakilakila ni vuli

Vakauqeta na Vuli e Vale

Sureta na gone me ra wasea vata kei na nodra matavuvale se itokani e dua na ka era sa vulica me baleti Jisu Karisito mai na Veiyalayalati Makawa. Vakayaloqaqataka me ra tekivu vulica na Veiyalayalati Vou ena macawa oqo.

Vakatorocaketaki Noda Veivakavulici

Vakarautaka e dua na ituvaki e sureta na Yalotabu Sa vuqa tu na sala o rawa ni sureta kina na Yalotabu ki na nomu kalasi. Sa rawa ni vakauqeta na vakadirorogo na sereivakatagi. Na ivakaraitaki eso ni loloma kei na ivakadinadina sa rawa ni vakavurea e dua na ituvaki momona vakayalo. Navuca ena masumasu na ka o rawa ni cakava mo vakavurea kina e dua na ituvaki vakayalo ena nomu kalasi. (Raica na Veivakavulici ena iVakarau ni iVakabula,15.)

tabana ni itaviqaravi: sa vakavulici au na Veiyalayalati Makawa me baleti Jisu.