“Sa tawamudu na Nona cakacaka” (Apakuki 3:6). Ena iVakatekivu Sa Bula Ko Koya na Vosa, mai vei Eva Timothy

28 ni Noveba–4 ni Tiseba

Neumi; Apakuki; Sefanaia

“Sa Tawamudu Na Nona Cakacaka”

Na nomu taleitaka na ivolanikalou sa rawa me veivakauqeti kaukauwa vei ira na gone o vakavulica. Me ra raica na nomu vakavinavinaka vakalevu ena vuku ni vosa ni Kalou.

Vola na Veika o Vakauqeti Kina

Sureta na Veiwasei

Sureti ira na gone me ra tucake vakayadudua ka vakatovotovotaka ni ra sa dua na parofita ni Veiyalayalati Makawa era sa tucake tu “ena dela ni bai ” me vakataki Apakuki (Apakuki 2:1). Kerei ira me ra tukuna vei ira na vo ni gone e dua na ka era sa vulica tiko baleti Jisu Karisito kei na Nona kosipeli.

Vakavulica na iVunau: Gone Sobu

Apakuki 2:3

Ena dau vakayacora na Kalou na Nona yalayala.

A lomabibi na parofita o Apakuki ena vuku ni ivalavala ca e raica vei ira na tamata i Juta (raica na Apakuki 1:2–4). A vakadeitaka vua na Turaga ni Nona yalayala ena vakayacori ga ena Nona gauna (raica na Apakuki 2:3).

iTaviqaravi e Rawa ni Caka

• Wasea eso na ivakaraitaki ni veika e vinaka ia ena gauna ga eda wawa kina—me vaka na vuanikau e gadrevi me dreu mada se valawa uli e gadrevi me vavi. Na cava ena yaco kevaka eda tovolea me da kania na vuanikau se valawa uli ni bera ni qai kena gauna? Tukuna na veika baleti parofita Apakuki, a vinakata me kila na gauna ena tarova kina na Turaga na ivalavala ca a raica sa tu wavoliti koya. Wilika vei ira na gone na isaunitaro ni Turaga, e tiko ena Apakuki 2:3. Mo vakabibitaka ni a gadrevi vei Apakuki me waraka na yalayala ni Turaga me vakavotukanataki, me vaka ga ni gadrevi ena so na gauna meda cakava vakakina. Wasea na dua na gauna o waraka tiko kina e dua na veivakalougatataki.

• Vukei ira na gone me ra vakasamataka na veika sa yalataka na Kalou—me kena ivakaraitaki, ni na lesu tale mai o Jisu Karisito ki vuravura se rawa ni da laki bula vata tale kei na Kalou. Ena ivakaraitaki yadua, sureti ira na gone me ra tokaruataka na malanivosa “Mo waraka tiko; baleta ni na yaco vakaidina mai.”

Apakuki 2:14

Au rawa ni vukea me vakasinaiti ko vuravura ena kila-ka baleti Jisu Karisito.

A parofisaitaka o Apakuki na siga ena kilai Jisu Karisito kina ko vuravura taucoko. Sa tekivu me vakavotukana tiko na parofisai oqori ena noda gauna oqo. Vakasamataka na sala e rawa ni o vukei ira kina na gone me ra tiki ni kena vakavotukanataki.

iTaviqaravi e Rawa ni Caka

• Vakaraitaka e dua na joke lala, ka solia vei ira yadua na gone e dua na iyaya lailai. Kerei ira yadua na gone me ra wasea e dua na ka a cakava se vakavulica o Jisu ka qai biuta na nodra inaki ena joke. Wilika i cake na Apakuki 2:14, ka vakamacalataka me vaka ga nodra vakasinaita na gone na joke ena veika era sa kila baleta na Turaga, sa rawa vakakina meda vakasinaita na vuravura ena veika eda kila baleti Koya.

• Vakaraitaka vei ira na gone e dua na mape ni vuravura (raica na Mape ni iTukutuku Makawa ni Lotu, naba 7, “Mape ni Vuravura”). Vukei ira me ra raica na vanua era vakaitikotiko kina kei na veivanua era veiqaravi tiko kina na daukaulotu era kila. Wasea na nomu ivakadinadina ni gadreva na Tamada Vakalomalagi e vuravura taucoko mera kila na veika baleti Jisu Karisito. E rawa vakacava meda veivuke na kena vakavulici ko Jisu kivei ira eso? Tukuna vei ira na gone na veika o sa raica era sa cakava e vakavulica vei iko na veika e baleti Jisu Karisito. Vukei ira me ra vakasamataka eso tale na ka era rawa ni ra cakava.

• Lagata vata e dua na sere me baleta na wasei ni kosipeli, me vaka na “Au Bole Meu Sa Kaulotu EdaiNodra iVolanisere na Lalai,90). Na cava eda rawa ni tukuna vei ira eso baleti Jisu Karisito? Me baleta eso na vakasama, raica na Yavu ni Vakabauta.

Sefanaia 2:3

“Dou vakasaqarai Jiova.”

E vakavulica o Sefanaia ni dodonu meda vakasaqara na Turaga ena gauna ni ivalavala ca levu, me vaka ena gauna oqo. Vakasamataka vakatitobu na sala o na vakauqeti ira kina na gone me ra vakasaqarai Koya.

iTaviqaravi e Rawa ni Caka

• Vakaraitaka e dua na iyaloyalo kei Jisu, ka wilika vei ira na gone na Sefanaia 2:3. Sureti ira me vakadodorai e ligadra me vaka na matailoilo ka raica na yaloyalo ena veigauna kece o cavuta kina na vosa “vakasaqara.” Vakamacalataka ni o parofita Sefanaia e vinakati ira na tamata me ra vakasaqara na Turaga. E da vakasaqara vakacava na Turaga? E vei na vanua eda na kunei Koya kina?

• Vakayagataka na tabana ni itaviqaravi ni macawa oqo, se vakasamataka e dua na qito ka vakayaloqaqataki ira na gone me ra vakasaqara na Turaga. Vakatagitaka se lagata vata e dua na sere e semati ki na ulutaga oqo, me vaka na “Meu na Vaqara na Turaga” (Nodra iVolanisere na Lalai,67). Veivosakitaka na veika e vakavulica na sere me baleta na sala eda rawa ni kunei Jisu Karisito kina ena noda bula.

Vakavulica na iVunau: Gone Qase Cake

Neumi 1:7

“Sa yalovinaka ko Jiova, sai vakaruru kaukauwa ena siga ni rarawa.”

Eda dui sotava yadua na noda “veisiga ni rarawa.” O na vukei ira vakacava na gone me ra gole vua na Turaga, “vakararavi vua,” ka kunea na tataqomaki vakayalo ena nodra gauna ni leqa?

iTaviqaravi e Rawa ni Caka

• Vakaraitaka vei ira na gone e dua na iyaloyalo ni dua na baiviri kaukauwa se koro vakabai cecere. Na cava eso na vuna era na gadreva kina na tamata na koro viribai cecere? Sureti ira na gone me ra wilika na Neumi 1:7 me ra raica kina na veika e tukuna na parofita Neumi sa vaka e dua na baiviri kaukauwa se koro vakabai cecere. Na cava e rawa ni taqomaki keda mai kina na iVakabula?

• Sureti ira na gone me ra droinitaka e dua na kedra iyaloyalo kei na nodra matavuvale ena loma ni dua na baiviri kaukauwa se koro vakabai cecere. Vakayaloqaqataki ira mera vola na vosa eso me wirina na baiviri kaukauwa e vakamacalataka eso na veivakauqeti butobuto e vuravura. Sureti ira mera vola na vosa eso ena loma ni baiviri kaukauwa e vakamacalataki Jisu Karisito. Na cava e kerea o Koya meda cakava meda ciqoma kina na Nona kaukauwa kei na veitaqomaki? (raica na Vunau kei na Veiyalayalati 35:24).

  

  “Sa yalovinaka ko Jiova, sai vakaruru kaukauwa e na siga ni rarawa” (Neumi 1:7).

Apakuki 3:17–19

Au sa rawa ni rekitaki Jisu Karisito, ena gauna mada ga ni sega ni lako vinaka tiko na bula.

E vakamacalataka o Apakuki eso na veivakatovolei a rawa ni yaco vei ira na nona tamata, oka kina na veivunikau se veivaini era sega ni vua. A qai kaya o koya ni kevaka mada ga me yaco na veika oqo, “Keu na rekitaki Jiova ga.”

iTaviqaravi e Rawa ni Caka

• Sureti ira na gone me ra wilika na Apakuki 3:17 ka kila rawa na veivakatovolei e vakamacalataki tiko ena tikina oqo. Na cava beka ena nanuma e dua kevaka mera na yaco na ka oqo? Vukei ira na gone mera vakasamataka na veivakatovolei e rawa ni yaco vei ira. Mo ni qai wilika vata na tikina e 18–19 me ra vulica kina na ka e kaya o Apakuki mena cakava kevaka mada ga e yaco vua na veika oqo.

• Vukei ira na gone me ra kunea eso tale na ivakaraitaki ni so na tamata ena ivolanikalou ka ra rekitaka na Turaga ena gauna madaga ni dredre. E rawa ni ra raica na ivakaraitaki ena Cakacaka 16:19–25; Mosaia 24:10–15; kei na itukutuku nei Peresitedi DieterF. Uchtdorf “Vakavinavinaka ena iTuvaki Kecega” (Liaona, Me 2014, 70–77), vakabibi na iwasewase “Na Vakavinavinakataki Ni Noda iTuvaki ni Bula.” Na cava na vuna era a rawa ni bula reki tiko kina na tamata oqo ena gauna dredre? Eda na muria vakacava na nodra ivakaraitaki?

Sefanaia 3:14–20

O ira sa muri Jisu Karisito era sa kunea na vakacegu kei na reki.

Sefanaia 3:14–20 e vakamacalataka na siga rekitaki ni o Jisu Karisito, “na tui Isireli,” ena lewai ira na Nona tamata ka “marautaki [keda] ena sere” (tikina e 15, 17).

iTaviqaravi e Rawa ni Caka

• Wilika vata na Sekanaia 3:14. Mo qai sureti ira na gone yadua me ra digitaka e dua na tikina ena Sefanaia 3:15–20 me vulica, ka vaqara e dua na ka e rawa ni vukei keda me da “marau ka reki.” Kerei ira me ra wasea na veika era kunea.

• Vukei ira na gone me ra raica na sere ni Lotu se nodra sere na lalai ka vukei ira me ra “marau ka reki ena vu ni yalodra” (Sefanaia 3:14). Lagata vata e vica na sere, ka vakayaloqaqataki ira na gone mera tukuna na reki era kunea ena kosipeli i Jisu Karisito.

Vakauqeta na Vuli e Vale

Kerei ira na gone me ra vola na idusidusi ki na dua na ivolanikalou era vinakata me ra wasea ki na nodra matavuvale (se vola ena vukudra).

Vakatorocaketaki ni Noda Veivakavulici

Vukei ira na gone mera vakila na Yalotabu. Tovolea mo raica na veigauna eso era na vakila kina na gone na veivakauqeti ni Yalotabu. Ni yaco oqo, vukei ira mera kila ni yalo oqo e lako mai vua na Yalo Tabu.