5–11 ni Tiseba

Akeai; Sakaraia 1–3; 7–14

“Sa Tabu me nei Jiova”

Wilika ena masumasu na Akeai kei na Sakaraia, ka vakasamataka vakatitobu na veivakauqeti o ciqoma. Ena veivuke beka vakacava ena kena sotavi nodra gagadre na gone na dina ena ivola e rua oqo?

Vola na Veika o Vakauqeti Kina

Sureta na Veiwasei

Droinitaka e dua na mata mamarau ena dua na tiki ni pepa, ka mera veitarataravi na gone na taura cake. Ni ra sa taura tiko, sureta mera wasea e dua na ka era sa vulica tiko baleta na Tamada Vakalomalagi kei Jisu Karisito ka ra sa marau kina.

Vakavulica na iVunau: Gone Sobu

Akeai 1:6–8

Au sa rawa ni vakaliuca na Kalou ena noqu bula.

Na nomu vulica na ivakasala ni Turaga mo “vakasamataka na nomu sala” sa dua na madigi vei ira na gone me ra vakadeitaka ni ra sa cakava tiko na veika bibi e kerea vei keda na Kalou.

iTaviqaravi e Rawa ni Caka

• Vakamacalataka vei ira na gone ni vinakata na Turaga vei ira na Isireli me ra tara na valetabu, ia era a cakava eso tale na ka. Wilika i cake na Akeai 1:7, ka vakamacalataka ni “vakananuma mada ki na nomudou ivalavala” e kena ibalebale ni vinakata na Turaga vei ira na Isireli me ra vakasamataka se ra sa cakava tiko na ka bibi duadua. Wilika na tikina8 vei ira na gone, ka sureti ira me ra vakatotomuria ni ra “cabe cake ki na ulunivanua,” “kauta mai na kau,” ka “tara na vale [ni Turaga].” Na cakacaka bibi cava e vinakata vei keda na Kalou meda cakava?

• Vukica sobu na iyaloyalo me vakatoboicu ena dua na teveli ka matataka eso na ka e bibi vua na Kalou, me vaka na ivolanikalou, masu, kei na valetabu. Solia na gauna vei ira na gone me ra veivukevuke ena nodra digitaka e dua na iyaloyalo ka vakaraitaka ki na kalasi. Vukei ira me ra kila na vuna e bibi kina meda vakadeitaka me da solia na gauna me baleta na veika yadua ena iyaloyalo.

Sakaraia 3:1–7

Sa rawa vei Jisu Karisito me vakasavasavataka na yaloqu.

Na isulu duka nei bete levu o Joshua, e vakamacalataki ena Sakaraia 3:1–7, e vakatakarakarataka na cava ena yaco ni da ivalavala ca. Mai na Veisorovaki i Jisu Karisito, sa rawa meda vakasavasavataki, me vaka a vakasavasavataki o Josua ena gauna a ciqoma kina na isulu vou.

iTaviqaravi e Rawa ni Caka

• Me ra qai veisoliyaka wavoki na gone e dua na sote duka, ka wilika na Sakaraia 3:3. Oti me qai veisoliyaki wavoki yani e dua na sote savasava, ka wilika na tikina4. Veivosaki vata kei ira na gone me baleta na ivakarau ni digidigi cala sa vaka ni da sa duka vakayalo, ia na iVakabula e rawa ni vakasavasavataki keda tale. Na cava eda na vakila ni da sa savasava? Wasea na nomu ivakadinadina ni baleta ga a vakararawataki ka mate o Jisu Karisito ena vukuda, eda na vakasavasavataki mai na noda ivalavala ca ni da sa veivutuni.

• Kevaka e rawa, vakaraitaka vei ira na gone e dua na iyaloyalo ni dua era kila ni vakaisulu vulavula ena nona papitaiso (se raica na iVola ni iYaloyalo Vakosipeli, naba 103, 104). Na cava na vuna eda vakaisulu vulavula kina ena noda papitaiso? Me lagati e dua na sere baleta na papitaiso, me vaka na “Vaqara Drodrolagi Ni Bula Vesu No”” (Nodra iVolanisere na Lalai,53). Sureti ira na gone me ra droinitaki ira ni ra sa papitaiso ka wasea na nodra nanuma me baleta na nodra papitaiso ena dua na siga.

Sakaraia 2:10; 9:9; 14:3–9

O ira na parofita era vakatavulica vei keda na veika baleti Jisu Karisito.

Me vakataki ira na parofita ni Veiyalayalati Makawa, o Sakaraia a parofisaitaki Jisu Karisito. Na cava e rawa ni vakavulica na parofisai ena Sakaraia 2:10; 9:9; 14:3–9 vei ira na gone na veika e baleti Koya?

iTaviqaravi e Rawa ni Caka

• Vakaraitaka e dua na iyaloyalo kei Jisu Karisito ni curumi Jerusalemi ena dua na asa (raica na iVola ni iYaloyalo Vakosipeli, naba 50). Tukuna vei ira na gone ni vuqa na yabaki ni bera ni a lako mai ki vuravura o Jisu, e parofisaitaka o Sakaraia ni na vodoka mai e dua na asa o Jisu Karisito ki Jerusalemi ni bera ni qai mai mate ena vukuda. Ni o wilika na Sakaraia 9:9, kerei ira na gone me ra dusi ira na tamata ena iyaloyalo era “reki vakalevu” ka dusia talega na “Tui.” O cei na Tui? Kerei ira na gone mera wasea na vuna era sa vakavinavinakataki Jisu kina.

• Wilika vei ira na gone e so na parofisai e a cakava o Sakaraia me baleta na iKarua ni Lako Mai ni iVakabula, me vaka na kena ena Sakaraia 2:10; 14:9. Kerei ira na gone me ra droinitaka na iyaloyalo ni veika era nanuma ni na yaco ena gauna sa lesu tale mai kina o Jisu, se lagata vata e dua na sere me baleta na iKarua ni Lako Mai, me vaka “Ena Lesu Tale Beka Mai” (Nodra iVolanisere na Lalai, 46).

Vakavulica na iVunau: Gone Qase Cake

Akeai 1:2–8

“Dou vakananuma mada ki na nomudou ivalavala.”

Sa ka bibi sara vei keda kece meda kila vinaka na veika eda vakaliuca ka taura na gauna meda “vakananuma mada na [noda] ivalavala.” O na vakauqeti ira vakacava na gone me ra solia na nodra gauna ena nodra bula ena vuku ni veika ni Kalou?

iTaviqaravi e Rawa ni Caka

• Sureti ira na gone me ra wilika na Akeai 1:2–5 me kilai kina na vuna a sega ni taleitaki ira kina na Isireli na Turaga. Kerei ira na gone mera tomika e dua na malanivosa mai na tikina6 ka droinitaka e dua na kena iyaloyalo. Mera qai kilakila na kalasi se malanivosa cava e matataka na droini yadua. Veivosakitaka ni dau vakayagataki na gauna ena veika eso ka sega ni ka e vinakata na Turaga sa vaka na kana ka sega ni mamau, vakaisulu ka sega ni katakata, kei na veika tale eso. Na cava na vuna meda solia kina noda gauna me baleta na veika e rui bibi vua na Turaga?

• Vola na “Vakananuma mada nomu ivalavala” ena papa (tikina7). Sureti ira yadua na gone mera vola na veika e rawa ni cakava ena dua na siga, oka kina na veika sa kerea vei keda na Turaga meda cakava. Kerei ira na gone me ra “vakananuma mada na [nodra] ivalavala” ena nodra wirina na veika e rawa ni kaya na Turaga ni sa ka bibi duadua ena nodra lisi. E rawa vakacava ni da vakadeitaka ni da solia noda gauna ena veisiga me baleta na veika e vinakata na Turaga meda cakava?

Eda vakaisulu vulavula ena noda papitaiso me vakaraitaka ni sa rawa ni vakasavasavataki keda o Jisu Karisito ni da sa veivutunitaka na noda ivalavala ca (raica na Sakaraia 3:3–4).

Sakaraia 3:1–7

Ni’u vakayacora ka maroroya na veiyalayalati ena rawa ni vukei au me’u vakataka sara na Tamada Vakalomalagi kei Jisu Karisito.

Ena raivotu, a raica o Sakaraia e dua na bete levu ka yacana o Josua, ka a “vakaisulu tu ena isulu dukadukali” (Sakaraia 3:3). A solia vua e dua na agilosi na isulu savasava ka vakamacalataka ni oqo sa vakatakarakarataka ni sa vakasavasavataki mai na nona ivalavala ca. Sa rawa mo vakayagataka na raivotu oqo mo vukei ira na gone me ra kila vinaka na veiyalayalati kei na veivakalougatataki e salavata kei na papitaiso.

iTaviqaravi e Rawa ni Caka

• Wilika vata na Sakaraia 3:1–7 ka veivosakitaka na taro vakaoqo: Na cava e matataka tiko “na isulu dukadukali” nei Josua? Eda vakasavasavataki vakacava mai na noda ivalavala ca? E vukei keda vakacava na noda veiyalayalati ni papitaiso me da “muria na sala [ni Turaga]”?

• Ni vo e vica na siga me tekivu na kalasi, sureta e dua na gone me vakarautaki koya me mai vosa me baleta na nona papitaiso. Ni railesuva vata na veiyalayalati eda vakayacora ena papitaiso (raica na Vunau kei na Veiyalayalati 20:37). E rawa vakacava me vukei keda na noda maroroya na noda yalayala meda vakataka cake kina na Tamada Vakalomalagi kei Jisu Karisito? Ena vukei keda vakacava na noda taura tiko na sakaramede ena veimacawa meda maroroya kina na noda veiyalayalati ni papitaiso?

Sakaraia 9:9–11; 11:12; 13:6–7

O Jisu Karisito na Mesaia sa yalataki.

Na cava e rawa ni ra vulica na gone mai na parofisai nei Sakaraia me baleti Jisu Karisito?

iTaviqaravi e Rawa ni Caka

• Wasea me ra veisasa na gone. Solia vei ira yadua na veisa e dua na parofisai oqo mai vei Sakaraia, vata kei na veitikina ena Veiyalayalti Vou sa vakamacalataka na kena sa vakavotukana: Sakaraia 9:9 kei na Maciu 21:5–9; Sakaraia 9:11 kei na 1 Pita 3:18–19; Sakaraia 11:12 kei na Maciu 26:14–16; Sakaraia 13:7 kei na Maciu 26:31. Kerei ira yadua na veisa me ra wasea ki na kalasi na veika era sa vulica baleti Jisu Karisito mai na nodra tikina kei na vuna era sa vakavinavinaka kina Vua.

• Vakaraitaka na iyaloyalo 50, 60, kei na64 mai na iVola ni iYaloyalo Vakosipeli. Vola ena papa ni volavola na veitiki ni ivolanikalou oqo, ka sureti ira na gone me ra vakasotara donu na veitikina ki na iyaloyalo: Sakaraia 9:9; 13:6; 13:7. Sureti ira na gone mera wasea na nodra nanuma me baleti Jisu Karisito.

Vakauqeta na Vuli e Vale

Sureti ira na gone me ra vola e dua na dina era sa vulica ena kalasi. Sureta me ra veivosakitaka kei na nodra matavuvale na sala era na rawata kina e dua na ivakadinadina kaukauwa cake ni dina o ya.

Vakatorocaketaki Noda Veivakavulici

Vakayagataka nomuni vakasama vinaka. Laiva na vakasama ena ituvatuva oqo me basika mai kina na nomuni vakasama vinaka. Vakasamataka na veika era na taleitaka na nomu kalasi kei na veika ena vukei ira mera kunea na isema eso ni ivolanikalou kei na nodra bula.