marama vulica tiko na ivolanikalou e vale

Sa Noda Takete na Saumaki

Na inaki taucoko ni vuli kosipeli kei na veivakatavulici oya me vakatitobutaka na noda saumaki kivei Tamada Vakalomalagi kei Jisu Karisito ka vukei keda me da vakataki Rau vakalevu sara. Ena inaki oqo, ni da vulica na kosipeli, eda sa sega walega ni vakasaqara na veitukutuku vou, eda sa vinakata meda “buli vou” (2 Korinica 5:17). E kena ibalebale oqo meda vakararavi vua na Tamada Vakalomalagi kei Jisu Karisito me vukei keda me veisautaka na lomada, noda rai, noda ivalavala, kei na keda ituvaki sara mada ga.

Ia, na mataqali vuli kosipeli e vaqaqacotaka noda vakabauta ka veimuataki ki na veisau veivakurabuitaki ni saumaki e sega ni yaco kecega ena dua na gauna. E tete yani ki taudaku ni rumu ni vuli ki na yalo kei na itikotiko ni tamata yadua. E sa gadreva na sasaga gugumatua ena veisiga me kilai deivaki ka bulataki na kosipeli. Na vulici ni kosipeli e veimuataki ki na saumaki dina e gadrevi kina na veivakauqeti ni Yalo Tabu.

Na Yalo Tabu e dusimaki keda ki na dina ka vakadinadinataka na dina o ya (raica na Joni 16:13). E vakararamataka na noda vakasama, ka vakamatatataka na noda kilaka, ka tara na yaloda ena ivakatakila mai vua na Kalou, na ivurevure ni dina kecega. Na Yalo Tabu e vakasavasavataka na yaloda. E vakauqeti keda ena gagadre meda bula ena dina, ka qai vakasolokakanataka vei keda na sala meda cakava kina. Vakaidina, “na Yalo Tabu … ena vakavulici [keda] ena ka kecega” (Joni 14:26).

Baleta na inaki eso oqo, ena noda sasaga meda bulataka, vulica, ka vakatavulica na kosipeli, sa dodonu meda vakasaqara taumada na veitokani ni Yalotabu. Na lalawa oqo sa dodonu me vakatulewataka na noda digidigi ka dusimaka na noda vakanananu kei na ivalavala. Meda vakasaqara na veika ga e sureta na veivakayarayarataki ni Yalo ka vakanadakuya na veika e kauta tani na veivakayarayarataki oya—baleta ni da kila kevaka eda rawa ni bula kilikili kaya na Yalo Tabu, sa rawa talega ni da bula kilikili kaya meda tiko ena iserau ni Tamada Vakalomalagi kei na Luvena, o Jisu Karisito.