marama vulica tiko na ivolanikalou e vale

Na Vakasama Eso me Vakavinakataka na Nomu Vuli iVolanikalou Yadua

Oqo eso na sala rawarawa me vakarabailevutaka na nomu vulica na vosa ni Kalou ena ivolanikalou.

Vakasaqara na Dina baleti Jisu Karisito

E vakavulica vei keda na ivolanikalou ni ka kecega sa vakadinadinataki Karisito (raica na 2 Nifai 11:4; Mosese 6:63), qai navuca mo vola se makataka na veitikina e vakadinadinataka na iVakabula, ka vakavulica na sala mo muri Koya kina.

Vakaraica na Veivosa kei na Malanivosa e Veivakauqeti

Ena rawa talega ni o raica eso na vosa kei na malanivosa ena ivolanikalou e tarai iko, e vaka ni ra a volai saraga me baleti iko. Era na rairai veiganiti tu vakayadua ka vakauqeti ka vakayavalati iko. Navuca mo toqai ira ena nomu ivolanikalou se volai ira ena nomu ivola ni veisiga.

Vakaraica na Dina va-Kosipeli Eso

Eso na gauna na dina vakosipeli (dau vakatokai me vunau se vakavuvuli) sa volai vakadodonu, ka so na gauna esa vakaibalebaletaki ena dua na ivakaraitaki se italanoa. Tarogi iko mada, “Na dina tawamudu cava so esa vakatavulici ena veitikina oqo?”

Vakarorogo ki na Yalotabu

Yadrava matua na nomu vakasama kei na veika o vakila, ke sega mada ga ni veisotari kei na ka o wilika tiko. Na veivakanananu oqori sa rawa ni ka saraga e vinakata vei iko na Tamada Vakalomalagi mo vulica.

Vakatautauvatataka na iVolanikalou ki na Nomu Bula

Navuca na sala e vakaibalebale kina ki na nomu bula na italanoa kei na ivakavuvuli o wilika tiko. Me ivakaraitaki, sa rawa ni o tarogi iko, “Na cava so au sotava esa tautauvata kei na ka au wilika tiko?” se “E rawa vakacava ni u muria na ivakaraitaki ni tamata oqo ena ivolanikalou?”

Taroga na Taro Eso ni O Vuli Tiko

Ni o vulica tiko na ivolanikalou, ena votu mai nomu vakasama na taro eso. Na veitaro oqo e rawa ni semati ki na ka o wilika tiko se ki na nomu bula raraba. Vakasamataka vagumatua na veitaro oqo ka vakaraica na isaunitaro ni o tomana tiko na vuli ivolanikalou.

itabagone vulica tiko na ivolanikalou e vale

Vakayagataka na Veivuke ni Vuli iVolanikalou

Me vakaikuritaki na raiyawa eso ena veitikina o sa wilika, vakayagataka na ivakamacala e ra, na Topical Guide, na Bible Dictionary, na Guide to the Scriptures (scriptures.ChurchofJesusChrist.org), kei na veivuke ni vuli tale eso.

Navuca na iVakavuvuli ni iVolanikalou

Sa rawa mo raica eso na vakasama titobu me baleta na ivolanikalou kevaka o vakasamataka na kena ituvatuva—na ituvaki se ituvatuva ni veika ena ivolanikalou. Me kena ivakaraitaki, na kilai ni tuvaki kei na nodra vakabauta na tamata e vosa kina e dua na parofita ena rawa ni vukei iko mo kila vakavinaka na inaki ni nona vosa.

Vola na Nomu Vakasama kei na Veika o Vakila

Oqo e vuqa na sala o rawa ni vola kina na veika e votu mai vei iko ena nomu vuli tiko. Me ivakaraitaki, e rawa ni o makataka e dua na vosa se malanivosa e vakaibalebale ka vola na nomu nanuma ena nomu ivolanikalou. Sa rawa talega ni o maroroya e dua na ivolaniveisiga ni raititobu, veika o vakila, kei na vakanananu eso o ciqoma.

Vulica na Nodra Vosa na Parofita kei na iApositolo ni Gauna Oqo

Wilika na veika era sa vakatavulica na parofita kei na apositolo ni gauna oqo me baleta na ivakavuvuli o kunea ena ivolanikalou (me ivakaraitaki, raica na conference.ChurchofJesusChrist.org kei na Mekasini ni Lotu).

Wasea na Raititobu Eso

Na veitalanoataki ni raititobu mai na nomu vuli yadua e sega walega ni sala vinaka mo vakatavulici ira kina na tani, ia e vukea talega me vaqaqacotaka na nomu kila vakamatata na veika o sa wilika.

Bulataka na Veika O Vulica

Na vulici ni ivolanikalou me kua walega ni vakauqeti keda ia e dodonu talega me muataki keda ni veisautaka na ivakarau ni noda bula. Vakarogoca na veika e vakauqeti iko kina na Yalotabu mo cakava ni o wiliwili tiko, ka qai vakadeitaka mo cakacaka ena veivakauqeti oqori.

Elder David A. Bednar e tukuna: “Meda kakua ni namaka ena Lotu me vaka e dua na isoqosoqo mena vakavulica ka tukuna vei keda na ka kecega e dodonu meda kila ka cakava meda rawa kina ni yaco meda tisaipeli yalodina ka vosota ena yaloqaqa me yacova na ivakataotioti. [raica na Vunau kei na Veiyalayalati 121:29] Ia, sa noda dui lesilesi ga meda vulica na ka e dodonu meda vulica, ka bulataka sara me vaka na dodonu ni veika eda sa mai kila, ka yaco meda vakataka na tamata sa gadreva na iVakavuvuli meda na vakataka. Ia na noda vale mei i usutu ni vanua ni vuli, bula voli, ka vakataki Koya” (“Vakavakarau mo Rawata na Veika e Gadrevi,” Ensign se Liaona, Me 2019, 102).