Vakavulici Ira na Gonelalai

Kevaka e tiko na gonelalai ena nomu vuvale, oqo eso na itaviqaravi ena rawa ni vukei ira me ra vuli:

• Laga. Na serenilotu kei na sere mai na iVolanisere ni Gonelalai e vakavulica vakaukauwa na ivunau. Vakayagataka na ituvatuva ni ulutaga ena daku ni iVolanisere ni Gonelalai mo kunea kina na sere e veiwekani ki na ivakavuvuli ni kosipeli o vakavulica tiko. Vukei ira na luvemu me ra semata na itukutuku ni sere ki na nodra bula. (Raica talega “Oka kina na Sere Tabu ena Nomu Vulica na Kosipeli” ena ivurevure oqo.)

• Vakarogoca se matanataka e dua na italanoa. Era dau taleitaka na gonelalai na italanoa—mai na ivolanikalou, mai na nomu bula, mai na itukutuku makawa ni Lotu, se mai na mekasini ni Lotu. Vakasaqara na sala me vakaitavitaki ira ena tukuni ni italanoa. E rawa ni ra taura tu na iyaloyalo se iyaya, droinitaka na iyaloyalo me baleta na veika era rogoca tiko, matanataka na italanoa, se veivuke ena tukuni ni italanoa. Vukei ira na luvemu me ra raica donu na dina vakosipeli ena italanoa o wasea.

• Wilika e dua na ivolanikalou. Era sega beka ni rawa ni wilivola vakalevu na gonelalai sobu, ia se rawa tikoga ni o vakaitavitaki ira ena vuli mai na ivolanikalou. O na gadreva beka mo vakanamata ga ena dua na tikina, malanivosa bibi, se vosa. Ena rawa sara mada ga ni ra cavuqaqataka na gone e vica na malanivosa leleka mai na ivolanikalou kevaka era tokaruataka toka vakavica. Ni ra rogoca na vosa ni Kalou, era na vakila na Yalo.

• Raica e dua na itaba se sarava e dua na vidio. Ni o vakaraitaka vei ira na luvemu e dua na itaba se iyaloyalo e veisemati kei na ivakavuvuli ni kosipeli se italanoa vakaivolanikalou, tarogi ira na taro ena vukei ira me ra vuli mai na veika era raica tiko. Me ivakaraitaki, e rawa ni o taroga, “Na cava e yaco tiko ena itaba se iyaloyalo oqo? Na cava o a vakila?” Na app ni Valenivola, MediaLibrary.ChurchofJesusChrist.org, kei na children.ChurchofJesusChrist.org eso na vanua vinaka mo raica kina na itaba kei na vidio.

• Bulia. Ena rawa vei ira na gone me ra bulia, droinitaka, se rokataka e dua na ka e veiwekani kei na italanoa se ivakavuvuli era vulica tiko.

• Vakaitavi ena lesoni vakaraitaki. E dua na lesoni ivakaraitaki ena rawa ni vukei ira na luvemu me ra kila vinaka na ivakavuvuli ni kosipeli ena via dredre me ra kila. Ni vakayagataki tiko na lesoni ivakaraitaki, vakasaqara na sala me ra vakaitavi kina na gonelalai. Ena levu cake na ka era vulica ni ra na vakaitavi tiko, mai na nodra sarava walega e dua na ka e vakaraitaki tiko.

• Matanataka Ni ra matanataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

• Tokaruataki na itaviqaravi. Era na gadreva na gone me ra rogoca vakavica e dua na vakasama me ra qai kila vinaka. Kakua ni rere me tokaruataki wasoma na italanoa se itaviqaravi eso. Me ivakaraitaki, o na wasea beka e dua na italanoa ni ivolanikalou vakavica vata ena sala duidui eso—wilika mai na ivolanikalou, vakalekalekataka ena nomu vosa ga, vakaraitaka e dua na vidio, vakatara me ra vukei iko na gone mo talanoataka e dua na italanoa, ka sureti ira me ra matanataka na italanoa, kei na so tale.