Oka Kina na Sere Tabu ena Nomu Vulica na Kosipeli

Na Lagasere ni Lalai kei na serenilotu e rawa ni vakalougatataki iko kei na nomu matavuvale ena vuqa na sala. Na veivakasama oqo e rawa ni vukei iko mo vakayagataka na sere vakatabui ena nomu segata mo vulica ka bulataka na kosipeli.

• Vulica na ivakavuvuli vakaivunau. Vakasaqara na dina e vakavulici ena sere o lagata se rogoca. Oqo e rawa ni muataki ki na veivosakitaki ni kosipeli me baleta na dina oqo ena siga taucoko. Lagata se vakarorogo ki na sere ni Lalai se serenilotu e vakavulica na veika baleti Jisu Karisito kei na nona kosipeli. Vakarorogo ki na sala e dau vakadinadinataka kina na iVakabula kei na nona ivakavuvuli na Yalo Tabu.

• Kila na kaukauwa ni ivakatagi. Na lagasere se vakarorogo ki na sere ni Lalai kei na serenilotu e rawa ni veivakalougatataki ena gauna ni leqa. Me vakataka, na lagati ni dua na sere ena rawa ni vakamaravutaka e dua na gone ena gauna ni moce, bulia na reki ni dou cakacaka vata vakamatavuvale, laveta cake e dua na wekamu e tauvimate, se vakaceguya e dua e lomaleqa.

• Wasea na veika sotavi. Wasea na veika o sotava yadua kei na matavuvale e sema ki na itukutuku ni sere. E rawa talega ni o wasea na italanoa ni ivolanikalou veiwekani.

• Vaqaqacotaka nomu matavuvale Ena vuli vakalevu cake na nomu matavuvale mai na sere kevaka era sa vakaitavi tiko vagumatua. Me ra vakaitavi na lewe ni matavuvale, sa rawa mo sureta e dua na gone qase cake me veivuke ena kena vakavulici e dua na sere vei ira na tacidra gone se sureti ira na gone me ra vakavulica na matavuvale ena dua na sere era vulica ena Lalai. Sa rawa talega mo raica na nodra liutaka tiko e dua na sere na lewe ni matavuvale.

• Dau bulivakasama. Vakayagataka na veisala duidui eso me vulici kina na sere ni sakaramede vaka matavuvale. Me ivakaraitaki, e rawa ni o vakayagataka na imoimoi e salavata kei na vosa kei na malanivosa ena dua na sere. Se e rawa ni o matanataka e dua na sere ni Lotu ni ra tovolea tiko eso na lewe ni matavuvale mera vakilakila na sere. Ena rawa ni marautaka na nomu matavuvale na lagasere ena duidui ni totolo se malua se na levu ni rorogo. Na app ni Valenivola kei na app ni Kosipeli vei ira na Gone era tiko kina na vosa katoni kei na vidio ka rawa ni vukei iko mo vulica na sere. E rawa talega ni o cakava e dua na lisi ni ivakatagi vakatabui mo vakarorogo kina.

Me baleta na vakasama tale eso, raica na iwasewase “enaVakayagataki ni sere me Vakavulici na iVunau” kei na “Vukei ira na Gone me ra Vulica ka Nanuma tiko na sere ni Lalai kei na Serenilotu,” e tiko ena “iDusidusi me baleta na gauna ni Lagasere kei na sere ni Sakaramede” ena Lako Mai, Mo Muri Au—Me Baleta na Lalai.