Vakayagataki ni Lako Mai, Mo Muri Au—Baleta na Tamata Yadua kei na Matavuvale

E Baleti Cei Na iVurevure Oqo?

Na ivurevure oqo e baleta na tamata yadua kei na matavuvale kece ena Lotu. E sa caka mai me vukei iko ni vulica na kosipeli—ke o vulica duadua se vatakei iratou na nomu matavuvale. Kevaka o sega ni se vulica wasoma na kosipeli ena gauna sa oti, na ivurevure oqo ena vukei iko mo tekivutaka yani. Kevaka e sa dua tiko na nomu ivakarau vinaka ni vulica na kosipeli, na ivurevure oqo ena rawa ni vukei iko me ivakaibalebale vakalevu cake na veika o sotava.

Meu na Vakayagataka Vakacava na iVurevure Oqo?

Vakayagataka na ivurevure oqo ena sala cava ga o nanuma me veivuke vei iko. O na kunea ni veivuke vakalevu me idusidusi se ivukevuke ni vuli ni tamata yadua se vakavuvale. E rawa talega ni o vakayagataka me baleta na lotu vakavuvale. Na idusidusi oqo e vakavotuya mai na ivakavuvuli bibi e kune ena Veiyalayalati Makawa, vakatura na vakasama eso ni itaviqaravi ni tamata yadua kei na vuvale, ka vakarautaka na vanua me volai kina na nomu vakasama eso.

Na Lako Mai, Mo Muri Au—Baleta na Tamata Yadua kei na Matavuvale e sega ni nakiti me sosomitaka se veisivisivi kei na veika vinaka o sa cakava rawa tiko. Muria na veidusimaki ni Yalo mo kila kina na iwalewale ni nomu vulica na vosa ni Kalou.

E Veisemati Vakacava na iVurevure Oqo ki na Veika e Yaco e Valenilotu?

Na idusidusi ena ivurevure oqo era sa tauyavutaki ena ituvatuva ni wiliwili ena veimacawa. Na Lako Mai, Mo Muri Au na ivurevure ni Lalai, me baleta na Matawilivola ni Sigatabu, kei na veikalasi ni Matabete i Eroni kei na Goneyalewa e tarava na ituvatuva vata ga. Me tokona na nomu sasaga ni vulica ka bulataka na kosipeli e vale, ena solia vei iko o nomu qasenivuli e valenilotu na gauna mo wasea na veika o sotava, vakanananu, kei na taro me baleta na ivolanikalou o sa vulica tiko e vale.

Baleta ni vakavulici ga vakarua ena dua na vula na Matawilivola ni Sigatabu, sa rawa ni digitaka na qasenivuli ni Matawilivola ni Sigatabu me lade lesoni se cokota vata na lesoni eso me veisotari tiko kei na ituvatuva vakamacawa. Ena vaka talega oqo (vei rau na Matawilivola ni Siga Tabu kei na Lalai) ena macawa e sega ni yaco kina na soqoni ni Lotu me baleta na koniferedi ni iteki se eso tale beka na vuna. Ena veimacawa oqo o sa sureti mo tomana tikoga nomu vulica na Veiyalayalati Makawa e vale.

Au Gadreva Beka Meu Vakamuria na iTuvatuva?

Na ituvatuva ena vukei iko mo wilika na ka e digitaki mai na Veiyalayalati Makawa kei na Mataniciva Talei me yacova na mua ni yabaki. Me kena ikuri, na vakamuri ni nodra ituvatuva vataga eso tale sa rawa ni muataki ki na veika e sotavi e vakaibalebale cake e vale, ena Lotu, kei na veivanua kecega. Ia mo kakua ni vesuki ena ituvatuva oqo se bolea mo wilika na veitikina yadua; na ituvatuva sai koya ga e dua na idusidusi me vukei iko mo vagaunataki iko. Na ka e bibi ga ni o sa vulica tiko vakai iko na kosipeli vakakina vata kei iratou na nomu vuvale.

Me baleta na ituvatuva ni kena wiliki na Veiyalayalati Makawa

Na veika e vakaturi ena Lako Mai, Mo Muri Au ena wiliki ni ituvatuva ni 2022 e sega ni oka kina na wase yadua ena Veiyalayalati Makawa. Ena vuku ga ni kena balavu na veiyalayalati makawa mai na so tale na ivolanikalou, eso na wase kei na ivola era sega ni okati me rawa ni sotavi kina na ituvatuva ni kena wiliki rawarawa vei iko kei na nomu matavuvale.

Na iwase kei na ivola era sa digitaki me ra kakua ni vakaruataki kei na bibi ni kena vakamatatataki na veitikina eso e vakadinadinataki Jisu Karisito, era sa vutuniyau ena ivunau, ka ra sa yaga sara vakalevu ki na noda gauna oqo. Me kena ivakaraitaki, na ituvatuva ni wiliwili e vakaturi e sega ni oka kina na 1kei na 2Ni Veigauna baleta e vuqa na lewe ni ivola oqori ka vakaruataki na veika e kunei ena 1kei na 2Tui. E sega talega ni oka ena ituvatuva oqo na sere i Solomoni, baleta ni vakavulica o Josefa Simici na parofita ni sega ni ivolanikalou veivakauqeti (raica na iDusidusi ki na iVolanikalou, “Sere nei Solomoni,” scripture.ChurchofJesusChrist.org). Ia, mo nanuma tiko ni oqo e dua ga na ituvatuva ni vuli vakaturi. Na nomu vuli ivolanikalou yadua kei na nomu matavuvale e dodonu me na dusimaki ena ivakatakila yadua.