“Li ch’utam re li xkaa domingo,” Kim, Taaqehin—choq’ reheb’ li ch’utam re li Tijonelil re Melkisedek ut li Komonil re Tenq’ank (2017)
Li ch’utam re li xkaa domingo
Li ch’utam re li xkaa domingo
Sa’ li xkaa domingo rajlal po, eb’ li molam, ch’uut, ut li Komonil re Tenq’ank te’aatinaq chirix jun na’leb’ sik’b’il ru xb’aan li Xb’eenil Awa’b’ejil ut lix Molameb’ li Kab’laju chi Apostol. Eb’ li na’leb’ a’in te’ak’ob’resiiq rik’in li junjunq chi jolomil ch’utub’aj-ib’. Li na’leb’ toj reetal naq nawulak wi’chik li jolomil ch’utub’aj-ib’, a’an li hilob’aal kutan. Eb’ laj jolominel malaj laj k’utunel naru te’xsik’ jun reheb’ li tzol’leb’ malaj kok’ k’anjel re tzolok li k’eeb’ileb’ chirub’el, naru te’xjunaji junjunq reheb’, malaj naru te’xkawresi jalan chik a’ yaal li rajomeb’ ru li komon.
Li hilob’aal kutan a’an jun kutan re xjultikankil k’a’ru xb’aanuhom qe li Dios.
Chiru resilal li ruchich’och’, li Dios kixye naq junjunqeb’ li ninqi k’anjel wankeb’ rilom rik’in li hilob’aal kutan. Sa’ xyanqeb’ li ninqi k’anjel a’in wan li Yo’ob’tesink (chi’ilmanq Genesis 2:1–3), li relikeb’ li ralal xk’ajol laj Israel sa’ li ch’och’ Egipto (chi’ilmanq Deuteronomio 5:15), ut lix waklijik chi yo’yo li Kolonel (chi’ilmanq Jwan 20:1–19; Hechos 20:7). B’oqeb’ li komon chixtz’ilb’aleb’ rix li raqal a’in ut chi aatinak chirix chanru naq xjultikankil li junjunq reheb’ li ninqi k’anjel a’in naru tooxtenq’a chiroxloq’inkil li hilob’aal kutan. B’arwan junjunqeb’ li ninqi k’anjel li xb’aanuhom li Dios choq’ qe? Chan ru naru taajultiko’q qe li k’a’aq re ru a’in sa’ li hilob’aal kutan? Wi naru, b’oqeb’ li komon chi aatinak chirixeb’ li patz’om jo’ a’in sa’ lix junkab’al.
Li Jesukristo a’an aj Eechal re li hilob’aal kutan
Lix kutankil li Qaawa’ nayeeman ajwi’ re li hilob’aal kutan (chi’ilmanq Apokalipsis 1:10). K’a’ut, jo’ nakak’oxla, naq aj Eechal re li hilob’aal kutan nayeeman re li Jesukristo? (chi’ilmanq Mateo 12:8). Tz’ileb’ rix sa’ komonil junjunqeb’ li raqal li naru te’xtenq’a xmusiq’ankileb’ xna’leb’ li komon re te’k’oxlaq chirix chanru xk’eeb’al li Jesukristo tz’aqal sa’ xyi sa’ li nak’ulman chiru li hilob’aal kutan (jo’ eetalil, Helaman 5:12; Eter 12:41; Moroni 10:32; ut Tz. ut S. 6:36–37). B’arwan junjunqeb’ chik li raqal naru te’xwotz li komon re xtenq’ankileb’ chixk’eeb’al li Kristo tz’aqal sa’ xyi’ li hilob’aal kutan. K’a’ruheb’ li jayalihom naru taqak’uub’ re qatenq’ankil chixk’oxlankil li Kolonel chiru li hilob’aal kutan?
Li Jesukristo a’an li eetalil chiqu chirix roxloq’inkil li hilob’aal kutan.
Chiru lix k’anjel sa’ ruchich’och’, li Kolonel kixsik’ li hoonal re k’utuk chirix li hilob’aal kutan. Patz’ reheb’ li komon naq te’rileb’ ru li esil a’in ut naq te’xtz’iib’a li k’a’ru kixb’aanu li Jesus sa’ li hilob’aal kutan jo’ ajwi’ li xb’eenileb’ na’leb’ kixk’ut: Lukas 6:1–11; 13:11–17; Jwan 5:1–20; 9:1–16. B’arwan junjunqeb’ chik li xb’eenil na’leb’ chirix li hilob’aal kutan li naqatzol sa’eb’ li raqal a’in? Exodo 20:8–11; 31:12–18; Isaias 58:13–14; ut Tz. ut S. 59:9–19. B’oqeb’ li komon chixwotzb’al li naru te’xb’aanu re xtaaqenkil lix b’aanuhom li Kolonel?
Chi’ilmanq ajwi’ Russell M. Nelson, “ Li hilob’aal a’an sahil kutan,” Ensign malaj Liahona, Mayo 2015, 129–32.
Li hilob’aal kutan a’an jun kutan re loq’onink.
Tz’iib’a li aatin loq’onink re naru taa’ile’q xb’aaneb’ li komon sa’ li tzoleb’aal ut patz’ reheb’ naq te’xtz’iib’a junjunqeb’ chik li aatin chixk’atq li wankeb’ rilom rik’in. Chirix a’an, sa’ xb’een oxib’ chi kaaxukuut jachb’ileb’ ru, tz’iib’aheb’ li aatin rub’elaj, chiru, ut chirix. K’a’ru naru taqab’aanu rub’elaj, chiru, ut chirix li wank sa’ iglees re xloq’oninkil li Qaawa’ sa’ lix loq’laj kutan? Eb’ li komon sa’ li tzoleb’aal naru te’ril ru sa’ komonil Mosiah 18:17–29 ut Moroni 6 re xtawb’al xna’leb’. B’oqeb’ li komon chixtz’ilb’al rix sa’ xk’a’uxleb’ chanru naq lix na’leb’eb’ ut lix b’aanuhomeb’ sa’ li hilob’aal kutan neke’tenq’ank reheb’ chixloq’oninkil li Qaawa’ sa’ li kutan a’an (chi’ilmanq Exodo 31:16–17). K’a’ru naru taqab’aanu re teq’ank sa’ xchaab’ilob’resinkil li loq’onink choq’ reheb’ li qajunkab’al ut li komon sa’ li qateep sa’eb’ li ch’utam sa’ Iglees?
Li tz’aqonk sa’ li loq’laj wa’ak naxk’e qawankil chixk’ub’al li Santil Musiq’ej jo’ qochb’een rajlal.
Tz’iib’aheb’ li patz’om a’in re te’ile’q xb’aaneb’ li komon: K’a’ru naxb’aanu li loq’laj wa’ak choq’ aawe sa’ laa yu’am? Re xsumenkil li patz’om a’in, b’oqeb’ li komon chi k’anjelak sa’ ka’kab’il re xsik’b’al ut aatinak chirix jun raqal chi aatin sa’eb’ li tij re li loq’laj wa’ak sa’ Tzol’leb’ ut Sumwank 20:77, 79 ut li na’leb’ sa’ Tzol’leb’ ut Sumwank 59:9. K’e xhoonaleb’ li junjunq chi sumal chixtawb’aleb’ li raqal sa’eb’ li loq’laj hu li te’tenq’anq reheb’ chixtawb’al ru chi chaab’il chik li aatin xe’xsik’ ut chi aatinak chirix chanru te’xsume raj li tz’iib’anb’il patz’om. Naru ajwi’ taab’oqeb’ li komon sa’ li tzoleb’aal chixsik’b’al li b’ich chirix li loq’laj wa’ak jwal nawulak chiruheb’ ut chixb’ichankileb’ sa’ komonil.
Chi’ilmanq ajwi’ Cheryl A. Esplin, “Li loq’laj wa’ak—jun ak’ob’resink choq’ re li aamej,” Ensign malaj Liahona, Nov. 2014, 12–14.
Li hilob’aal kutan a’an jun kutan re k’anjelak chiruheb’ li qas qiitz’in.
K’a’ru naru taqatzol chirix li k’anjelak chiruheb’ li qas qiitz’in sa’ li hilob’aal kutan rik’in chanru li Kolonel kik’anjelak chiruheb’ ut kirosob’tesiheb’ li wankeb’ sa’ xsutam? Waklesi xch’ooleb’ li komon chixtz’ilb’al rix ut chi aatinak chirix Mateo 9:10–13; Lukas 19:1–9; Jwan 11:32–46; 13:1–5, 12–17; ut 3 Nefi 17:5–10. B’oqeb’ li komon chi k’oxlak chirixeb’ li raqal a’in sa’eb’ li loq’laj hu naq te’xk’oxla chanru naru te’k’anjelaq chiruheb’ li ras riitz’in sa’ li hilob’aal kutan. Qayehaq, te’ruuq raj chi k’anjelak chiru xkomoneb’ lix junkab’al, chixye’b’al ruq’eb’ reheb’ li neke’k’anjelak wi’ jo’ aj tzolol ochochnal, chixb’aanunkil li k’anjel re resilal lix junkab’al, chirula’aninkileb’ li yaj, malaj chixwotzb’al li evangelio. Maare naru te’xch’utub’ rib’ sa’ junkab’al re xk’uub’ankil xna’leb’eb’ chirix chanru naru te’k’anjelaq chiruheb’ li ras riitz’in sa’ li hilob’aal kutan.