Li ch’utam re li xkab’ ut rox domingo

Sa’ li xkab’ ut rox domingo rajlal po,  eb’ li molam re li tijonelil ut li Komonil re Tenq’ank te’xtzol lix k’utumeb’ li yo’yookil profeet, li Apostol, ut xkomoneb’ chik aj jolominel re li Iglees re li jolomil ch’utub’aj-ib’ toje’ xnume’. Yalaq esil re li jolomil ch’utub’aj-ib’ toje’ xnume’ naru taa’tzole’q.

Chi kok’ aj xsa’, li awa’b’ejil re li molam, li ch’uut aj jolominel, malaj li awa’b’ejil re li Komonil re Tenq’ank te’xsik’ jun esil re xtzolb’al a’ yaal k’a’ru na’ajman ru reheb’ li komon, us ta li obiisp malaj li awa’b’ej re li oqech naru te’xk’e xna’leb’. Eb’ laj jolominel naru te’xsik’ jun esil li wan rilom rik’in li na’leb’ li xe’aatinak wi’ sa’ li ch’utam re k’uub’ank na’leb’ re li xb’een domingo, malaj ut naru te’xsik’ junaq chik li esil a’ yaal jo’ musiq’anb’ileb’ xb’aan li Musiq’ej. Eb’ laj jolominel ut aj k’utunel tento te’xtaw chanru te’xwaklesiheb’ xch’ool li komon chirilb’al li esil sik’b’il ru chi rub’elaj ut chi chalk chi kawresinb’il re xwotzb’aleb’ lix na’leb’. Eb’ li kok’ k’anjel re tzolok li k’eeb’ileb’ arin, li k’ojob’anb’ileb’ sa’eb’ li xb’eenil na’leb’ sa’ Li k’utuk jo’ li Kolonel, naru te’xtenq’aheb’ li komon chixtzolb’aleb’ li esil re jolomil ch’utub’aj-ib’.

Sharon Eubank, “Lochomaq lee saqen”

Patz’ reheb’ lix komoneb’ laa molam malaj Komonil re Tenq’ank naq te’k’oxlaq chirix chanru eek’asinb’il chaq xyu’ameb’ chixb’aanunkil li us xb’aan jun ixq tiik chi paab’ank. K’oxla xb’oqb’aleb’ junjunqeb’ li komon chixwotzb’al chanru naq li ixq a’in naxyu’ami wiib’ oxib’ reheb’ lix na’leb’ jun ixq tiik chi paab’ank li yeeb’il resil sa’ li raatin li Hermana Eubank. K’a’ru naqatzol rik’in li Hermana Eubank chirix chanru naru too’ok choq’ “jun xnimal ru kawilal sa’ xk’iijik li Iglees sa’ ajl ut sa’ musiq’ej sa’ roso’jikeb’ li kutan”?

Neill F. Marriott, “Li kanaak rik’in li Dios ut xtuqub’ankil li jukulal”

Li esil a’in naru tixtenq’aheb’ li komon li neke’reek’a naq jachb’ileb’ ru rik’in li qaChoxahil Yuwa’ malaj rik’ineb’ li wankeb’ chixsutameb’. K’a’ru taatenq’anq reheb’ li ani nakatzol chixtawb’al ru k’a’ru a’an jun jukulal? Maare tatruuq chixk’amb’al chaq jun jalam-uuch re junjuqeb’ paay chi jukulal. K’a’ru a’an jun jukulal jo’ naxye li Hermana Marriott? K’a’ru naru tixk’e chi yoob’ank li jukulal sa’ li qakomonil rik’in li Dios ut rik’ineb’ li qakomon? B’oqeb’ li komon chixtz’ilb’al rix li raatin li Hermana Marriott re xtawb’al li na’leb’ chirix chanru risinkileb’ li jukulal sa’ li qayu’am. K’eheb’ xhoonal li komon chixtz’iib’ankil li k’a’ru naxye li Musiq’ej reheb’ naq te’xb’aanu re te’jiloq rik’in li Dios ut lix komoneb’.

Joy D. Jones, “Li moko naru ta chi b’ise’k xtz’aq”

K’a’ruheb’ li osob’tesink li neke’chal sa’ li qayu’am naq naqataw ru li qachoxahilal wank qe? Re xsumenkil li patz’om a’in, eb’ li komon sa’ laa molam malaj Komonil re Tenq’ank naru te’xtz’il rix sa’ komonil li seraq’ chirix li xMariama, li xRenu, ut li xTaiana sa’ li raatin li Hermana Jones. K’a’ru li na’leb’ naxk’e li Hermana Jones re qatenq’ankil “xjultikankil ut xk’uulankil sa’ qaam li qachoxahilal”? B’oqeb’ li komon chixtawb’al jun raqal sa’ li loq’laj hu malaj sa’ li raatin li Hermana Jones li naxtenq’aheb’ chixtawb’al ru lix loq’aleb’ chiru li Dios. B’oqeb’ chixwotzb’al jun reheb’ li raqal malaj aatin a’in rik’in junaq komon li naraj ru xjultikankil lix choxahil loq’al.

Dieter F. Uchtdorf, “Oxib’ li ixq riitz’ineb’ rib’”

Naru taatz’ilmanq rix li raatin li Awa’b’ej Uchtdorf rik’in xjachb’al li molam malaj Komonil re Tenq’ank sa’ junjunqeb’ li kok’ ch’uut. Naru taaye re li junjunq chi ch’uut naq te’ril ru li esil chirix jun reheb’ li oxib’ li ixq riitz’ineb’ rib’ sa’ li raatin li Awa’b’ej Uchtdorf. Li junjunq chi ch’uut naru te’xtz’iib’a jun hu re li ixq a’an, te’xk’os ru lix na’leb’ toja’ naq te’xwotz li k’a’ru xe’xtz’iib’a rik’ineb’ li jun ch’ol chik chi ch’uut. K’a’ru naru taqab’aanu re naq chanchanaqo li rox ixq? K’a’ru naru taqab’aanu re naq li qamolam malaj Komonil re Tenq’ank a’anaq jun “kolb’a-ib’ ochoch” choq’ reheb’ li ani wankeb’ xch’a’ajkilal?

Dieter F. Uchtdorf, “Xpatz’b’al li qochochnal”

Chan ru naru taatenq’aheb’ li ani nakatzol chixk’eeb’al reetal chanru naq li Dios yoo chiroksinkileb’ re rosob’tesinkileb’ lix komoneb’? Naru taab’oqeb’ chixtz’ilb’al rix li raqal “Li Dios tatroksi” sa’ li raatin li Awa’b’ej Uchtdorf, re te’xsik’ li yeechi’ihom k’eeb’il reheb’ li ani neke’xyal xq’e chi k’anjelak sa’ lix awa’b’ejihom li Dios us ta q’uneb’ xmetz’ew. Rilb’al ru li esil a’in naru tixjultika reheb’ li komon junaq na’leb’ te’ruuq chixwotzb’al chirix chanru naq ke’oksiik xb’aan li Dios re rosob’tesinkil junaq komon—malaj naq a’an kiroksi junaq komon re rosob’tesinkileb’ a’an. K’eheb’ xhoonal li komon chixk’oxlankil li k’a’ru musiq’anb’ileb’ wi’ chixb’aanunkil xb’aan li aatinak a’in.

Bonnie L. Oscarson, “Li na’ajman ru chiqu laa’o”

Naru taatikib’ li aatinak chirix li raatin li Hermana Oscarson rik’in xk’eeb’al re chixjunileb’ jun li perel hu rik’in li aatin “Ani naraj wu anajwan?” ak tz’iib’anb’il chiru. Eb’ li komon sa’ li Komonil re Tenq’ank malaj laa molam naru te’xk’oxla ut te’xtz’iib’a xsumenkil li patz’om a’in chiru junjunqeb’ li k’asal. Toja’ naq te’ruuq chixtz’ilb’al rix li raatin li Hermana Oscarson re xtawb’aleb’ li na’leb’ chirix chanru naru te’k’anjelaq chiruheb’ li kristiaan li xe’xtz’iib’a chaq sa’ lix hu—malaj xtiqb’al xkomon chik li k’ab’a’ej a’ yaal jo’ chanru musiq’anb’ileb’. Maare junjunq reheb’ te’ruuq chixwotzb’al li k’a’ru xe’xtzol.

Dallin H. Oaks, “Li k’uub’anb’il na’leb’ ut li jek’inb’il aatin”

K’a’ru te’xb’aanu li komon sa’ laa molam malaj Komonil re Tenq’ank re xk’anjelankil lix b’oqom li Elder Oaks naq “[te’xk’ut ut te’xyu’ami]” li jek’inb’il aatin chirix li junkab’al, sa’ rochocheb’, sa’ li k’aleb’aal, ut sa’ li iglees? B’oqeb’ chixwotzb’aleb’ xna’leb’ chirib’ileb’ rib’. Maare us xtz’ilb’al rix li esil re xtawb’al junjunqeb’ li tzol’leb’ re li jek’inb’il aatin chirix li junkab’al. Chan ru neke’tenq’ank li tzol’leb’ a’in chixsumenkil “li k’a’ru nach’a’ajkilank re li junkab’al sa’eb’ li kutan a’in”? Sa’ li raqal IV re li raatin li Elder Oaks wan wiib’ oxib’ li tzol’leb’ a’an.

D. Todd Christofferson, “Li yo’yookil wa li kikub’e chaq sa’ choxa”

Wahi’keb’ junjunqeb’ li patz’om naru te’xtz’il rix sa’ xk’a’uxleb’ li komon re li Komonil re Tenq’ank ut li molam naq neke’xtz’il rix li raatin li Elder Christofferson. K’a’ru li santilal? Chan ru naqasik’ li santilal? Chan ru tenq’anb’ilo sa’ lix yalb’al qaq’e naq nokotz’aqon sa’ li loq’laj wa’ak? Eb’ li komon naru te’xwotz junjunqeb’ li na’leb’ re li raatin li Elder Christofferson li nasumen reheb’ li patz’om a’in. Chan ru naqatenq’a qib’ chiqib’il qib’ jo “qech aj Santil Paab’anel” sa’ xyalb’al qaq’e chixsik’b’al xkomon li qasantilal?

Jeffrey R. Holland, “Tz’aqalaq eere eeru—junaq kutan”

Junjunq reheb’ li ani nakatzol maare neke’reek’a naq ink’a’ tz’aqal chaab’ileb’ sa’ xyu’aminkileb’ lix k’utum li Kolonel. K’a’ru naxk’ut chiqu li Elder Holland li naru tixk’ojob’ ut tixwaklesi xch’ooleb’ li ani neke’reek’a chi jo’kan? Naru taab’oqeb’ li komon re li Komonil re Tenq’ank malaj li molam chixsik’b’al jun aatin sa’ li esil a’in li naru te’xwotz rik’in junaq xkomon li nareek’a’ naq “moko tz’aqal [chaab’il] ta.” Malaj ut naru te’xtaw jun li aatin sa’ li esil li naxmusiq’aheb’ chireek’ankil “xkomon chik li rahok ut oxloq’ink choq’ re a’an ut jun [rajomeb’] nim wi’chik ru chi wank jo’ a’an.”

Gary E. Stevenson, “Li musiq’ejil ramok”

Ma wan junaq laa komon sa’ li molam malaj li Komonil re Tenq’ank li xk’ul sa’ xyu’am jun musiq’ejil ramok? Wi jo’kan, naru taab’oq jun reheb’ chixch’olob’ankil li jaljookil ru aatin naxwotz li Elder Stevenson chirix jun “musiq’ejil ramok.” K’a’ruheb’ li tichk’ob’aal li naru “neke’xram ru lix nimajwalil, lix sahil, ut lix tiqwal lix saqenkil li Jesukristo ut lix evangelio”? Chan ru naru naq li redes sociales te’risi li qilob’aal chiru “lix ch’ina-usil, lix tiqwal, ut lix choxahil saqenkil lix evangelio li Jesukristo”? Chan ru taqak’e chiqu “lix lem li evangelio” li nokoxkol chiru li musiq’ejil mutz’il? K’a’ru naxk’ut chiqu lix jaljookil ru aatin li Elder Stevenson chirix xk’uulankil jun ilok jo’ na’ilok li evangelio?

Quentin L. Cook, “Li junelikil wulaj wulaj”

Li raatin li Elder Cook naxjultika qe lix aajelil ru xyalb’al qaqe’ chi wank chi tuulan qach’ool. Naru taajacheb’ li komon sa’ wiib’ chi ch’uut re te’aatinaq chirix li naxk’ut a’an. Patz’ re jun ch’uut naq te’xsik’ li na’leb’ sa’ li raatin li Elder Cook li naru te’tenq’anq qe chixtuulanob’resinkil qib’, ut re li jun chik ch’uut naq te’xsik’ chanru naq neke’xq’etq’eti rib’ li kristiaan? B’oqeb’ li junjunq chi ch’uut chixwotz’b’al lix na’leb’ rik’in li ch’uut jun chik. Eb’ li komon naru ajwi’ te’xwotz chanru naru te’xk’ut li “tuulanil wulaj wulaj” sa’ xyu’ameb’ ut te’xk’oxla chanru naq li tuulanil a’in taatenq’anq reheb’ chixkawresinkil rib’ chixk’ulb’al li Dios.

Ronald A. Rasband, “Chi k’oxlanb’il xb’aan li Dios”

Re xwaklesinkileb’ xch’ool chi aatinak chirix li raatin li Elder Rasband, maare naru taab’oqeb’ junjunqeb’ li komon chixk’amb’al chaq k’a’ruhaq kemb’il, jun tz’iib’anb’il eetalil, malaj jun hu re k’uub’ank tzakemq ut chi aatinak chirix k’a’ut naq neke’tenq’an li k’a’aq re ru a’in. K’a’ruheb’ li eetalil malaj k’utum sa’ li raatin li Elder Rasband li neke’musiq’an reheb’ li komon chixk’eeb’al reetal lix k’uub’anb’il na’leb’ li Dios choq’ re xyu’ameb’? Maare eb’ li komon sa’ li tzoleb’aal naru te’xwotz k’a’ruhaq xe’xk’ul li xe’ril wi’ naq li Qaawa’ yoo chixb’eresinkileb’ xyu’am. K’a’ru xb’aanuhomeb’ re xk’utb’al chiru li Dios naq neke’xk’e “xloq’al” lix b’eresihom? K’a’ut naq aajel ru xk’eeb’al reetal “li k’a’ru k’oxlanb’il” xb’aan li Dios?

Russell M. Nelson, “Lix Hu laj Mormon: K’a’ru raj xjalanil laa yu’am chi maak’a’ li hu a’an?”

Li Awa’b’ej Nelson kixb’oqeb’ li komon chi k’oxlak chirix oxib’ chi patz’om: (1) “Chan raj ru taawanq lee yu’am wi ta maak’a’ lix Hu laj Mormon?” (2) “K’a’ru li ink’a’ raj teenaw?” (3) “K’a’ru raj taasache’q cheru?” B’oqeb’ li komon sa’ laa molam, ch’uut, malaj Komonil re Tenq’ank chixtz’ilb’aleb’ rix li patz’om a’in ut chixwotzb’al chanru te’xsumeheb’. K’a’ru neke’xtaw sa’ li esil a’in li naxmusiq’aheb’ chixk’eeb’al xloq’al lix Hu laj Mormon sa’ xb’een xloq’aleb’ li “diamante malaj li lemtz’il q’ol”?

Dale G. Renlund, “Li tijonelil ut lix wankil aj tojol-ix li Kolonel”

Chan ru naru taatenq’aheb’ li komon sa’ laa molam malaj Komonil re Tenq’ank chixtawb’al ru chanru naq li tijonelil naxk’ameb’ li osob’tesink re lix tojb’al rix li maak kixb’aanu li Kolonel sa’ xyu’ameb’. Maare taatz’iib’a li wiib’ chi jolomil aatin sa’ li pizarron: “K’a’ut naq aajel ru choq’ qe lix tojb’al rix li maak kixb’aanu li Jesukristo” ut “Chanru naq li tijonelil naxk’ameb’ li osob’tesink re lix tojb’al rix li maak sa’ qayu’am.” Toja’ ut naq taab’oqeb’ li komon chixtz’ilb’al rix li raatin li Elder Renlund, re xtawb’al li aatin re xtz’iib’ankil chirub’el li junjunq chi jolomil aatin. Chan ru naq li tijonelil ut eb’ li k’ojob’anb’il k’anjel nokohe’xtenq’a chixtz’aqob’resinkil ru li rajom li qaChoxahil Yuwa’ choq’ reheb’ li ralal xk’ajol?

Dieter F. Uchtdorf, “Eb’ laj k’amol re li choxahil saqen”

B’oqeb’ li komon chixtz’ilb’al rix li raatin li Awa’b’ej Uchtdorf ut chixk’eeb’al reetal chanru lix wanjik malaj lix maak’a’il li choxahil saqen naru tixjal li qayu’am. Naru taab’oqeb’ li komon chixtz’ilb’al rix junjunqeb’ li raqal sa’eb’ li loq’laj hu naroksi li Awa’b’ej Uchtdorf ut chixk’eeb’al reetaleb’ li yaal li wan rilomeb’ rik’in li musiq’ejil saqen. K’a’ru naxk’ut chiqu li jaljookil ru aatin re lix moyb’al ru li saq’e chirix lix k’anjel lix taql ch’oolej sa’ xsik’b’al li musiq’ejil saqen? K’a’ru naru taqab’aanu re xwotzb’al lix choxahil saqen li Jesukristo rik’ineb’ li qakomon, jo’ ajwi’ rik’in li qajunkab’al ut li “qasaaj” li yookeb’ chixsik’b’al li saqen?

Henry B. Eyring, “Li Qaawa’ najolomin re lix Iglees”

B’oqeb’ li komon sa’ laa molam malaj Komonil re Tenq’ank chixwotzb’al k’a’ruhaq xe’xk’ul li x’ajman wi’ ru chiruheb’ naq te’xnimob’resi xpaab’aaleb’ naq lix b’oqb’al a’an malaj lix b’oqb’al anihaq chik xchal rik’in li Dios? Chan ru xe’xk’anjela lix paab’aaleb’? Chan ru xe’xnaw naq li b’oqom xchal rik’in li Dios? B’oqeb’ li komon chixtz’ilb’al rix li raatin li Awa’b’ej Eyring ut chixk’eeb’al reetaleb’ li yaal li kixtzol a’an sa’ li kixk’ul li naru te’tenq’anq qe chi wank xk’ojob’ankil qach’ool ut qakuyum qik’in qajunes ut rik’ineb’ ajwi’ li qakomon b’oqb’ileb’ xb’aan li Qaawa’.

Jean B. Bingham, “Re naq lix sahilal eech’ool tz’aqalaq re ru”

Li raatin li Hermana Bingham naru tixtenq’aheb’ li komon sa’ li Komonil re Tenq’ank malaj laa molam chixtawb’al ru chanru xtawb’al sahil ch’oolejil, us ta wan lix ch’a’ajkilal li yu’am, naq nokochal rik’in li Kristo. Re aatinak chirix li esil, naru taab’on jun ch’ina b’e sa’ li pizarron li nak’amok sa’ li aatin sahil ch’oolejil. B’oqeb’ junjunqeb’ li komon chixtz’iib’ankil sa’ li b’e a’an jun na’leb’ re li raatin li Hermana Bingham li nak’amok sa’ li tz’aqal sahil ch’oolejil. Waklesiheb’ xch’ool li komon chixk’oxlankil chanru naru te’xyu’ami lix na’leb’ li Hermana Bingham. B’oqeb’ junjunqeb’ li komon chixwotzb’aleb’ xk’oxlahom.

David A. Bednar, “Eb’ li yeechi’ihom q’axaleb’ ninq ut loq’”

Re xtenq’ankileb’ li komon sa’ li Komonil re Tenq’ank malaj laa molam chi aatinak chirix li raatin li Elder Bednar, naru taak’ut chiruheb’ li jalam-uuch li neke’reetali li hilob’aal kutan, li santil ochoch, ut li qochoch. B’oqeb’ li komon chirilb’al ru li raqal li neke’aatinak chirix a’in sa’ li raatin li Elder Bednar ut chixtz’iib’ankil chiru li pizarron chanru li hilob’aal kutan, li santil ochoch, ut li qochoch nokehe’xtenq’a chixjayalinkil qib’ rik’ineb’ lix yeechi’ihom li Dios choq’ qe. K’a’ raj ru li naru na’isin re li qilob’aal chiruheb’ li yeechi’ihom a’in? K’a’ru naru taqab’aanu re naq junelik naqajultikaheb’?

Henry B. Eyring, “Meexuwa xb’aanunkil li chaab’il”

Li raatin li Awa’b’ej Eyring naru tixtenq’aheb’ li ani nakatzol chixktawb’al xkawilaleb’ xch’ool ut lix paab’aaleb’ re xb’aanunkil li chaab’il sa’ li ruchich’och’. Naru taab’oqeb’ junjunqeb’ li komon chixk’osb’al ru li reetalileb’ li kristiaan tiikeb’ chi paab’ank li naxwotz li Awa’b’ej Eyring. K’a’ru neke’xk’ut chiqu li eetalil a’in chirix chanru took’anjelaq chiru li qas qiitz’in? K’a’ru neke’xye li eetalil a’in chirix chanru naru took’anjelaq sa’ komonil jo’ jun molam malaj Komonil re Tenq’ank?

Re aatinak chirix li esil a’in, naru ajwi’ xtz’ilb’aleb’ rix li osob’tesink li ke’ril li Awa’b’ej Eyring naq kixtaaqe lix na’leb’ li Awa’b’ej Thomas S. Monson chirix xtzolb’al lix Hu laj Mormon. K’a’ruheb’ li osob’tesink li qilom chaq rik’in xtzolb’al lix Hu laj Mormon?

M. Russell Ballard, “Toj chi uub’ej li b’eenik!”

Re xtikib’ankil jun aatinak chirix li raatin li Elder Ballard, naru taab’oq junaq chixwotzb’al k’a’ruhaq xk’ul naq wan sa’ b’e a’ut xk’e reetal naq maawa’ a’an li b’e naraj xk’amb’al. Chan ru neke’xkam rib’ li eetalil jo’ a’in rik’in li “qab’eenik” re sutq’iik rik’in li qaChoxahil Yuwa’? Toja’ naq eb’ li komon naru te’xsik’ li na’leb’ ut li tijom k’eeb’il xb’aan li Elder Ballard li naru toohe’xtenq’a chixnawb’al ma us li jayalil yooko chixk’amb’al sa’ li qayu’am. K’eheb’ xhoonal li komon chixtz’ilb’al rix sa’ xk’a’uxleb’ lix b’ehileb’ ut chi aatinak chirix chanru naru taqatenq’aheb’ ut taqawaklesiheb’ xch’ool li qakomon sa’eb’ lix “b’eenik” re sutq’iik rik’in li qaChoxahil Yuwa’.

Neil L. Andersen, “Lix yaab’ xkux li Qaawa’”

Maare eb’ li komon sa’ li Komonil re Tenq’ank malaj laa molam naru te’xwotz k’a’ruhaq xe’xk’ul li xe’reek’a wi’ naq jwal nim xwankil choq’ reheb’ jun esil re li jolomil ch’utub’aj-ib’. K’a’ut naq ninqeb’ xwankil li esil a’an? K’a’ru naxk’ut chiqu li Elder Andersen chirix lix aajelileb’ ru li esil re li jolomil ch’utub’aj-ib’ ut li yalok-q’e ut li nab’aanuman re xkawresinkileb’? Chan ru tixjal li nawom a’in lix anchalil qach’ool naqatzoleb’ wi’ ut naqapaab’eb’ wi’ li aatin a’in? K’oxla xtz’iib’ankileb’ junjunqeb’ li b’oqom re li jolomil ch’utub’aj-ib’ li toje’ xnume’. K’a’ru ak qab’aanuhom re xk’anjelankileb’ li b’oqom a’in?