Li loq’laj wa’ak—jun ak’ob’resink choq’re li aamej

Xb’aan li xCheryl A. Esplin

Xkab’ aj tenq’ aj k’ehol na’leb’ sa’ li Awa’b’ejil re li Tz’oleb’aal reheb’ li Kok’al

Li Musiq’ej nak’irtesin re ut na’ak’ob’resin re li qaam. Li yeechi’inb’il osob’tesihom re li loq’laj wa’ak a’an naq “taaruuq taawanq junelik lix Musiq’ [qik’in]”.

Jun ch’uut aj saaj ixq jun sut ke’xpatz’ we, “K’a’ru taawaj raj naq xanaw naq saaj ixqat laa’at?” Wi tinsume raj li patz’om a’an anajwan, tinye raj li na’leb’ a’in: “Nawaj raj naq sa’ lin ch’ajomil xintaw raj ru li xnimal xwankil li loq’laj wa’ak wi’chik chiru li xintaw chaq ru. Nawaj raj naq xintaw raj ru li loq’laj wa’ak jo’ ch’olob’anb’il xb’aan laj Elder Jeffrey R. Holland. A’an kixye, «Jun reheb’ li b’oqom li nachal rik’in li loq’laj k’anjel re loq’laj wa’ak, a’an naq chi tz’aqal a’an jun li hoonal re reek’ankil li Musiq’ej, jun loq’laj wotzok rik’in li choxahil, ut jun ak’ob’resink re li aamej»”.¹

Chan run naq taa’ok li loq’laj wa’ak jo’ “jun li hoonal re reek’ankil li Musiq’ej, jun loq’laj wotzok rik’in li choxahil, ut jun ak’ob’resink re li aamej” rajlal xamaan?

Li loq’laj wa’ak na’ok jo’ jun hoonal re xkawresinkil li Musiq’ej naq naqab’i li raatinul li tij re li loq’laj wa’ak ut naqa’ak’ob’resi li qasumwank. Re xb’aanunkil a’in, tento naq wan qach’ool chixk’ulb’al sa’ qab’een lix k’ab’a’ li Jesukristo.² Chirix li yeechi’ihom a’in, li Awa’b’ej Henry B. Eyring kixye: “A’an naraj naxye naq tento taqil qib’ jo’ reho A’an. Taqak’e A’an jo’ xb’eenil sa’ li qayu’am. Too’ajoq raj re li k’a’ru naraj A’an chiru li naqaj qajunes laa’o malaj li naxk’ut chiqu li ruchich’och’ naq taqaj raj”. ³

Naq naqak’ul li loq’laj wa’ak, naqak’e qib’ sa’ sumwank naq “junelik taajultiko’q qe”⁴ li Jesukristo. Sa’ li ewu rub’elaj naq kik’ehe’ chiru krus, li Kristo kixch’utub’ lix tzolom chixsutam ut kitikib’ank re li loq’laj wa’ak. Kixjachi ru li kaxlan wa, kirosob’tesi, ut kixye, “K’ulumaq, wa’omaq; a’in re xjultikankil lin tib’el li ninke’ choq’ xtojb’al eerix.”⁵ Chirix a’an kixchap jun uk’leb’ sek’ li vino, kib’antioxin, kixk’e reheb’ lix tzolom re te’ruk’a, ut kixye: “A’in re xjultikankil lin kik’el … , li hoyb’il choq’ re jo’ k’ihal li te’paab’anq re lin k’ab’a’ ”.⁶

Sa’ xyanqeb’ aj Nefita ut wi’chik sa’ lix K’ojob’ankil wi’chik lix Iglees sa’ roso’jikeb’ li kutan, kixye wi’chik naq taqak’ul li loq’laj wa’ak re xjultikankil A’an.⁷

Naq yooko chixk’ulb’al li loq’laj wa’ak, naqak’ut xyaalal chiru li Dios naq junelik taajultiko’q qe li Ralal, moko ka’aj ta wi’ chiru li ch’ina hoonal re li loq’laj wa’ak. A’in naraj naxye naq rajlal yooko chixk’eeb’al li qilob’aal sa’ li nak’utuk lix b’aanuhom ut lix tzol’leb’ li Kolonel re te’xb’eresi li qak’oxlahom, li qasik’om, ut li qab’aanuhom.⁸

Li tij re li loq’laj wa’ak naxjultika ajwi’ qe naq tento “taqapaab’ lix taqlahom”.⁹

Kixye li Jesus, “Wi nikineera, teepaab’ lin chaq’rab’ ”.¹⁰ Li loq’laj wa’ak naxk’e qe li hoonal re rilb’al sa’ li qaam ut li hoonal re xjalb’al qak’a’uxl ut rajom chiru li Dios. Xpaab’ankil li chaq’rab’ nak’amok xwankilal li evangelio sa’ li qayu’am ut taawanq chik li tuqtuukilal ut li musiq’ejil sa’ li qayu’am.

Li loq’laj wa’ak naxk’e li hoonal choq’ re reek’ankil li Musiq’ej naq yooko chixk’oxlankil lix xwankil chi kolok ut tojok-ix li Kolonel rik’in lix tojb’al rix li maak. Jun aj jolominel reheb’ li Saaj Ixq toja’ xtaw xna’leb’ chirix li metz’ew naqak’ul naq yooko chixyalb’al qaq’e chixk’ulb’al li loq’laj wa’ak. Yoo chixk’eeb’al xch’ool sa’ jun k’anjel re chaab’ilob’resink-ib’, ut kixk’e xch’ool chixjayalinkil rib’ sa’ li raatinul li tij ut b’ich re li loq’laj wa’ak.

Rajlal xamaan, xb’aanu jun tz’ilok-ix sa’ xk’ehil li loq’laj wa’ak. Xk’oxla li ink’a’ us xb’aanuhom, ut xk’e xch’ool chi chaab’ilo’k sa’ xamaan chal re. Xb’antioxin xb’aan naq xru chixjalb’al xk’a’uxl ut chi jo’kan taach’aje’q. Naq xk’oxla a’in li xk’ulman junxil, xye, “Xinb’aanu li jalb’a’-k’a’uxlej jo’ jun raqal re lix Tojb’al rix li Maak”.

Jun domingo chirix lix tz’ilok-ix, x’ok chi raho’k sa’ xch’ool ut chireek’ankil rahilal. Xril naq toj yoo chixb’aanunkil wi’chik ut wi’chik li ink’a’ us, rajlal xamaan. A’b’an, sa’ hoonal a’an xk’utb’esiman chiru naq yoo chixsachb’al sa’ xch’ool jun nimla raqal re lix Tojb’al rix li Maak—lix wankilal li Kolonel re xk’eeb’al li qawankilal. Xsach sa’ xch’ool li k’iila hoonal naq li Kolonel xtenq’an re chi wank jo’ aajman ru ut chi tenq’ank wi’chik chiru lix metz’ew xjunes rib’.

Rik’in li na’leb’ a’in, xk’oxla wi’chik li xamaan li xnume’. Xye: “Jun sahil ch’oolejil kisachok re lix rahil inch’ool jo’ xink’e reetal naq A’an xk’ehom we naab’al lin hoonal ut seeb’al. Xink’e reetal. Rik’in b’antioxink xink’e reetal naq wan inseeb’al chixnawb’al li rajom lin kok’al naq moko nak’utman ta sa’ junpaat. Xink’e reetal naq sa’ jun kutan ak jwal laatz’ ru, toj xinru chixtenq’ankil jun wamiiw rik’in li waatin aj kawob’resinel. Xink’ut chaq li yo’onihom sa’ jun hoonal li rajlal naxk’e chinb’aanunkil lix ka’pak’alil.

Xraq li raatin chixyeeb’al: “Naq xinb’antioxi re li Dios lix wankil li Kolonel re xk’eeb’al inwankilal sa’ inyu’am, sa wi’chik xweek’a chirix li jalb’a’-k’a’uxlej yookin wi’ ut xwil chi ub’ej sa’ li xamaan chal re rik’in ak’il inyo’onihom.”

Laj Elder Melvin J. Ballard kixk’ut chanru naq li loq’laj wa’ak taaruuq taa’ok jo’ jun hoonal re k’irtesink ut ch’ajob’resink. Kixye:

“Ani sa’ qayanq li ink’a’ nak’ob’ok re lix musiq’ rik’in aatin, k’oxlahom, malaj b’aanuhom, sa’ xyi jun Hilob’aal Kutan toj sa’ li jun? Naqab’aanu li k’a’ru nayot’e’wi’ li qach’ool ut naqasik’ lix kuyb’al li qamaak. … Li chanru naqak’ul xkuyb’al qamaak a’an … a’an xjalb’al qak’a’uxl chirix li qamaak, xpatz’b’al xkuyb’al qamaak rik’ineb’ li xoomaakob’k chiru ut xk’ulb’al li qakuyb’al rik’ineb’ ut chirix a’an xk’ulb’al li loq’laj wa’ak b’ar wi’, wi chi yaal xqayot’ qach’ool ut xqajal qak’a’uxl, taakuye’k qamaak, ut sa’ musiq’ejil taak’irtesiiq li qaam. ….

“Laa’in jun aj yehol nawom,” kixye laj Elder Ballard, “naq wan jun musiq’ej sa’ li k’anjel re li loq’laj wa’ak li naxk’e chixjunil li qaxaqalil chi xamamnak, li qajolom toj li qoq; nakaweek’a xk’irtesinkil lix k’ob’olal laa musiq’, ut na’isiik laa wiiq. Li k’ojob’ank ch’oolej ut li sahil ch’oolejil neke’chal rik’in li aamej li wan xkulub’ ut chi yaal naraj xtzekankil li musiq’ejil tzakemq.”¹¹

Lix k’ob’olal li qaam naru te’kirtesiiq ut te’ak’ob’resiiq moko ka’aj ta wi’ xb’aan naq li kaxlan wa ut li ha’ nokohe’xjultika lix mayej re tib’el ut kik’el li Kolonel a’b’anan xb’aan naq li eetalil a’in nokohe’xjultika ajwi’ a’anaq junelik li “yu’am wa’ ”¹² ut li “yo’yookil ha’ ”.¹³

Chirix xk’eeb’al li loq’laj wa’ak reheb’ laj Nefita, kixye li Jesus:

“Ani nawaʼok re li kaxlan wa aʼin, naxwaʼ xkomon intibʼel choqʼ re li raam; ut ani naʼukʼak re li viin aʼin, narukʼ xkomon inkikʼel choqʼ re li raam; ut li raam maajoʼqʼe taatzʼokaaq chi moko taachaqiq re; taanujaq bʼan.

“Anajwan, chirix naq li chʼutchʼuukil tenamit keʼwaʼak ut keʼukʼak chixjunilebʼ, kʼehomaq reetal, keʼnujak rikʼin li Musiqʼej.”¹⁴

Rik’in li aatin a’in, li Kristo naxk’ut chiqu naq li Musiq’ej nak’irtesin re ut na’ak’ob’resin re li qaam. Li yeechi’inb’il osob’tesihom re li loq’laj wa’ak a’an naq “taaruuq taawanq junelik lix Musiq’ [qik’in]”.¹⁵

Naq nink’ul li loq’laj wa’ak laa’in, wan naq nink’oxla jun jalam-uuch li naxk’ut li Kolonel waklesinb’il wi’chik chi yo’yo ut ye’b’il li ruq’, jo’ chanchan naq yo’on wan chiqak’ulb’al sa’ lix raarookil q’alunk. Ninra li jalam-uuch a’in. Naq nink’oxla sa’ xk’ehil li loq’laj wa’ak, nataqsiik li waam ut haye’ nawab’i li raatin li Kolonel: “Relik chi yaal, ninye chi yaal eere, wi texchalq wikʼin taawanq eeyuʼam chi junelik. Kʼehomaq reetal, yeʼbʼil li wuqʼ aj uxtaan eere, ut ani taaʼajoq re chalq, aʼan tinkʼul, ut osobʼtesinbʼilebʼ li nekeʼchal wikʼin”.¹⁶

Eb’ li wankeb’ rik’in li tijonelil re Aaron neke’ok jo’ reetalil li Kolonel naq yookeb’ chixkawresinkil, chirosob’tesinkil, ut chixjek’inkil li loq’laj wa’ak. Naq jun li wan rik’in li tijonelil naxye’ li ruq’ chixjek’inkil li loq’laj wa’ak qe, chanchan naq yoo chixye’b’al li ruq’ aj uxtaan li Kolonel xjunes rib’, chiqab’oqb’al li junjunq chi tz’aqonk sa’ li xnimal ru maatan re rahok li neke’chal rik’in lix mayej aj tojol-ix—li maatan re li jalok ch’oolej, li kuyuk maak, k’ojob’ank ch’oolej, ut li yo’onink.¹⁷

Naq naqak’oxla rajlal li xnimal xwankil li loq’laj wa’ak, loq’aq chik ut nim chik xwankil choq’ qe. A’in li kixye jun yuwa’b’ej 96 chihab’ wan re naq kixpatz’ li ralal, “At inyuwa’, k’a’ut naq nakatxik sa’ Iglees? Mutz’ aawu, tz’ap aaxik, ut ch’a’aj chawu li b’eek. K’a’ut naq nakatxik sa’ Iglees?” Kichaq’ok ut kixye li yuwa’b’ej. “A’ li loq’laj wa’ak. Ninxik re xk’ulb’al li loq’laj wa’ak.”

Chowulaq chiqajunjunqal sa’ li ch’utam re li loq’laj wa’ak chi kawresinb’ilo chixk’ulb’al “chi tz’aqal jun li hoonal re reek’ankil li Musiq’ej, jun loq’laj wotzok rik’in li choxahil, ut jun ak’ob’resink re li [qaam]”.¹⁸

Ninnaw naq yo’yookeb’ li qaChoxahil Yuwa’ ut li Kolonel. Ninb’antioxin re li hoonal naxk’e li loq’laj wa’ak re taqeek’a lix rahom choq’ qe ut re xk’ulb’al li Musiq’ej. Sa’ xk’ab’a’ li Jesukristo, amen.