Toj taqach’utub’ qib’ wi’chik

Xb’aan li Awa’b’ej Thomas S. Monson

Chiqak’oxlaheb’ li yaalalil xqatzol chaq, ut che’tenq’a qe chi wank jo’ tzolom nim chik xkawilal qach’ool.

Ex was wiitz’in, chaq’al ru li wiib’ kutan li xonume’ wi’ chirab’inkil li musiq’anb’il aatin. Xtoch’e li qach’ool ut xniman li qapaab’aal naq yooko chixk’ulb’al li musiq’ej li xwan kiq’in chiru lix ch’utamil li ch’utub’aj-ib’. Naq yooko chi raq’ek anajwan, naqab’antioxi re li qaChoxahil Yuwa’ li k’iila roso’btesinkil choq’ qe.

Li chaq’al ru b’ichank ut wajb’ak li xqab’i sa’ li junjunq chi ch’utam xe’waklesin ut xe’musiq’an qe. Eb’ li tij li xe’k’eeman xoxjilosi rik’in li choxa.

Ma tinruuq tink’e xb’antioxinkil chixjunil li Iglees reheb’ li xe’raq’e xk’anjel sa’ li ch’utub’aj-ib’ a’in. Taqak’oxlaheb’ naq maa’aniheb’ chik. Ninqeb’ lix b’aanuhom ut lix k’anjel sa’ lix k’anjel li Qaawa’ ut te’wanq xwankil chiru k’iila tasal tenamit li toj te’chalq.

Chosutq’iiq sa’ li qochoch chi k’eek’o li qach’ool chiqachaab’ilob’resinkil qib’. Chiqak’ut xchaab’ilal qach’ool chiru li qas qiitz’in. Chiqaye’ li quq’ re xtenq’ankileb’ li qas qiitz’in, moko ka’aj ta wi’ li qakomon, a’b’anan chixjunileb’ li maji’ qakomon. Naq yooko chixnawb’aleb’ ru, chiqanimaheb’ ru.

Wankeb’ li aniheb’ li wankeb’ xch’a’ajkilal wulaj wulaj. Chiqak’ut chiruheb’ naq yooko chixk’oxlankileb’ ut taqaj xtenq’ankileb’. Naq taqach’olani qib’ chiqib’il qib’, too’osob’tesiiq.

Chijultiko’q qe li tiixeb’ ut li ink’a’ neke’ru chi elk sa’ kab’l. Naq yooko chirula’aninkileb’, te’xk’e reetal naq raab’ileb’ ut ninqeb’ xtz’aq. Chiqataaqe li taqlank re “xtenq’ankileb’ li q’uneb’ xmetz’ew, taqsi li uq’ej li nalukta, ut k’e xmetz’ew li xb’een aqej li maak’a’ xmetz’ew.”¹

Tiikaq ru qach’ool ut li qab’aanuhom, naq yooko chixyalb’al qaq’e chixsik’b’al li us sa’ chixjunil hoonal ut sa’ chixjunil na’ajej. Chowanq jo’ xtzolom li Jesukristo nim qapaab’aal, reetalilaqo li tiikilal, chi jo’kan yooko chi ok jo’ “chahim sa’ ruchich’och’.”²

Ex was wiitz’in, ninb’antioxi eere lee tij choq’ we laa’in. Nikine’xkawresi ut neke’xwaklesi inch’ool naq yookin chixyalb’al inq’e chi anchal in ch’ool ut chi anchal inmetz’ew chixb’aanunkil li rajom li Dios ut chi k’anjelak chiru a’an ut cheru ajwi’ laa’ex.

Naq noko’el sa’ li ch’utub’aj-ib’ a’in, nintz’aama li rosob’tesinkil li choxa sa’ eeb’een chejunjunqalex. Li wankex chirix kab’l, chexsutq’iiq chi tuqtu sa’ lee rochoch. Chiqak’oxlaheb’ li yaalalil xqatzol chaq, ut che’tenq’a qe chi wank jo’ tzolom nim chik xkawilal qach’ool wi’chik chiru naq maji’ kitiqla li ch’utub’aj-ib’ a’in.

Toj retaal taqach’utub’ qib’ wi’chik sa’ waqib’ po, nintz’aama naq te’wanq li rosob’tesinkil li Qaawa’ sa’ eeb’een, ut chi ch’olch’o, sa’ qab’een chiqajunilo, ut chi jo’kan ninb’aanu sa’ lix santil k’ab’a’—a’ li Jesukristo, li Qawaa’ut aj Kolol qe—amen.