Kimqex ut toxeeril

xb’aan laj Elder David A. Bednar

re lix molameb’ li Kab’laju chi Apostol

Lix Iglees li Jesukristo junelik a’an ut junelik a’anaq jun iglees aj k’amol aatin.

Tinye li waatin reheb’ li ani moko komoneb’ ta sa’ Lix Iglees li Jesukristo reheb’ laj Santil Paab’anel sa’ Rosoj’ikeb’ li Kutan. Tinsume jun patz’om li maare xepatz’: “K’a’ut naq eb’ laj Santil Paab’anel sa’ Roso’jikeb’ li Kutan xikenaqeb’ xch’ool chixyeeb’al we k’a’ru neke’xpaab’, ut chinb’oqb’al chi tzolok chirix lix iglees?

Nintz’aama naq chiwanq lix Musiq’ li Qaawa’ wik’in, re tin’aatinak chi chaab’il, ut re teetaw ru chi tz’aqal naq ninsume li xnimal ru patz’om a’in.

Jun xtaqlahom li Dios

Eb’ lix tzolom li Jesukristo junelik xe’wan ut junelik te’wanq choq’ kawil ch’oolejil aj k’amol aatin. Jun aj k’amol aatin a’an jun li nataaqenk re li Kristo ut naxch’olob’ xyaalal naq a’an li Kolonel, ut naxjultika li yaal chirix lix evangelio.

Lix Iglees li Jesukristo junelik a’an ut junelik a’anaq jun iglees aj k’amol aatin. Eb’ li komon sa’ lix Iglees li Kolonel xe’xk’ulub’a lix teneb’ankileb’ naq te’tenq’anq sa’ xtz’aqob’resinkil ru li taqlahom kixk’e li Qaawa’ reheb’ lix apostol, jo’ chanru tz’iib’anb’il sa’ li Ak’ Chaq’rab’:

“Ayuqex b’i’, ut k’ehomaqeb’ choq’ intzolom chixjunileb’ li tenamit. Teekub’siheb’ xha’ sa’ xk’ab’a’ li Yuwa’b’ej, li K’ajolb’ej ut li Santil Musiq’ej,

“ut k’utumaq chiruheb’ xpaab’ankil chixjunil li xexintaqla wi’. Chenawaq naq laa’in wanqin eerik’in chixjunil li kutan toj sa’ roso’jik li ruuchich’och’ ” (Mateo 28:19–20).

Eb’ laj Santil Paab’anel sa’ Roso’jikeb’ li kutan neke’xk’ulub’a li taqlahom a’in re xtzolb’al chixjunileb’ li tenamit chirix li Qaawa’ Jesukristo ut lix evangelio li k’ojob’anb’il wi’chik. Laa’o naqapaab’ naq li Iglees li kixxaqab’ li Kolonel najter ak xaqab’anb’il wi’chik xb’aan a’an sa’ li ruchich’och’ sa’ roso’jik li kutan. Eb’ li tzol’leb’, li raqal chi na’leb’, li wankilal, li k’ojob’anb’il k’anjel, ut li sumwank re lix evangelio neke’tawman anajwan sa’ lix Iglees.

Naq nekexqab’oq chi xik chiqix sa’ li iglees, malaj chi tzolok rik’ineb’ li misioneer, moko k’ayink ta yooko. Jo’ komon sa’ li iglees, ink’a’ naqak’ul junaq qamaatan, chi moko nak’eeman qe junaq ch’ina punto sa’ jun li choxahil batz’unk. Ink’a’ yal naqasik’ naq te’nimanq rajlankil li ani wankeb’ sa’ li qa’Iglees. Ut sa’ xb’een chixjunil, ink’a’ naqaj xminb’al eeru chixpaab’ankil li k’a’ru naqapaab’. Yooko cheb’oqb’al chirab’inkil li yaal k’utb’esinb’il wi’chik chirix lix evangelio li Jesukristo, re texruuq chi tzolok, k’oxlaak, tijok, ut xnawb’al eejunes ma yaal li k’a’ru yooko chixk’utb’al cheru.

Maare junjunq eere tixye, “Ak ninpaab’ li Jesus ut ninb’aanu li k’a’ru kixk’ut,” malaj “Laa’in ink’a’ ninnaw ma wan ta jun li Dios.” Li qab’oqom maawa’ re xkub’sinkil xwankil lee paab’aal, malaj li k’a’ru xetzol sa’ lee yu’am. K’amomaq chaq chixjunil li nekenaw naq yaal, chaab’il, ut nimajel ru—ut yalomaq rix li qaatin. Jo’ chanru naq li Jesus kixye reheb’ wiib’ lix tzolom, “Kimqex ut toxeeril,” (Juan 1:39), laa’o ajwi’ naqatz’aama cheru naq texchalq ut toxeril ma yaal naq lix evangelio li Jesukristo, li k’ojob’anb’il wi’chik, tixnimob’resi ut tixk’e chik xwankil li k’a’ru ak nekepaab’ naq yaal.

Relik chi yaal, naqeek’a li qateneb’ankil chixk’amb’al li esil a’in rik’in li junjunq tenamit, junkab’al, aatinob’aal ut teepal. Ut a’an li yooko chixb’aanunkil rik’in numenaq 88,000 chi misioneer li yookeb’ chi k’anjelak sa’ 150 chi nimla tenamit sa’ li ruchich’och’. Eb’ li winq ut ixq a’in neke’xtenq’aheb’ li komon sa’ li qa’Iglees chixtz’aqob’resinkil ru lix taqlankil li junjunq, k’eeb’il xb’aan li Dios, re xjultikankil lix evangelio li Jesukristo li maak’a’ roso’jik (chi’ilmanq Tz ut S 68:1).

Maawa’ ka’ajwi’ jun musiq’ejil teneb’ank

A’ut ink’a’ naqach’olob’ li esil a’in yal re xb’aanunkil jun li qamusiq’ejil teneb’ankil. Naqaj b’an xwotzb’al eerik’in lix evangelio li Jesukristo li k’ojob’anb’il wi’chik, sa’ xk’aba’ naq eb’ li yaal a’in xninqaleb’ ru choq’ qe. Maare naru ninch’olob’ cheru k’a’ut naq k’eek’o qach’ool chixch’olob’ankil cheru li k’a’ru naqapaab’, rik’in xyeeb’al resil li k’a’ru xink’ul junjunq chihab’ chaq wochb’een li wixaqil, rik’in wiib’ li qalal.

Sa’ jun ewu, laa’in wochb’een li xSusan chiru li rilob’aal li qochoch yooko chaq chirilb’aleb’ wiib’ li qalal li yookeb’ chi batz’unk chirix kab’l. Naq yookeb’ chi batz’unk, li iitz’inb’ej xtoch’ rib’ b’ayaq. Xqak’e reetal naq moko ra ta lix toch’olal, ut xqak’e qach’ool naq ink’a’ taqaseeb’a qib’ chixtenq’ankil. Xqaj rilb’al ma xkana sa’ xch’ooleb’ li al li k’a’ru xqak’ut chaq chiruheb’ chirix li chaab’il ch’oolej rik’ineb’ li ras riitz’in. Rik’in li k’a’ru xk’ulman, wan k’a’ru xqatzol laa’o.

Li asb’ej xk’ojob’ xch’ool li riitz’in, ut xtenq’a chi ok sa’ li ochoch. Li xSusan ut laa’in xqaxaqab’ qib’ chixk’atq li k’ubleb’aal wa, re rilb’al k’a’ru taak’ulmanq, re naq tooruuq sa’ junpaat chixtenq’ankileb’ wi maare wan k’a’ruhaq te’xk’ul malaj wi ra te’b’aanu rib’.

Li asb’ej xjilosi chaq jun li siiy sa’ xna’aj li ha’. Xtaqe’ sa’ xb’een li siiy, xtaqsi li riitz’in sa’ xb’een li siiy, xte li ha’, ut x’ok chixhoyb’al naab’al li k’aj xab’on sa’ li toch’olal sa’ xtel li riitz’in. A’an xyal xch’ajb’al li tz’aj chi q’un. Li k’a’ru xb’aanu li iitz’inb’ej naq tenq’anb’il chi jo’kan, ka’ajwi’ naru xyeeb’al rik’in li aatin natawman sa’eb’ li loq’laj hu: “Ut taawanq rajb’al naq te’xq’ich re, ut te’yaab’aq, ut te’ayaynaq, ut te’xk’uxuxi ruch re” (Mosiah 16:2). Ut k’a’jo’ naq xq’ich li re li ch’ina al a’an!

Naq xchoyman li ch’ajok, kichaqihob’resiik li uq’ej rik’in jun li t’ikr. Timil timil xch’ana li yaab’ak. Chirix a’an li asb’ej xtaqe’ sa’ xb’een li meex, xte jun kaxon, ut xtaw jun li tubo wan wi’ li loq’b’il b’an. Us ta yal ka’ch’in lix toch’olal li riitz’in, li asb’ej kixyul ka’ch’in chik ma chixjunil li b’an sa’ li tubo, chiru chixjunil lix tel li riitz’in. Ink’a’ chik xtikla li japok-e, xb’aan naq li iitz’inb’ej nawulak chiru li b’an chi mas wi’chik chiru li ch’aje’k rik’in xxab’onil li sek’.

Li asb’ej xsutq’i sa’ li kaxon li xtaw wi’ chaq li ch’ina b’an, ut kixtaw jun li ak’ karton wan wi’ li lanleb’ t’ikr. A’an xrisiheb’ chaq li lanleb’ t’ikr sa’ xhuhil, ut xk’eheb’ chiru chixjunil li ruq’ li riitz’in, chalen rit li ruq’ toj sa’ xkux li ruq’. Naq ak tuqub’anb’il chi jo’kan li ch’a’ajkilal, chi wan li xab’on, li b’an, ut xhuhil li lanleb’ t’ikr chi jek’inb’il sa’ li k’uub’leb’aal wa, xe’kub’e chaq sa’ li siiy chi se’ se’ li rilob’aaleb’.

Nim xwankil li k’a’ru xk’ulman chirix a’an. Li ch’ina iitz’inb’ej xxokeb’ chixjunil li lanleb’ t’ikr li xe’kana, ut li tubo xwan wi’ chaq li b’an, ut xko’o chirix kab’l. A’an sa’ junpaat xsik’eb’ li ramiiw ut x’ok chixk’eeb’al li b’an ut chixlanb’al li t’ikr chiru li ruq’eb’. Li xSusan ut laa’in xsach qach’ool chan ru naq sa’ junpaat ut chi anchal xch’ool xb’aanu a’in.

K’a’ut naq li ch’ina al xb’aanu li kixb’aanu? K’ehomaq reetal naq sa’ junpaat kiraj sa’ xch’ool xk’eeb’al reheb’ li ramiiw li k’a’ru xtenq’ank re a’an naq wan xrahil. Ink’a’ x’ajman ru xpatz’b’al, xtz’aamankil, xtaqlankil malaj xq’unb’esinkil xch’ool re tixb’aanu. Ak re naq kiraj wotzok xb’aan naq tenq’anb’il chaq xb’aan li chaab’ilal li xb’aanuman re a’an.

Laa’o li ak xooninqan naqab’aanu ajwi’ tz’aqal chi jo’kan naq naqataw junaq b’an li xkotzok re junaq rahilal li xqakuy chiru k’iila kutan, malaj naq nak’eeman qe jun li na’leb’ li nokoxtenq’a chixk’ulb’al li qach’a’ajkilal rik’in kawil ch’oolej, malaj li qak’a’uxlej rik’in kuyum. Ak qe naq naqaj xwotzb’al rik’in li qas qiitz’in li k’a’ru naxk’e li qana’leb’ malaj li natenq’ank qe.

A’in ajwi’ nak’ulman rik’in li na’leb’ li k’a’jo’ nim xwankil ut xkawilal choq’ re li qamusiq’. Qayehaq, wan jun esil sa’ jun raqal chi loq’laj hu, lix Hu laj Mormon nayeeman re, li na’aatinak chirix jun matk’ kixk’ul laj Lehi, jun najter profeet ut aj b’eresinel. Li kiril laj Lehi a’an li che’ re li yu’amej, li wan choq’ reetalil “lix rahom li Dios” li “q’axal wi’chik atawaal sa’ xb’een chixjunil li k’a’aq re ru” ut “li q’axal nasahob’resink ch’oolej” (1  Nefi 11:22–23; chi’ilmanq ajwi’1  Nefi 8:12, 15).

Laj Lehi kixch’olob’ xyaalal:

“Ut kik’ulman naq kink’amok b’e ut kinyal li ruuchinihom, ut kink’e reetal naq q’axal ki’, chiru chixjunil li ak inyalom chaq. Relik chi yaal, ut kink’e reetal naq saq li ruuchinihom, naxq’ax chixjunil li saqilal li wilom chaq.

“Ut naq kinyal li ruuchinihom, kixnujob’resi li waam rik’in sahil ch’oolejil q’axal nim; jo’kan naq kin’ok chirajb’al naq lin junkab’al te’okenq ajwi’ chixyalb’al” (1 Nefi 8:11–12 tiqb’il xkawilal li aatin).

K’a’jo’ naq na’ilman lix rahom li Dios choq’ re li ralal xk’ajol sa’ lix k’anjel sa’ li ruchich’och’, lix mayej re xtojb’al rix li maak, ut lix waklijik chi yo’yo li Qaawa’ Jesukristo. Li ru li che’ naru nak’oxlaman jo’ reetalil li osob’tesink nachal xb’aan lix tojb’al rix li maak xb’aan li Kolonel.

Naq laj Lehi kixyal li ru li che’ ut kixk’ul li nimal sahil ch’oolej, a’an tikto kichal rajom chixwotzb’al a’an rik’in lix junkab’al, re xtenq’ankileb’. Chi jo’kan, naq a’an xjilosi rib’ rik’in li Kristo, kixjilosi ajwi’ rib’ rik’in xraab’al ut k’anjelak chiru li ras riitz’in.

Jun chik esil nim xwankil sa’ lix Hu laj Mormon naxye li k’a’ru kixk’ul jun li winq, aj Enos xk’ab’a’, chirix naq kitijok chi anchal xch’ool ut ki’ab’iik ut kisumeek lix tij xb’aan li Dios.

A’an kixye:

“Ut kitz’okak li waam; ut kinwiq’la chiru laj yiib’ahom we, ut kin’elajin chiru rik’in tijok ut tz’aamank rik’in nimla metz’ew choq’ re li waam laa’in; ut chiru chixjunil li kutan kin’elajin chiru; relik chi yaal, ut naq ki’ok q’ojyin toj kintaqsi xyaab’ inkux taqe’q, re naq toj sa’ choxa kiwulak.

“Ut kichal jun xyaab’ kuxej wik’in, kixye: At Enos, kuyb’il aamaak, ut laa’at tat-osob’tesiiq.

“Ut laa’in, aj Enos, kinnaw naq li Dios ink’a’ kiru chi tik’ti’ik; jo’kan naq oso’jenaq li maak sa’ inb’een.

“Ut laa’in kinye: At Qaawa’, chan ru nab’aanuman?

“Ut a’an kixye we: Sa’ xk’ab’a’ laa paab’aal chirix li Kristo, li maajun wa aawab’ihom chi moko aawilom. ...Jo’kan ut, ayu, laa paab’aal xk’irtesink aawe.

“Anajwan, kik’ulman naq chirix naq kiwab’i li aatin a’in kin’ok chireek’ankil watawom choq’ re lix chaab’ilaleb’ li was wiitz’in aj Nefita; jo’kan naq kinhoy x’anchalil li waam chiru li Dios choq’ reheb’” (Enos 1:4–9; tiqb’il xkawilal li aatin).

Naq laj Enos kixjilosi rib’ rik’in li Qaawa’ “chi anchal li rajom xch’ool” (2  Nefi 31:13), kiniman ajwi’ li rajom choq’ re xchaab’ilaleb’ lix junkab’al, eb’ li ramiiw ut li ras riitz’in.

Li k’a’ru naqatzol rik’in li wiib’ chi esil a’in, a’an naq aajel ru naq li junjunq tixk’ul rosob’tesinkil sa’ xyu’am rik’in li lix tojb’al rix li maak xb’aan li Jesukristo, ut chirix a’an nachal jun li anchal ch’oolejil k’anjel chiru li qas qiitz’in, li ink’a’ nab’aanuman yal re xb’aanunkil. Jo’ chanru laj Lehi, laj Enos, ut eb’ li al sa’ li esil xinye, laa’o jo’ komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan ak xqeek’a li rahil ch’oolejil nachal naq moko k’ojk’o ta qamusiq’ ut naq wan li maak. Xqeek’a ajwi’ li ch’aje’k, lix tuqtuukil li qak’a’uxl, lix k’irtesinkil ut rak’ob’resinkil li qamusiq’, ut lix k’amb’al li qab’e li ka’ajwi’ natawman rik’in xtzolb’al ut xyu’aminkil lix evangelio li Kolonel.

Lix tojb’al rix li maak xb’aan li Jesukristo nak’anjelak re qach’ajb’al ut risinkinkil qatz’ajnil, naxk’e li b’an re xb’anb’al lix toch’olal li qamusiq’ ut risinkil li maak, ut naxkol qix re naq tiikaqo chi paab’ank, maak’a’ naxye ma sa malaj ra li wanko wi’.

Wan jun li yaal li tz’aqal re ru

Choq’ eere laa’ex li qakomon ut qamiiw li maawa’ex komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, xinyal inq’e chixch’olob’ankil cheru k’a’ut naq wanko choq’ aj k’amol aatin.

Wan jun li yaal li tz’aqal re ru, us ta li ruchich’och’ naxhob’ ut naxtz’eqtaana li k’a’ru tz’aqal re ru. Sa’ junaq kutan chalel li junjunq chi xb’een aqej taab’ase’q, ut li junjunq chi ru’uj aq’ej tixch’olob’ “naq li Jesukristo a’an li Qaawa’, re li xnimal xloq’al li Dios Yuwa’b’ej” (Filipenses 2:10–11). Li Jesukristo a’an tz’aqal li Junaj Yo’lajenaq chiru li Junelikil Yuwa’b’ej. Jo’ komon sa’ lix Iglees, naqach’olob’ xyaalal naq a’an yo’yo ut k’ojob’anb’il wi’chik lix Iglees chi tz’aqal ru sa’eb’ li roso’jikil kutan a’in.

Wi nekexqab’oq chixtzolb’al ut chixyalb’al rix li esil naqaye, a’an xb’aan li chaab’ilal xb’aanu lix evangelio li Jesukristo sa’ li qayu’am laa’o. Wan naq nach’a’ajko’ b’ayaq chiqu ut ink’a’ sa na’el naq naqayal qaq’e chixb’aanunkil. Li rajom qach’ool a’an xwotzb’al eerik’in li yaal li q’axal nim xwankil choq’ qe laa’o.

Jo’ jun reheb’ lix Apostol li Qaawa’, ut chi anchal lix metz’ew li waam, ninch’olob’ xyaalal naq A’an tz’aqal Dios, ut naq yo’yo. Ut nink’e jun eeb’oqb’al, “kimkex ut toxeeril” (Jwan 1:39 ) sa’ lix loq’laj k’ab’a’ li Qaawa’ Jesukristo, amen.