« ថ្ងៃទី ១៣–១៩ ខែ មករា នីហ្វៃទី ១ ៨–១០ ៖ ‹ មកទទួលទានផ្លែឈើនោះ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៣–១៩ ខែ មករា នីហ្វៃទី ១ ៨–១០ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
សុបិនរបស់លីហៃ ដោយ ស្ទីវិន អែលឡយ ណែល
ថ្ងៃទី ១៣–១៩ ខែ មករា
នីហ្វៃទី ១ ៨–១០
« មកទទួលទានផ្លែឈើនោះ »
ក្រៅពីការមើលឃើញខ្លួនរបស់អ្នកនៅក្នុងការនិមិត្តរបស់លីហៃ សូមព្យាយាមមើលឃើញកុមារដែលអ្នកបង្រៀននៅក្នុងនោះផងដែរ ។ តើការនិមិត្តនេះអនុវត្តចំពោះពួកគេយ៉ាងដូចម្ដេច ?
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមទាក់ទងកុមារពីរបីនាក់ជាមុន ហើយសូមឲ្យពួកគេគិតអំពីបទពិសោធន៍ ឬខគម្ពីរនានា ដែលពួកគេអាចចែកចាយ ដែលបានជួយពួកគេឲ្យទទួលសេចក្តីស្រឡាញ់នៃព្រះ ។
បង្រៀនគោលលទ្ធិ ៖ កុមារតូចៗ
ព្រះបន្ទូលនៃព្រះដឹកនាំខ្ញុំទៅរកព្រះ ហើយជួយខ្ញុំឲ្យទទួលអារម្មណ៍នៃសេចក្តីស្រឡាញ់របស់ទ្រង់ ។
នៅក្នុងការនិមិត្តរបស់លីហៃ យើងត្រូវបានអញ្ជើញឲ្យទទួលទាននូវសេចក្តីស្រឡាញ់របស់ព្រះ ដែលមានដើមឈើ និងផ្លែរបស់វាជានិមិត្តរូប ។ តើអ្នកអាចជួយកុមារឲ្យទទួលយកការអញ្ជើញនេះដោយរបៀបណា ?
សកម្មភាពដែលអាចជ្រើសរើស
-
សូមអញ្ជើញកុមារឲ្យជួយអ្នកប្រាប់រឿងអំពីការនិមិត្តរបស់លីហៃមកពី នីហ្វៃទី ១ ៨:១០–៣៤ ។ ដើម្បីជួយពួកគេឲ្យស្រមៃឃើញអំពីរឿងនេះ អ្នកអាចបង្ហាញរូបភាពការនិមិត្តរបស់លីហៃ ( សូមមើល គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ឬរូបភាពនៅក្នុង « ជំពូកទី ៦ ៖ សុបិនរបស់លីហៃ » ( ដំណើររឿងព្រះគម្ពីរមរមន ៣៤–៣៦ ឬវីដេអូដែលដូចគ្នានេះនៅលើគេហទំព័រ ChurchofJesusChrist.org ) ។ សូមប្រាកដថា កុមារដឹងថា ដំបងដែកតំណាងឲ្យបន្ទូលរបស់ព្រះ ដែលយើងអាននៅក្នុងព្រះគម្ពីរ និងស្ដាប់ឮពីពួកព្យាការីដែលនៅរស់ ។ សូមជួយពួកគេឲ្យយល់ថា ដើមឈើតំណាងឲ្យសេចក្តីស្រឡាញ់របស់ព្រះសម្រាប់ពួកយើង ។
-
សូមយកខ្សែមួយដែលតំណាងឲ្យដំបងដែកនៅក្នុងការនិមិត្តរបស់លីហៃ ។ សូមឲ្យកុមារកាន់វា នៅពេលអ្នកដឹកពួកគេជុំវិញបន្ទប់ ទៅកាន់រូបភាពនៃដើមឈើ ។ សូមជួយពួកគេឲ្យយល់ថា បន្ទូលរបស់ព្រះនាំឲ្យយើងខិតជិតទៅទ្រង់ គឺដូចជាខ្សែដែលតំណាងឲ្យដំបងដែកដែលបាននាំយើងទៅដើមនោះដែរ ។ ដើម្បីបង្ហាញថា ដើមឈើតំណាងឲ្យសេចក្តីស្រឡាញ់នៃព្រះ អ្នកអាចបង្ហាញរូបភាពនៃអ្វីៗដែលព្រះបានប្រទានដល់យើង ដែលបង្ហាញអំពីសេចក្តីស្រឡាញ់របស់ទ្រង់សម្រាប់យើង ដូចជា ព្រះអង្គសង្គ្រោះ ក្រុមគ្រួសាររបស់យើង និងពិភពលោកដ៏ស្រស់ស្អាតនេះ ។
-
សូមយកផ្លែឈើមួយចំនួនដែលមានរូបបេះដូងបិទភ្ជាប់ជាមួយវា ។ សូមឲ្យផ្លែឈើមួយចំណិតទៅកុមារភ្លក់ ហើយសួរពួកគេអំពីផ្លែឈើដែលពួកគេចូលចិត្ត ។ សូមពន្យល់ថា ដើមឈើនៅក្នុងការនិមិត្តរបស់លីហៃមានផ្លែដែលមានរសជាតិផ្អែមបំផុត ដែលលោកធ្លាប់បានភ្លក់ ហើយវាបានបំពេញព្រលឹងរបស់លោកដោយអំណរ ។ គឺដូចជាផ្លែឈើដ៏មានរសជាតិផ្អែមដែលធ្វើឲ្យយើងរីករាយដែរ នោះយើងនឹងទទួលអារម្មណ៍រីករាយ នៅពេលយើងធ្វើតាមព្រះយេស៊ូវ ហើយរស់នៅជាមួយព្រះវរបិតាសួគ៌ម្តងទៀត ។
-
សូមអាន នីហ្វៃទី ១ ៨:១២ ហើយអញ្ជើញកុមារឲ្យស្តាប់ដោយយកចិត្តទុកដាក់រកមើលនូវអ្វីដែលលីហៃចង់ធ្វើ បន្ទាប់ពីលោកបានភ្លក់ផ្លែឈើនោះ ។ សូមឲ្យកុមារឆ្លាស់វេនគ្នាសម្តែងធ្វើជាលីហៃ ដោយអញ្ជើញមនុស្សដទៃឲ្យមកទទួលទានផ្លែឈើនោះ ។ តើយើងអាចធ្វើអ្វីខ្លះ ដើម្បីអញ្ជើញមនុស្សដទៃឲ្យមក ហើយរីករាយនឹងពរជ័យនៃដំណឹងល្អជាមួយយើង ?
ព្រះនឹងបើកសម្ដែងសេចក្ដីពិតដល់ខ្ញុំ ដោយព្រះចេស្ដានៃព្រះវិញ្ញាណបរិសុទ្ធ ។
បន្ទាប់ពីស្តាប់ឮការនិមិត្តរបស់ឪពុកលោករួច នីហ្វៃមានបំណងប្រាថ្នាមួយដែលយើងទាំងអស់គ្នាគួរតែមាន—គឺបំណងប្រាថ្នាដើម្បីដឹងនូវសេចក្តីពិតដោយខ្លួនលោកផ្ទាល់ ។
សកម្មភាពដែលអាចជ្រើសរើស
-
សូមអាន នីហ្វៃទី ១ ១០:១៩ ហើយអញ្ជើញកុមារឲ្យលើកដៃរបស់ពួកគេ នៅពេលពួកគេឮពាក្យ « បើកបង្ហាញ » និង « ព្រះវិញ្ញាណបរិសុទ្ធ » ។ សូមជួយកុមារឲ្យយល់ពីខគម្ពីរនេះ ដែលបង្រៀនថា ព្រះវិញ្ញាណបរិសុទ្ធនឹងជួយយើងឲ្យដឹងចម្លើយចំពោះសំណួររបស់យើង ។ ដើម្បីជួយកុមារឲ្យស្រមៃឃើញអំពីអត្ថន័យដែលថា សេចក្តីពិតត្រូវបាន « បើកបង្ហាញ » សូមយកភួយដែលបត់មួយមក ហើយដាក់រូបភាពមួយរបស់ព្រះអង្គសង្គ្រោះនៅក្នុងភួយនោះ ហើយសូមឲ្យកុមារលាភួយនោះ ។
-
សូមច្រៀងចម្រៀងជាមួយកុមារអំពីការស្វែងរកសេចក្តីពិត ដូចជាបទ « ស្វែងរក គិត អធិស្ឋាន » ( សៀវភៅចម្រៀងកុមារ ទំព័រ ៦៦ ) ។ សូមបង្ហាញរូបភាពនានាដែលបង្ហាញអំពីពាក្យនៅក្នុងចម្រៀងនោះ ដើម្បីជួយកុមារឲ្យចាំអំពីរបៀបដែលព្រះវិញ្ញាណបរិសុទ្ធបង្រៀនយើង ។
-
សូមគិតពីការចែកចាយបទពិសោធន៍មួយ នៅពេលដែលព្រះវិញ្ញាណបរិសុទ្ធបានជួយអ្នកឲ្យដឹងអំពីអ្វីមួយដែលពិត ។ សូមប្រាប់កុមារពីមូលហេតុដែលព្រះវិញ្ញាណបរិសុទ្ធមានបន្ទូលមកកាន់អ្នក ។
បង្រៀនគោលលទ្ធិ ៖ កុមារធំៗ
ព្រះបន្ទូលនៃព្រះដឹកនាំខ្ញុំទៅរកព្រះ ហើយជួយខ្ញុំឲ្យទទួលអារម្មណ៍នៃសេចក្តីស្រឡាញ់របស់ទ្រង់ ។
នៅពេលកុមារនៅក្នុងថ្នាក់របស់អ្នករៀនអំពីការនិមិត្តរបស់លីហៃ សូមលើកទឹកចិត្តពួកគេឲ្យសិក្សាបន្ទូលនៃព្រះ ហើយចែកចាយសេចក្តីស្រឡាញ់នៃព្រះជាមួយមនុស្សដទៃ។
សកម្មភាពដែលអាចជ្រើសរើស
-
នៅពេលកុមារអានខគម្ពីរដែលបានជ្រើសរើសមកពី នីហ្វៃទី ១ ៨ សូមអញ្ជើញពួកគេឲ្យស្វែងរកព័ត៌មានលម្អិតមកពីខគម្ពីរទាំងនោះនៅក្នុងរូបភាពនៃការនិមិត្តរបស់លីហៃ ( ដូចជារូបភាពមួយនៅក្នុង គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ ឬសូមឲ្យពួកគេគូររូបភាពនៅលើក្ដារខៀនអំពីព័ត៌មានលម្អិតដែលពួកគេបានអាន ។ បន្ទាប់មក សូមជួយកុមារឲ្យរកមើលអ្វីដែលតំណាងឲ្យនិមិត្តរូបនៅក្នុងសុបិននោះ ( សូមមើល នីហ្វៃទី ១ ១១:២១–២២; ១២:១៦–១៨; ១៥:២៣–៣៣, ៣៦ ) ។
-
ប្រសិនបើអាច សូមយកបំណែកដែកមួយ ឬលោហធាតុផ្សេងទៀតមកថ្នាក់រៀន ហើយអញ្ជើញកុមារឲ្យពិពណ៌នាអំពីវត្ថុធាតុមួយចំនួនរបស់វា និងអ្វីៗដែលវាអាចត្រូវបានប្រើប្រាស់ដើម្បីធ្វើវត្ថុនានា ។ តើព្រះបន្ទូលនៃព្រះដូចជាដំបងដែកយ៉ាងដូចម្តេច ? តើយើងរកឃើញបន្ទូលរបស់ព្រះនៅឯណា ? ហេតុអ្វីដំបងដែកមានសារៈសំខាន់នៅក្នុងការនិមិត្តរបស់លីហៃ ?
រូបភាពលីហៃបរិភោគផ្លែនៃដើមជីវិតលីហៃបរិភោគផ្លែនៃដើមជីវិត ។ ដើមជីវិត ដោយ ម៉ាគឺស អាឡែន វីនសែន
-
សូមអញ្ជើញកុមារឲ្យសរសេរនៅលើក្រដាសមួយសន្លឹកនូវបទពិសោធន៍ នៅគ្រាដែលព្រះបន្ទូលរបស់ព្រះបានជួយពួកគេឲ្យដឹងអ្វីដែលពួកគេគួរតែធ្វើ ឬជួយពួកគេឲ្យទទួលអារម្មណ៍ខិតកាន់តែជិតព្រះវរបិតាសួគ៌ ។ នៅពេលពួកគេចែកចាយអ្វីដែលពួកគេបានសរសេរ សូមអញ្ជើញពួកគេឲ្យមូរក្រដាសរបស់ពួកគេទៅជារាងដូចដំបង ។ អ្នកអាចថែមទាំងបិទបង់ស្អិតលើ « ដំបង » របស់កុមារឲ្យជាប់ជាមួយគ្នា ដើម្បីធ្វើជាតំណាងនៃដំបងដែកនៅក្នុងសុបិនរបស់លីហៃ ។
-
សូមអញ្ជើញកុមារមួយចំនួនឲ្យអាន នីហ្វៃទី ១ ៨:១០–១២ ហើយពិពណ៌នាអំពីអ្វីដែលលីហៃបានឃើញ ។ សូមឲ្យកុមារដទៃទៀតអាន នីហ្វៃទី ១ ១១:២០–២៣ ហើយពិពណ៌នាអំពីអ្វីដែលនីហ្វៃបានឃើញ ។ ហេតុអ្វីទេវតាបានបង្ហាញនីហ្វៃនូវព្រះឱរសយេស៊ូវ ដើម្បីបង្រៀនលោកអំពីសេចក្តីស្រឡាញ់នៃព្រះ ? ដើម្បីជួយឆ្លើយសំណួរនេះ សូមអានជាមួយគ្នានូវ យ៉ូហាន ៣:១៦ ឬច្រៀងជាមួយគ្នានូវចម្រៀងមួយបទអំពីព្រះអង្គសង្គ្រោះ ដូចជាបទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០–២១ ) ។ សូមប្រាប់កុមារអំពីរបៀបដែលអ្នកបានទទួលសេចក្តីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ ដែលជាព្រះរាជបុត្រាទ្រង់នៅក្នុងជីវិតរបស់អ្នក ។
-
សូមសរសេរនៅលើក្ដារខៀន ៖ តើយើងរៀនអ្វីខ្លះពីគំរូរបស់លីហៃ ? សូមអញ្ជើញកុមារឲ្យគិតអំពីការនិមិត្តរបស់លីហៃ និងសរសេរចម្លើយឲ្យបានច្រើនតាមដែលពួកគេអាចឆ្លើយបាន ។ សូមឲ្យពួកគេចែកចាយចម្លើយរបស់ពួកគេ ជាមួយមិត្តក្នុងថ្នាក់ ។ បន្ទាប់មក សូមឲ្យកុមារគិតអំពីនរណាម្នាក់ ដែលពួកគេអាចចែកចាយអំណរនៃដំណឹងល្អនេះជាមួយបាន ។
ព្រះនឹងបើកសម្ដែងសេចក្ដីពិតដល់ខ្ញុំ ដោយព្រះចេស្ដានៃព្រះវិញ្ញាណបរិសុទ្ធ ។
ប្រសិនបើយើងទូលសូមព្រះវរបិតាសួគ៌ដោយសេចក្តីជំនឿ នោះសេចក្តីពិតនឹង « បានបើកបង្ហាញដល់ [ យើង ] ដោយព្រះចេស្ដានៃព្រះវិញ្ញាណបរិសុទ្ធ » ( នីហ្វៃទី ១ ១០:១៩ ) ។ តើអ្នកអាចជួយកុមារដែលអ្នកបង្រៀនឲ្យយល់ពីសេចក្ដីពិតនេះដោយរបៀបណា ?
សកម្មភាពដែលអាចជ្រើសរើស
-
សូមអញ្ជើញកុមារឲ្យនិយាយអំពីរបៀបដែលពួកគេអាចរកឃើញចម្លើយចំពោះសំណួរមួយ ។ សូមលើកទឹកចិត្តកុមារឲ្យអាន នីហ្វៃទី ១ ១០:១៧–១៩ និង ១១:១ ។ តើនីហ្វៃនឹងនិយាយដូចម្តេច ប្រសិនបើនរណាម្នាក់សួរលោកអំពីរបៀបដើម្បីស្វែងរកចម្លើយចំពោះសំណួរអំពីដំណឹងល្អ ? តើព្រះបង្រៀនយើងតាមរយៈព្រះវិញ្ញាណបរិសុទ្ធយ៉ាងដូចម្តេច ? ( សូមមើល គ. និង ស. ៨:២ ) ។
-
សូមឲ្យកុមារនិយាយអំពីគ្រាមួយ នៅពេលដែលព្រះវិញ្ញាណបរិសុទ្ធបានជួយពួកគេឲ្យដឹងអំពីអ្វីមួយដែលពិត ។ សូមឲ្យពួកគេនឹកស្រមៃថា ពួកគេមានមិត្តម្នាក់ដែលគិតថា គាត់ពុំអាចទទួលចម្លើយតាមរយៈព្រះវិញ្ញាណបរិសុទ្ធបានឡើយ ។ តើពួកគេអាចចែកចាយអ្វីខ្លះមកពី នីហ្វៃទី ១ ១០:១៧–១៩ និង ១១:១ ដើម្បីជួយមិត្តម្នាក់នោះ ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តឲ្យកុមារប្រើទំព័រសកម្មភាពសប្ដាហ៍នេះដើម្បីចែកចាយជាមួយគ្រួសាររបស់ពួកគេ នូវអ្វីដែលពួកគេបានរៀនអំពីការនិមិត្តរបស់លីហៃអំពីដើមជីវិត ។
ការកែលម្អការបង្រៀនរបស់យើង
កុមាររៀនតាមវិធីជាច្រើន ។ កុមារចូលចិត្តការរៀនសូត្រតាមរយៈបទពិសោធន៍ជាច្រើន ។ សូមប្រើសកម្មភាពនានាដែលជួយពួកគេឲ្យធ្វើចលនាបាន ប្រើអស់ទាំងញាណរបស់ពួកគេ ហើយសាកល្បងរឿងថ្មីៗ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥–២៦ ) ។