« ថ្ងៃទី ១៣–១៩ ខែ មករា ។ នីហ្វៃទី ១ ៨–១០ ៖ ‹ មកទទួលទានផ្លែឈើ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៣–១៩ ខែ មករា ។ នីហ្វៃទី ១ ៨–១០ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
សុបិនរបស់លីហៃ ដោយ ស្ទីវិន ឡយ នៀល
ថ្ងៃទី ១៣–១៩ ខែ មករា
នីហ្វៃទី ១ ៨–១០
« មកទទួលទានផ្លែឈើ »
នៅពេលបងប្អូនអាន នីហ្វៃទី ១ ៨–១០ សូមពិចារណាថាមានសារលិខិតអ្វីខ្លះក្នុងការនិមិត្តរបស់លីហៃដែលអនុវត្តចំពោះបងប្អូន ។ សូមកត់ត្រាចំណាប់អារម្មណ៍ខាងវិញ្ញាណដែលបងប្អូនទទួលបាននៅក្នុងបទគម្ពីរសៀវភៅកំណត់ចំណាំរបស់បងប្អូន ឬធនធាននេះ ។
កត់ត្រាចំណាប់អារម្មណ៍របស់បងប្អូន
សុបិនរបស់លីហៃ—មានដំបងដែក អ័ព្ទនៃសេចក្ដីងងឹត អគារធំទូលាយ និងដើមឈើ ដែលមានផ្លែ « ផ្អែមបំផុត »— គឺជាការអញ្ជើញដ៏បំផុសគំនិតឲ្យមកទទួលពរជ័យនៃសេចក្ដីស្រឡាញ់ និងពលិកម្មដង្វាយធួនរបស់ព្រះអង្គសង្គ្រោះ ។ ទោះជាយ៉ាងណាក៏ដោយ សម្រាប់លីហៃ ការនិមិត្តនេះក៏ថ្លែងអំពីគ្រួសាររបស់គាត់ផងដែរ ៖ « ដោយសារការណ៍ដែលឪពុកបានឃើញ គឺជាហេតុដែលនាំឲ្យឪពុកមានសេចក្ដីត្រេកអររីករាយក្នុងព្រះអម្ចាស់ពីព្រោះតែនីហ្វៃ ហើយព្រមទាំងសាំផង ។… ប៉ុន្តែមើលចុះ លេមិន និងលេមយួល ឪពុកភ័យខ្លាចជាខ្លាំង ពីព្រោះតែកូន » ( នីហ្វៃទី ១ ៨:៣–៤ ) ។ នៅពេលលីហៃបញ្ចប់ការពិពណ៌នាអំពីការនិមិត្តរបស់គាត់ គាត់បានសូមអង្វរឲ្យលេមិន និងលេមយួល « ប្រុងស្ដាប់តាមពាក្យទាំងឡាយរបស់លោក ក្រែងព្រះអម្ចាស់ទ្រង់នឹងមេត្តាករុណាដល់ពួកគេ » ( នីហ្វៃទី ១ ៨:៣៧ ) ។ ទោះជាបងប្អូនបានសិក្សាការនិមិត្តរបស់លីហៃជាច្រើនដងក្ដី ក៏គ្រានេះចូរគិតអំពីវាតាមរបៀបដែលលីហៃបានធ្វើ—គឺគិតអំពីមនុស្សម្នាក់ដែលបងប្អូនស្រឡាញ់ ។ នៅពេលបងប្អូនធ្វើដូច្នោះ ភាពសុវត្ថិភាពរបស់ដំបងដែក ភាពគ្រោះថ្នាក់នៃអគារដ៏ធំទូលាយ និងភាពផ្អែមរបស់ផ្លែឈើនោះ នឹងមានអត្ថន័យថ្មី ។ ហើយបងប្អូននឹងយល់កាន់តែជ្រៅជ្រះ « អស់ទាំងអារម្មណ៍របស់មេបា [ ដ៏ ] ទន់ភ្លន់ » ដែលបានទទួលការនិមិត្តដ៏អស្ចារ្យនេះ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ព្រះបន្ទូលនៃព្រះដឹកនាំខ្ញុំទៅរកព្រះអង្គសង្គ្រោះ ហើយជួយខ្ញុំទទួលបានអារម្មណ៍នៃក្ដីស្រឡាញ់របស់ទ្រង់ ។
ការនិមិត្តរបស់លីហៃផ្ដល់ការអញ្ជើញមួយឲ្យឆ្លុះបញ្ចាំងអំពីកន្លែងរបស់បងប្អូន—ហើយបងប្អូននឹងទៅកន្លែងណា—នៅក្នុងការធ្វើដំណើរផ្ទាល់ខ្លួនរបស់បងប្អូនដើម្បីស្គាល់ព្រះអង្គសង្គ្រោះ ហើយដឹងពីសេចក្ដីស្រឡាញ់របស់ទ្រង់ ។ ប្រធាន ប៊យដ៏ ឃេ ផាកកឺ បានបង្រៀនថា ៖ « អ្នកប្រហែលជាគិតថា សុបិន ឬ ការនិមិត្តរបស់លីហៃមិនមានន័យពិសេសអ្វីសម្រាប់អ្នកនោះទេ ប៉ុន្តែវាពិតជាមានន័យ ។ អ្នកស្ថិតនៅក្នុងសុបិននោះ យើងទាំងអស់គ្នាស្ថិតនៅក្នុងសុបិននោះ ( សូមមើល នីហ្វៃទី ១ ១៩:២៣ ) ។ សុបិនរបស់លីហៃ ឬការនិមិត្តរបស់លីហៃអំពីដំបងដែក មាននូវអ្វីគ្រប់យ៉ាង … ដែលពួកបរិសុទ្ធថ្ងៃចុងក្រោយម្នាក់ចាំបាច់ត្រូវយល់ដឹងអំពីការសាកល្បងនៃជីវិត » ( « Lehi’s Dream and You » New Era ខែ មករា ឆ្នាំ ២០១៥ ទំព័រ ២ ) ។
របៀបមួយដើម្បីសិក្សា នីហ្វៃទី ១ ៨ អាចជាការបំពេញតារាងមួយដូចជាតារាងមួយដែលបង្ហាញនៅត្រង់នេះ ។ ដើម្បីយល់អំពីអត្ថន័យនៃនិមិត្តរូបទាំងឡាយ វានឹងជាជំនួយដើម្បីយោងទៅការនិមិត្តដែលនីហ្វៃបានឃើញ នៅពេលគាត់បានអធិស្ឋានសុំការយល់ដឹងអំពីការនិមិត្តរបស់ឪពុកគាត់—សូមមើលជាពិសេសនៅ នីហ្វៃទី ១ ១១:៤–២៥, ៣២–៣៦; ១២:១៦–១៨ និង ១៥:២១–៣៣, ៣៦ ។ នៅពេលបងប្អូនសិក្សាការនិមិត្តរបស់លីហៃ សូមពិចារណាអំពីអ្វីដែលព្រះអម្ចាស់សព្វព្រះទ័យចង់ឲ្យបងប្អូនរៀន ។
|
និមិត្តរូបមកពីការនិមិត្តរបស់លីហៃ |
អត្ថន័យ |
សំណួរត្រិះរិះ |
|---|---|---|
និមិត្តរូបមកពីការនិមិត្តរបស់លីហៃ ដើមឈើ និងផ្លែរបស់វា ( នីហ្វៃទី ១ ៨:១០–១២ ) | អត្ថន័យ | សំណួរត្រិះរិះ តើខ្ញុំកំពុងធ្វើអ្វីខ្លះដើម្បីអញ្ជើញអ្នកដទៃឲ្យទទួលទានសេចក្ដីស្រឡាញ់របស់ព្រះ ? |
និមិត្តរូបមកពីការនិមិត្តរបស់លីហៃ ទន្លេ ( នីហ្វៃទី ១ ៨:១៣ ) | អត្ថន័យ | សំណួរត្រិះរិះ |
និមិត្តរូបមកពីការនិមិត្តរបស់លីហៃ ដំបងដែក ( នីហ្វៃទី ១ ៨:១៩–២០, ៣០ ) | អត្ថន័យ | សំណួរត្រិះរិះ |
និមិត្តរូបមកពីការនិមិត្តរបស់លីហៃ អ័ព្ទនៃសេចក្ដីងងឹត ( នីហ្វៃទី ១ ៨:២៣ ) | អត្ថន័យ | សំណួរត្រិះរិះ |
និមិត្តរូបមកពីការនិមិត្តរបស់លីហៃ អគារដ៏ធំ ហើយទូលាយ ( នីហ្វៃទី ១ ៨:២៦–២៧, ៣៣ ) | អត្ថន័យ | សំណួរត្រិះរិះ |
និមិត្តរូបមកពីការនិមិត្តរបស់លីហៃ | អត្ថន័យ | សំណួរត្រិះរិះ |
សូមមើលផងដែរ ដេវីឌ អេ បែដណា « Lehi’s Dream: Holding Fast to the Rod » Ensign ឬ លីអាហូណា ខែ តុលា ឆ្នាំ ២០១១ ទំព័រ ៣៣–៣៧ ។
លីហៃកំពុងទទួលទានផ្លែនៃដើមជីវិត ផ្លែនៃដើមជីវិត ដោយ ម៉ារកឹស អាឡាន វិនសិន
ហេតុអ្វីនីហ្វៃធ្វើផ្ទាំងចំណារពីរឈុត ?
« គោលបំណងដ៏ឈ្លាសវៃ » របស់ព្រះអម្ចាស់នៅក្នុងការឲ្យនីហ្វៃបង្កើតកំណត់ត្រាពីរ បានបង្ហាញយ៉ាងច្បាស់នៅរាប់សតវត្សរ៍ក្រោយមក ។ បន្ទាប់ពីយ៉ូសែប ស្ម៊ីធ បានបកប្រែឯកសារសរសេរដោយដៃចំនួន ១១៦ សន្លឹកដំបូងនៃព្រះគម្ពីរមរមន គាត់បានឲ្យសន្លឹកទាំងនោះទៅ ម៉ាទិន ហារីស ដែលបានធ្វើឲ្យបាត់បង់វា ( សូមមើល គ. និង ស. ១០:១–២៣ ) ។ ប៉ុន្តែផ្ទាំងមួយឈុតទៀតរបស់នីហ្វៃបានធ្វើឡើងនៅពេលដំណាលគ្នានោះដែរ ហើយព្រះអម្ចាស់បានត្រាស់បង្គាប់ដល់យ៉ូសែប ស្ម៊ីធឲ្យបកប្រែផ្ទាំងទាំងនេះជាជាងបកប្រែអ្វីដែលបានបាត់នោះឡើងវិញ ( សូមមើល គ. និង ស. ១០:៣៨–៤៥ ) ។
សម្រាប់ព័ត៌មានបន្ថែមអំពីផ្ទាំងទាំងឡាយដែលបានលើកឡើងនៅក្នុង នីហ្វៃទី ១ ៩, សូមមើល « ការអធិប្បាយដ៏សង្ខេបអំពីព្រះគម្ពីរមរមន » នីហ្វៃទី ១ ១៩:១–៥; នីហ្វៃទី ២ ៥:២៩–៣២ និង ពាក្យសម្ដីនៃមរមន ១:៣–៩ ។
ពួកព្យាការីបុរាណបានដឹងអំពីបេសកកម្មរបស់ព្រះយេស៊ូវគ្រីស្ទ ហើយបានថ្លែងទីបន្ទាល់អំពីទ្រង់ ។
ដំណើររឿងអំពីការនិមិត្តរបស់លីហៃ ពិតជាធ្វើឲ្យមានចំណាប់អារម្មណ៍មួយអំពីគ្រួសាររបស់គាត់ ប៉ុន្តែគាត់នៅតែមានសេចក្ដីពិតដ៏អស់កល្បជានិច្ចដទៃទៀតដើម្បីបង្រៀនពួកគេអំពីបេសកកម្មរបស់ព្រះអង្គសង្គ្រោះ ។ នៅពេលបងប្អូនអាន នីហ្វៃទី ១ ១០:២–១៦ ចូរគិត អំពីមូលហេតុដែលព្រះអម្ចាស់សព្វព្រះទ័យចង់ឲ្យគ្រួសារលីហៃ—និងយើងទាំងអស់គ្នា—ដឹងអំពីសេចក្ដីពិតទាំងនេះ ។ សូមពិចារណាអំពីអ្វីដែលបងប្អូនអាចប្រាប់ដល់មនុស្សជាទីស្រឡាញ់ដើម្បីអញ្ជើញពួកគេឲ្យត្រឡប់មករកព្រះអង្គសង្គ្រោះ ។ បន្ទាប់ពីការសិក្សាអំពីការនិមិត្ត និងការបង្រៀនរបស់លីហៃ តើបងប្អូនទទួលបានការបំផុសអ្វីខ្លះ ដូចជានីហ្វៃ « ដោយព្រះចេស្ដានៃព្រះវិញ្ញាណបរិសុទ្ធ ? » ( នីហ្វៃទី ១ ១០:១៧ ) ។
ព្រះនឹងបើកសម្ដែងសេចក្ដីពិតដល់ខ្ញុំ បើខ្ញុំនឹងស្វែងរកសេចក្ដីពិតដោយឧស្សាហ៍ព្យាយាម ។
តើបងប្អូននឹងឆ្លើយតបយ៉ាងដូចម្ដេច នៅពេលបងប្អូនជួបនឹងគោលការណ៍ដំណឹងល្អមួយ ដែលបងប្អូនពុំយល់ ? សូមកត់ចំណាំអំពីភាពខុសគ្នារវាងរបៀបដែលនីហ្វៃបានឆ្លើយតបទៅនឹងការនិមិត្តរបស់លីហៃ ( សូមមើល នីហ្វៃទី ១ ១០:១៧–១៩, ១១:១ ) និងរបៀបដែលលេមិន និងលេមយួលបានឆ្លើយតប ( សូមមើល នីហ្វៃទី ១ ១៥:១–១០ ) ។ ហេតុអ្វីបានជាពួកគេឆ្លើយតបតាមរបៀបនេះ ហើយតើមានលទ្ធផលអ្វីខ្លះចំពោះការឆ្លើយតបរបស់ពួកគេនោះ ?
សូមពិចារណាធ្វើការសរសេរអំពីគ្រាមួយនៅពេលដែលបងប្អូនចង់ដឹងថាតើការបង្រៀនដំណឹងល្អមួយពិតឬយ៉ាងណា ។ តើមានដំណើរការអ្វីខ្លះ ដែលបងប្អូនបានធ្វើតាម បើប្រៀបធៀបទៅនឹងអ្វីដែលនីហ្វៃបានធ្វើ ?
សូមមើលផងដែរ នីហ្វៃទី ១ ២:១១–១៩, គោលលទ្ធិ និង សេចក្ដីសញ្ញា ៨:១–៣ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ១ ៨
សមាជិកគ្រួសារបងប្អូនអាចនឹងរីករាយចំពោះការដើរតួ អំពីការនិមិត្តរបស់លីហៃ ឬការគូររូប និងការប្រើគំរូរបស់ពួកគេប្រាប់អំពីរឿងនេះ ។ ឬបងប្អូនអាចបង្ហាញរូបភាពរបស់វិចិត្រករអំពីការនិមិត្តរបស់លីហៃ ដែលមានមកជាមួយនឹងមេរៀននេះ ហើយអញ្ជើញសមាជិកគ្រួសារឲ្យចង្អុលបង្ហាញនូវព័ត៌មានលម្អិត ហើយរកមើលបទគម្ពីរដែលពិពណ៌នាអំពីរឿងទាំងនេះតំណាងឲ្យអ្វី ។ ទំនុកតម្កើង « ដំបងដែក » ( ទំនុកតម្កើង លេខ ១៧២ ) គឺត្រូវជាមួយនឹងជំពូកនេះ ។ បងប្អូនក៏អាចមើលវីដេអូមួយអំពីការនិមិត្តរបស់លីហៃផងដែរ ( សូមមើលបណ្ដុំវីដេអូអំពីព្រះគម្ពីរមរមននៅលើ ChurchofJesusChrist.org ឬ កម្មវិធីបណ្ណាល័យដំណឹងល្អ ) ។
នីហ្វៃទី ១ ៨:១០–១៦
តើយើងអាចអញ្ជើញនរណាខ្លះឲ្យខិតមកជិតនឹងព្រះយេស៊ូវគ្រីស្ទ ហើយទទួលអារម្មណ៍ដឹងពីសេចក្ដីផ្អែមល្ហែមនៃសេចក្ដីស្រឡាញ់ទ្រង់ ? តើយើងអាចធ្វើអ្វីខ្លះដើម្បី« [ បោយដៃហៅ ] ពួកគេ » ?
នីហ្វៃទី ១ ៩:៥–៦
តើនៅពេលណាដែលយើងបានធ្វើតាមបទបញ្ញត្តិមួយដោយពុំបានយល់ដឹងពេញលេញអំពីហេតុផលនោះ ? តើយើងត្រូវបានប្រទានពរយ៉ាងដូចម្ដេចខ្លះ ?
នីហ្វៃទី ១ ១០:២០–២២
តើការពុំស្អាតខាងរូបកាយស្រដៀងគ្នានឹងការពុំស្អាតខាងវិញ្ញាណយ៉ាងដូចម្ដេច ? តើយើងអាចធ្វើអ្វីខ្លះ ដើម្បីប្រាកដថា យើងបន្ដស្អាតខាងវិញ្ញាណ ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អការបង្រៀនរបស់យើង
តើបទគម្ពីរអនុវត្តនៅក្នុងជីវិតរបស់យើងយ៉ាងដូចម្ដេច ? បន្ទាប់ពីការអានវគ្គបទគម្ពីរមួយរួចហើយ សូមអញ្ជើញសមាជិកគ្រួសារឲ្យចែកចាយអំពីរបៀបដែលវគ្គបទគម្ពីរអនុវត្តចំពោះពួកគេ ។ ឧទាហរណ៍ នៅពេលសមាជិកគ្រួសាររបស់បងប្អូនអាន នីហ្វៃទី ១ ៨:៣៣ ពួកគេអាចនឹងនិយាយអំពីរបៀបកុំឲ្យស្ដាប់តាមអស់អ្នកដែល « ចង្អុលមើលងាយ » ។
ដើមឈើជីវិត ដោយ អាវ៉ុន អូកឃឺសុន