« ថ្ងៃទី ២០–២៦ ខែ មករា ។ នីហ្វៃទី ១ ១១–១៥ ៖ ‹ ប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះ › » ចូរមកតាមខ្ញុំសម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២០–២៦ ខែ ខែ មករា ។ នីហ្វៃទី ១ ១១–១៥ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ផ្អែមជាងភាពផ្អែមទាំងអស់ ដោយ មីហ្គែល អ៊ែនចល ហ្គុងហ្សាឡេស រ៉ូមីអូ
ថ្ងៃទី ២០–២៦ ខែ មករា
នីហ្វៃទី ១ ១១–១៥
« ប្រដាប់អាវុធដោយសេចក្ដីសុចរិត និង ដោយព្រះចេស្ដានៃព្រះ »
តើបងប្អូនអាចមើលឃើញរូបបងប្អូននៅក្នុង នីហ្វៃទី ១ ១១–១៥ ដែរឬទេ ? តើវគ្គបទគម្ពីរអ្វីខ្លះនឹងមានតម្លៃបំផុតចំពោះបងប្អូន និងគ្រួសារ ?
កត់ត្រាចំណាប់អារម្មណ៍របស់បងប្អូន
នៅពេលព្រះមានកិច្ចការដ៏មហិមាឲ្យព្យាការីរបស់ទ្រង់ធ្វើ ជាញឹកញាប់ ទ្រង់ប្រទានដល់ព្យាការីនូវការនិមិត្តដ៏ធំមួយ ដើម្បីជួយគាត់យល់អំពីគោលបំណងរបស់ព្រះសម្រាប់បុត្រាបុត្រីទ្រង់ ។ ម៉ូសេបានមើលឃើញការនិមិត្តអំពី « ផែនដីនេះ និងអំពីបណ្ដាជនដែលអាស្រ័យនៅលើទីនោះ និងអំពីផ្ទៃមេឃ » ( ម៉ូសេ ១:៣៦ ) ។ សាវកយ៉ូហានបានមើលឃើញប្រវត្តិសាស្ត្រនៃពិភពលោក និងការយាងមកជាលើកទីពីររបស់ព្រះអង្គសង្គ្រោះ ( សូមមើល គម្ពីរវិវរណៈ ) ។ យ៉ូសែប ស្ម៊ីធ បានមើលឃើញព្រះវរបិតា និងព្រះរាជបុត្រា ( សូមមើល យ៉ូសែប ស្ម៊ីធ––ប្រវត្តិ ១:១៧–១៨ ) ។ លីហៃបានមើលឃើញការនិមិត្តមួយដែលបង្ហាញអំពីការធ្វើដំណើរដែលយើងត្រូវដើរឆ្ពោះទៅកាន់ព្រះអង្គសង្គ្រោះ និងសេចក្ដីស្រឡាញ់របស់ ទ្រង់ ។
ដូចបានកត់ត្រានៅក្នុង នីហ្វៃទី ១ ១១–១៤ នីហ្វៃបានមើលឃើញការបម្រើរបស់ព្រះអង្គសង្គ្រោះ អនាគតនៃកូនចៅរបស់លីហៃនៅក្នុងដែនដីសន្យា និងជោគវាសនាថ្ងៃចុងក្រោយនៃកិច្ចការរបស់ព្រះ ។ ការនិមិត្តនេះបានជួយរៀបចំនីហ្វៃឲ្យទទួលកិច្ចការដែលនៅខាងមុខគាត់ ហើយវាក៏អាចជួយរៀបចំបងប្អូន —ដ្បិតព្រះមានកិច្ចការមួយឲ្យបងប្អូនធ្វើនៅក្នុងនគររបស់ទ្រង់ ។ បងប្អូនស្ថិតនៅក្នុងចំណោម « ពួកបរិសុទ្ធក្នុងសាសនាចក្រនៃកូនចៀម » ដែលនីហ្វៃបានមើលឃើញ « អ្នកដែលបានខ្ចាត់ខ្ចាយពាសពេញលើផ្ទៃផែនដី ហើយពួកគេប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះ ដោយសិរីល្អដ៏អស្ចារ្យ » ( នីហ្វៃទី ១ ១៤:១៤ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ព្រះបានបញ្ជូនព្រះយេស៊ូវគ្រីស្ទមក ជាការបង្ហាញពីសេចក្ដីស្រឡាញ់របស់ទ្រង់ ។
ដើម្បីជួយនីហ្វៃយល់អំពីអត្ថន័យនៃដើមឈើដែលឪពុកគាត់បានមើលឃើញ នោះទេវតាមួយអង្គបានបង្ហាញគាត់ « ព្រះរាជបុត្រានៃព្រះវរបិតា » ( នីហ្វៃទី ១ ១១:២១ ) ។ រឿងនេះបាននាំឲ្យនីហ្វៃសន្និដ្ឋានថា ដើមឈើជាតំណាងឲ្យសេចក្ដីស្រឡាញ់របស់ព្រះ ។ ប៉ុន្ដែ ការនិមិត្តពុំទាន់ចប់នៅឡើយនោះទេ ។ នៅពេលបងប្អូនអាន ហើយពិចារណា នីហ្វៃទី ១ ១១ តើបងប្អូនរកឃើញថាមានអ្វីខ្លះដែលជួយបងប្អូនយល់អំពីមូលហេតុដែលព្រះយេស៊ូវគ្រីស្ទ គឺជាការបង្ហាញអំពីសេចក្ដីស្រឡាញ់របស់ព្រះ ?
ដើម្បីរៀនអំពីនិមិត្តរូបដទៃទៀតនៅក្នុងសុបិនរបស់លីហៃ សូមមើល នីហ្វៃទី ១ ១១:៣៥–៣៦; ១២:១៦–១៨ និង ១៥:២១–៣០ ។
សូមមើលផងដែរ យ៉ូហាន ៣:១៦ ។
ព្រះអម្ចាស់បានរៀបចំផ្លូវសម្រាប់ការស្ដារឡើងវិញ ។
នីហ្វៃនឹងពុំបានរស់នៅដើម្បីធ្វើសាក្សីច្រើនអំពីអ្វីដែលគាត់បានមើលឃើញក្នុងការនិមិត្តរបស់គាត់ទេ ។ តើបងប្អូនគិតថា ហេតុអ្វីវាមានតម្លៃចំពោះនីហ្វៃដើម្បីដឹងអំពីរឿងទាំងនេះ ? ហេតុអ្វីបានជាវាមានតម្លៃចំពោះ បងប្អូន ត្រូវស្គាល់រឿងទាំងអស់នេះ ? បងប្អូនប្រហែលជាអាចសួរសំណួរនេះរាល់ពេលដែលបងប្អូនអានអំពីអ្វីដែលនីហ្វៃបានមើលឃើញនៅក្នុងការនិមិត្តរបស់គាត់ ។
ទាំងនេះគឺជាព្រឹត្តការណ៍មួយចំនួនដែលនីហ្វៃបានមើលឃើញ ៖ អនាគតនៃប្រជាជនរបស់គាត់ ( សូមមើល ជំពូកទី ១២ ) ការធ្វើនិគមកិច្ចរបស់អាមេរិក និងបដិវត្តន៍ជនជាតិអាមេរិក ( សូមមើល ជំពូកទី ១៣:១២–១៩ ), ការក្បត់សាសនាដ៏ធំ ( សូមមើល ជំពូកទី ១៣:២០–២៩ ) និងការស្ដារឡើងវីញនៃដំណឹងល្អ ( សូមមើល ជំពូកទី ១៣:៣២–៤២ ) ។
តើ « សាសានាចក្រដ៏ធំ ហើយគួរខ្ពើមឆ្អើម » ដែលនីហ្វៃបានមើលឃើញជាអ្វី ?
អែលឌើរ ដាល្លិន អេក អូក បានពន្យល់ថា « សាសានាចក្រដ៏ធំ ហើយគួរខ្ពើមឆ្អើម » ដែលបានពិពណ៌នាដោយនីហ្វៃតំណាងឲ្យ « ទស្សនវិជ្ជា ឬអង្គការទាំងឡាយណាដែលជំទាស់នឹងជំនឿទៅលើព្រះ ។ ហើយ ‹ ការជាប់ជាឈ្លើយ › ដែល ‹ ព្រះវិហារ › នេះព្យាយាមនាំពួកបរិសុទ្ធទៅ នឹងពុំជាប់ឃុំខាងរូបកាយដូចជាការជាប់ជាឈ្លើយក្នុងគំនិតខុសឆ្គងនោះទេ » ( « Stand as Witnesses of God » Ensign ខែ មីនា ឆ្នាំ. ២០១៥ ទំព័រ ៣២ ) ។
តើបុរសដែលនីហ្វៃបានមើលឃើញជានរណា ដែលព្រះវិញ្ញាណ « យាងចុះមកសណ្ឋិតលើ » ហើយ« ចេញដំណើរឆ្លងកាត់ផ្ទៃទឹកដ៏ធំ » នោះ ?
នីហ្វៃបានមើលឃើញថា ព្រះវិញ្ញាណបរិសុទ្ធនឹងបំផុសគំនិតដល់ គ្រីស្ដូហ្វើរ ខូឡុំបឹស ឲ្យធ្វើដំណើរយ៉ាងល្បីល្បាញទៅកាន់ទ្វីបអាមេរិក ។ នៅថ្ងៃទី ១៤ ខែ មីនា ឆ្នាំ ១៤៩៣ ខូឡុំបឹស បានសរសេរអំពីការធ្វើដំណើរនេះថា « លទ្ធផលដ៏មហិមា និងអស្ចារ្យនេះ គឺពុំមែនទទួលបានដោយមកពីខ្លួនខ្ញុំឡើយ … ដ្បិតពុំមានបញ្ញាមនុស្សណាអាចយល់ដឹងបានឡើយ តែព្រះវិញ្ញាណនៃព្រះបានប្រទានដល់មនុស្ស ព្រោះព្រះនឹងលម្អៀងព្រះស្ដាប់ការអធិស្ឋានរបស់ពួកអ្នកបម្រើទ្រង់ ដែលស្រឡាញ់សិក្ខាបទទ្រង់ ទាំងបណ្ដាលឲ្យពួកគេអាចធ្វើរឿងដែលមើលទៅពុំអាចធ្វើទៅបានដោយមនុស្ស » ( The Annals of America [ Encyclopedia Britannica, Inc., 1976 ], 1:5 ) ។
គម្ពីរពួកបរិសុទ្ធបានស្ដារឡើងវិញនូវ « រឿងដ៏ច្បាស់ និងពិសេសៗ » ។
នីហ្វៃបានមើលឃើញនៅក្នុងការនិមិត្តថា ព្រះគម្ពីរបរិសុទ្ធ—ដែលគាត់បានពិពណ៌នា ជា « កំណត់ត្រានៃពួកសាសន៍យូដា »—ត្រូវ « ដកចេញនូវរឿងដ៏ច្បាស់ និងពិសេសៗចេញពី [ វា ] » ( នីហ្វៃទី ១ ១៣:២៣, ២៨ ) ។ ទោះជាយ៉ាងណា គាត់ក៏បានមើលឃើញផងដែរថា ព្រះនឹងស្ដាររឿងទាំងឡាយនេះតាមរយៈ « គម្ពីរដទៃទៀត » —គឺ ព្រះគម្ពីរមរមន និងគម្ពីរពួកបរិសុទ្ធថ្ងៃចុងក្រោយដទៃទៀត ( សូមមើល នីហ្វៃទី ១ ១៣:៣៩–៤០ ) ។ តើសេចក្ដីពិតដ៏មានតម្លៃមួយចំនួនដែលព្រះគម្ពីរមរមនជួយយើងឲ្យយល់បានកាន់តែច្បាស់មានអ្វីខ្លះ ? តើជីវិតរបស់បងប្អូនបានផ្លាស់ប្តូរយ៉ាងដូចម្តេចខ្លះ ដោយសារតែសេចក្ដីដ៏ច្បាស់ និងពិសេសៗត្រូវបានស្ដារឡើងវិញ ?
ព្រះគម្ពីរមរមនបានស្ដារឡើងវិញនូវសេចក្ដីពិតនៃដំណឹងល្អដែលបានបាត់បង់អំឡុងការក្បត់សាសនា ។
សូមមើលផងដែរ « Plain and Precious Truths » Ensign ខែ មីនា ឆ្នាំ ២០០៨, ទំព័រ ៦៨–៧៣; រ័សុល អិម ណិលសុន, « The Book of Mormon: What Would Your Life Be Like without It? » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៦០–៦៣ ។
ព្រះអម្ចាស់នឹងឆ្លើយតបដល់ខ្ញុំ បើខ្ញុំសូមដោយសេចក្ដីជំនឿដោយដួងចិត្តទន់ភ្លន់ ។
តើបងប្អូនធ្លាប់មានអារម្មណ៍ដូចជាបងប្អូនពុំទទួលបានវិវរណៈផ្ទាល់ខ្លួនសោះ—ថាព្រះពុំបានមានបន្ទូលមកកាន់បងប្អូនឬទេ ? តើនីហ្វៃបានឲ្យដំបូន្មានអ្វីខ្លះដល់បងប្រុសរបស់គាត់ នៅពេលពួកគេមានអារម្មណ៍ដូចនេះ ? តើបងប្អូនអាចអនុវត្តតាមដំបូន្មានរបស់នីហ្វៃនៅក្នុងជីវិតរបស់បងប្អូន ហើយអាចប្រើដំបូន្មានរបស់គាត់ដើម្បីជួយអ្នកដទៃដោយរបៀបណា ?
សូមមើលផងដែរ យ៉ាកុប ៤:៨; អាលម៉ា ៥:៤៦; ២៦:២១–២២ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ១ ១១–១៤
នៅពេលគ្រួសាររបស់បងប្អូនអានជំពូកទាំងនេះ យូរៗម្ដង សូមឈប់ ហើយសួរសំណួរទាំងនេះ ៖ តើនីហ្វៃបានមើលឃើញអ្វីខ្លះនៅក្នុងការនិមិត្តរបស់គាត់ ដែលអាចធ្វើឲ្យគាត់រីករាយ ? តើអ្វីខ្លះដែលធ្វើឲ្យគាត់សោកសៅ ? ហេតុអ្វីទៅ ?
នីហ្វៃទី ១ ១:២០–៤២
ដើម្បីជួយសមាជិកគ្រួសារឲ្យយល់អំពីតម្លៃនៃសេចក្ដីពិត « ដ៏ច្បាស់ និងពិសេសៗ » នៅក្នុងព្រះគម្ពីរមរមន សូមប្រៀបធៀបសារលិខិតដែលបានកត់ត្រាទុកច្បាស់ៗទៅនឹងសារលិខិតដែលច្របល់គ្នា ។ ហេតុអ្វីព្រះវរបិតាសួគ៌ចង់ឲ្យសេចក្ដីពិតរបស់ទ្រង់ត្រូវបានបង្រៀនដោយច្បាស់លាស់ដូច្នេះ ? សមាជិកគ្រួសារអាចថ្លែងទីបន្ទាល់អំពីសេចក្ដីពិត « ដ៏ច្បាស់ និងពិសេសៗ » មួយចំនួនដែលពួកគេបានរៀនមកពីព្រះគម្ពីរមរមន ។
នីហ្វៃទី ១ ១៤:១២–១៥
ហេតុអ្វីក៏យើង « ប្រដាប់អាវុធដោយសេចក្ដីសុចរិត និង ដោយព្រះចេស្ដានៃព្រះ » នៅពេលយើងរស់នៅស្មោះត្រង់តាមសេចក្ដីសញ្ញាជាមួយនឹងព្រះរបស់យើង ?
នីហ្វៃទី ១ ១៥:៨–១១
តើមានបទពិសោធន៍អ្វីខ្លះដែលគ្រួសាររបស់បងប្អូនអាចចែកចាយ នៅពេលពួកគាត់បាន « សូមដល់ព្រះអម្ចាស់ » ? តើយើងរៀនអ្វីខ្លះមកពីគំរូរបស់នីហ្វៃ ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អដល់ការសិក្សាផ្ទាល់ខ្លួន
សូមប្រើជំនួយការសិក្សា ។ លេខយោងទាំងឡាយ សេចក្តីណែនាំដល់បទគម្ពីរទាំងឡាយ និងជំនួយការសិក្សាដទៃទៀត ផ្ដល់ជាគំនិតយោបល់អំពីបទគម្ពីរទាំងឡាយ ។ ឧទាហរណ៍ តើលេខយោងអ្វីខ្លះជួយបងប្អូនឲ្យយល់អំពី នីហ្វៃទី ១ ១៤:២០–២១ ?
ការនិមិត្តរបស់នីហ្វៃអំពីម៉ារា ដោយ ជេមស៍ ចនសុន