« ថ្ងៃទី ១០–១៦ ខែ កុម្ភៈ នីហ្វៃទី ២ ៦–១០ ៖ ‹ ឱផែនការនៃព្រះរបស់យើងធំណាស់ហ្ន៎ ! › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ១០–១៦ ខែ កុម្ភៈ។ នីហ្វៃទី ២ ៦–១០ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ ដោយ ហារី អាន់ឌើរសិន

ថ្ងៃទី ១០–១៦ ខែ កុម្ភៈ

នីហ្វៃ ទី ២ ៦–១០

« ឱផែនការនៃព្រះរបស់យើងធំណាស់ហ្ន៎ ! »

នៅពេលអ្នកអាន នីហ្វៃទី ២ ៦–១០ សូមស្វែងរកការបំផុសគំនិតមកពីព្រះវិញ្ញាណអំពីអ្វីដែលត្រូវបង្រៀន ។ គម្រោងមេរៀននេះ និង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចបំផុសគំនិតបន្ថែមទៀត ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមលើកទឹកចិត្តកុមារឲ្យឆ្លាស់វេនគ្នាចែកចាយអ្វីដែលពួកគេបានរៀនអំពីព្រះយេស៊ូវគ្រីស្ទ និងដង្វាយធួនរបស់ទ្រង់ អំឡុងពេលសិក្សា នីហ្វៃទី ២ ៦–១០ រៀងៗខ្លួន ឬជាមួយគ្រួសាររបស់ពួកគេ ។

បង្រៀនគោលលទ្ធិ ៖ កុមារតូចៗ

នីហ្វៃទី ២ ៩:៧–១៣, ២០–២៣

ព្រះយេស៊ូវគ្រីស្ទសង្គ្រោះខ្ញុំពីអំពើបាប និងសេចក្តីស្លាប់ ។

តើអ្នកអាចប្រើ នីហ្វៃទី ២ ៩:៧–១៣ និង ២០–២៣ ដើម្បីជួយកុមារឲ្យយល់ថា ព្រះយេស៊ូវគ្រីស្ទសង្គ្រោះមនុស្សគ្រប់គ្នាពីសេចក្តីស្លាប់ ហើយធ្វើឲ្យយើងអាចប្រែចិត្តពីអំពើបាបដោយរបៀបណា ?

សកម្មភាពដែលអាចជ្រើសរើស

សូមប្រាប់កុមារនូវរឿងមួយអំពីបុគ្គលម្នាក់ដែលធ្លាក់ចូលទៅក្នុងរណ្តៅមួយយ៉ាងជ្រៅ ដែលគាត់ពុំអាចឡើងចេញពីរណ្តៅនោះវិញបាន ។ មានបុរសម្នាក់បានដើរកាត់នោះ ហើយបានលើកបុគ្គលនេះឡើងចេញពីរណ្តៅនោះ ។ អ្នកអាចគូររូបភាពអំពីរឿងនេះនៅលើក្តារខៀន ឬសម្តែងរឿងនេះជាមួយកុមារ ។ សូមពន្យល់ថា រណ្តៅនេះគឺដូចជាសេចក្តីស្លាប់ដូច្នោះ ហើយបុរសដែលបានជួយបុគ្គលនោះគឺជាដូចជាព្រះយេស៊ូវគ្រីស្ទ ដែលបានសង្គ្រោះមនុស្សទាំងអស់ពីសេចក្តីស្លាប់ដែរ តាមរយៈការផ្តល់ដល់ពួកយើងនូវអំណោយទាននៃការរស់ឡើងវិញ ។ សូមប្រាប់កុមារថា បុគ្គលដដែលនោះបានធ្លាក់ចូលក្នុងរណ្តៅមួយផ្សេងទៀត ។ ម្តងនេះអ្នកជួយសង្គ្រោះបានឲ្យជណ្តើរទៅបុគ្គលនោះ ដើម្បីប្រើឡើងចេញពីរណ្តៅមក ។ សូមពន្យល់ថា រណ្តៅនេះគឺដូចជាអំពើបាប ហើយជណ្តើរនោះគឺជាដង្វាយធួនរបស់ព្រះយេស៊ូវគ្រីស្ទ ដែលអនុញ្ញាតឲ្យយើងប្រែចិត្ត និងទទួលបានការអភ័យទោសពីអំពើបាបរបស់យើង ។ សូមអាន នីហ្វៃទី ២ ៩:២២–២៣ ហើយថ្លែងទីបន្ទាល់របស់អ្នកអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។
សូមច្រៀងចម្រៀងមួយបទអំពីសេចក្តីស្រឡាញ់របស់ព្រះយេស៊ូវគ្រីស្ទជាមួយគ្នា ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។ សូមអញ្ជើញកុមារឲ្យគូររូបភាពអំពីអ្វីៗដែលជួយពួកគេដឹងថា ព្រះអង្គសង្គ្រោះស្រឡាញ់ពួកគេ ។

នីហ្វៃទី ២ ៩:៤៩

« ចិត្តខ្ញុំត្រេកអរនឹងអំពើសុចរិត » ។

តើអ្នកអាចជួយលើកទឹកចិត្តកុមារដែលអ្នកបង្រៀនឲ្យ « [ ត្រេកអរ ] នឹងអំពើសុចរិត » ឬធ្វើតាមព្រះអម្ចាស់ដោយរីករាយយ៉ាងដូចម្តេច ? (នីហ្វៃទី ២ ៩:៤៩) ។

សកម្មភាពដែលអាចជ្រើសរើស

សូមអាន នីហ្វៃទី ២ ៩:៤៩ ឲ្យកុមារស្ដាប់ ហើយជួយពួកគេឲ្យរកឃើញ និងយល់អ្វីដែលយ៉ាកុបនិយាយថា គាត់ស្រឡាញ់ ហើយគាត់ស្អប់ ។ សូមចែកចាយស្ថានភាពនានាដែលកុមារម្នាក់ជ្រើសរើសជម្រើសល្អ ឬអាក្រក់ ហើយអញ្ជើញកុមារក្នុងថ្នាក់ឲ្យក្រោកឈរនៅពេលជម្រើសនោះនាំឲ្យមានសុភមង្គល ហើយឲ្យកុមារអង្គុយចុះ នៅពេលជម្រើសនោះនាំឲ្យកើតទុក្ខ ។ ហេតុអ្វីការជ្រើសរើសត្រឹមត្រូវនាំឲ្យយើងមានក្តីអំណរ ? តើអ្នកមានអារម្មណ៍រីករាយដោយសារអ្នកបានធ្វើការជ្រើសរើសត្រូវនៅពេលណា ?
សូមច្រៀងបទចម្រៀងអំពីអំណរដែលកើតមកពីការគោរពប្រតិបត្តិ ដូចជាបទ « ពេលយើងជួយ » ( សៀវភៅចម្រៀងកុមារ ទំព័រ ១០៨ ) ហើយសូមឲ្យកុមារស្តាប់រកអ្វីដែលធ្វើឲ្យពួកយើងរីករាយ ។ សូមឲ្យកុមារឆ្លាស់វេនគ្នាសម្ដែងធ្វើជាឪពុកម្តាយសុំឲ្យកុមារផ្សេងទៀតធ្វើអ្វីមួយ ។ សូមឲ្យកុមារផ្សេងទៀតអនុវត្តការគោរពតាមដោយក្ដីរីករាយ ។

បង្រៀនគោលលទ្ធិ ៖ កុមារធំៗ

នីហ្វៃទី ២ ៦; ៧:១–២

ព្រះអម្ចាស់នឹងបំពេញការសន្យារបស់ទ្រង់ជានិច្ច ។

ការយល់ដឹងថា ព្រះអម្ចាស់រក្សាការសន្យារបស់ទ្រង់ អាចជួយកុមារឲ្យស្ថាបនាសេចក្ដីជំនឿរបស់ពួកគេទៅលើទ្រង់ និងបង្កើនទំនុកចិត្តរបស់ពួកគេក្នុងការគោរពបទបញ្ញត្តិរបស់ទ្រង់ ។

សកម្មភាពដែលអាចជ្រើសរើស

សូមឲ្យកុមារនិយាយអំពីការសន្យាមួយចំនួនដែលពួកគេបានធ្វើ ដូចជាការសន្យាដែលពួកគេបានធ្វើជាមួយមិត្តភក្តិ ឬសេចក្តីសញ្ញាដែលពួកគេបានធ្វើនៅបុណ្យជ្រមុជទឹក ។ ហេតុអ្វីជួនកាល វាពិបាកដើម្បីរក្សាការសន្យារបស់យើង ? ហេតុអ្វីវាសំខាន់ដើម្បីរក្សាការសន្យារបស់យើង ? សូមអានឃ្លាដូចតទៅនេះ ៖ « ព្រះអម្ចាស់ដ៏ជាព្រះ ទ្រង់នឹងបំពេញសេចក្ដីសញ្ញាទាំងឡាយរបស់ទ្រង់ ដែលទ្រង់បានធ្វើជាមួយនឹងកូនចៅព្រះអង្គ » ( នីហ្វៃទី ២ ៦:១២ ) ។ សូមចែកចាយឧទាហរណ៍មួយអំពីរបៀបដែលព្រះបានរក្សាការសន្យារបស់ទ្រង់ ទោះបីជាពរជ័យនោះពុំបានកើតឡើងភ្លាមក្តី ។
សូមដាក់តាំងរូបភាពនៃព្រះយេស៊ូវនៅជាប់នឹងរូបថតរបស់កុមារម្នាក់ ។ សូមអាន នីហ្វៃទី ២ ៧:១ ហើយពន្យល់ថា នៅពេលរាស្ត្ររបស់ព្រះឈប់គោរពតាមដំណឹងល្អរបស់ទ្រង់ នោះវាហាក់ដូចជាពួកគេបាន « លះលែង » ពីទ្រង់ដូច្នោះ ។ សូមរំកិលរូបថតរបស់កុមារចេញឆ្ងាយពីរូបភាពរបស់ព្រះយេស៊ូវ ដើម្បីបង្ហាញថា នៅពេលយើងពុំរក្សាសេចក្តីសញ្ញារបស់យើង ដូចជាសេចក្តីសញ្ញានៃបុណ្យជ្រមុជទឹក នោះយើងញែកខ្លួនរបស់យើងចេញពីព្រះវរបិតាសួគ៌ និងព្រះអង្គសង្គ្រោះ ។ ( ដើម្បីរំឭកសេចក្តីសញ្ញានៃបុណ្យជ្រមុជទឹក សូមមើល គ. និង& ស. ២០:៣៧ ) ។ តើដង្វាយធួនរបស់ព្រះអង្គសង្គ្រោះធ្វើឲ្យយើងរំកិលខិតទៅជិតទ្រង់វិញយ៉ាងដូចម្តេច ? នៅពេលអ្នកពិភាក្សាអំពីរឿងនេះ សូមអញ្ជើញកុមារឲ្យរំកិលរូបភាពទាំងពីរឲ្យមកជិតគ្នាវិញ ។

នីហ្វៃទី ២ ៩:១០–២៣

ព្រះយេស៊ូវគ្រីស្ទសង្គ្រោះខ្ញុំពីអំពើបាប និងសេចក្តីស្លាប់ ។

តើអ្នកអាចប្រើ នីហ្វៃទី ២ ៩:១០–២៣ ដើម្បីជួយកុមារឲ្យដឹងថា ព្រះយេស៊ូវគ្រីស្ទគឺជាព្រះអង្គសង្គ្រោះដោយរបៀបណា ?

សកម្មភាពដែលអាចជ្រើសរើស

សូមឲ្យកុមារជួយអ្នកគូរផ្លូវមួយនៅលើក្តារខៀន ហើយអញ្ជើញពួកគេឲ្យបន្ថែមឧបសគ្គ ឬរនាំងបាំងផ្លូវមួយចំនួនដាក់នៅលើផ្លូវនោះ ។ សូមអាន នីហ្វៃទី ២ ៩:១០ ហើយអញ្ជើញកុមារឲ្យដាក់ឈ្មោះលើឧបសគ្គដែលមានលើផ្លូវជាមួយពាក្យមកពីខគម្ពីរនេះ ដែលពិពណ៌នាអំពីឧបសគ្គដែលអាចរារាំងយើងមិនឲ្យត្រឡប់ទៅកាន់ព្រះវិញ ។ បន្ទាប់មក សូមនិយាយអំពីរបៀបដែលព្រះយេស៊ូវគ្រីស្ទយកឈ្នះលើឧបសគ្គទាំងនេះសម្រាប់ពួកយើង ( សូមមើល នីហ្វៃទី ២ ៩:២១–២៣ ) ហើយនៅពេលអ្នកធ្វើដូច្នេះ សូមអញ្ជើញកុមារឲ្យលុបឧបសគ្គទាំងនោះចេញ ។
សូមបង្ហាញរូបភាពរបស់អ័ដាម និងអេវ៉ា ដូចជារូបភាព ការចាកចេញពីសួនច្បារអេដែន ( ChurchofJesusChrist.org ) ។ សូមពន្យល់ថា នៅពេលអ័ដាម និងអេវ៉ាបានបរិភោគផ្លែឈើ ដែលព្រះបានបង្គាប់ពួកគេកុំឲ្យបរិភោគនៅក្នុងសួនច្បារអេដែន នោះពួកគេបាននាំមកកាន់ពិភពលោកនូវអំពើបាប និងសេចក្តីស្លាប់ ។ សូមបង្ហាញរូបភាពរបស់ព្រះយេស៊ូវគ្រីស្ទ ។ ដើម្បីជួយកុមារឲ្យយល់អំពីរបៀបដែលព្រះយេស៊ូវបានយកឈ្នះលើអំពើបាប និងសេចក្តីស្លាប់ សូមប្រាប់រឿងអំពីបុគ្គលម្នាក់ដែលធ្លាក់ទៅក្នុងរណ្តៅ ដែលមាននៅក្នុងយោបល់សម្រាប់ការបង្រៀនដំបូងខាងក្រោមពាក្យ « កុមារតូចៗ » នៅក្នុងគម្រោងមេរៀននេះ ។ បន្ទាប់មក សូមអញ្ជើញកុមារឲ្យគូររូបភាពអំពីរឿងនោះ ឬសម្តែងរឿងនោះ ។ សូមអាន នីហ្វៃទី ២ ៩:២១–២៣ ហើយថ្លែងទីបន្ទាល់របស់អ្នកអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។
សូមជួយកុមារម្នាក់ៗឲ្យរកចម្រៀងមួយអំពីដង្វាយធួនរបស់ព្រះអង្គសង្គ្រោះទោះនៅក្នុង សៀវភៅទំនុកតម្កើង ឬ សៀវភៅចម្រៀងកុមារ ក្តី ( លិបិក្រមក្នុងសៀវភៅទាំងនោះអាចផ្តល់ជាអត្ថប្រយោជន៍ ) ។ សូមឲ្យកុមាររកមើល និងចែកចាយឃ្លានានាមកពីចម្រៀងនោះ ដែលពិពណ៌នាអំពីអ្វីដែលព្រះយេស៊ូវបានធ្វើសម្រាប់ពួកយើង ។ សូមឲ្យកុមារចែកចាយគំនិត និងអារម្មណ៍របស់ពួកគេអំពីដង្វាយធួនរបស់ព្រះអង្គសង្គ្រោះ ឬចែកចាយទីបន្ទាល់របស់អ្នក ។

នីហ្វៃទី ២ ៩:២០, ២៨–២៩, ៤២–៤៣

ខ្ញុំនឹងទទួលបានពរ នៅពេលខ្ញុំធ្វើតាមព្រះឱវាទរបស់ព្រះ ។

សូមជួយកុមារឲ្យស្ថាបនាគ្រឹះដ៏រឹងមាំនៃការទុកចិត្តលើព្រះ ប្រយោជន៍ឲ្យចំណេះដឹង និងសមត្ថភាពរបស់ពួកគេកើនឡើង នោះពួកគេនឹងបន្តពឹងផ្អែកលើទ្រង់ និងធ្វើតាមព្រះឱវាទរបស់ទ្រង់ទៀត ។

សកម្មភាពដែលអាចជ្រើសរើស

សូមអញ្ជើញកុមារឲ្យប្រាប់អ្នកអំពីអ្វីដែលពួកគេដឹងច្រើនបំផុត ដូចជាសៀវភៅ ឬការកម្សាន្តដែលពួកគេចូលចិត្ត ។ សូមឲ្យកុមារម្នាក់អាន នីហ្វៃទី ២ ៩:២០ ហើយថ្លែងទីបន្ទាល់ថា ព្រះ « [ ជ្រាប ] គ្រប់អស់ទាំងការណ៍ » ។ ហេតុអ្វីវាសំខាន់សម្រាប់យើងដើម្បីដឹងថា ព្រះជ្រាបការណ៍គ្រប់យ៉ាង ?
សូមឲ្យកុមារស្រមៃថា ពួកគេបានឮថា មិត្តម្នាក់និយាយថា បទបញ្ញត្តិ ឬការបង្រៀនរបស់សាសនាចក្រគឺជារឿងឆ្កួតលីលា ។ តើពួកគេនឹងនិយាយដូចម្តេចទៅកាន់មិត្តរបស់ពួកគេ ? ហេតុអ្វីវាសំខាន់ដើម្បីទុកចិត្តលើព្រះឱវាទរបស់ព្រះ ទោះបីយើងពុំយល់ពីវាទាំងស្រុងក្តី ? សូមលើកទឹកចិត្តកុមារឲ្យមើលនៅក្នុង នីហ្វៃទី ២ ៩:២០, ២៨–២៩ និង ៤២–៤៣ សម្រាប់ជាជំនួយជាមួយនឹងការពិចារណា និងការពិភាក្សាអំពីសំណួរទាំងនេះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមជួយកុមារឲ្យគិតអំពីវិធីនានាដែលពួកគេអាចបង្រៀនគ្រួសាររបស់ពួកគេ នូវអ្វីដែលពួកគេបានរៀនអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។ ឧទាហរណ៍ ពួកគេអាចប្រើទំព័រសកម្មភាពនាសប្ដាហ៍នេះ ដើម្បីពន្យល់អំពីរបៀបដែលព្រះអង្គសង្គ្រោះជួយយើងឲ្យយកឈ្នះលើអំពើបាប និងសេចក្តីស្លាប់ ។

ការកែលម្អការបង្រៀនរបស់យើង

សូមប្រើទំព័រសកម្មភាព ។ នៅពេលកុមារធ្វើការជាមួយទំព័រសកម្មភាព សូមប្រើពេលដើម្បីជួយពួកគេឲ្យឃើញអំពីរបៀបដែល សកម្មភាពនេះទាក់ទងនឹងគោលការណ៍នានាមកពីមេរៀន និងរបៀបដែលគោលការណ៍ទាំងនោះអនុវត្តបាននៅក្នុងជីវិតរបស់ពួកគេ ។

ទំព័រសកម្មភាព ៖ ព្រះយេស៊ូវគ្រីស្ទសង្គ្រោះយើងពីអំពើបាប និងសេចក្តីស្លាប់