« ថ្ងៃទី ១៧–២៣ ខែ កុម្ភៈ នីហ្វៃទី ២ ១១–២៥ ៖ ‹ យើងអររីករាយក្នុងព្រះគ្រីស្ទ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ១៧–២៣ ខែ កុម្ភៈ នីហ្វៃទី ២ ១១–២៥ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០

ថ្ងៃទី ១៧–២៣ ខែ កុម្ភៈ

នីហ្វៃទី ២ ១១–២៥

« យើងអររីករាយក្នុងព្រះគ្រីស្ទ »

ការរៀបចំបង្រៀនរបស់អ្នកចាប់ផ្ដើម ពេលអ្នកអាន នីហ្វៃទី ២ ១១–២៥ ។ ចូរមកតាមខ្ញុំ—សម្រាប់បុគ្គល និងក្រុមគ្រួសារ អាចជួយអ្នកឲ្យយល់ពីជំពូកទាំងនេះ ហើយគម្រោងមេរៀននេះអាចផ្ដល់នូវគំនិតបង្រៀននានាដល់អ្នក ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សូមរំឭកជាមួយកុមារអំពីអ្វីដែលពួកគេបានរៀនអំពីព្រះអង្គសង្គ្រោះ និងដង្វាយធួនរបស់ទ្រង់កាលពីសប្តាហ៍ ។ ប្រសិនបើពួកគេបានចែកចាយអ្វីដែលពួកគេបានរៀនជាមួយក្រុមគ្រួសាររបស់ពួកគេ សូមលើកទឹកចិត្តពួកគេឲ្យនិយាយអំពីរឿងនោះ ។

បង្រៀនគោលលទ្ធិ ៖ កុមារតូចៗ

នីហ្វៃទី ២ ១២:២–៣

ព្រះវិហារបរិសុទ្ធគឺជាដំណាក់របស់ព្រះអម្ចាស់ ។

ការព្យាកររបស់អេសាយអំពី « ភ្នំជាទីសាងព្រះវិហារនៃព្រះអម្ចាស់ » អាចជាឱកាសមួយដើម្បីបង្រៀនកុមារអំពីព្រះវិហារបរិសុទ្ធ និងជួយពួកគេឲ្យទន្ទឹងរង់ចាំការទៅទីនោះនាថ្ងៃណាមួយ ។

សកម្មភាពដែលអាចជ្រើសរើស

សូមឲ្យកុមារម្នាក់កាន់រូបភាពនៃព្រះវិហារបរិសុទ្ធ ( គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ មានរូបភាពមួយ ) ហើយសូមឲ្យកុមារចែកចាយអ្វីដែលពួកគេដឹងអំពីព្រះវិហារបរិសុទ្ធ ។ សូមអាន នីហ្វៃទី ២ ១២:៣ ហើយសូមពន្យល់ថា នៅក្នុងខគម្ពីរនេះ ព្យាការីម្នាក់ឈ្មោះអេសាយបានព្យាករថា នឹងមានព្រះវិហារបរិសុទ្ធជាច្រើននៅថ្ងៃចុងក្រោយ ។ សូមអានខគម្ពីរនោះម្តងទៀត ហើយគូសបញ្ជាក់ថា នៅពេលយើងទៅព្រះវិហារបរិសុទ្ធ នោះព្រះអម្ចាស់ « នឹងបង្រៀនយើងពីផ្លូវទាំងឡាយរបស់ទ្រង់ » ហើយជួយយើងឲ្យ « ដើរតាមផ្លូវទាំងឡាយរបស់ទ្រង់ » ។
សូមធ្វើផ្លូវមួយនៅលើកម្រាលឥដ្ឋ ហើយដាក់រូបភាពព្រះវិហារបរិសុទ្ធនៅខាងចុងផ្លូវនោះ ប៉ុន្តែសូមគ្របរូបភាពនោះទុកសិន ។ សូមឲ្យកុមារដើរនៅលើផ្លូវនោះ ហើយនៅពេលពួកគេដើរ សូមជួយពួកគេឲ្យនិយាយឃ្លា « ដើរតាមផ្លូវទាំងឡាយរបស់ទ្រង់ » ម្ដងហើយម្ដងទៀត ។ នៅពេលកុមារដើរទៅដល់ចុងផ្លូវនោះ សូមឲ្យពួកគេបើករូបភាពដែលគ្របនោះ ។ តើការដើរតាមផ្លូវទាំងឡាយរបស់ព្រះមានន័យយ៉ាងណា ?
សូមច្រៀងជាមួយគ្នានូវបទចម្រៀងមួយបទអំពីព្រះវិហារបរិសុទ្ធ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ។ សូមជួយពួកគេឲ្យស្វែងរកពាក្យ និងឃ្លានៅក្នុងចម្រៀងនេះ ដែលបង្រៀនអំពីព្រះវិហារបរិសុទ្ធ និងអ្វីដែលយើងធ្វើនៅទីនោះ ។

នីហ្វៃទី ២ ១៩:៦; ២៥:២៦

« យើងអររីករាយក្នុងព្រះគ្រីស្ទ » ។

នីហ្វៃ និងអេសាយមានទីបន្ទាល់អំពីព្រះអង្គសង្គ្រោះ ហើយទីបន្ទាល់របស់ពួកគេបានធ្វើឲ្យពួកគេពោរពេញដោយអំណរ ។ សូមជួយកុមារឲ្យឃើញថា អ្នក « អររីករាយក្នុងព្រះគ្រីស្ទ » ។

សកម្មភាពដែលអាចជ្រើសរើស

សូមអញ្ជើញកុមារឲ្យកាន់រូបភាពអំពីការប្រសូតរបស់ព្រះយេស៊ូវគ្រីស្ទ ( ដូចជា សៀវភៅរូបភាពដំណឹងល្អ លេខ ៣០ ) ហើយជួយកុមារឲ្យស្វែងរកព្រះឱរសយេស៊ូវនៅក្នុងរូបភាពនោះ ។ សូមអាន នីហ្វៃទី ២ ១៩:៦ ឬបង្ហាញវីដេអូ « A Savior Is Born—Christmas Video » ( ChurchofJesusChrist.org ) ហើយសូមឲ្យកុមារចង្អុលទៅកាន់ព្រះយេស៊ូវ នៅពេលពួកគេឮពាក្យ បុត្រ និង បុត្រា ។ សូមពន្យល់ថា ព្យាការីអេសាយ ដែលបានសរសេរពាក្យពេចន៍ទាំងឡាយនៅក្នុង នីហ្វៃទី ២ ១៩:៦ បានដឹងអំពីការប្រសូតរបស់ព្រះគ្រីស្ទកាលពីរាប់រយឆ្នាំពីមុនរឿងនោះបានកើតឡើង ។
សូមប្រាប់រឿងអំពីព្រះយេស៊ូវគ្រីស្ទដែលនាំអំណរមកកាន់មនុស្សដទៃ ឬបង្ហាញវីដេអូដូចជា « Jesus Heals a Man Born Blind » ឬ « Suffer the Little Children to Come unto Me » ( ChurchofJesusChrist.org ) ។ សូមចង្អុលបង្ហាញអំពីគ្រាដ៏មានអំណរនៅក្នុងរឿង ឬវីដេអូនោះ ។ សូមអាន នីហ្វៃទី ២ ២៥:២៦ ហើយនិយាយអំពីមូលហេតុដែលអ្នក « អររីករាយក្នុងព្រះគ្រីស្ទ » ។ សូមកុមារឲ្យនិយាយអំពីរបៀបដែលព្រះយេស៊ូវនាំមកនូវអំណរដល់ពួកគេ ។

នីហ្វៃទី ២ ២១:៦–៩; ២២

សហស្សវត្សរ៍នឹងក្លាយជាគ្រាមួយនៃសេចក្ដីសុខសាន្ដ និងអំណរ ។

បន្ទាប់ពីការយាងមកជាលើកទីពីររបស់ទ្រង់ នោះព្រះយេស៊ូវគ្រីស្ទនឹងគង់នៅជាមួយរាស្ត្ររបស់ទ្រង់អំឡុងពេលនៃសេចក្តីសុខសាន្តដែលហៅថាសហស្សវត្សរ៍ ។

សកម្មភាពដែលអាចជ្រើសរើស

សូមបង្ហាញរូបភាពអំពីសត្វដែលបាននិយាយនៅក្នុង នីហ្វៃទី ២ ២១:៦–៧ ហើយសូមឲ្យកុមារដាក់ឈ្មោះសត្វនោះ ។ សូមពន្យល់ថា សត្វទាំងនេះជាធម្មតាគឺជាសត្រូវនឹងគ្នា ប៉ុន្តែអេសាយបានបង្រៀនថា បន្ទាប់ពីព្រះយេស៊ូវគ្រីស្ទយាងមកម្តងទៀត នឹងមានគ្រានៃសេចក្តីសុខសាន្ត ដែលហៅថា សហស្សវត្សរ៍ នៅពេលសត្វនោះនឹងពុំធ្វើទុក្ខទោសដល់គ្នាឡើយ ។ តើយើងអាចធ្វើតាមគំរូរបស់សត្វទាំងនោះក្នុងរបៀបដែលយើងប្រព្រឹត្តចំពោះគ្នាទៅវិញទៅមកយ៉ាងដូចម្តេច ? សូមអញ្ជើញកុមារឲ្យគូររូបសត្វទាំងនេះដែលរស់នៅដោយសុខសាន្តជាមួយគ្នា ។
សូមអាន នីហ្វៃទី ២ ២២:៥ ហើយសូមឲ្យកុមារជួយអ្នកស្វែងរកចម្រៀងមួយបទដែលពិពណ៌នាអំពី « ការណ៍ដ៏ប្រសើរ » ដែលព្រះអម្ចាស់បានធ្វើ ។ ឧទាហរណ៍មួយចំនួនអាចរួមមាន « ព្រះវរបិតាស្រឡាញ់ខ្ញុំ » ( សៀវភៅចម្រៀងកុមារ ទំព័រ ១៦–១៧ ) ឬ « ទ្រង់ធំណាស់ណា៎ » ( ទំនុកតម្កើង លេខ ៣៨ ) ។ សូមច្រៀងចម្រៀងនោះជាមួយគ្នា ។ សូមពន្យល់ថា នៅក្នុងពេលសហស្សវត្សរ៍ មនុស្សគ្រប់រូបនឹងដឹងអំពី « ការណ៍ដ៏ប្រសើរ » ដែលព្រះអម្ចាស់បានធ្វើ ។

បង្រៀនគោលលទ្ធិ ៖ កុមារធំៗ

នីហ្វៃទី ២ ១២:២–៣

ព្រះវិហារបរិសុទ្ធគឺជាដំណាក់របស់ព្រះអម្ចាស់ ។

តើអ្នកអាចប្រើខគម្ពីរទាំងនេះដើម្បីជួយកុមារឲ្យទន្ទឹងរង់ចាំដល់ថ្ងៃមួយ ពេលពួកគេអាចចូលរួមព្រះវិហារបរិសុទ្ធដោយរបៀបណា ?

សកម្មភាពដែលអាចជ្រើសរើស

សូមបង្ហាញរូបភាពព្រះវិហារបរិសុទ្ធ ( គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និង ក្រុមគ្រួសារ មានរូបភាពមួយ ) ។ សូមកុមារឲ្យអាន នីហ្វៃទី ២ ១២:២–៣ ហើយអញ្ជើញកុមារផ្សេងទៀតឲ្យស្តាប់រកហេតុផលនៃមូលហេតុដែលអេសាយបាននិយាយថា យើងត្រូវការព្រះវិហារបរិសុទ្ធ ។ អ្នកអាចពន្យល់បានថា អេសាយបានហៅព្រះវិហារបរិសុទ្ធថាជា « ភ្នំជាទីសាងព្រះវិហារនៃព្រះអម្ចាស់ » ។ ហេតុអ្វីភ្នំគឺជានិមិត្តសញ្ញាដ៏ល្អមួយសម្រាប់ព្រះវិហារបរិសុទ្ធ ?
សូមអញ្ជើញកុមារឲ្យគូររូបខ្លួនពួកគេទៅកាន់ព្រះវិហារបរិសុទ្ធ ។ ប្រសិនបើអាច សូមឲ្យយុវជន ឬយុវនារីម្នាក់នៅក្នុងវួដប្រាប់កុមារថា តើការធ្វើពិធីបុណ្យជ្រមុជទឹកសម្រាប់មរណជននៅក្នុងព្រះវិហារបរិសុទ្ធមានលក្ខណៈដូចម្តេច ។ យុវវ័យនេះ ឬបុគ្គលម្នាក់ទៀតនៅក្នុងវួដអាចបង្រៀនកុមារអំពីរបៀបស្វែងរកឈ្មោះនៃជីដូនជីតារបស់ពួកគេដែលត្រូវការពិធីបរិសុទ្ធនៃព្រះវិហារបរិសុទ្ធ ។

នីហ្វៃទី ២ ១៥:២០

សាតាំងព្យាយាមបំភាន់ខ្ញុំអំពីសេចក្តីល្អ និងសេចក្តីអាក្រក់ ។

យើងរស់នៅក្នុងពិភពលោកមួយ ជាកន្លែងដែលអេសាយបានព្យាករថា មនុស្សនឹងរាប់សេចក្ដីអាក្រក់ថាជាល្អ ហើយសេចក្ដីល្អថាជាអាក្រក់វិញ ។ តើអ្នកអាចជួយកុមារឲ្យរកឃើញការបោកបញ្ឆោតបែបនោះដោយរបៀបណា ?

សកម្មភាពដែលអាចជ្រើសរើស

សូមបង្ហាញកុមារនូវអ្វីមួយដែលចត់ ឬជូរ ដូចជាជ្រក់ ឬក្រូចឆ្មា នៅក្នុងស្ករគ្រាប់ដែលរុំជិត ។ សូមអាន នីហ្វៃទី ២ ១៥:២០ ហើយពន្យល់ថា សាតាំងព្យាយាមធ្វើឲ្យអ្វីៗដែលអាក្រក់មើលទៅថាល្អ ។ សូមជួយកុមារឲ្យគិតអំពីរបៀបនានា ដែលសាតាំងធ្វើបែបនេះ ។ តើយើងអាចដឹងអំពីការបោកបញ្ឆោតរបស់វាយ៉ាងដូចម្ដេច ?
សូមបង្ហាញវីដេអូ « You Will Be Freed » ដែលមានរយៈពេលមួយនាទីកន្លះ ( ChurchofJesusChrist.org ) ។ ហេតុអ្វីអ្នកនេសាទត្រីលាក់បាំងផ្លែសន្ទូចរបស់គាត់ ? ហេតុអ្វីសាតាំងលាក់បាំងអំពើបាប ?

2:58

នីហ្វៃទី ២ ១៧:១៤; ១៩:៦; ២៥:២៣–២៦

« យើងអររីករាយក្នុងព្រះគ្រីស្ទ » ។

កុមារត្រូវដឹងថា ដំណឹងល្អនៃព្រះយេស៊ូវគ្រីស្ទគឺពោរពេញដោយអំណរ ។ តើអ្នកនឹងជួយពួកគេឲ្យ « អររីករាយក្នុងព្រះគ្រីស្ទ » ដោយរបៀបណា ?

សកម្មភាពដែលអាចជ្រើសរើស

សូមជួយកុមារឲ្យស្វែងរកព្រះនាមរបស់ព្រះយេស៊ូវគ្រីស្ទនៅក្នុង នីហ្វៃទី ២ ១៧:១៤ និង ១៩:៦ ។ អ្នកចាំបាច់ត្រូវពន្យល់ថា « អេម៉ាញូអែល » គឺជាព្រះនាមមួយក្នុងចំណោមព្រះនាមទាំងនេះ ហើយវាមានន័យថា « ព្រះអង្គទ្រង់គង់ជាមួយនឹងយើងខ្ញុំ » ។ តើព្រះនាមនីមួយៗនៃព្រះនាមទាំងនេះបង្រៀនអ្វីខ្លះដល់យើងអំពីទ្រង់ ?
សូមដាក់រូបភាពព្រះអង្គសង្គ្រោះនៅលើក្តារខៀន ហើយអាន នីហ្វៃទី ២ ២៥:២៦ ជាមួយគ្នា ។ ហេតុអ្វីនីហ្វៃនិយាយ និងសរសេរអំពីព្រះយេស៊ូវគ្រីស្ទច្រើនម៉្លេះ ? សូមទុកឲ្យកុមារគ្រប់គ្នាសរសេរនៅលើក្តារខៀន ក្បែររូបព្រះយេស៊ូវ នូវអ្វីមួយអំពីព្រះអង្គសង្គ្រោះដែលនាំឲ្យពួកគេមានអំណរ ។
សូមឲ្យកុមារគិតអំពីនរណាម្នាក់ដែលពួកគេចង់ « បញ្ចុះបញ្ចូល … ឲ្យជឿដល់ព្រះគ្រីស្ទ » ( នីហ្វៃទី ២ ២៥:២៣ ) ។ តើយើងអាចសម្តែងសេចក្តីអំណរដែលព្រះអង្គសង្គ្រោះនាំមកក្នុងជីវិតរបស់យើងដល់មនុស្សដទៃដោយរបៀបណា ? សូមឲ្យកុមារសរសេរ ឬដើរតួសម្តែងនូវអ្វីមួយចំនួនដែលពួកគេអាចធ្វើ ដើម្បីជួយមនុស្សដែលពួកគេគិតថានឹងជឿលើព្រះយេស៊ូវគ្រីស្ទ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមឲ្យកុមារគិតអំពីអ្វីមួយដែលពួកគេអាចធ្វើ ដើម្បីបង្ហាញក្រុមគ្រួសាររបស់ពួកគេថាពួកគេ « អររីករាយក្នុងព្រះគ្រីស្ទ » ។

ការកែលម្អការបង្រៀនរបស់យើង

សូមឲ្យកុមារមានការច្នៃប្រឌិត ។ « នៅពេលអ្នកបង្រៀនកុមារតូចៗ សូមអនុញ្ញាតឲ្យពួកគេសង់រូប គូររូប ផាត់ពណ៌ សរសេរ ហើយច្នៃប្រឌិត ។ រឿងទាំងនេះមានន័យច្រើនជាងសកម្មភាពដ៏សប្បាយរីករាយទៅទៀត—វាមានសារៈសំខាន់ណាស់នៅក្នុងការរៀនសូត្រ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ទំព័រសកម្មភាព ៖ ព្រះវិហារបរិសុទ្ធគឺជាដំណាក់របស់ព្រះអម្ចាស់