« ថ្ងៃទី ១៧–២៣ ខែ កុម្ភៈ ។ នីហ្វៃទី ២ ១១–២៥ ៖ ‹ យើងអររីករាយក្នុងព្រះគ្រីស្ទ › » ចូរមកតាមខ្ញុំសម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៧–២៣ ខែ កុម្ភៈ ។ នីហ្វៃទី ២ ១១–២៥ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ថ្ងៃទី ១៧–២៣ ខែ កុម្ភៈ
នីហ្វៃ ទី ២ ១១–២៥
« យើងអររីករាយក្នុងព្រះគ្រីស្ទ »
នីហ្វៃបានបង្រៀនថា ពាក្យសម្ដីរបស់លោកអេសាយ « ច្បាស់ដល់អ្នកណាដែលពោរពេញទៅដោយវិញ្ញាណនៃការព្យាករណ៍ដែរ » ( នីហ្វៃទី ២ ២៥:៤ ) ។ នៅពេលបងប្អូនអាន សូមស្វែងរកវិញ្ញាណនៃការព្យាករណ៍ដោយការរៀបចំខ្លួនរបស់បងប្អូនខាងវិញ្ញាណ ការស្ដាប់តាមព្រះវិញ្ញាណ និងការកត់ត្រាចំណាប់អារម្មណ៍របស់បងប្អូន ។
កត់ត្រាចំណាប់អារម្មណ៍របស់បងប្អូន
ការឆ្លាក់នៅលើផ្ទាំងលោហៈពុំងាយស្រួលនោះទេ ហើយកន្លែងនៅលើផ្ទាំងតូចរបស់នីហ្វៃក៏មានកំណត់ផងដែរ ។ ដូច្នេះហេតុអ្វីក៏នីហ្វៃខិតខំយ៉ាងនឿយហត់ចម្លងការកត់ត្រាដ៏ច្រើនរបស់លោកអេសាយមកដាក់ក្នុងកំណត់ត្រារបស់គាត់យ៉ាងដូច្នេះ ? គាត់បានធ្វើវា « ថាបើសិនជាប្រជាជនខ្ញុំណាម្នាក់បានឃើញពាក្យទាំងនេះហើយ នោះគេអាចលើកចិត្តគេឡើង ហើយអរសប្បាយ » ( នីហ្វៃទី ២ ១១:៨ ) ។ ក្នុងន័យនោះ ការអញ្ជើញឲ្យអានការសរសេររបស់លោកអេសាយ គឺជាការអញ្ជើញឲ្យអរសប្បាយ ។ បងប្អូនអាចរីករាយដូចជានីហ្វៃ នៅក្នុងការព្យាករណ៍របស់លោកអេសាយអំពីការប្រមូលផ្ដុំនៃវង្សអ៊ីស្រាអែល ការយាងមករបស់ព្រះមេស៊ី និងភាពសុខសាន្ដនៅក្នុងសហសវត្សរ៍ដែលបានសន្យាចំពោះពួកសុចរិត ។ បងប្អូនអាចអរសប្បាយថា ទោះជានៅក្នុងថ្ងៃនៃ « សេចក្ដីលំបាក និងសេចក្ដីងងឹត » បងប្អូន « បានឃើញពន្លឺយ៉ាងធំ » ( នីហ្វៃទី ២ ១៨:២២, ១៩:២ ) ។ បងប្អូនអាចអរសប្បាយថា បងប្អូនអាច « ដងទឹកពីអណ្ដូងនៃសេចក្ដីសង្គ្រោះដោយអំណរ » ( នីហ្វៃទី ២ ២២:៣ ) ។ ជាពាក្យម៉្យាងទៀត បងប្អូនអាច « អររីករាយនៅក្នុងព្រះគ្រីស្ទ » ( នីហ្វៃទី ២ ២៥:២៦ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើខ្ញុំអាចយល់អំពីការបង្រៀនរបស់លោកអេសាយកាន់តែល្អប្រសើរយ៉ាងដូចម្ដេច ?
នីហ្វៃទទួលស្គាល់ថា « ពាក្យពេជន៍មួយចំនួនរបស់លោកអេសាយមិនច្បាស់ »( នីហ្វៃទី ២ ២៥:៤ ) ។ រឿងនេះអាចជាការពិតចំពោះអ្នកទាំងឡាយដែលពុំស្គាល់វប្បធម៌ពីបុរាណរបស់ពួកសាសន៍យូដា និងភូមិសាស្ត្រដូចជានីហ្វៃ ( សូមមើល នីហ្វៃទី ២ ២៥:៦ ) ។ ប៉ុន្តែនីហ្វៃក៏បានផ្ដល់ដំបូន្មានដើម្បីជួយយើងរកឃើញអត្ថន័យនៅក្នុងការសរសេររបស់លោកអេសាយផងដែរ ៖
-
« ប្រៀបពាក្យទាំងឡាយរបស់លោក » ទៅនឹងខ្លួនបងប្អូន ( នីហ្វៃទី ២ ១១:២ ) ។មានការបង្រៀនរបស់លោកអេសាយជាច្រើនអាចមានអត្ថន័យ និងការអនុវត្តជាច្រើន ។ ឧទាហរណ៍ ការសរសេររបស់លោកអំពីការខ្ចាត់ខ្ចាយ និងការប្រមូលផ្ដុំនៃវង្សអ៊ីស្រាអែល អាចនឹងបំផុសគំនិតបងប្អូនឲ្យគិតអំពីតម្រូវការរបស់បងប្អូនក្នុងការ « ប្រមូលផ្ដុំ » ឲ្យត្រឡប់ទៅព្រះអង្គសង្គ្រោះវិញ ។
-
សូមព្យាយាមដើម្បីបាន « ពោរពេញទៅដោយវិញ្ញាណនៃការព្យាករណ៍ » ( នីហ្វៃទី ២ ២៥:៤ ) ។របៀបដ៏ល្អបំផុតដើម្បីយល់អំពីការព្យាករណ៍របស់លោកអេសាយ គឺស្វែងរកការបំផុសគំនិតមកពីព្រះវិញ្ញាណ ។ អធិស្ឋានសូមការណែនាំខាងវិញ្ញាណ ។ បងប្អូនពុំអាចយល់រឿងគ្រប់យ៉ាងក្នុងពេលតែម្ដងនោះទេ ប៉ុន្តែព្រះវិញ្ញាណអាចជួយបងប្អូនរៀនអំពីអ្វីដែលបងប្អូនចាំបាច់ត្រូវដឹងសម្រាប់ជីវិតរបស់បងប្អូនបច្ចុប្បន្ននេះ ។
បងប្អូនអាចរកឃើញថាវាមានប្រយោជន៍ដើម្បីយោងទៅជំនួយការសិក្សានៅក្នុងបទគម្ពីរ រួមទាំងលេខយោង ក្បាលជំពូក សេចក្ដីណែនាំដល់បទគម្ពីរទាំងឡាយ ជាដើម ។
« របៀបត្រឹមត្រូវគឺជឿទៅលើព្រះគ្រីស្ទ » ។
នីហ្វៃបានណែនាំ ព្រមទាំងបានបញ្ចប់ការដកស្រង់ពាក្យរបស់លោកអេសាយដោយការបង្ហាញពីទីបន្ទាល់របស់គាត់អំពីព្រះយេស៊ូវគ្រីស្ទ ( សូមមើល នីហ្វៃទី ២ ១១:២–៨, ២៥:១៩–២៩ ) ។ តើមានអ្វីខ្លះបានបំផុសគំនិតដល់បងប្អូនអំពីទីបន្ទាល់របស់គាត់ ? នៅពេលបងប្អូនសិក្សាក្នុងសប្ដាហ៍នេះ សូមគិតអំពីបំណងប្រាថ្នារបស់នីហ្វៃដើម្បី « បញ្ចុះបញ្ចូលកូនចៅ [ របស់គាត់ ]… ឲ្យជឿដល់ព្រះគ្រីស្ទ ហើយឲ្យស្រុះស្រួលនឹងព្រះ » ( នីហ្វៃទី ២ ២៥:២៣ ) និងកត់ចំណាំវគ្គបទគម្ពីរដែលបញ្ចុះបញ្ចូលដល់ បងប្អូន ឲ្យជឿទៅលើ និងធ្វើតាមព្រះយេស៊ូវគ្រីស្ទ ។
វាអាចនឹងជួយដើម្បីចងចាំថា មានការបង្រៀនជាច្រើនអំពីព្រះអង្គសង្គ្រោះរបស់លោកអេសាយ ត្រូវបានបញ្ជូនសារតាមរយៈនិមិត្តរូប ។ ឧទាហរណ៍ បងប្អូនអាចមើលឃើញព្រះអង្គសង្គ្រោះនៅក្នុងនិមិត្តរូប ដូចជា ម្ចាស់ចម្ការទំពាំងបាយជូរ ( សូមមើល នីហ្វៃទី ២ ១៥:១–៧ ) ថ្ម ( សូមមើល នីហ្វៃទី ២ ១៨:១៤ ) និងពន្លឺ ( សូមមើល នីហ្វៃទី ២ ១៩:២ ) ។ តើមាននិមិត្តរូបអ្វីខ្លះទៀតអំពីព្រះយេស៊ូវគ្រីស្ទដែលបងប្អូនរកឃើញមាននៅក្នុងជំពូកទាំងនេះ ? តើនិមិត្តរូបទាំងនេះបង្រៀនបងប្អូនអ្វីខ្លះ អំពីទ្រង់ ?
ពួកឆ្មើងឆ្មៃ និងពួកលោកិយ នឹងត្រូវបន្ទាបចុះ ។
នីហ្វៃបានមើលឃើញជាមុនថា ភាពឆ្មើងឆ្មៃនឹងបណ្ដាលឲ្យប្រជាជនរបស់គាត់ធ្លាក់ចុះ ( សូមមើល នីហ្វៃទី ២ ១២:១៩) ។ ដូច្នេះវាពុំគួរភ្ញាក់ផ្អើលទេ ដែលនីហ្វៃនឹងចែកចាយជាមួយនឹងប្រជាជនរបស់គាត់នូវការព្រមានដដែលៗរបស់លោកអេសាយទាស់នឹងភាពឆ្មើងឆ្មៃនោះ ។ នៅក្នុង ជំពូកទី ១២ និង ១៣ សូមស្វែងរកពាក្យសម្ដីដែលអេសាយបានប្រើដើម្បីពិពណ៌នាអំពីភាពឆ្មើងឆ្មៃ ដូចជា តណ្ណា និង ឬកខ្ពស់ ។ បន្ទាប់មកបងប្អូនអាចនឹងព្យាយាមសរសេរការព្រមានទាំងនេះជាពាក្យបងប្អូនផ្ទាល់ ហាក់ដូចជាបងប្អូនកំពុងសរសេរសារលិខិតមួយទៅខ្លួនឯងដើម្បីព្រមានអំពីភាពឆ្មើងឆ្មៃ ។
សូមមើលផងដែរ « Chapter 18: Beware of Pride » ( Teachings of Presidents of the Church: Ezra Taft Benson [ ឆ្នាំ ២០១៤ ], ២២៩–២៤០ ) ។
នីហ្វៃទី ២ ១២:២–៥; ២១:៩–១២; ២២; ២៤:១–៣
នៅក្នុងសហសវត្សរ៍ រាស្ត្ររបស់ព្រះនឹងរីករាយនូវភាពសុខសាន្ដ ។
បងប្អូនអាចរកឃើញថាវាមានប្រយោជន៍ដើម្បីស្រមៃថាខ្លួនបងប្អូនជានីហ្វៃ និងប្រជាជនរបស់គាត់ ។ ស្រមៃថាបងប្អូនបានភៀសខ្លួនពីទីក្រុងយេរូសាឡិម ពីមុនទីក្រុងត្រូវបានបំផ្លិចបំផ្លាញចោល ( សូមមើល នីហ្វៃទី ២ ២៥:១០ ) ហើយឥឡូវបងប្អូនគឺជាផ្នែកមួយនៃវង្សអ៊ីស្រាអែលដែលខ្ចាត់ខ្ចាយ ។ តើការអានការបង្រៀនរបស់លោកអេសាយអំពីការប្រមូលផ្ដុំវង្សអ៊ីស្រាអែលនាពេលអនាគត និងសហសវត្សរ៍ដ៏សុខសាន្ដនោះ អាចនឹងមានអារម្មណ៍បែបណា ? ក្នុងនាមជាពួកបរិសុទ្ធថ្ងៃចុងក្រោយ យើងត្រូវបានហៅឲ្យជួយប្រមូលផ្ដុំរាស្ត្ររបស់ព្រះនៅក្នុងថ្ងៃចុងក្រោយ ជាការរៀបចំខ្លួនសម្រាប់ការគ្រងរាជ្យសហសវត្សរ៍របស់ព្រះគ្រីស្ទ ។ នៅពេលបងប្អូនអានខគម្ពីរទាំងនេះ សូមពិចារណាអំពីរបៀបដែលបងប្អូនកំពុងជួយបំពេញតាមការព្យាករណ៍ទាំងឡាយដែលពួកគាត់បានពិពណ៌នា ។ តើបងប្អូនទទួលអារម្មណ៍បំផុសគំនិតឲ្យធ្វើអ្វីខ្លះដើម្បីជួយប្រមូលរាស្ត្ររបស់ព្រះ ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ៣ ១២:១–៣
បើបងប្អូនបានទៅព្រះវិហារបរិសុទ្ធ—« ភ្នំជាទីសាងនៃព្រះវិហារនៃព្រះអម្ចាស់ »—បងប្អូនអាចចែកចាយជាមួយនឹងគ្រួសារបងប្អូនអំពីរបៀបដែលសេចក្ដីសញ្ញាក្នុងព្រះវិហារបរិសុទ្ធកំពុងជួយបងប្អូនឲ្យ « ដើរតាមផ្លូវទាំងឡាយ [ របស់ព្រះអម្ចាស់ ] » ។ បើបងប្អូនពុំធ្លាប់ទៅព្រះវិហារបរិសុទ្ធទេ ការអានខគម្ពីរទាំងនេះជាមួយគ្នាអាចបំផុសឲ្យមានការពិភាក្សាអំពីរបៀបដែលបងប្អូនអាចរៀបចំខ្លួនសម្រាប់ពរជ័យនៃព្រះវិហារបរិសុទ្ធ ។
នីហ្វៃទី ២ ១៥:១៨–២៣
តើគ្រួសាររបស់បងប្អូនអាចគិតអំពីឧទាហរណ៍នៅសម័យទំនើបអំពីគំនិតមិនសុចរិតដែលខគម្ពីរទាំងនេះបានពិពណ៌នាដែរឬទេ ? តើយើងអាចចៀសវាងពីការបោកបញ្ឆោតដោយគំនិតខុសឆ្គងអំពីសេចក្ដីល្អ និងសេចក្ដីអាក្រក់បានយ៉ាងដូចម្ដេច ?
នីហ្វៃទី ២ ២១
បើគ្រួសាររបស់បងប្អូនត្រូវការជំនួយដើម្បីយល់អំពីជំពូកនេះ ( ដែលឆ្លើយឆ្លងទៅនឹង អេសាយ ១១ ), បងប្អូនអាចស្វែងរកគំនិតយោបល់នៅក្នុង គោលលទ្ធិ និងសេចក្ដីសញ្ញា ១១៣:១–៦ ដែលព្យាការីយ៉ូសែប ស្ម៊ីធ ឆ្លើយតបសំណួរខ្លះៗអំពី អេសាយ ១១ ។ តើយើងរៀនអ្វីខ្លះអំពីព្រះយេស៊ូវគ្រីស្ទចេញមកពីខគម្ពីរទាំងនេះ ?
នីហ្វៃទី ២ ២១:៩
តើរឿងជាក់លាក់មួយចំនួនណាខ្លះដែលយើងអាចធ្វើដើម្បីជួយបំពេញផែនដីដោយ « ចំណេះដឹងអំពីព្រះអម្ចាស់ » ?
នីហ្វៃទី ៣ ២៥:២៣–២៦
តើបងប្អូនអាចជួយសមាជិកគ្រួសារបងប្អូន « អររីករាយក្នុងព្រះគ្រីស្ទ » យ៉ាងដូចម្ដេច ? ប្រហែលជាបងប្អូនអាចអញ្ជើញពួកគេឲ្យសរសេរនៅលើសន្លឹកក្រដាសអំពីរឿងទាំងឡាយអំពីព្រះអង្គសង្គ្រោះដែលនាំឲ្យពួកគេមានអំណរ ។ បន្ទាប់មក នៅក្នុងរាត្រីជួបជុំក្រុមគ្រួសារឬនៅក្នុងការសិក្សាព្រះគម្ពីរជាគ្រួសារលើកក្រោយ សូមឲ្យនរណាម្នាក់អានក្រដាសនោះ ។ សមាជិកគ្រួសារអាចបន្ថែមក្រដាសនៅពេញមួយឆ្នាំបាន ។
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អដល់ការសិក្សាផ្ទាល់ខ្លួន
សូមរកមើលលំនាំ ។ នៅក្នុងបទគម្ពីរ យើងអាចស្វែងរកលំនាំដែលបង្ហាញយើងអំពីរបៀបដែលព្រះអម្ចាស់ធ្វើកិច្ចការទ្រង់ ។ ឧទាហរណ៍ នៅក្នុង នីហ្វៃទី ២ ១១–២៥បងប្អូនអាចស្វែងរកលំនាំដែលបង្ហាញអំពីរបៀបដែលព្រះអម្ចាស់ព្រមាន និងអភ័យទោស ។
ព្រះវិហារបរិសុទ្ធ ផាណាម៉ា ទីក្រុងផាណាម៉ា ។ « ព្រះវិហារនៃព្រះអម្ចាស់នឹងបានតាំងឡើងខ្ពស់លើសអស់ទាំងភ្នំធំៗ ហើយអស់ទាំងសាសន៍នឹងចូលហូរហែទៅក្នុងទីនោះ » ( នីហ្វៃទី ២ ១២:២ ) ។