« ថ្ងៃទី ២៤ ខែ កុម្ភៈ–ថ្ងៃទី ១ ខែ មីនា ។ នីហ្វៃទី ២ ២៦–៣០ ៖ ‹ កិច្ចការដ៏ធំ និងអស្ចារ្យ › » ចូរមកតាមខ្ញុំសម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២៤ ខែ កុម្ភៈ–ថ្ងៃទី ១ ខែ មីនា ។ នីហ្វៃទី ២ ២៦–៣០ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ថ្ងៃទី២៤ ខែ កុម្ភៈ–ថ្ងៃទី ១ ខែ មីនា
នីហ្វៃទី ២ ២៦–៣០
« កិច្ចការដ៏ធំ និង អស្ចារ្យ »
ព្រះអម្ចាស់បានមានបន្ទូលថា ៖ « យើងបញ្ជាដល់មនុស្សទាំងអស់ …ថាពួកគេត្រូវសរសេរនូវពាក្យទាំងឡាយដែលយើងនិយាយទៅរកពួកគេ » ( នីហ្វៃទី ២ ២៩:១១ ) ។ តាមរយៈព្រះវិញ្ញាណ នោះព្រះអម្ចាស់នឹងមានបន្ទូលមកកាន់បងប្អូន នៅពេលបងប្អូនសិក្សាព្រះបន្ទូលរបស់ទ្រង់ ។ កត់ត្រានូវអ្វីដែលបងប្អូនបានទទួល ។
កត់ត្រាចំណាប់អារម្មណ៍របស់បងប្អូន
នីហ្វៃសរសេរថា « ខ្ញុំព្យាករប្រាប់អ្នករាល់គ្នាអំពីគ្រាចុងក្រោយបង្អស់ » ( នីហ្វៃទី ២ ២៦:១៤ ) ។ ជាពាក្យម្យ៉ាងទៀតថា គាត់កំពុងសរសេរអំពីជំនាន់របស់យើង ។ ហើយមានមូលហេតុដែលត្រូវខ្វល់ខ្វាយអំពីអ្វីដែលគាត់បានឃើញ ៖ មនុស្សកំពុងបដិសេធអំណាច និងអព្ភូតហេតុរបស់ព្រះ ភាពច្រណែន និងជម្លោះយ៉ាងឃោរឃៅ អារក្សបានចងមនុស្សដោយចំណងដ៏មាំ ។ ប៉ុន្តែបន្ថែមពីលើ« កិច្ចការនៃសេចក្ដីខ្មៅងងឹត » នៅថ្ងៃចុងក្រោយ ( នីហ្វៃទី ២ ២៦:១០ , ២២ ) ដែលបានដឹកនាំដោយមារសត្រូវនេះ នីហ្វៃក៏បាននិយាយផងដែរអំពី « កិច្ចការដ៏ធំ និង អស្ចារ្យ » ដែលដឹកនាំដោយព្រះអម្ចាស់ផ្ទាល់ ( នីហ្វៃទី ២ ២៧:២៦ ) ។ នៅកណ្ដាលនៃកិច្ចការនោះ នឹងជាគម្ពីរមួយ—គម្ពីរមួយដែលនិយាយចេញពីធូលីដីមក ដែលលាតត្រដាងពីការកុហករបស់សាតាំង ហើយដែលប្រមូលពួកសុចរិតដូចជាទង់ជ័យមួយ ។ គម្ពីរនោះ គឺព្រះគម្ពីរមរមន កិច្ចការដ៏ធំ គឺជាកិច្ចការនៃសាសនាចក្ររបស់ព្រះអម្ចាស់នៅថ្ងៃចុងក្រោយ ហើយកិច្ចការដ៏អស្ចារ្យ គឺថាទ្រង់អញ្ជើញពួកយើងទាំងអស់គ្នាឲ្យមកចូលរួម មិនថាយើងមានភាពទន់ខ្សោយយ៉ាងណាទេ ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ព្រះយេស៊ូវគ្រីស្ទអញ្ជើញមនុស្សទាំងអស់ឲ្យមករកទ្រង់ ។
ព្យាការី យ៉ូសែប ស្ម៊ីធ បានបង្រៀនថា ព្រះវរបិតាសួគ៌គឺ « មានសេចក្ដីមេត្តាករុណា និងពរជ័យដែលគ្មានដែនកំណត់ ច្រើនជាងយើងត្រៀមខ្លួនដើម្បីជឿ ឬទទួលយកទៅទៀត » ( The Joseph Smith Papers « History, 1838–1856, volume D–1 » ទំព័រ ៤ [ addenda ] josephsmithpapers.org ) ។ សូមអាននូវអ្វីដែលនីហ្វៃបានមើលឃើញនៅក្នុង នីហ្វៃទី ២ ២៦:២០–២២ និងអ្វីដែលគាត់បានបង្រៀនអំពីព្រះអង្គសង្គ្រោះនៅក្នុង ខ ២៣–៣៣ ហើយប្រៀបធៀបរឿងនេះទៅនឹងសេចក្ដីថ្លែងរបស់យ៉ូសែប ស្ម៊ីធ ។ តើបងប្អូនរៀនអ្វីខ្លះអំពីសេចក្ដីមេត្តាករុណារបស់ព្រះអម្ចាស់ដ៏គ្មានដែនកំណត់ ? តើបងប្អូនអាចធ្វើអ្វីខ្លះក្នុងនាម ជាសមាជិកមួយរូបនៃសាសនាចក្ររបស់ព្រះយេស៊ូវគ្រីស្ទ ដើម្បីកាន់តែមានលក្ខណៈដូចជាទ្រង់នៅក្នុងរបៀបដែលបងប្អូនប្រព្រឹត្តនឹងបុត្រាបុត្រីរបស់ព្រះ ?
សូមមើលផងដែរ នីហ្វៃទី ៣ ១៨:៣០–៣២ ។
តើគម្ពីរនេះត្រូវបានថ្លែងនៅក្នុងជំពូកទាំងនេះយ៉ាងណាខ្លះ ?
ការព្យាករណ៍របស់នីហ្វៃនៅក្នុង នីហ្វៃទី ២ ២៦–២៧ ដែលបានលើកឡើងជាច្រើនលើកច្រើនគ្រាមកពីការព្យាកររបស់លោកអេសាយកាលពីជំនាន់មុន ( សូមមើល អេសាយ ២៩ ) ដែលបានទាយទុកជាមុនអំពីការចេញមកនៃព្រះគម្ពីរមរមន ។ ការព្យាករណ៍នេះពិពណ៌នាដូចខាងក្រោម ៖
-
ពាក្យសម្ដីរបស់ពូជនៃលីហៃ ( កូនចៅរបស់គាត់ ) កំពុងនិយាយចេញពី « ធូលីដីមក » ដោយ « សំឡេងនៃពួកគ្រូខាប » និងត្រូវបាន « បិទត្រាទុក » ( នីហ្វៃទី ២ ២៦:១៤–១៧ សូមមើលផងដែរ អេសាយ ២៩:៤ ) ។
-
ផ្នែកមួយនៃគម្ពីរត្រូវបានផ្ដល់ឲ្យបុរសចេះដឹងម្នាក់ដែលនិយាយថា « ខ្ញុំពុំអាចអានវាបានទេ » ( នីហ្វៃទី ២ ២៧:១៥–២០, យូសែប ស៊្មីធ—ប្រវត្តិ ១:៦៤–៦៥ សូមមើលផងដែរ អេសាយ ២៩:១១ ) ។
បន្ថែមទៅលើអេសាយ ពួកព្យាការីនៅក្នុងគម្ពីរបរិសុទ្ធដទៃទៀត ថ្លែងអំពីព្រះគម្ពីរមរមន ទោះជាពុំបានថ្លែងអំពីឈ្មោះវាក្ដី ។ ឧទាហរណ៍ អេសាគាល ៣៧:១៥–២០ និយាយអំពី « បន្ទះឈើនៃយ៉ូសែប » អាចយោងទៅកំណត់ត្រានៃពួកសាសន៍នីហ្វៃ ដែលជាកូនចៅរបស់យ៉ូសែប ។ កំណត់ត្រានេះនឹងក្លាយជាកំណត់ត្រាមួយជាមួយនឹង « បន្ទះឈើនៃយូដា » នៅក្នុងគម្ពីរបរិសុទ្ធ ។
ឧទាហរណ៍ផ្សេង ទៀត អាចរកបាននៅក្នុង សេចក្ដីណែនាំដល់បទគម្ពីរទាំងឡាយ « Book of Mormon » ( scriptures.ChurchofJesusChrist.org ) ។
សាតាំងព្យាយាមបោកបញ្ឆោត ។
ការកុហក និងយុទ្ធវិធីរបស់សាតាំងត្រូវបានលាតត្រដាងនៅក្នុងកំណត់ត្រារបស់នីហ្វៃអំពីថ្ងៃចុងក្រោយនៅក្នុង នីហ្វៃទី ២ ២៨ ។ សូមមើលបើសិនជាបងប្អូនអាចស្វែងរកវាបាន ( ឧទាហរណ៍ សូមមើល ខ ៦, ៨, ២១–២៣, ២៩ ) ។ ហេតុអ្វីបានជាបងប្អូនចាំបាច់ត្រូវដឹងអំពីការកុហករបស់សាតាំង ? តើបងប្អូននឹងធ្វើអ្វីខ្លះ នៅពេលមារសត្រូវព្យាយាមបោកបញ្ឆោតបងប្អូន ?
ព្រះបន្ដផ្ដល់វិវរណៈដើម្បីដឹកនាំកូនចៅរបស់ទ្រង់ ។
នៅក្នុងនាមជាពួកបរិសុទ្ធថ្ងៃចុងក្រោយ ពួកយើងត្រូវបានប្រទានពរជាអនេកនូវព្រះបន្ទូលនៃព្រះ ដូច្នេះការព្រមានរបស់នីហ្វៃអាចអនុវត្តចំពោះយើង ៖ យើងមិនត្រូវមានអារម្មណ៍ថា « យើងមានគ្រប់គ្រាន់នោះទេ ! » នៅពេលបងប្អូនអានការព្រមាននៅក្នុង នីហ្វៃទី ២ ២៨ និង ២៩ សូមពិចារណាអំពីសំណួរដូចតទៅនេះ ៖
-
តើព្រះអម្ចាស់មានព្រះទ័យចង់ឲ្យខ្ញុំទទួលអារម្មណ៍ ហើយឆ្លើយតបចំពោះព្រះបន្ទូលរបស់ទ្រង់យ៉ាងដូចម្ដេច ?
-
ហេតុអ្វីមនុស្សពេលខ្លះ « ខឹង » អំពីការទទួលសេចក្ដីពិតបន្ថែមទៀតមកពីព្រះ ? ( នីហ្វៃទី ២ ២៨:២៨ ) ។ តើខ្ញុំធ្លាប់មានអារម្មណ៍របៀបនេះឬទេ ? បើដូច្នោះ តើខ្ញុំអាចទទួលយកសេចក្ដីពិតកាន់តែច្រើនដោយរបៀបណា ?
-
តើការទទួលយកព្រះបន្ទូលរបស់ព្រះ មានន័យយ៉ាងណា ? តើខ្ញុំអាចបង្ហាញទ្រង់ថា ខ្ញុំចង់ទទួលព្រះបន្ទូលទ្រង់កាន់តែច្រើនយ៉ាងដូចម្ដេច ?
សូមមើលផងដែរ អាលម៉ា ១២:១០–១១, នីហ្វៃទី ៣ ២៦:៦–១០ ។
ព្រះបានរៀបចំព្រះគម្ពីរមរមនសម្រាប់ជំនាន់របស់យើង ។
នីហ្វៃបានដឹងតាមវិវរណៈ ពីមុនព្រះគម្ពីរមរមនត្រូវបានសរសេរចប់សព្វគ្រប់ទៅទៀត ថានៅថ្ងៃណាមួយ វា « នឹងមានប្រយោជន៍យ៉ាងធំចំពោះកូនចៅមនុស្ស » ( នីហ្វៃទី ២ ២៨:២ ) ។ ហេតុអ្វីព្រះគម្ពីរមរមនមានតម្លៃយ៉ាងខ្លាំងចំពោះបងប្អូន ? ចូរគិតអំពី សំណួរនេះ នៅពេលបងប្អូនអាន នីហ្វៃទី ២ ២៩–៣០ ។ តើកិច្ចការ « ដ៏ធំ » មួយចំនួន ដែលព្រះកំពុងសម្រេចនៅក្នុងលោកិយនេះ និងនៅក្នុងជីវិតរបស់បងប្អូនតាមរយៈព្រះគម្ពីរមរមនមានអ្វីខ្លះ ?
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ២ ២៦:១២–១៣
នីហ្វៃបានបង្រៀនថា ព្រះយេស៊ូវគ្រីស្ទបើកសម្ដែងព្រះអង្គទ្រង់តាមរយៈព្រះវិញ្ញាណបរិសុទ្ធ ។ តើមានបទពិសោធន៍អ្វីខ្លះដែលសមាជិកគ្រួសារអាចចែកចាយជាមួយគ្នាទៅវិញទៅមក នៅពេលទីបន្ទាល់របស់ពួកគេអំពីព្រះអង្គសង្គ្រោះត្រូវបានពង្រឹងដោយព្រះវិញ្ញាណបរិសុទ្ធ ?
នីហ្វៃទី ២ ២៦:២២, ២៨:១៩–២២
ប្រហែលជាគ្រួសារបងប្អូននឹងរីករាយជាមួយនឹងការបង្ហាញវត្ថុមួយដែលទាក់ទងនឹងមេរៀនអំពីអ្វីដែល នីហ្វៃទី ២ ២៦:២២ បង្រៀនអំពីអារក្ស ។ នៅពេលបងប្អូនអានអំពីយុទ្ធវិធីរបស់សាតាំងនៅក្នុង នីហ្វៃទី ២ ២៨:១៩–២២ បងប្អូនអាចរុំអំបោះខ្លះៗជុំវិញកដៃរបស់នរណាម្នាក់ដើម្បីតំណាងឲ្យ « ខ្សែពួរ » ។ តើខ្សែពួរប្រៀបដូចជាការល្បួងរបស់សាតាំងយ៉ាងដូចម្ដេច ? តើវាអាចក្លាយជាចំណងដ៏មាំមួយយ៉ាងដូចម្ដេច ? តើយើងអាចដឹងអំពីការកុហករបស់សាតាំងយ៉ាងដូចម្ដេច ?
នីហ្វៃបានប្រៀបធៀបការល្បួងរបស់អារក្សទៅនឹង « ខ្សែពួរមួយ » ។
នីហ្វៃទី ២ ២៧:២០–២១
តើព្រះអម្ចាស់អាចមានន័យយ៉ាងណានៅពេលទ្រង់មានបន្ទូលថា « យើងអាចធ្វើកិច្ចការរបស់យើងបាន » ? តើសេចក្ដីពិតនេះមានឥទ្ធិពលទៅលើរបៀបដែលយើងបម្រើនៅក្នុងសាសនាចក្រយ៉ាងដូចម្ដេច ?
នីហ្វៃ ទី ២ ២៨:៣០–៣១
តើគ្រួសាររបស់បងប្អូនអាចគិតថាអ្វីមួយដូចជា វិវរណៈមកពីព្រះ គឺត្រូវបានទទួលបន្ដិចម្ដងដ៏ល្អបំផុតដែរឬទេ ? ហេតុអ្វីព្រះបើកបង្ហាញសេចក្ដីពិតមកកាន់យើង « មួយសិក្ខាបទម្ដងៗ ឯណេះបន្តិច ឯណោះបន្តិច » ជំនួសឲ្យទាំងអស់ក្នុងពេលតែមួយដូច្នេះ ?
នីហ្វៃទី ២ ២៩:៧–៩
តើព្រះអម្ចាស់មានព្រះរាជបំណងបង្ហាញ ឬប្រាប់អ្វីខ្លះអំពីព្រះគម្ពីរមរមន ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អដល់ការសិក្សាផ្ទាល់ខ្លួន
ចែកចាយពីការយល់ដឹង ការពិភាក្សាជាមួយអ្នកដទៃអំពីអ្វីដែលបងប្អូនរៀន អាចពង្រឹងដល់ការយល់ដឹងផ្ទាល់ខ្លួនរបស់បងប្អូន ។ បន្ទាប់ពីការអាន នីហ្វៃទី ២ ២៩:៦–១៤ បងប្អូនអាចទទួលអារម្មណ៍បំផុសគំនិតដើម្បីពន្យល់ទៅកាន់មិត្តម្នាក់ថា ហេតុអ្វីក៏យើងត្រូវការព្រះគម្ពីរមរមន ។
ការសរសេររបស់នីហ្វៃបានប្រាប់ទុកជាមុនអំពី « កិច្ចការដ៏ធំ និង អស្ចារ្យ » ដែលនឹងកើតមាននៅក្នុងថ្ងៃចុងក្រោយ ( នីហ្វៃទី ២ ២៧:២៦ ) ។