« ថ្ងៃទី ២–៨ ។ នីហ្វៃទី ២ ៣១–៣៣ ៖ ‹ នេះគឺជាផ្លូវ › » ចូរមកតាមខ្ញុំសម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២–៨ ខែ មីនា ។ នីហ្វៃទី ២ ៣១–៣៣ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
ថ្ងៃទី ២–៨ ខែ មីនា
នីហ្វៃទី ២ ៣១–៣៣
« នេះគឺជាផ្លូវ »
គម្រោងនេះផ្ដល់យោបល់នូវគោលការណ៍ទាំងឡាយដែលបងប្អូនអាចស្វែងរកប្រកបដោយអត្ថន័យនៅក្នុង នីហ្វៃទី ២ ៣១–៣៣ ។ ប៉ុន្តែរឿងសំខាន់បំផុត ដែលបងប្អូននឹងរៀននៅក្នុងការសិក្សារបស់បងប្អូន នឹងកើតមកពីការខ្សឹបប្រាប់នៃព្រះវិញ្ញាណ ។ សូមស្វែងរកការណែនាំនេះ ហើយកត់ត្រាការបំផុសគំនិតដែលកើតមាន ។
កត់ត្រាចំណាប់អារម្មណ៍របស់បងប្អូន
នៅក្នុងចំណោមពាក្យដែលបានកត់ត្រាចុងក្រោយរបស់នីហ្វៃ ពួកយើងរកឃើញការប្រកាសនេះ ៖ « ព្រះអម្ចាស់បានត្រាស់បង្គាប់ខ្ញុំ ហើយខ្ញុំត្រូវតែគោរពតាម » ( នីហ្វៃទី ២ ៣៣:១៥ ) ។ រឿងនេះហាក់ដូចជាត្រូវនឹងការសង្ខេបអំពីជីវិតរបស់នីហ្វៃ ។ គាត់ព្យាយាមធ្វើតាមព្រះទ័យរបស់ព្រះអម្ចាស់ ហើយបានព្យាយាមយ៉ាងក្លាហានដើម្បីគោរពតាម—ទោះជាគាត់ត្រូវប្រថុយជីវិតដើម្បីទៅយកផ្ទាំងលង្ហិនមកពីឡាបាន់ក្ដី ការសង់សំពៅ និងការធ្វើដំណើរឆ្លងកាត់សមុទ្រ ឬការបង្រៀនដោយស្មោះត្រង់អំពីគោលលទ្ធិនៃព្រះគ្រីស្ទ ដោយភាពច្បាស់លាស់ និងអានុភាព ។ នីហ្វៃអាចនិយាយដោយបញ្ចុះបញ្ចូលអំពីតម្រូវការដើម្បី « ឈានទៅមុខដោយខ្ជាប់ខ្ជួននៅក្នុងព្រះគ្រីស្ទ » ក្នុងការដើរតាម « ផ្លូវតូច ហើយចង្អៀត ដែលនាំទៅរកជីវិតអស់កល្បជានិច្ច » ( នីហ្វៃទី ២ ៣១:២០, ១៨ ) ដោយសារតែផ្លូវដែលគាត់ត្រូវដើរតាម ។ គាត់ដឹងតាមបទពិសោធន៍ថា ផ្លូវនេះ ទោះជាតម្រូវពេលវេលាក្ដី ក៏វាប្រកបដោយអំណរ ហើយថា « គ្មានផ្លូវឯណាទៀតទេ ឬក៏ឈ្មោះណាទៀតនៅក្រោមមេឃនេះ ដែលមនុស្សអាចបានសង្គ្រោះនៅក្នុងនគរនៃព្រះឡើយ » ( នីហ្វៃទី ២ ៣១:២១) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ព្រះយេស៊ូវគ្រីស្ទ និងគោលលទ្ធិរបស់ទ្រង់គឺជាមាគ៌ាតែមួយគត់ទៅកាន់ជីវិតដ៏អស់កល្បជានិច្ច ។
បើសិនជាបងប្អូនត្រូវសង្ខេបអំពីមាគ៌ាទៅកាន់ជីវិតអស់កល្បជានិច្ចត្រឹមតែពាក្យពីរបីម៉ាត់ តើបងប្អូននឹងនិយាយអ្វីខ្លះ ? នីហ្វៃដោយមានលក្ខណៈសម្បត្តិច្បាស់លាស់ និងសាមញ្ញ បានធ្វើតាមរបៀបនេះ ៖ មានជំនឿទៅលើព្រះគ្រីស្ទ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការប្រកាន់ខ្ជាប់ដរាបដល់ចុងបំផុត ។ បន្ទាប់ពីបងប្អូនសិក្សាការបង្រៀនរបស់នីហ្វៃនៅក្នុង នីហ្វៃទី ២ ៣១–៣២ សូមពិចារណាអំពីរបៀបដែលបងប្អូននឹងពន្យល់អំពីវាទៅដល់នរណាម្នាក់តាមពាក្យសម្ដីផ្ទាល់ខ្លួនរបស់បងប្អូន ។ ចូរគិតថាតើការរស់នៅតាមការបង្រៀនទាំងនេះ បានប្រទានពរដល់បងប្អូនដោយរបៀបណា ។ បងប្អូនអាចពិចារណាអំពីការបង្រៀនរបស់នីហ្វៃនៅក្នុង នីហ្វៃទី ២ ៣១:១៨–២០ ហើយវាយតម្លៃការខិតខំផ្ទាល់ខ្លួនរបស់បងប្អូនដើម្បី « ឈានទៅមុខ » នៅតាមផ្លូវដំណឹងល្អ ។
សូមមើលផងដែរ នីហ្វៃទី ៣ ១១:៣២–៣៩, ២៧:១៣–២២, ឌី ថត គ្រីស្តូហ្វឺសិន « The Doctrine of Christ » Ensign ឬ Liahona ខែ ឧសភា ឆ្នាំ ២០១២ ទំព័រ ៨៦–៩០, ប្រៃអិន ខេ អាស្ដុន « The Doctrine of Christ » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ១០៦–៩ ។
ការធ្វើតាមការបង្រៀនរបស់ព្រះយេស៊ូវគ្រីស្ទ ដឹកនាំជីវិតទៅកាន់ជីវិតអស់កល្បជានិច្ច ។
ព្រះយេស៊ូវគ្រីស្ទបានធ្វើជាគំរូដ៏ឥតខ្ចោះនៃការគោរពប្រតិបត្តិនៅពេលទ្រង់ជ្រមុជទឹក ។
មិនថាពិធីបុណ្យជ្រមុជទឹករបស់បងប្អូនធ្វើឡើងកាលពីម្សិលមិញ ឬ ៨០ ឆ្នាំ មុននោះទេ វាគឺជាគ្រាដ៏សំខាន់មួយ—ដែលបងប្អូនចូលទៅក្នុងសេចក្ដីសញ្ញាដើម្បីដើរតាមព្រះយេស៊ូវគ្រីស្ទពេញមួយជីវិត ។ ចូរគិតអំពីពិធីបុណ្យជ្រមុជទឹករបស់បងប្អូន នៅពេលបងប្អូនអានអំពីពិធីបុណ្យជ្រមុជទឹករបស់ព្រះអង្គសង្គ្រោះនៅក្នុង នីហ្វៃទី ២ ៣១:៤–១៣ ។ ហេតុអ្វីក៏ព្រះអង្គសង្គ្រោះជ្រមុជទឹក ? តើមូលហេតុដែលទ្រង់ទទួលបុណ្យជ្រមុជទឹកស្រដៀងគ្នាទៅនឹងមូលហេតុដែលបងប្អូនជ្រមុជទឹកយ៉ាងដូចម្ដេច ? តើអ្វីដែលបងប្អូនកំពុងធ្វើនៅសព្វថ្ងៃនេះ បន្ដធ្វើតាមគំរូរបស់ព្រះអង្គសង្គ្រោះក្នុងការគោរពប្រតិបត្តិយ៉ាងណាខ្លះ ?
ពិធីបរិសុទ្ធនៃពិធីសាក្រាម៉ង់ គឺជាឱកាសប្រចាំសប្ដាហ៍មួយសម្រាប់បងប្អូនដើម្បីតាំងចិត្តឡើងវិញដើម្បីដើរតាមព្រះយេស៊ូវគ្រីស្ទ ។ នៅពេលបងប្អូនទទួលទានសាក្រាម៉ង់នៅពេលក្រោយ សូមពិចារណាធ្វើការអាន នីហ្វៃទី ២ ៣១:១៣ និងការពិចារណាអំពីការតាំងចិត្តរបស់បងប្អូនដើម្បី « ធ្វើតាមព្រះរាជបុត្រាដោយពេញចិត្តប្រាថ្នា » និងឆន្ទៈរបស់បងប្អូន « ដើម្បីទទួលយកព្រះនាមនៃព្រះគ្រីស្ទមកលើខ្លួន » ។
ព្រះវិញ្ញាណបរិសុទ្ធនឹងបង្ហាញខ្ញុំនូវអ្វីដែលខ្ញុំគួរធ្វើ ។
ប្រសិនបើពិធីបុណ្យជ្រមុជទឹក និងពិធីបញ្ជាក់ គឺជា « ទ្វារដែល [ យើង ] ត្រូវចូល » លើផ្លូវតូច ហើយចង្អៀត ( នីហ្វៃទី ២ ៣១:១៧ ) តើយើងធ្វើអ្វីខ្លះនៅពេលយើងស្ថិតនៅលើផ្លូវនោះ ? នោះជាអ្វីដែលប្រជាជនរបស់នីហ្វៃងឿងឆ្ងល់ ( សូមមើល នីហ្វៃទី ២ ៣២:១ ) ។ តើនីហ្វៃផ្ដល់ចម្លើយអ្វីខ្លះនៅក្នុង នីហ្វៃទី ២ ៣១:១៩–២០ និង ជំពូកទី ៣២ ? តើបងប្អូនរកបានចម្លើយអ្វីសម្រាប់ខ្លួនឯង ?
សូមមើលផងដែរ ដាវីឌ អេ. បែតណា « Receive the Holy Ghost » Ensign ឬ Liahona ខែវិច្ឆិកា ឆ្នាំ ២០១០ ទំព័រ ៩៤–៩៧; « Holy Ghost » Gospel Topics topics.ChurchofJesusChrist.org ។
ព្រះគម្ពីរមរមនបញ្ចុះបញ្ចូលមនុស្សទាំងអស់ឲ្យជឿលើព្រះគ្រីស្ទ ។
នៅក្នុង នីហ្វៃទី ២ ៣៣ នៅពេលនីហ្វៃបញ្ចប់ការសរសេររបស់គាត់ គាត់បានពន្យល់អំពីមូលហេតុដែលគាត់សរសេរដូច្នេះតាំងពីដំបូងមក ។ តើមានមូលហេតុអ្វីខ្លះដែលបងប្អូនរកឃើញនៅក្នុងជំពូកនេះ ? សូមនឹកគិតអំពីអ្វីដែលបងប្អូនបានអានជាយូរមកនៅក្នុង នីហ្វៃទី ១ និង នីហ្វៃទី ២ និងកំណត់ចំណាំដែលបងប្អូនបានសរសេរ ។ តើដំណើររឿង និងការបង្រៀនទាំងឡាយសម្រេចតាមគោលបំណងរបស់នីហ្វៃមានចំពោះបងប្អូនយ៉ាងដូចម្ដេច ? ឧទាហរណ៍ តើអ្វីៗទាំងនោះបញ្ចុះបញ្ចូលបងប្អូនឲ្យ « ជឿទៅលើ [ ព្រះគ្រីស្ទ ] ហើយកាន់ខ្ជាប់ដល់ចុងបំផុតយ៉ាងដូចម្ដេច ? ( ខទី ៤ ) ។ សូមពិចារណាធ្វើការកត់ត្រាបទពិសោធន៍ទាំងនេះ ឬការចែកចាយវាជាមួយនឹងសមាជិកគ្រួសារ ឬមិត្តភក្ដិ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
នីហ្វៃទី ២ ៣១:៥–១៣
តើមានសមាជិកគ្រួសារណាម្នាក់កំពុងរៀបចំខ្លួនដើម្បីទទួលពិធីបុណ្យជ្រមុជទឹក ឬបានទទួលបុណ្យជ្រមុជទឹកក្នុងពេលថ្មីៗនេះឬទេ ? ប្រហែលជាពួកគេអាចចែកចាយអំពីមូលហេតុដែលពួកគេបានសម្រេចចិត្តដើម្បីទទួលបុណ្យជ្រមុជទឹក ។ យោងតាមការបង្រៀនរបស់នីហ្វៃ តើមានមូលហេតុ អ្វីខ្លះដែលយើងគួរតែទទួលបុណ្យជ្រមុជទឹក ? តើមានពរជ័យអ្វីខ្លះដែលយើងទទួលបាន នៅពេលយើងជ្រមុជទឹក ?
នីហ្វៃទី ២ ៣១:១៧–២១
តើបងប្អូនអាចជួយគ្រួសាររបស់បងប្អូនឲ្យយល់អំពីការប្រៀបធៀបរបស់នីហ្វៃអំពី « ផ្លូវតូច ហើយចង្អៀត » តាមរបៀបណា ? ( នីហ្វៃទី ២ ៣១:១៨ ) ។ ឧទាហរណ៍ បងប្អូនអាចធ្វើការរួមគ្នាដើម្បីគូររូបមួយអំពីផ្លូវដែលនីហ្វៃបានពិពណ៌នានៅក្នុង នីហ្វៃទី ២ ៣១:១៧–២១ ដោយបិទស្លាកវាជាមួយនឹងអ្វីៗដែលយើងត្រូវធ្វើដើម្បីចូលទៅលើផ្លូវ ហើយបន្ដដើរឆ្ពោះទៅមុខនៅលើផ្លូវនោះ ។ តើព្រះអង្គសង្គ្រោះជួយយើងរីកចម្រើននៅលើផ្លូវនោះយ៉ាងដូចម្ដេច ?
នីហ្វៃទី ២ ៣១:២០
បើបងប្អូនចង់ជួយគ្រួសារឲ្យយល់កាន់តែល្អប្រសើរអំពីរបៀបដែលយើងកាន់ខ្ជាប់ដរាបដល់ចុងបំផុត ទំព័រ ៦ នៃសៀវភៅ ប្រកាសដំណឹងល្អរបស់យើង មាននិយមន័យដ៏ជាជំនួយ ក៏ដូចជាសារលិខិតរបស់អែលឌើរ ឌែល ជី រ៉ង់ឡាន់ « Latter–day Saints Keep on Trying » ( Ensign ឬ Liahona ខែ ឧសភា ឆ្នាំ ២០១៥, ទំព័រ ៥៦–៥៨ ) ។
នីហ្វៃទី ២ ៣២:៨–៩
ដើម្បីជួយសមាជិកគ្រួសារឲ្យយល់ថាយើងអាច « អធិស្ឋានជានិច្ច » បងប្អូនអាចធ្វើបញ្ជីអំពីស្ថានភាពនានាដែលយើងអាចអធិស្ឋាន ( ឬគូររូបតំណាង ) ។ បន្ទាប់មកគ្រួសាររបស់បងប្អូនអាចច្រៀងចម្រៀងមួយដែលបង្រៀនអំពីការអធិស្ឋាន ដូចជា « តើបានអធិស្ឋានទេ ? » ( ទំនុកតម្កើង លេខ ៧៩ ) ដោយជំនួសពាក្យមួយចំនួននៅក្នុងចម្រៀងនោះដោយពាក្យចេញមកពីបញ្ជីរបស់ពួកគេ ។ តើព្រះអម្ចាស់ប្រទានពរដល់យើង នៅពេលយើងអធិស្ឋានជានិច្ចយ៉ាងដូចម្ដេច ?
នីហ្វៃទី ២ ៣៣:១–២
តើមានអ្វីខ្លះដែលដឹកនាំមនុស្សឲ្យ « មានចិត្តរឹងរូសទាស់នឹងព្រះវិញ្ញាណបរិសុទ្ធ » ? តើយើងអាចធ្វើយ៉ាងដូចម្ដេច ដើម្បីប្រាកដថា ព្រះវិញ្ញាណបរិសុទ្ធមាន « ទីកន្លែងនៅក្នុង [ យើង ] » ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អការបង្រៀនរបស់យើង
ត្រាប់តាមព្រះអង្គសង្គ្រោះ ។ វានឹងជាជំនួយដើម្បីសិក្សាតាមរបៀបដែលព្រះអង្គសង្គ្រោះបានបង្រៀន—ជាវិធីសាស្ត្រដែលទ្រង់បានប្រើ និងអ្វីៗដែលទ្រង់បានមានព្រះបន្ទូល ។ ប៉ុន្តែព្រះចេស្ដាររបស់ព្រះយេស៊ូវដើម្បីបង្រៀន និងលើកអ្នកដទៃឡើងនៅទីបំផុត កើតមានមកពីទ្រង់ជានរណា ហើយទ្រង់បានរស់នៅដោយរបៀបណា ។ កាលណាបងប្អូនកាន់តែព្យាយាមរស់នៅដូចជាព្រះយេស៊ូវគ្រីស្ទ ហើយពឹងផ្អែកទៅលើដង្វាយធួនរបស់ទ្រង់ នោះបងប្អូននឹងកាន់តែបង្រៀនតាមរបៀបរបស់ទ្រង់តាមធម្មជាតិ ។
បំពេញសេចក្ដីសុចរិតគ្រប់យ៉ាង ដោយ លីស្ស លីម៉ូន ស្វីនឌល