« ថ្ងៃទី ២–៨ ខែ មីនា នីហ្វៃទី ២ ៣១–៣៣ ៖ ‹ នេះគឺជាផ្លូវ › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២–៨ ខែ មីនា នីហ្វៃទី ២ ៣១–៣៣ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
ព្រះគ្រីស្ទបង្រៀនពួកសិស្សរបស់ទ្រង់ ដោយ ចាស្ទីន ឃុន
ថ្ងៃទី ២–៨ ខែ មីនា
នីហ្វៃទី ២ ៣១–៣៣
« នេះគឺជាផ្លូវ »
សូមចាប់ផ្ដើមការរៀបចំរបស់អ្នកដោយអាន នីហ្វៃទី ២ ៣១–៣៣ ។ សូមស្វែងរកការដឹកនាំពីព្រះវិញ្ញាណអំពីអ្វីដែលត្រូវបង្រៀនកុមារ ។ គម្រោងមេរៀននេះអាចផ្ដល់ជាគំនិតដល់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ដោយសារនីហ្វៃបានបង្រៀនអំពីបុណ្យជ្រមុជទឹករបស់ព្រះគ្រីស្ទ សូមឲ្យកុមារចែកចាយអ្វីដែលពួកគេបានរៀនអំពីបុណ្យជ្រមុជទឹក ។ ពួកគេក៏អាចចែកចាយគំនិត និងអារម្មណ៍អំពីបុណ្យជ្រមុជទឹកផ្ទាល់របស់ពួកគេ ឬបុណ្យជ្រមុជទឹករបស់មិត្តភក្ដិ ឬសមាជិកគ្រួសារពួកគេផងដែរ ។
បង្រៀនគោលលទ្ធិ ៖ កុមារតូចៗ
ព្រះយេស៊ូវគ្រីស្ទបានបង្រៀនខ្ញុំអំពីរបៀបត្រឡប់ទៅកាន់ព្រះវរបិតាសួគ៌វិញ ។
នីហ្វៃបានបង្រៀនថា ការធ្វើតាមគំរូ និងការបង្រៀនរបស់ព្រះអង្គសង្គ្រោះគឺជារបៀបតែមួយគត់ដើម្បី « បានសង្គ្រោះនៅក្នុងនគរព្រះ » ( នីហ្វៃទី ២ ៣១:២១ ) ។
សកម្មភាពដែលអាចជ្រើសរើស
-
សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អំឡុងពេលអ្នកសង្ខេបដំណើររឿងនៃបុណ្យជ្រមុជទឹករបស់ព្រះយេស៊ូវ ( សូមមើល នីហ្វៃទី ២ ៣១:៤–១៣ ) ។ សូមពន្យល់ថា បុណ្យជ្រមុជទឹកគឺជាជំហានមួយនៅលើផ្លូវត្រឡប់ទៅរស់នៅជាមួយព្រះវរបិតាសួគ៌វិញ ។ សូមអញ្ជើញនរណាម្នាក់ដែលទើបតែទទួលបុណ្យជ្រមុជទឹកឲ្យប្រាប់កុមារ អំពីអារម្មណ៍របស់គាត់ស្តីពីបុណ្យជ្រមុជទឹក ។
-
សូមពន្យល់ថា ព្រះយេស៊ូវគ្រីស្ទបានបង្រៀនពួកយើងនូវអ្វីដែលយើងត្រូវធ្វើដើម្បីត្រឡប់ទៅកាន់ទ្រង់វិញ បន្ទាប់ពីយើងស្លាប់ ។ សូមគូររូបផ្លូវមួយនៅលើក្ដារខៀន ហើយដាក់រូបភាពព្រះគ្រីស្ទនៅខាងចុងនៃផ្លូវនោះ ។ សូមឲ្យរូបភាពទៅកុមារដែលតំណាងអំពីធាតុនានានៃគោលលទ្ធិនៃព្រះគ្រីស្ទ ( សេចក្តីជំនឿលើព្រះគ្រីស្ទ, ការប្រែចិត្ត, ពិធីបុណ្យជ្រមុជទឹក, អំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ) ។ សូមជួយពួកគេឲ្យដាក់រូបភាពនោះនៅតាមផ្លូវនោះ ។
-
សូមជួយកុមារឲ្យរៀនអំពីមាត្រាទីបួននៃសេចក្តីជំនឿ ។ សូមច្រៀងចម្រៀងមួយបទជាមួយគ្នាអំពីគោលការណ៍ទីមួយនៃដំណឹងល្អ ដូចជាបទ « ជំនឿ », « ពេលខ្ញុំបានជ្រមុជទឹក » ឬ « ជ្រើសរើសផ្លូវត្រូវ » ( សៀវភៅចម្រៀងកុមារ ទំព័រ ៥០–៥១, ៥៣, ៨២–៨៣ ) ។
ខ្ញុំអាចទទួលទាននូវព្រះបន្ទូលទាំងឡាយនៃព្រះគ្រីស្ទ ។
តើបទពិសោធន៍របស់អ្នកជាមួយនឹង « [ ការ ] ទទួលទាននូវព្រះបន្ទូលទាំងឡាយនៃព្រះគ្រីស្ទ » ( នីហ្វៃទី ២ ៣២:៣ ) អាចជួយកុមារឲ្យយល់ឃ្លានេះដោយរបៀបណា ?
សកម្មភាពដែលអាចជ្រើសរើស
-
សូមឲ្យកុមារប្រាប់ឈ្មោះអាហារមួយចំនួនដែលពួកគេចូលចិត្ត ហើយអញ្ជើញពួកគេឲ្យសម្តែងតួពីរបៀបដែលពួកគេនឹងទទួលទានអាហារទាំងនោះ ។ សូមអាន នីហ្វៃទី ២ ៣២:៣ ហើយសូមឲ្យកុមារស្តាប់រកអ្វីដែលនីហ្វៃនិយាយថា យើងគួរតែទទួលទាន ។ តើការទទួលទានបទគម្ពីរមានន័យដូចម្តេច ? សូមពន្យល់ថា ព្រះគម្ពីរគឺជាកន្លែងមួយដែលយើងអាចរកឃើញព្រះបន្ទូលនៃព្រះគ្រីស្ទ ។
-
សូមសរសេរពាក្យ ព្រះ និង ព្រះអម្ចាស់ នៅលើក្តារខៀន ។ សូមអញ្ជើញកុមារឲ្យបើកទំព័រព្រះគម្ពីរ ហើយរកមើលពាក្យទាំងនេះ ។ ប្រសិនបើចាំបាច់ សូមជួយពួកគេ ។ សូមថ្លែងទីបន្ទាល់ថា នៅពេលយើងអានព្រះគម្ពីរ នោះយើងអាចរៀនពីព្រះបាន ។
ព្រះវរបិតាសួគ៌សព្វព្រះទ័យឲ្យខ្ញុំអធិស្ឋានជានិច្ច ។
ខគម្ពីរទាំងនេះអាចបំផុសគំនិតកុមារឲ្យធ្វើឲ្យការអធិស្ឋានក្លាយជាផ្នែកមួយនៃជីវិតប្រចាំថ្ងៃរបស់ពួកគេ ។
សកម្មភាពដែលអាចជ្រើសរើស
-
សូមសួរកុមារនៅពេលពួកគេអធិស្ឋាន ។ តើពួកគេអធិស្ឋាននៅពេលព្រឹក ? នៅពេលយប់ ? ពីមុនបរិភោគអាហារដែរឬទេ ? សូមជួយកុមារឲ្យគិតអំពីសកម្មភាពនានាដើម្បីបង្ហាញនៅពេលណាដែលពួកយើងអាចអធិស្ឋាន ដូចជាពេលយើងក្រោកពីដំណេក ពេលចូលដំណេក និងពេលបរិភោគអាហារ—ឬពេលផ្សេងទៀត ។ សូមអានជួរទីមួយ ឬទីពីរពី នីហ្វៃទី ២ ៣២:៩ ឲ្យពួកគេស្ដាប់ ហើយគូសបញ្ជាក់អំពីឃ្លា « អធិស្ឋានជានិច្ច » ។
-
សូមសួរកុមារអំពីរបៀបដែលពួកគេអធិស្ឋាន ។ តើពួកគេធ្វើក្បាលដូចម្តេច ធ្វើដៃដូចម្តេចជាដើម ? តើពួកគេនិយាយអ្វីខ្លះ ? សូមឲ្យពួកគេស្រមៃថា អ្នកពុំដឹងអំពីរបៀបអធិស្ឋានទេ ហើយទុកឲ្យពួកគេបង្រៀនអ្នក ។ ហេតុអ្វីព្រះវរបិតាសួគ៌សព្វព្រះទ័យឲ្យយើងអធិស្ឋាន ?
យើងអាចទូលទៅកាន់ព្រះតាមរយៈការអធិស្ឋាន ។
បង្រៀនគោលលទ្ធិ ៖ កុមារធំៗ
ព្រះយេស៊ូវគ្រីស្ទបានបង្រៀនខ្ញុំអំពីរបៀបត្រឡប់ទៅកាន់ព្រះវរបិតាសួគ៌វិញ ។
យើងអាចត្រឡប់ទៅកាន់ព្រះវិញ បន្ទាប់ពីជីវិតនេះ តាមរយៈការធ្វើតាមគោលលទ្ធិដែលព្រះយេស៊ូវគ្រីស្ទបានបង្រៀន ៖ សេចក្តីជំនឿលើព្រះគ្រីស្ទ, ការប្រែចិត្ត, ពិធីបុណ្យជ្រមុជទឹក, អំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ។
សកម្មភាពដែលអាចជ្រើសរើស
-
សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមកុមារឲ្យចែកចាយអ្វីដែលពួកគេដឹងអំពីបុណ្យជ្រមុជទឹករបស់ព្រះយេស៊ូវ ( សូមមើល ម៉ាថាយ ៣:១៣–១៧ ) ។ សូមដាក់ពាក្យដូចតទៅនេះដោយពុំតាមលំដាប់លំដោយនៅលើក្តារខៀន ៖ ព្រះយេស៊ូវបានធ្វើបន្ទាល់ដល់ព្រះវរបិតាថា ទ្រង់នឹងគោរពតាមព្រះអង្គ ។ សូមអញ្ជើញកុមារឲ្យអាន នីហ្វៃទី ២ ៣១:៧ ជាមួយសិស្សក្នុងថ្នាក់ ហើយតម្រៀបពាក្យទាំងនេះឲ្យត្រូវតាមលំដាប់លំដោយ ។
-
សូមសួរកុមារថា តើពួកគេនឹងនិយាយយ៉ាងណា ទៅកាន់នរណាម្នាក់ដែលរៀបចំទទួលបុណ្យជ្រមុជទឹក ហើយជួយពួកគេឲ្យចងក្រងការទូន្មានរបស់ពួកគេនៅលើកាតសាមញ្ញ ដែលពួកគេអាចផ្តល់ឲ្យនរណាម្នាក់ ។ តើយើងអាចបន្តធ្វើតាមគំរូរបស់ព្រះយេស៊ូវបន្ទាប់ពីយើងជ្រមុជទឹកហើយដោយរបៀបណា ?
-
សូមពន្យល់ថា គោលលទ្ធិនៃព្រះគ្រីស្ទរួមមានអ្វីៗដែលព្រះយេស៊ូវគ្រីស្ទបានបង្រៀនថា យើងត្រូវតែធ្វើដើម្បីត្រឡប់ទៅកាន់ព្រះវរបិតាសួគ៌វិញ ។ សូមសរសេរលើក្រដាសផ្សេងគ្នានូវពាក្យ សេចក្តីជំនឿលើព្រះគ្រីស្ទ, ការប្រែចិត្ត, ពិធីបុណ្យជ្រមុជទឹក, អំណោយទាននៃព្រះវិញ្ញាណបរិសុទ្ធ និង ការកាន់ខ្ជាប់ដរាបដល់ចុងបំផុត ហើយដាក់វាពង្រាយនៅជុំវិញបន្ទប់ ។ សូមអាន នីហ្វៃទី ២ ៣១:១១–១៩ ឲ្យកុមារស្តាប់ ហើយអញ្ជើញកុមារឲ្យឆ្លាស់វេនគ្នាលោតចេញពីក្រដាសមួយទៅក្រដាសមួយទៀត នៅពេលពួកគេឮអំពីគោលការណ៍ទាំងនោះ ។ សូមជួយពួកគេឲ្យគិតអំពីបទពិសោធន៍មួយដែលពួកគេមានជាមួយគោលការណ៍នីមួយៗ ។
ខ្ញុំអាចទទួលទាននូវព្រះបន្ទូលទាំងឡាយនៃព្រះគ្រីស្ទ ។
ហេតុអ្វីកុមារត្រូវយល់អំពីសារៈសំខាន់នៃការទទួលទាននូវព្រះបន្ទូលទាំងឡាយនៃព្រះគ្រីស្ទ ?
សកម្មភាពដែលអាចជ្រើសរើស
-
សូមឲ្យកុមារស្រមៃថានឹងទទួលទានអាហារមួយ ។ តើពួកគេចង់បានអាហារអ្វីខ្លះនៅទីនោះ ? តើពួកគេនឹងបរិភោគអ្វីមុនគេ ? បន្ទាប់មក អញ្ជើញពួកគេឲ្យស្រមៃអំពីអត្ថន័យនៃការទទួលទានបទគម្ពីរ នៅពេលអ្នកអាន នីហ្វៃទី ២ ៣២:៣ ។ ហេតុអ្វីនីហ្វៃប្រើពាក្យ ទទួលទាន ដើម្បីបង្រៀនយើងអំពីរបៀបដែលយើងគួរតែសិក្សាព្រះបន្ទូលនៃព្រះ ? ហេតុអ្វីលោកមិនគ្រាន់តែនិយាយពាក្យថា អាន ? តើការទទួលទានបទគម្ពីរមានន័យដូចម្តេច ? សូមចែកចាយជាមួយកុមារនូវពរជ័យដែលអ្នកបានទទួល នៅពេលអ្នកទទួលទានបទគម្ពីរ ។
-
សូមបំពេញទំព័រសកម្មភាពជាមួយកុមារ ហើយអញ្ជើញពួកគេឲ្យដាក់គោលដៅដើម្បីធ្វើកិច្ចការយ៉ាងហោចណាស់មួយ ដើម្បីទទួលទានបទគម្ពីរនាសប្តាហ៍នេះ ។
ព្រះវរបិតាសួគ៌សព្វព្រះទ័យឲ្យខ្ញុំអធិស្ឋានជានិច្ច ។
ពួកសត្រូវល្បួងយើងមិនឲ្យអធិស្ឋានឡើយ ។ សូមពិចារណាអំពីរបៀបដែលអ្នកអាចបង្រៀនកុមារឲ្យទប់ទល់នឹងការល្បួងនេះ ហើយ « អធិស្ឋានជានិច្ច » ( នីហ្វៃទី ២ ៣២:៩ ) ។
សកម្មភាពដែលអាចជ្រើសរើស
-
សូមជ្រើសយកឃ្លាមួយអំពីការអធិស្ឋានមកពី នីហ្វៃទី ២ ៣២:៨–៩ សូមសរសេរវានៅលើក្តារខៀន ហើយគ្របពាក្យនីមួយៗដោយក្រដាសមួយសន្លឹក ។ សូមអញ្ជើញកុមារឲ្យប្ដូរវេនគ្នាដកក្រដាសនោះម្តងមួយៗ រហូតដល់ពួកគេអាចទាយនូវឃ្លានោះ ។
-
សូមអាន នីហ្វៃទី ២ ៣២:៨–៩ ជាមួយគ្នា ហើយសូមឲ្យកុមារចែកចាយអ្វីដែលពួកគេរៀនអំពីការអធិស្ឋានមកពីខគម្ពីរទាំងនេះ ។ តើ « ការអធិស្ឋានជានិច្ច » មានន័យដូចម្ដេច ? ( ខទី ៩ ) ។ តើយើងអាចធ្វើវាបានដោយរបៀបណា ?
-
តើមានអ្វីខ្លះដែលអាចធ្វើឲ្យនរណាម្នាក់ពុំចង់អធិស្ឋាន ? សូមចែកចាយបទពិសោធន៍មួយ នៅពេលអ្នកបានអធិស្ឋាន ទោះបីជាអ្នកពុំមានអារម្មណ៍ចង់អធិស្ឋានក្តី ។ បន្ទាប់ពីនោះ តើអ្នកមានអារម្មណ៍យ៉ាងដូចម្ដេច ? សូមឲ្យកុមារម្នាក់អានពាក់កណ្តាលនៃ នីហ្វៃទី ២ ៣២:៨ ហើយទុកពេលឲ្យកុមារពិចារណាអំពីវា ។ ហេតុអ្វីសាតាំងពុំចង់ឲ្យយើងអធិស្ឋាន ? តើយើងអាចរំឭកខ្លួនរបស់យើងឲ្យអធិស្ឋាន ទោះបីជាយើងពុំមានអារម្មណ៍ចង់អធិស្ឋានដោយរបៀបណា ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យស្វែងរកនរណាម្នាក់—មិត្តភក្តិ, បងប្អូនបង្កើត ឬសមាជិកគ្រួសារម្នាក់—ដែលពួកគេអាចបង្រៀនអំពីរបៀបអធិស្ឋាន ។
ការកែលម្អការបង្រៀនរបស់យើង
កុមារពោរពេញដោយកម្លាំង ។ សូមអញ្ជើញកុមារឲ្យសម្តែងតាមរឿង និងចម្រៀងពីព្រះគម្ពីរ ។ សូមប្រើលក្ខណៈធម្មជាតិរបស់ពួកគេដើម្បីពង្រីកការរៀនសូត្រ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥–២៦ ) ។