« ថ្ងៃទី ១៦–២២ ខែ មីនា យ៉ាកុប ៥–៧ ៖ ‹ ព្រះអម្ចាស់ធ្វើការជាមួយយើង › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១៦–២២ ខែ មីនា យ៉ាកុប ៥–៧ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
រូបាធិដ្ឋាននៃដើមអូលីវ ដោយ ប្រាដ ធៀរេ
ថ្ងៃទី ១៦–២២ ខែ មីនា
យ៉ាកុប ៥–៧
ព្រះអម្ចាស់ធ្វើការជាមួយយើង
សូមសិក្សា ពិចារណា និងអធិស្ឋានដើម្បីដឹងអំពីរបៀបដែលអ្នកអាចបង្រៀនសេចក្តីពិតដែលមាននៅក្នុង យ៉ាកុប ៥–៧ ដល់កុមារឲ្យបានល្អបំផុត ។ សូមកត់ត្រាការបំផុសគំនិតនានាដែលអ្នកទទួលបាន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ដើម្បីចាប់ផ្តើមការពិភាក្សាអំពីសារលិខិតដែលមាននៅក្នុង យ៉ាកុប ៥–៧ សូមអញ្ជើញកុមារឲ្យនិយាយអំពីរឿងរ៉ាវនៅក្នុងជីវិតរបស់ពួកគេ ដែលជួយពួកគេឲ្យទទួលអារម្មណ៍នៃសេចក្តីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ ។ តើយើងបង្ហាញសេចក្ដីស្រឡាញ់របស់យើងចំពោះមនុស្សដទៃដោយរបៀបណា ?
បង្រៀនគោលលទ្ធិ ៖ កុមារតូចៗ
ពួកអ្នកផ្សព្វផ្សាយសាសនាបម្រើបុត្រាបុត្រីរបស់ព្រះវរបិតាសួគ៌ ។
សូមពិចារណាពីរបៀបដែលអ្នកអាចចែកចាយអំពីរូបាធិដ្ឋាននៃដើមអូលីវ នៅក្នុងរបៀបមួយដែលកុមារអាចយល់ ។
សកម្មភាពដែលអាចជ្រើសរើស
-
សូមបង្ហាញរូបភាពមួយនៃដើមឈើ ឬដើរទៅក្រៅថ្នាក់ដើម្បីទៅមើលដើមឈើមួយ ហើយរំឭកដោយសង្ខេបអំពីចំណុចសំខាន់ៗនៃរូបាធិដ្ឋាននៃដើមអូលីវនៅក្នុង យ៉ាកុប ៥ ។ ឧទាហរណ៍ ៖ ម្ចាស់នៃចម្ការទំពាំងបាយជូរ ( ដែលអាចតំណាងឲ្យព្រះយេស៊ូវ ) បានខំធ្វើការយ៉ាងខ្លាំង ដើម្បីមើលថែដល់ដើមអូលីវ ( ដែលអាចតំណាងឲ្យមនុស្សនៅលើផែនដី ) ដោយសារទ្រង់ខ្វល់ព្រះទ័យយ៉ាងខ្លាំងអំពីពួកគេ ។ ទ្រង់បានហៅអ្នកធ្វើការ ( ដែលអាចតំណាងឲ្យពួកអ្នកផ្សព្វផ្សាយសាសនា ) ដើម្បីឲ្យជួយមើលថែដើមឈើទាំងនោះ ។ សូមជ្រើសយកខគម្ពីរមួយ ឬពីរមកពី យ៉ាកុប ៥ ដើម្បីអានឲ្យកុមារស្តាប់ ( ដូចជា ខទី ៧១–៧២ ) ។
-
សូមសួរកុមារ ប្រសិនបើពួកគេស្គាល់នរណាម្នាក់ដែលបានបម្រើបេសកកម្ម ឬនិយាយអំពីនរណាម្នាក់ដែលអ្នកស្គាល់ ។ សូមជួយកុមារឲ្យរកទីតាំងនៅលើផែនទីនូវកន្លែងនានាដែលពួកអ្នកផ្សព្វផ្សាយសាសនាទាំងនោះកំពុងបម្រើ ។ សូមពន្យល់ថា យ៉ាកុបបានប្រៀបធៀបពិភពលោកនេះទៅនឹងក្រុមនៃដើមអូលីវ ។ ដើមនេះគឺដូចជាមនុស្សនៅលើផែនដីដែរ ហើយការមើលថែដល់ដើមឈើទាំងនេះគឺដូចជាអ្វីដែលពួកអ្នកផ្សព្វផ្សាយសាសនាធ្វើសម្រាប់បុត្រាបុត្រីរបស់ព្រះ ។ តើពួកអ្នកផ្សព្វផ្សាយសាសនាធ្វើអ្វីខ្លះដើម្បីផ្តល់ពរដល់បុត្រាបុត្រីរបស់ព្រះវរបិតាសួគ៌ ? សូមរកមើលចម្លើយមួយចំនួនចំពោះសំណួរនេះជាមួយគ្នា នៅក្នុងចម្រៀងដូចជាបទ « ហៅឲ្យបម្រើ » ( សៀវភៅចម្រៀងកុមារ ទំព័រ ៩៤–៩៥ ) ។ តើយើងអាចក្លាយដូចជាពួកអ្នកផ្សព្វផ្សាយសាសនាយ៉ាងដូចម្តេច ?
កិច្ចការផ្សព្វផ្សាយសាសនាគឺជារបៀបតែមួយ ដែលយើងអាចជួយបុត្រាបុត្រីរបស់ព្រះឲ្យត្រឡប់ទៅកាន់ទ្រង់វិញ ។
ព្រះវរបិតាសួគ៌ស្រឡាញ់ខ្ញុំ ។
តើអ្នកអាចបង្រៀនកុមារនៅក្នុងថ្នាក់របស់អ្នកថា ព្រះស្រឡាញ់បុត្រាបុត្រីទាំងអស់របស់ទ្រង់ ហើយលាត « ព្រះពាហុនៃសេចក្តីមេត្តាករុណា » របស់ទ្រង់ចំពោះពួកគេដោយរបៀបណា ?
សកម្មភាពដែលអាចជ្រើសរើស
-
សូមអញ្ជើញកុមារឲ្យឱបខ្លួនឯង ។ តើយើងមានអារម្មណ៍យ៉ាងណា នៅពេលនរណាម្នាក់ដែលយើងស្រឡាញ់ឱបយើង ? សូមអាន យ៉ាកុប ៦:៥ ឲ្យកុមារស្តាប់ ហើយពន្យល់ថា ឃ្លា « [ ព្រះ ] តោងជាប់ទៅនឹងអ្នក » និង « ព្រះពាហុនៃសេចក្ដីមេត្តាករុណារបស់ទ្រង់លាចេញមករកអ្នក » បង្រៀនថា ព្រះវរបិតាសួគ៌ស្រឡាញ់យើង ហើយសព្វព្រះទ័យឲ្យយើងត្រឡប់ទៅរកទ្រង់វិញនៅថ្ងៃណាមួយ ។
-
សូមច្រៀងចម្រៀងមួយបទអំពីសេចក្តីស្រឡាញ់ជាមួយគ្នា ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។ សូមឲ្យកុមារប្រាប់រឿងអ្វីៗដែលជួយពួកគេឲ្យទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះ ។
ខ្ញុំអាចឈរការពារអ្វីដែលខ្ញុំដឹងថាពិត ។
យ៉ាកុបគឺជាគំរូដ៏អស្ចារ្យមួយនៃបុគ្គលម្នាក់ដែលមានទីបន្ទាល់ដ៏រឹងមាំ ដែលបានជួយលោកឲ្យការពារសេចក្តីពិតនៅក្នុងការប្រឈមមុខនឹងការជំទាស់ ។
សកម្មភាពដែលអាចជ្រើសរើស
-
សូមប្រាប់អំពីរឿងរបស់យ៉ាកុប និង សេរេម ( យ៉ាកុប ៧:១–២៣ ) នៅក្នុងរបៀបមួយដែលកុមារអាចយល់ ។ អ្នកអាចប្រើ « ជំពូកទី ១០ ៖ យ៉ាកុប និង សេរេម » ( ដំណើររឿងព្រះគម្ពីរមរមន ទំព័រ ៤៦–៥០ ឬមើលវីដេអូដូចគ្នានេះនៅគេហទំព័រ ChurchofJesusChrist.org ) ។ បន្ទាប់មក សូមប្រាប់រឿងនោះម្តងទៀត ប៉ុន្តែម្តងនេះសូមទុកឲ្យកុមារជួយបំពេញចំណុចលម្អិត ។ សូមសួរពួកគេថា តើពួកគេបានរៀនអ្វីខ្លះពីយ៉ាកុប ។ តើយើងអាចធ្វើតាមគំរូរបស់លោកយ៉ាងដូចម្ដេច ?
-
សូមឲ្យកុមារច្រៀងចម្រៀងមួយបទអំពីការជ្រើសរើសផ្លូវត្រូវដូចជាបទ « ហ៊ាននឹងធ្វើត្រូវ » ឬ « ឈរដោយសុចរិត » ( សៀវភៅចម្រៀងកុមារ ទំព័រ ៨០, ៨១ ) ។ សូមឲ្យពួកគេក្រោកឈរ នៅពេលណាដែលពួកគេច្រៀងពាក្យដូចជា ត្រូវ ឬ ពិត ។
បង្រៀនគោលលទ្ធិ ៖ កុមារធំៗ
ព្រះអម្ចាស់ខ្វល់ព្រះទ័យនឹងរាស្ត្ររបស់ទ្រង់ ។
យ៉ាកុបបានចែកចាយអំពីរូបាធិដ្ឋាននៃដើមអូលីវ ដើម្បីជួយអញ្ជើញរាស្ត្ររបស់ទ្រង់ឲ្យមកកាន់ព្រះគ្រីស្ទ ។ គោលបំណងដូចគ្នានេះក៏អាចសម្រេចបានសម្រាប់កុមារដែលអ្នកបង្រៀនដែរ ។
សកម្មភាពដែលអាចជ្រើសរើស
-
សូមអាន និងពន្យល់ដល់កុមារនូវខគម្ពីរគន្លឹះ ដោយសង្ខេបរូបាធិដ្ឋាននៃដើមអូលីវ ដូចជា យ៉ាកុប ៥:៣–៤, ២៨–២៩, ៤៧ និង ៧០–៧២ ហើយអញ្ជើញកុមារឲ្យគូររូបភាពនៃអ្វីដែលខគម្ពីរទាំងនេះពិពណ៌នា ។ តើយើងរៀនអ្វីខ្លះ មកពីខគម្ពីរទាំងនេះអំពីរបៀបដែលព្រះអម្ចាស់ព្រះតម្រិះអំពីរាស្ត្ររបស់ទ្រង់ ? សូមឲ្យកុមារធ្វើដូចជាមើលថែដើមអូលីវមួយ នៅពេលសង្ខេបយ៉ាងខ្លីនូវ ខទី ៦១–៧១ ( ពួកគេអាចសម្តែងធ្វើជាជីកដី ស្រោចទឹក ជាដើម ) ។ សូមអញ្ជើញកុមារពីរបីនាក់ឲ្យអាន យ៉ាកុប ៥:១១, ៤១, ៤៧ និង ៧២ ដោយរកមើលអ្វីៗដែលបង្ហាញថា ម្ចាស់ចម្ការ ( ព្រះយេស៊ូវគ្រីស្ទ ) បានខ្វល់ខ្វាយអំពីដើមឈើនោះ ។ តើព្រះអង្គសង្គ្រោះបានធ្វើអ្វីខ្លះ ដើម្បីបង្ហាញថា ទ្រង់ខ្វល់ព្រះទ័យអំពីយើង ? វីដេអូ « Old Testament Olive Vineyard » ( ChurchofJesusChrist.org ) អាចជួយជាមួយសកម្មភាពនេះបាន ។
-
សូមសរសេរនិមិត្តសញ្ញាមួយចំនួននៅក្នុង យ៉ាកុប ៥ នៅលើក្តារខៀន ដូចជាចម្ការ ម្ចាស់ចម្ការ អ្នកបម្រើ និងដើមអូលីវ ។ បន្ទាប់មកសូមធ្វើបញ្ជីមួយទៀត ដោយមិនបាច់តាមលំដាប់លំដោយ អំពីអ្វីៗដែលនិមិត្តសញ្ញាទាំងនេះអាចតំណាងឲ្យនោះទេ វាមានដូចជាពិភពលោក ព្រះអង្គសង្គ្រោះ ថ្នាក់ដឹកនាំសាសនាចក្រ ឬអ្នកផ្សព្វផ្សាយសាសនា និងរាស្ត្ររបស់ព្រះ ។ សូមអានខគម្ពីរជាមួយគ្នាមកពី យ៉ាកុប ៥ ដែលចែងអំពីនិមិត្តសញ្ញាទាំងនេះ ហើយជួយកុមារឲ្យគូរបន្ទាត់នៅលើក្តារខៀន ដោយភ្ជាប់និមិត្តសញ្ញាទាំងនោះជាមួយនឹងអត្ថន័យដែលអាចត្រូវនឹងវា ( ឧទាហរណ៍សូមមើល ខទី ៣–៤, ២៨–២៩, ៤៧, ៧០–៧២ ) ។
ព្រះវរបិតាសួគ៌ស្រឡាញ់ខ្ញុំ ហើយនឹងអភ័យទោសឲ្យខ្ញុំពេលខ្ញុំប្រែចិត្ត ។
វាសំខាន់ដើម្បីជួយកុមារដែលអ្នកបង្រៀនឲ្យយល់ថា ព្រះស្រឡាញ់ពួកគេ ហើយនឹងអភ័យទោសឲ្យពួកគេជានិច្ច នៅពេលពួកគេប្រែចិត្តដោយស្មោះសរ ។
សកម្មភាពដែលអាចជ្រើសរើស
-
សូមធ្វើតារាងមួយនៅលើក្ដារខៀនដោយមានជួរឈរពីរដែលដាក់ចំណងជើងថា ព្រះវរបិតាសួគ៌ និង ពួកយើង ។ សូមអាន យ៉ាកុប ៦:៤–៥ ហើយសូមឲ្យសិស្សពាក់កណ្តាលថ្នាក់ រកមើលឃ្លានានាដែលអនុវត្តចំពោះព្រះ ហើយសិស្សពាក់កណ្ដាលថ្នាក់ទៀតរកមើលឃ្លាដែលអនុវត្តចំពោះយើង ។ សូមកត់ត្រាអ្វីដែលពួកគេរកឃើញនៅក្នុងជួរឈរដែលត្រឹមត្រូវ ។ សូមជួយពួកគេឲ្យផ្តល់និយមន័យចំពោះពាក្យដែលពួកគេមិនយល់ ។
-
សូមចែកចាយរឿងរបស់អែលឌើរ អាឡែន ឌី ហែនី អំពីការប្រឡាក់ភក់នៅក្នុងរណ្តៅនៅក្នុងសារលិខិតរបស់គាត់ « ចងចាំដល់អង្គដែលយើងទុកចិត្ត » ( Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ១២១–១២២ ) ។ តើរឿងនេះបង្រៀនយើងអ្វីខ្លះ អំពីអ្វីដែលយើងត្រូវធ្វើដើម្បីបានសង្គ្រោះនៅក្នុងនគរនៃព្រះ ? តើយើងរៀនអ្វីខ្លះទៀតមកពី យ៉ាកុប ៦:៤–៥ នេះ ?
ខ្ញុំអាចឈរការពារអ្វីដែលខ្ញុំដឹងថាពិត ។
តើអ្នកអាចបំផុសគំនិតកុមារឲ្យឈរការពារសេចក្តីពិតដូចយ៉ាកុបបានធ្វើដោយរបៀបណា ?
សកម្មភាពដែលអាចជ្រើសរើស
-
សូមអញ្ជើញកុមារឲ្យសម្ដែងតួអំពីការប្រាស្រ័យទាក់ទងគ្នារវាងយ៉ាកុប និង សេរេម ដោយប្រើ យ៉ាកុប ៧:១–២៣ ជាមគ្គទេសក៍ ។ ឬបង្ហាញវីដេអូ « Jacob and Sherem » ( ChurchofJesusChrist.org ) ។ សូមឲ្យកុមារប្រាប់ពីផ្នែកនៃរឿងនោះដែលពួកគេចូលចិត្ត ។ តើយ៉ាកុបបានឈរការពារអ្វីដែលលោកបានដឹងថាត្រឹមត្រូវដោយរបៀបណា ? សូមអញ្ជើញកុមារឲ្យចែកចាយបទពិសោធន៍ នៅពេលពួកគេឈរការពារអ្វីដែលត្រឹមត្រូវ ឬចែកចាយបទពិសោធន៍របស់អ្នក ។
-
សូមឲ្យកុមារច្រៀងចម្រៀងមួយបទអំពីការជ្រើសរើសផ្លូវត្រូវដូចជាបទ « ហ៊ាននឹងធ្វើត្រូវ » ឬ « ឈរដោយសុចរិត » ( សៀវភៅចម្រៀងកុមារ ទំព័រ ៨០, ៨១ ) ។ សូមចែកពួកគេជាក្រុម ហើយអញ្ជើញពួកគេឲ្យធ្វើបដា ឬប័ណ្ណប្រកាសដ៏បំផុសគំនិតមួយ ដែលតំណាងឲ្យអ្វីមួយដែលពួកគេឈរការពារអ្វីដែលពួកគេជឿ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យគិតអំពីរបៀបមួយ ដែលពួកគេអាចជួយគ្រួសារពួកគេឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះ—ឧទាហរណ៍ តាមរយៈការពន្យល់នូវអ្វីដែលពួកគេបានរៀនអំពី របៀបដែលម្ចាស់ចម្ការបានមើលថែដើមអូលីវរបស់គាត់ ។
ការកែលម្អការបង្រៀនរបស់យើង
កុមារចូលចិត្តចែកចាយអ្វីដែលពួកគេកំពុងរៀន ។ ទោះបីជាពួកគេនៅក្មេងក្ដី ក៏កុមារអាចពង្រឹងដល់សមាជិកគ្រួសាររបស់ពួកគេបានដែរ ។ សូមលើកទឹកចិត្តពួកគេឲ្យចែកចាយអ្វីដែលពួកគេបានរៀននៅក្នុងថ្នាក់កុមារដល់គ្រួសាររបស់ពួកគេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣០ ) ។